Shiyanso
Imola yina yilongola
Ilitaafili ili ilya Shiyanso lyapelwagwa ilitaawa ili kwa kiiva litaviilila uNguluvi shina wáwumbaga inyi ni fiinu fyona, mandu umuunu, yuna wámuviikhaga kifiyangalila ifiinu fyona. Ilitaafili ili litaviilila uwunansi, amalava ni mfwa shina fyayansaaga. Khanji ilitaafili ili liwonensa uwupaayo wa filogolo ni fimyanja shina fyayansaaga na shina uNguluvi wámubagulaga uAbulahamu ni shisafi shaakwe isha Vayahuudi, vave vaanu vaakwe na kishilila aveene, awonense ishiyooli ni ngufu saakwe ku vaanu avanji.
Umulyango gwa 12-50 litaviilila ulwa Abulahamu nu muswamu waakwe uIsaaka na vanaakwe, mandu uYaakobo, na vaswamuve va Yaakobo ishumi na vavili, mandu uYusufu. Yiwonensa uNguluvi shina akhandi ikivayangalila avabaagule vaakwe, hata vave vakhandi vasheefu vapiliimwe na vaanu vina vakhandi vikigafuunya amanguluvi. Khanji yiwonensa uNguluvi shina akhandi agulumiile avaanu vaakwe, vamugotaje na kimutupikha.
Ilitaafili ili, lili lumo na mataafili aganji gina gitambulwa Kihuma, Njowo sa Valaawi, Luvaso nu Luuju lwa Ndaji. Amataafili aga, aVayahuudi vikigatambula ‘Ndaji sa Musa.’ Ilitaafili lya mukuwamalago uMusa yikwiliile kiija lyayandikhwagwa mu maakha ga magana ishumi na magana gasaanu (1500) ndeeni, pina asinaasawe uYeesu Kilisito.
| Umulyango | Gina gakwali mu litaafili ili |
| 1:1–2:3 | Kiwumbwa kwa nyi nu wulanga |
| 2:4–4:26 | Ishiyanso sha wunansi |
| 5:1-32 | Ishisafi sha Adamu |
| 6:1–9:29 | Imola ya Nuhu |
| 10:1-32 | Ishisafi sha vaana va Nuhu |
| 11:1-9 | Umunaala umutali ugwa ku Babeeli |
| 11:10-26 | Ishisafi sha Sheemu |
| 11:27–25:11 | Imola ya Abulahamu |
| 25:12-18 | Ishisafi sha Ishimayeli |
| 25:19–26:35 | Imola ya Isaaka |
| 27:1–35:29 | Imola ya Yaakobo |
| 36:1-43 | Ishisafi sha Esawu |
| 37:1–50:26 | Imola ya Yusufu |