Tɛ́ngɛfɔlilɔ sìi fɔnwɔ wori dè
3
1 Bɛ̀ sí yeli 'pínɛ nɛ̀ nyɛ́ nɛ̀ yiri nɛ́ Kirisi ní wè,
yeri naamɛ yɛrɛ tire caa;
baa Kirisi wi yē kire tiʔɛ nī tɛ́niwɛ Kulocɛliɛ kàliige mɛ́ gè.
2 Yɛrɛ dáà dī naamɛ gè ye yeli sɔ̀ngirɔ yaʔa dè ti- puu tire nɛ̄,
ye fǎga yeli sɔ̀ngirɔ yaʔa dè ti- puu dàala wori tire nɛ̄ʔ.
3 Ki 'nyaa yeli yē kùulo wī,
á yeli sìi ní wè làriwɛ nɛ́ Kirisi ní wè Kulocɛliɛ tiʔɛ nī.
4 A Kirisi wi kɛ́nì wìi tìɛ wè,
wire ŋáà wī yeli sìi wè,
kire lɛ̀lɛ nī lè,
yeli míɛni bèle,
yeli bé yiri nɛ́ wi ní bè puu kpuɔmɔ nī.
Tánʔagɛnliɛmɛ bè nɛ́ tánʔagɛnvɔnmɔ ní bè
5 Kire nɛ̄,
ladaanma kele gílì gīɛlɛ yeli nī náʔa dàala nɛ̄ lè,
kire 'jo kanuʔɔrɔ dè,
nɛ́ karimɛ kakpiʔiligele ní gèle,
nɛ́ céri kanɛdanʔana,
nɛ́ nìge kele ní gèle,
nɛ́ fungbuʔɔ ní gè,
yasunzungo cɛ gī kire gè;
ye- ti kpúu ye yige yeli céri nī dè.
6 Tire dáà tire ti nyɛ́ni báan nɛ́ Kulocɛliɛ funyɛrigɛ ní gè bìli kúrugu pe wè nɛ lúru wi nɛ̄ bèleʔ.
7 Kire kɛnmɛ báà pire nɛ̄ yeli 'puu nɛ yeli sìi tári wè bɛ̀ yeli 'puu nɛ ki kele gálì kúu gèle.
8 Kire nɛ̄ píra ŋáà nī wè,
ye- láʔa tire dáà ti mìɛni nɛ̄ dè:
funyɛrigɛ gè,
fundanʔanigɛ gè,
funbinʔɛ gè,
siɛnjuucuʔɔrɔ dè,
nɛ́ fìɛrɛfun siɛnjuuro dè;
ti sî nɛ yigi yeli nyuɔyɔ nī yè.
9 Ye fǎga de káfinɛrɛ nyu yìye mɛ́ʔ,
nɛ̀ taʔa gíi nɛ̄,
yeli nyɛ́nì tánʔagɛnliɛmɛ yige bè yìye nī nɛ́ pi kakpiʔiligele ní gèle,
10 nɛ́ sí tánʔagɛnvɔnmɔ le bè yìye nɛ̄;
Kulocɛliɛ wire wi 'ki kanvɔnmɔ le bè yeli nɛ̄.
Kàa sí nɛ fàrí nɛ waa pi nɛ̄ nɛ̀ yɛli nɛ́ Kulocɛliɛ wire kɛnmɛ ní bè,
gìi ki bé tí ye- wi cɛ́n yé sí puu bɛ̀ wi tíɛlɛ.
11 Kire kɛnmɛ nɛ̄,
yeli nī bèle wàa wè baa nɛ ní kpuɔwɔʔ:
miɛ̄ Girɛkiwɛ yo,
miɛ̄ Zuufuwo yo,
ma 'kɛnɛkɛnɛ kpíʔile yo,
miɛ̀ nɛ́ kɛnɛkɛnɛ kpíʔile yoʔ,
miɛ̄ nabɔnwɔ yo,
miɛ̄ sìnbirige wuu yo,
miɛ̄ sùkulowo yo,
miɛ̄ mìɛmɛ yo,
kire káà wè baaʔ.
Gìi ki 'cɛ́n gè,
Kirisi wire wī ki mìɛni nyùgo gè,
nɛ́ ní pe mìɛni nī.
12 Bɛ̀ sí yeli yē bàli Kulocɛliɛ wi 'nyíɛnɛ nɛ̀ kɔ̀n bèle,
nɛ́ ní wi wuulo bèle,
nɛ̀ wi dɛ́ni wè,
ye- puu yeri nyinimɛ tari kpuʔɔ,
yeri kacɛ̀ngɛ kpínʔini yìye nɛ̄,
yeri yìye cɛ́rigi,
ye- puu funnyigefɔlilɔ,
ye- puu kpàricogofɔlilɔ.
13 Ye- funyɔ nyígi yè yìye kúrugu,
yeri ki yɛri yìye nɛ̄.
A ki nɛ́ cɛ́nì nyaa kaala yē wàa fungo nī wi siinyɛni kúrugu wè,
siɛn wi- ki yaʔa.
Bɛ̀ Kàfɔli wi 'ki yaʔa yeli nɛ̄ bèle,
yeli míɛni bèle yeri ki yɛri yìye nɛ̄.
14 Kire gáà ki mìɛni nī gè,
ye- dɛ́nigɛ yaʔa ki- puu kele ke mìɛni nī,
kire gī bìɛni wi mìɛni tiibe bè.
15 Kirisi yanyige ki- puu yeli funyɔ nī yè,
nɛ́ ki cɛ́n kire nī Kulocɛliɛ wi 'yeli yeri ye- puu cetinnɛ nigbe,
nɛ̀ pínɛ ye- puu kicɛ́nfɔlilɔ.
16 Kirisi siɛnrɛ ti- kòridiʔɛ taa yeli funyɔ nī yè majo lɔri dī.
Yeri tɛnmɛnɛ kanʔa yìye mɛ́,
yéri nyu yeri yìye yɛrigi ye mìɛni bèle,
yeri ki kpínʔini nɛ́ sìnjilige ní.
Yeri Kulocɛliɛ síɛri wè nɛ́ yeli fungo ki mìɛni ní,
nɛ́ ŋúnudaanya ní,
nɛ́ Kulocɛliɛ gbùʔɔrigɔ ŋúnuyɔ ní,
nɛ́ ŋúnudo dáà Kulocɛliɛ Pìle ni sî sɔ̀ngi nɛ̀ tìrige siɛn fungo nī gè.
17 A yeli nɛ kaala ó kaala kúu,
nyasiɛnrɛ dī yo,
kakpiʔilile nī yo,
yeri ni kpínʔini Kàfɔli Zezi wire kɛnmɛ nɛ̄,
ye kpuʔɔrɔ taʔa weli Tuu Kulocɛliɛ nɛ̄ wè nɛ́ Zezi wire míʔɛ ní gè.
Tɛ́ngɛfɔlilɔ pe sìi tánʔagɛnmɛ nɛ́ pìye ní bèle
18 Yeli bèle cɛlilɛ bèle,
yeri yìye cɛ́rigi yeli pɔlilɔ mɛ́ bèle,
majo mɛni ki 'yɛli bèri kpínʔini Kàfɔli pínɛnyɛnigɛ nī gè.
19 Yeli bèle nàguɔlɔ bèle,
ye tí yeli cɛlilɛ pe- yeli dɛ́ni,
yé fǎga puu tanʔaninɛ nɛ́ pe níʔ.
20 Pìile,
yeri lúru yeli siivɔlilɔ nɛ̄ bèle kele ke mìɛni nī gèle,
nɛ́ ki cɛ́n kire ki 'Kàfɔli dɛ́ni wè.
21 Yeli bèle tuufɔlilɔ bèle,
ye fǎri yeli pìile pe funyɔ córi yè pe nīʔ,
bè pe funyɔ kpúu yèʔ.
22 Yeli bèle sùkulolo bèle,
yeri lúru yeli kàfɔlilɔ nɛ̄ bèle náʔa duniya nī wè.
Ye fǎri ki kpínʔini nyapigele nyaamɛ nɛ̄ʔ,
majo dùʔɔ yeli nɛ ki kpínʔini ki- siɛnnɛ dɛ́ni wīʔ.
Gìi ki 'pɔ́ri gè,
yeri ki kpínʔini nɛ́ funviige ní,
yeri Kàfɔli fìʔɛ́ wè.
23 Kaala ó kaala yeli nɛ kúu,
yeri ni kúu nɛ́ yeli fungo ki mìɛni ní majo Kàfɔli wire mɛ́ yeli nɛ ki kpínʔini,
siɛnnɛ mɛ́ bɛ̀ʔ.
24 Ye- ki cɛ́n Kàfɔli wire mɛ́ yeli bága yeli kɔrigɔ taa gè ki- puu yeli kpuʔɔrɔ dè.
Yeri baara Kirisi mɛ́ wè;
wire wī Kàfɔli wè.
25 Nɛ̀ taʔa gíi nɛ̄,
a siɛn nɛ sìpiʔi kpínʔini,
sìpiʔi kire siɛn wi bága taa;
ʔaan,
Kulocɛliɛ wi wè ki cuɔnriʔ.