4
1 Yeli bèle kàfɔlilɔ bèle,
yeri ki kpínʔini ki- puu sìnʔɛ nɛ́ yeli sùkulolo ní bèle,
ye ki cɛ́n yeli míɛni bèle,
Kàfɔli wáà yē yeli nɛ̄ baa nyìʔɛnɛkaʔa nī gè.
Pɔli wi 'juu nɛ̀ le tɛ́ngɛfɔlilɔ nī bèle
2 Ye- puu yeri waa náarigɛ nɛ̄ gè,
bɛ̀ yeli bé puu gbòboriyaʔala súuri bèri Kulocɛliɛ síɛri wè.
3 Yeri náari yeri pínɛ weli kɛnmɛ nɛ̄ bè,
gìi ki bé tí Kulocɛliɛ wi- koligo múgu gè weli mɛ́ Kataanna Siɛnrɛ ti juʔu nɛ̄ gè,
weli de Kirisi wi kalarigɛlɛ nyu gèle.
Tire kɛnmɛ nɛ̄ mi yē náʔa còdɔnwɔ kasuu nī wè.
4 Yeri náaria gìi ki bé tí mi gbɛ̀ jáa de ki nyu de yigi wálilɛ mɛni mi 'yɛli bèri ki kpínʔini gè.
5 Ye- puu sícilile yeli tánʔagɛnmɛ nī bè nɛ́ kpànʔa wuulo ní bèle,
ye lɛ̀lɛ cò lè macɛ́n.
6 Ye- tí yeli siɛnjuuro ti- puu tàanra nɛ́ yasuʔɔgɔ ní lɛ̀gɛlɛ ke mìɛni nī,
ye ki cɛ́n mɛni yeli 'yɛli bèri siɛnnugoro kanʔa dè yìye mɛ́ bèle.
Pɔli wi 'tɛ́ngɛfɔlilɔ síɛri bèle nɛ́ wi siɛnrɛ kúɔ dè
7 Gìi gī náʔa mi nɛ̄ gè,
we siinyɛni Tisiiki wè,
wire ŋáà wi 'mi dɛ́ni wè,
wi bága sa ti mìɛni yiʔɛ juu bè tìɛ yeli nɛ̄;
mi baakuɔnyɛni wī Kàfɔli pínɛnyɛnigɛ nī gè,
wiī tɛ́ngɛmɛ siɛn nɛ̀ pínɛ.
8 Mi 'kɔ̀rirɔ nɛ̀ wi tun baa yeli mɛ́ wī,
ye- ki cɛ́n gìi gī náʔa weli nɛ̄ gè,
wí sí nàzɔnnɔ nyígi bèle yeli nī.
9 We siinyɛni Wonɛzimu wè wire ŋáà wī yeli wuu wáà wè,
wi woli ni 'weli dɛ́ni,
wiī tɛ́ngɛmɛ siɛn nɛ̀ pínɛ,
wi 'pínɛ nɛ́ Tisiiki ní wè.
Pe bé sa ti mìɛni yiʔɛ juu gè yeli mɛ́ gìi gī náʔa wè.
10 Arisitariki wiī nɛ yeli síɛri;
wiī náʔa nɛ́ mi ní kasuu nī wè,
wire nɛ́ Mariki ní wèb,
Barinabasi siinyɛni wèc.
Yeli nyɛ́nì nyasiɛnrɛ taa wi wori nɛ̄ dè,
a wi kɛ́nì kɛ́ baa yeli mɛ́ wè ye- wi kpàli.
11 Nɛ̀ pínɛ Zezi ŋáà pe yeri nɛ pínɛ Zusutusi wè,
wiī nɛ yeli síɛri.
Peli bálì peli yákuɔlɔ bīɛlɛ Zuufulo sunʔɔmɔ nī bè,
pe 'fàri mi nɛ̄ a we 'pínɛ nɛ̀ Kulocɛliɛ Kùlofɔligɔ ki baara kúɔ dè;
peli pe 'nàzɔn lìri wè mi nɛ̄.
12 Epafirasid wè yeli wuu wè,
wiī nɛ yeli síɛri,
Zezi Kirisi wi baakuɔwɔ wáà wī.
Wi 'lèbaanna le nɛ náari súuri yeli mɛ́,
gìi ki bé tí ye- liɛ ye láʔa,
yé sí nyuɔ ye láʔa Kulocɛliɛ nyɛ́ni kele ke mìɛni nī gèle.
13 M'bé tɔ̀ni bè gbɛ̀ wi wori juu dè káaliyɛ fùn,
wiī nɛ fùrɔgɔ suu kátii yeli kɛnmɛ nɛ̄ bè,
yeli nɛ́ Lawodise wuulo ní bèle,
nɛ́ Irapolisi wuulo ní bèle.
14 We nàgori Luku wè,
yaagbariwɛ wè,
wiī nɛ yeli síɛri,
wire nɛ́ Demasi ní wè.
15 We siinyɛninɛ bálì bīɛlɛ baa Lawodise kàʔa mɛ́ gè,
ye- pe síɛri.
Ye- Numufa síɛri ye pínɛ,
wire nɛ́ tɛ́ngɛfɔlilɔ gboli náà ni waa nɛ gbúʔuro baa wi saʔa nī gè.
16 A ye kɛ́nì siɛnrɛ dáà wéli dè nɛ̀ kúɔ wè,
ye tí ti- nɔ̀ Lawodise tɛ́ngɛfɔlilɔ nɛ̄ bèle,
pe- ti wéli pe pínɛ.
Sɛbɛ ŋíì wi bága kɔ́n baa Lawodise kàʔa mɛ́ gè,
ye- wi siɛnrɛ wéli dè yeli tíimɛ bèle.
17 Yé sí ti juu Arisipi mɛ́ wè,
ye wi yɛ:
«-Yiʔɛ le muɔ baara nī dè,
dàa Kàfɔli wi 'kɛn muɔ mɛ́ dè,
ma ti kúɔ ma láʔa.»
18 Mi Pɔli wè,
mi nɛ yeli síɛri nɛ́ mi tíimɛ kɔli yasɛbɛrɛ ní dè.
Yeri sɔ̀ngí yeri tari mi yē náʔa kasuu nī.
Kulocɛliɛ kpuʔɔrɔ ti- puu ye nɛ̄.