Luutu 1

Luutu

UElimeleki nu mudala na vanaakwe vihaamila ku Mowabu

1-2 Pamwandi, uluhaavi lwa vahigaaji, vaali vikivalongosaaga avaanu ava ku nyi ya Isilaheli, wáali akwali umuunu itambulwaga Elimeleki. Ikhalaga ku lijumbi lya ku Betelehemu ku booma iya ku Yuuda, shaali shikholo sha Efulaata, wáali atoolile umudala itambulwaga Naomi. Vaali vasavile avaana vavili avadiimi. Yumonga itambulwaga yu Malooni, uyunji itambulwaga Kiliyoni. Inyi yila yagwile injala, baaho vawuushile viita ku nyi iya ku Mowabu. Vaganile kifikha kula vakheele. 3 Kuunyuma uElimeleki wáfwile, wásigeele uNaomi na vanaakwe vavili. 4 Avadiimi vala vatoolile avahinja aVamowabu, yumonga wámutoolile uLuutu, uyunji wámutoolile uOlipa. Ulusawo lwa Elimeleki lwakheele ku Mowabu maakha ishumi ndeeni. 5 Mu maakha ago ishumi, uMalooni nu Kiliyoni woope vafwile. Baheene uNaomi wásigeele agaya mugoosi wala sha vaana.

UNaomi nu Luutu viiwuya ku Betelehemu

6 Baheene uNaomi wápuliishe imola kihuma ku Yuuda kiija, uMUTWA avapeelile imota ya shakiilya. Baheene umwene wáyipinyanjile kiwuya kula, avakhamwana vangʼangʼaniile kiita lumo. 7 Vawuushile pa lujinji lula pina vikhalaga, shi vafwatile insila iya ku Yuuda. 8 UNaomi wávajovile, “Omwe muwuyaje ku vasafi veenyu. Nilomba uMUTWA avayimiilile ngaja shina mukhandi muniganile one na vanangu. 9 UMUTWA avatanje mupate avagoosi avanji ava kivatoola, mukhale wunofu.” UNaomi wávanoneele na kivahwesa, woope avakhamwana vakhoolile na kingʼangʼaanila. 10 Vamujovile, “Ndaali tiita lumo noowe ku vaanu vaakho.”

11 UNaomi wávalombile avakhamwana wáaja, “Muwuyaje! Kwashi mukinifwata? Mwihiiva omwe kiija ningapata avaana ava kivahaala? 12 Vanangu one nagoosipa, muwuyaje kunyeenyu. Hata nda nimupate umugoosi ishilo isha minsiyaano, hata one ndanje niipata ulwanda mbakha nisunje ulwanda nisave avaana, 13 wuli, musiweese kiheepa mbakha vakule? Wuli, musileshe kitoolwa ku vagoosi avanji? Ndaali vanangu. Uwiikhasi wangu wuvi kishila uwiikhasi weenyu. Kiiva uMUTWA wándafya wuvi mandu.”

14 Woope vakhosiise inkhoolo, vakhoolile mandu. Apo uOlipa wámunoneele umukhamwana, wáwuushile iiwuya kunyaanave, leelo uLuutu wámukumbatiile uNaomi. 15 UNaomi wámujovile, “Umaamo wáata ku vaanu vaakwe na ku manguluvi gaakwe. Na yuuwe uwuyaje umufwataje umaamo.”

16 Leelo uLuutu wájovile ndeeni,

“One khamwana nikikulomba usikhanisimilaga nikuleshe,

one khamwana tiita lumo.

Kuna wiita na yuune niita, avalukholo lwakho na yuune vakhava valukholo lwangu,

uNguluvi waakho na yuune akhava Nguluvi wangu.

17 Pina ukhafwila na kisiilwa,

na yuune inkhafwila baaho na kisiilwa baaho.

Nda ishiinu shikhatubagulania one noowe uMUTWA andafyaje,

ila kiifwa hela kukhatubagulania one noowe.”

18 Baheene uNaomi wáganile kimwaga, kiiva wáali atugeene ni lihiiva lyakwe ilya kilongosania nu mwene, wáleshile kimukhaana kiija asikhataga lumo.

19 Vakhandi vapiiluta lumo ku Betelehemu. Vaganile kifikha kula, avakhaaya va kula vayansiise kiswiga, avadala vaposeenie, “Wuli, uyu yu Naomi?” 20 UNaomi wájovile, “Musikhanishemeelaji Naomi!^a Munishemeelaje Mala,^b kiiva uNguluvi Munya Ngufu Soona wámeelaga amangʼuulo makhome mandu. 21 Pina nikhandi niwuukha apa, nikhandi na vaanu vinshi ni fiinu finshi, leelo isala isi uMUTWA angomwese mawokho shiishi. Kwashi mukinishemeela Naomi kuno uNguluvi Munya Ngufu Soona wámokha, khanji andafiise?”

22 Shiisho ndeeno, uNaomi nu mukhamwana uLuutu, uMumowabu, vafishile ku Betelehemu kihuma ku Mowabu, pina viyansaaga inkungulo iya shayili.^c