Luutu 2

ULuutu ihalaala mu magunda ga Bowasi

1 Pala pa Betelehemu uNaomi wáali nu lukholo lwa mugoosi waakwe uElimeleki, yuna wáali itambulwaga Bowasi. Wáali imanyikhaga khanji munya fiinu finshi. 2 Ilisiku limonga uLuutu wámulombile uNaomi, wámujovile, “Nitawula nilute ku magunda kihalaala ishayili, kwa muunu yuna hambi ikinjiitikha.” Umukhamwana wáyitiishe wájeele, “Haaya, lutaga.”^a

3 Baheene uLuutu wáwuushile iita kihalaala amahoojo mu mugunda gumonga. Humbe umugunda gula, gwali gwa yula uBowasi yuna akhandi lukholo lwakwe wa Elimeleki. 4 Luhaavi lufupi uBowasi wáfishile kihuma ku lijumbi lya ku Betelehemu, wáfishile wávahunjiile avakungulaaji, “UMUTWA aveesaje noomwe.” Woope vajeele, “UMUTWA akudiimaje.” 5 Baheene uBowasi wámuposiise umuyimililaaji wa vakungulaaji, “Wuli, umuhinja yula mwali wa naani?” 6 Yula umuyimililaaji wájeele, “Uyo yuyula uMumowabu, yuna wáyinsaga lumo nu Naomi kihuma ku Mowabu. 7 Wándomba ahalaalaje muunyuma mwa vakungulaaji. Lino shi wáava apihalaala kihuma ulwamilaawu, yisala siisi wáaluta mu ndindiga kituuya padoodo.”

8 Baheene uBowasi wámujovile uLuutu kiija, “Puliisa mwali wangu. Usikhaataga kihalaala ku magunda ga vaanu avanji, ukhalaje baaha na vasenga nsengo vangu avashidala ava. 9 Uloleelaje uluvala luna vikungula awo, luta uhalaalaje kukula. Navasimila avadiimi ava vasikhakulafyaga. Nda uwone wákhawukha ulutaje ungʼwelaje amalenga gina vaanega avadiimi awo.” 10 Apo uLuutu wámufugamiile na kimusungamila^b uBowasi mbakha pansi, wáajova, “Kwashi wanisungupila kuno one nili muhensa kihuma ku Mowabu?”

11 UBowasi wámujovile, “Napulikhaga shina wamugahilaga umukhamwana waakho wunofu, kihuma afwe umuunu waakho. Khanji kivalekha avasafi ni nyi yaakho, kiyinsa kikhala na vaanu vina usivameenye. 12 UMUTWA akupeele ulutono kwa goona gina wasengaga. Khanji uMUTWA uNguluvi uwa ku Isilaheli yuna uyihuviliile baheene akudiime, akupeele ulutono luna lukhamiliishe na gaganji goona.” 13 ULuutu wámugomoseese uBowasi kiija, “Mugosiivaha tihongije wanigahila lunofu mandu. Wambalasa inumbula yangu, na kilogola noone kwa lusungu, kuno one insili muvanda waakho.”

14 Uluhaavi ulwa shakiilya lwafishile, baheene uBowasi wámujovile uLuutu kiija, “Yinsa tilye, liisaga umukhaate na udabisaaje mu muhosi.” ULuutu wákheele na vakungulaaji, vamupeelile imbumbulu inkhalinje, wáliile wáyikuta na kisigasa.^c 15 ULuutu wáyiteneeshe kihalaala amahoojo, woope uBowasi wávajovile avadiimi avasenga nsengo, “Yula mumulekhaje ahalaalaje, hata ave ivejeela mu filundo, musikhamukhalipilaji. 16 Khanji mukwehelaji amahoojo agamonga, mulagasaaje. Baheene umwene ahalaalaje, khanji musikhamukhalipilaji!”

17 ULuutu wáyiteneeshe kihalaala mbakha shaamihe, wáatova ishayili wáapata lidebe limo na kishila. 18 Wátoola imbumbulu wáaluta ku booma wámusoonela umukhamwana waakwe. Khanji wámupeela ishakiilya shina wásigasa. 19 Baheene umukhamwana wámuposa, “Isi soona wahalaala kwi? Waava mu mugunda gwa naani? UNguluvi amuyimiilile uyu umuunu yuna wákuyiitikha!” ULuutu wáaja, “Naava mu mugunda gwa muunu yumonga yuna itambulwa Bowasi.” 20 Baheene uNaomi wámujovela kiija, “UMUTWA amudiimaje uBowasi! Humbe uNguluvi asituleshile ose na vina vafwile.” Khanji wámujovela, “UBowasi shikholo sha nkholeela yuna akwiliile kikuhaala owe na kitusunga.”^d

21 Khanji uLuutu wálogola kiija, “Wánijova nivafwataje vala avadala avasenga nsengo nihalaalaje mbakha pina vimaliisa inkungulo yoona.” 22 UNaomi wámujova uLuutu, “Lunofu kihalaala mu magunda ga Bowasi. Ndi walafisiwa nda utaje ku mugunda ugwa muunu uyunji shiishi.” 23 Baheene uLuutu wáfwateene na vaanu va Bowasi mbakha inkungulo ya shayili ni ngano pina yiisila. Wáali apikhalaga nu mukhamwana waakwe.