Luutu 3

UNaomi ikimusimila uLuutu shina hambi iipata ikhati

1 Ilisiku ilinji, uNaomi wámujovile uLuutu kiija, “One lunofu nikusakulile ikhati, upate ishikhasi ishinofu.2 Yula uBowasi lukholo lwesu, yuna mukhandi lumo na vadala avasenga nsengo vaakwe. Loleelaga, ishilo sha minsiyaano asiive akwali pina viyeleelula ishayili yaakwe pa luuga.3 Lino owe, yiyooga uyipashe amafuta, ufwale amenda gaakho amanofu. Lutaga pa luuga, leelo usikhayiwonesaaga kunyaakwe mbakha uwone wáalya na kiingʼwa.4 Pina hambi iita kigona upaloleelaje, na yuuwe uyinjilaje ugubutulaje umwenda ku magulu gaakwe ulambalale baaho palubali. Pina wálamukha na yumwene asikujovele lya kigaha.”5 ULuutu wáajova, “Ago goona gina wánijovela one hambi niita kigasenga.”

6 ULuutu wáatile mbakha ku luuga, wásenjile goona gina wámujoveele umukhamwana. 7 Baheene uBowasi wáganile kiilya na kiingʼwa, inumbula yaakwe yashendeevile, shi wálutile kigona kulubali ku shilundo sha mbumbulu. Baheene umudala yula wáata lushe lushe wágubutula umutote ku magulu, woope wálambalala baaho palubali. 8 Shaali shilo sha paakhati, uBowasi wálangamwishe wáweene pana mudala alambaleele ku magulu gaakwe palubali. 9 Wáajova, “Haa! Yuuwe naani?” ULuutu wámugomosesa, “Yuune Luutu, ni muvanda waakho. Nilomba undingulaje one ni muvanda waakho kiiva owe shikholo sha nkholeela nu muunu wangu.”^a

10 UBowasi wáajova, “UMUTWA akuyimiilile! Aga gina ukigasenga isala isi wiwonensa lugoto lwakho ku shikholo sheesu, kishila ulutogo luna watugahilaga ulwamwandi. Kiiva usikhavasakwile avadiimi hata vave vapiina hata vave vanya nafyo vakutoole.^b 11 Lino mwali wangu usikhatiilaga, nisikusenjele goona gina wilogola, kiiva shila muunu pa lujinji panu vakumeenye kiija uli mudala munofu. 12 Shiyooli one nili lukholo lwa nkholeela mandu nu muunu waakho. Leelo akwali uyunji yuna ali nkholeela kishila one. 13 Owe uheepe ishilo ishi, ulwamilaawu nisilute nimwaje yula ukholo lwangu. Nda ayiitishe kikuhaala, haaya, nda akhaane, one nikiyiyiiga ku litaawa lya MUTWA nisikuhaale. Owe gona baaha mbakha kushe.”

14 ULuutu wágona palubali ku magulu ga Bowasi mbakha ulwansheelo, wáyilaavile kiwuukha pala kupili nshiisi. Kiiva uBowasi akhandi asisakula umuunu amanye kiija, umudala yula wáava pala pa luuga. 15 Akhandi ashaanali asinawuushe, uBowasi wáajova, “Uleete umwenda gwakho guna uyipinyile ku mutwe.” Woope wátawula umwenda wátandikha, baheene uBowasi wámupimila mu mwenda ngaja debe sivili ndeeni isa shayili. Wáajova, “Mutwalilaga umukhamwana waakho ulutono ulu,” shi wáava ikimutwikha. Yula umudala wáwuukha iita mbakha kunyaanave ku booma.

16 Wáganile kifikha kukhaaya umukhamwana waakwe wámuposiise, “Mwali wangu, lwava wuli?” Woope wámutaviilila goona gina wámusenjela umuunu yula. 17 Wámujoveele, “Ishayili isi wámeela, wánijovela, ‘Usikhaataga mawokho shiishi kwa mukhamwana waakho.’” 18 Woope umukhamwana waakwe wámujova, “Lino mwali wangu usingamale, uheepe iliswi kuna hambi lipoolela, kiiva uBowasi asinojelwa nda ave asilimalile iliswi ili iminsiyaano.”