Luutu
Imola yina yilongola
Ilitaafili ili lipeliilwe ilitaawa lya mudala yuna itambulwa Luutu, kihuma ku shimyanja sha Vamowabu. AVamowabu vaali shegamane ni nyi iya ku Isilaheli, uluhaavi ulo luwonekhaga kwali kuna shimanyi shinofu, ku nyi isi sivili. Imola sina tiyimba mu litaafili ili, uluhaavi ulo avahigaaji vakhandi vatemile mu nyi ya Isilaheli. Mu maakha ga 1375-1050 pina ashaanali uKilisito. Uluhaavi ulo lukhandi lushaanali ku nyi iya ku Isilaheli, vasinayanse kitemwa na vatwa. Avahigaaji vaanu vina vashemeliilwe nu Nguluvi kivalongosa aVaisilaheli kwa kitovana na valugu vaanave. Khanji avahigaaji vakhandi vilamula injowo mu nyi ya ku Vaisilaheli. Yimba mu litaafili lya Vahigaaji 2:10-19.
Ilimanyiso ilikhome lina tiipata mu litaafili ili liija, imota sa Nguluvi kwa vaanu va nyi soona. UNguluvi wáwesaaga kimumotesa uLuutu, hata wámuviikhaga ave yuyuumo na vina valongwele mu shikholo sha mutwa uDawudi. Gaganile kishila maakha minshi, uYeesu Kilisito wásaviilwe mu shikholo shiisho. Mu litaafili ili uLuutu wáwonensaaga ulusungu nu wunofu ku shikholo sha mugoosi waakwe. Khanji uNguluvi ikivadiima avaanu vaakwe pina vana malava, na kivatanga pina viilava.