Kajuʔulo tɛ́ngɛfɔlilɔ gboli ni siɛnliɛlɛ mɛ́ bèle
5
1 Mi nɛ nyu siɛnliɛlɛ mɛ́ bèle tɛ́ngɛfɔlilɔ gboli nī lè,
mi ŋáà wī liɛwɛ pe tíɛlɛ wè nɛ́ ní Kirisi wuʔɔyɔ yi nyaafɔli wè.
Mi míɛni m'bága liɛlɛ taa kpuɔmɔ nī bè bàa Kulocɛliɛ bága ba tìɛ bè.
Píra ŋáà nī wè,
mi nɛ liɛlɛ náari bèle bàli bīɛlɛ yeli sunʔɔmɔ nī bè:
2 Tɛ́ngɛfɔlilɔ tògo gáà Kulocɛliɛ 'kɛn yeli mɛ́ gè,
yeli de ki nári gè.
Yeri ki wéli,
kiì nyaa majo fànʔa baara dīʔ;
funjɛ̀ngɛ wori dī,
kɛnmɛ bíì nɛ̄ ki 'Kulocɛliɛ dɛ́ni wè.
Yeri ki kpínʔini ki fǎga buu majo wali caagoligo gīʔ,
nɛ̀ ki yaʔa ki 'yɛli ki- puu majo ki láa yē yeli nɛ̄ wī.
3 Bàli Kulocɛliɛ 'kɛn yeli mɛ́ yeli de pe nári bèle,
ye fǎri ki kpínʔini kàfɔlilɔ pálì tíɛlɛ bàli pe 'gbɛ̀n bèleʔ.
Yeli tánʔagɛnmɛ pi 'yɛli bè puu fìɛ cɛ̀nwɛ,
ŋàa tɛ́ngɛfɔlilɔ pe béri tɛnmɛ wè.
4 A nàʔavɔlilɔ Kàfɔli wi kɛ́nì wìi tìɛ wè,
yeli bága kpuɔmɔ ndɔ̀ngɔa taa gè,
gàa cɛ̀nmɛ piǐ gbɛ̀ kúɔ bèʔ.
5 Bɛ̀ míɛni ki yē,
yeli nàgapunminɔ bèle,
ye- yìye cɛ́rigɛ liɛlɛ mɛ́ bèle.
Ye mìɛni bèle,
yeri yìye cɛ́rigi yìye mɛ́,
nɛ́ ki cɛ́n Kulocɛliɛ siɛnsɛbɛrɛ ti 'ki juu nɛ́ jo:
Bìli pe pìye nyíɛnɛ bèle,
Kulocɛliɛ wiī nɛ túngu nɛ́ pe ní.
Bìli sí pe pìye cɛ́rigi bèle,
Kulocɛliɛ wi nɛ̂ wi kpuʔɔrɔ kɛn dè pe mɛ́b.
6 Bɛ̀ sí ki yē gè,
yeri yìye cɛ́rigi Kulocɛliɛ fànʔa kɔli láara gè,
kire ga buu wi- yeli yɛ̀gɛ wi nyɛ́ni lɛ̀lɛ nī lè.
7 Ye- yeli kasɔngigɔlɔ ke mìɛni taʔa wi nɛ̄c,
nɛ́ ki cɛ́n yeli woli ni 'kpúʔɔ wi mɛ́.
8 Ki 'yɛli ye- yìye cògɛnmɛ cɛ́n,
ye- puu nyɛminɛ.
Nɛ́ ki cɛ́n yeli leguu wè gbòdolilo kàfɔli wè,
wiī nɛ cuulo nɛ mári yeli táanni bɛ̀ jàri tíɛlɛ ŋàa fungo cî taa wè;
wi nìɛ wàa caa bè wi káa.
9 Yeri cáanri nɛ́ wi ní,
ye- nìre wáa tɛ́ngɛlɛ nī lè,
nɛ́ ki cɛ́n yeli siinyɛninɛ tɛ́ngɛfɔlilɔ bèle duniya nī wè,
piyē nɛ wuʔɔ bɛ̀ yeli tíɛlɛ.
10 Bà yeli 'wuʔɔ lɛ̀lɛ láà cɛ̀ri nī wè,
Kulocɛliɛ ŋáà wī kacɛ̀ngɛ ki mìɛni fɔ́li wè,
wire ŋáà wi 'yeli yeri wi kúɔmɔfun kpuɔmɔ nī bè,
bɛ̀ yeli yē pínɛnɛ nɛ́ Zezi Kirisi ní wè,
wire tíimɛ wi bé yeli yɛ̀gɛ bè yérige,
bè yeli cò,
bè yeli kpíʔile ŋɔrifɔlilɔ,
yeli sǐ gbɛ̀ tuuʔ.
11 Wire mɛ́ fànʔa ki yē lɛ̀lɛ ó lɛ̀lɛ nī.
Ki- taa ki puu bɛ̀ !
Siɛnsɛnrɛ dè
12 Silivɛnd wi 'mi sáʔa,
a mi 'nyasiɛnkɛniyɛ nyáà sɛbɛ yè bè tórigo yeli mɛ́,
wire ŋáà wī mi siinyɛni wè,
tɛ́ngɛmɛ siɛn wè.
Mi 'sɛbɛ ŋáà sɛbɛ wè bè lèbaanna nyɔ́gɔ yeli nī,
bè ki fílige yeli mɛ́ dí kpuʔɔrɔ dáà Kulocɛliɛ 'kɛn yeli mɛ́ dè,
kányiʔɛ wori dī.
13 Tɛ́ngɛfɔlilɔ gboli náà nī náʔa Babilɔni kàʔae nī gè,
nàa Kulocɛliɛ 'nyíɛnɛ nɛ̀ kɔ̀n lè majo bɛ̀ wi 'yeli nyíɛnɛ nɛ̀ kɔ̀n wè,
piyē nɛ yeli síɛri.
Marikif míɛni nɛ yeli síɛri,
wire ŋáà wī mi jaa wè tɛ́ngɛlɛ nī lè.
14 Ye- yìye síɛri ye yìye gàangbuʔulo suɔn suɔn gèle yìye nɛ̄ nɛ́ dɛ́nigɛ funyɔ ní.
Yanyige ki- puu yeli ye mìɛni nɛ̄,
yeli bálì bīɛlɛ pínɛnɛ nɛ́ Kirisi ní wè !