Tɛ́ngɛfɔlilɔ pe woli ni 'kpúʔɔ Pɔli mɛ́ wè
2
1 Mi nɛ ki caa ye- ki cɛ́n cáanra dáà mi nɛ cáanri yeli kɛnmɛ nɛ̄ bè,
nɛ́ Lawodise kàʔa wuulo kɛnmɛ nɛ̄ bè,
nɛ́ bìli bīɛlɛ piyè fìɛ mi nyaa nɛ̀ nyaa yiʔɛ nī gèʔ,
ki cáanra tiī kpuɔrɔ.
2 Mi nɛ kire gáà ki mìɛni kpínʔini gè gìi ki bé tí pe- pe nàzɔnnɔ lìri bèle,
pe- pe funyɔ pínɛ yè,
dɛ́nigɛ- puu pe sunʔɔmɔ nī,
pe sìnjilige ki- kpúʔɔ,
kaaliyɛ fǎga puu baaʔ.
A kire kpíʔile gè,
pe bé Kulocɛliɛ kalarilɛ cɛ́n lè;
lire nī Kirisi wè.
3 Kirisi wire nī sícilimɛ nɛ́ kacɛ́nnɛ tɔ̀ni yɛrɛ ti mìɛni ti yē làridɛ.
4 Mi nɛ tire nyu gìi ki bé tí siɛn fǎga yeli fáanni bè yeli pùunni nɛ́ nyatanʔa siɛnrɛ níʔ.
5 A ki cɛ́nì nyaa mi wè baa yeli táanni wèʔ,
mi sɔ̀ngirɔ tiī baa nɛ́ yeli ní.
Kiī mi mɛ́ fundaanra bà mi 'yeli tánʔagɛnjɛ̀nmɛ nyaa bè,
nɛ́ yeli lèbaanna ní lè tɛ́ngɛlɛ nī lè Kirisi nī wè.
Sìi wiī nɛ taʔa Kirisi nī
6 Bɛ̀ sí yeli 'fɔ̀li Zezi Kirisi nɛ̄ wè,
we Kàfɔli wè,
ye- puu yeri tári nɛ́ wire ní,
7 ye- nìre wáa ye- puu yérile wire nī,
yé sí yeli tɛ́ngɛlɛ yaʔa lè ni- puu nɛ́ ŋɔri ní bè yɛli nɛ́ tɛnmɛnɛ náà yeli 'taa lè.
Ye- puu kacɛ̀ngɛcɛnfɔlilɔ lɛ̀gɛlɛ ke mìɛni nī.
8 Ye- yìye cò,
yeli wáà fáala fǎga tí bé wìi yaʔa pe- wi kɔ́ri bè le kobuunnigo nīʔ nɛ́ kacɛ́nminɛ siɛnjuuro ní dèʔ;
tiī nɛ siɛn fáanni,
ti wè kaala nyuʔɔʔ.
Kire tɛnmɛgɛlɛ gálì gèle,
kiyē nɛ kɔ́ngi siɛnnɛ pe kaliʔɛlɛ nī wī,
nɛ́ duniya yasunro ti fànʔa ní gè,
Kirisi mɛ́ bɛ̀ʔ tire nɛ kɔ́ngiʔ.
9 Ki sí nyaa,
Kulocɛliɛ kɛnmɛ bè bɛ̀ piī kɛnmɛ bíì nɛ̄ wè,
kire ki mìɛni ki 'kpíʔile nɛ̀ fori nɛ̀ pɛ́nì jíin nɛ̀ tɛ́ni Kirisi nī wè nɛ ní siɛnnɛ céri ní.
10 Wire fànʔa nɛ̄ gè,
yeli 'yɛrɛ ti mìɛni taa nɛ̀ tín,
nɛ̀ taʔa gíi nɛ̄,
wire wī kàfɔlilɔ pe mìɛni Kàfɔli wè,
nɛ́ Setɛni fànʔa ki mìɛni Kàfɔli wè nɛ̀ pínɛ.
11 Kirisi wire nī yeli 'kɛnɛkɛnɛ kpíʔile wè,
ki kɛnɛkɛnɛ ŋáà wè,
siɛn kɔli kaala bɛ̀ʔ,
Kirisi wī.
Kire kɛnɛkɛnɛ wire wi 'yeli píle nɛ̀ suɔ céri kanɛdanʔana mɛ́ gèle.
12 Bà yeli 'batɛmi kpíʔile wè,
ki 'kpíʔile majo pe 'yeli pínɛ nɛ̀ tɔ́n nyɛgɛ nī gè nɛ́ wi ní wī.
Nɛ̀ pínɛ yeli 'koli nɛ̀ nyɛ́ nɛ̀ yiri nɛ́ wi ní,
bɛ̀ ki 'nyaa yeli 'tɛ́ngɛ ki nɛ̄ fànʔa yē Kulocɛliɛ mɛ́ wè a wi 'wi nyɛ́ nɛ̀ yige kúbilo sunʔɔmɔ nī bè wè.
13 Ki 'nyaa yeli 'puu kùulo yeli kakolido ti kɛnmɛ nɛ̄ bè,
nɛ́ bɛ̀ yeli céri tiì cé kɛnɛkɛnɛ dèʔ.
Wi sí koli nɛ̀ yeli kpíʔile sìi nɛ̄ nɛ́ Kirisi ní wè,
nɛ̀ weli kakolido ti mìɛni yaʔa weli nɛ̄a waʔanɛ.
14 Kajuudiʔɛlɛ gílì ke 'puu nɛ weli cɔ̀rí gèle,
níɛ weli túngu wè,
wi 'ti kurugo nɛ̀ láʔa,
nɛ̀ ti kóri nɛ̀ tárigɛ tiiparigɛ nɛ̄ gè nɛ̀ yige baa.
15 Wi 'fànʔafɔlilɔ pe fànʔa suɔ gè pe mɛ́,
nɛ́ Setɛni fànʔa ní gè nɛ̀ pínɛ,
nɛ̀ pe yige kpànʔanɛ wálilɛ nɛ̀ fìɛrɛ tɔ́n pe nɛ̄,
nɛ̀ pe jáa Kirisi wire kùu wi fànʔa nɛ̄ gè tiiparigɛ nɛ̄ gè.
16 Kire kɛnmɛ nɛ̄,
ye fǎga tí bé siɛn yaʔa wi- yeli cɔ̀ri yakaʔa kɛnmɛ nɛ̄ʔ,
á kire 'laa yagbuʔɔ kɛnmɛ nɛ̄ʔ,
kàajaa pùrɔrɔ táà kɛnmɛ nɛ̄ʔ,
á kire 'laa yevɔnyɔ cɛnyɛ kɛnmɛ nɛ̄ʔ,
bé nɛ́ ga jo cɛndɛniyɛ kɛnmɛ nɛ̄ʔ.
17 Tire dáà ti mìɛni dè,
kele kálì kɛnmɛ tiī nɛ tìí,
kele gílì ke báan nɛ tíin gèle.
Kirisi wire sí wī ti kányiʔɛ gè.
18 Ye fǎga tí bé siɛn wáà fáala yaʔa wi- kàyuʔu cáan yeli nɛ̄ʔ,
bé ki kpíʔile wire nɛ wìi cɛ́rigi wīʔ,
bé sí de nyìʔɛnɛ tundunminɔ gbùʔɔrɔ́,
bèri tɔ́ri kpuʔɔ nɛ́ wi ŋɔ́nidɔ ní dè.
Ki siɛnnɛ pe felile bèle,
nàgbuʔɔrɔ ti 'tóri pe nī,
ki 'nyaa siɛnnɛ sɔ̀ngirɔ dī pe nī.
19 Kire siɛn wè,
wiì wìi puɔ Kirisi nɛ̄ wèʔ,
wire ŋáà wī nyùgo gèʔ.
Wire fànʔa nɛ̄ cetinnɛ ni mìɛni lè,
nɛ́ ni suʔulodiɛyɛ ní yè,
nɛ́ ni kapɛnyɛ ní yè,
niī nɛ ni màakuu nyuʔɔ wè,
nɛ̀ nìi cò nɛ̀ yérige nɛ́ sí nɛ liʔi mɛni Kulocɛliɛ wiī nɛ ki caa wè.
Weli 'kùu nɛ́ koli nɛ̀ nyɛ́ nɛ̀ yiri nɛ́ Kirisi ní wè
20 Bɛ̀ yeli 'kùu nɛ́ Kirisi ní wè duniya kaliʔɛlɛ kɔli mɛ́ gè,
gáa nɛ̄ ye bé ní de yeli sìi tári wè bè puu cɔ̀rilɔ duniya wi kiyɛ nī yè ?
21 Bɛ̀ dàa tíɛlɛ dè bà pe sî jo:
«Fǎga ki líɛʔ !
Fǎga ki le nyuɔ nīʔ !
Fǎga cò ki nɛ̄ʔ !»
22 Tire dáà ti mìɛni dè,
bɛ̀ pe ti tíʔi nɛ baara dè,
bɛ̀ ti córi nɛ waa.
Ki 'nyaa siɛnnɛ katɛngɛlɛ nɛ́ siɛnnɛ kajuʔulo gīɛlɛ.
23 Piyē nɛ tire dáà ti mìɛni kpínʔini dè nɛ ki tìí peli yē sícilile wī bɛ̀.
Pe nɛ̂ pe nyɛ́ni sérikoligo káà líɛ ki nɛ̂ puu muɔ bé jo siɛn wiī nɛ wìi cɛ́rigi wī.
Pe nìɛ pe céri wuʔɔ dè,
nɛ̀ sí ki taa tire dáà ti mìɛni tiǐ gbɛ̀ jáa bè siɛn láʔa wi céri kanɛdanʔana nɛ̄ gèleʔ.