Shiyanso 50

Kisiilwa kwa Isilaheli

1 Apo, uYusufu wámukumbaatila uwihaanave, wákhoola na kimunoonela. 2 Baheene uYusufu, wávalajisa avahusi vaakwe vagususuute umuvili gwa Isilaheli uwihaanave, umugoda gwa mafuta kiija, gusikhawolaga. 3 Insengo iyo yatoolaga nsiku mashumi gana, kwa kiiva yikhandi ngʼoma ya Vamisili kiyandaala umufimba. AVamisili vamukhoola na kiyaalama kwa nsiku mashumi fungati.

4 Vaganile kimala ishivembo isho, uYusufu wálogola na vakhome vina vakhandi viyangalila amaswi ga Falawo, wávajovela wáaja, “One nda mwaniyiitikha, nilomba mulute kwa Falawo mumujovele kiija, 5 ‘Uwiheesu akhandi anijoveele na kiyiyiiga, wánilajisaaga ndeeni, “One nili nkholeela kiifwa, unisiilaje mu lijooja lina nayihimbilaga ku Kanaani.” Kwa kiiva ya ilyo, nikikulomba unitawule nilute nimusiile uwiheesu. Pina nikhamusiila, nikhatina.’” 6 UFalawo wámugomosesa uYusufu wáaja, “Lutaga umusiile uwiiho ngaja shina wáyiyiigaga kimugahila.”

7 Ndeeno, uYusufu wáwuukha iiluta kimusiila uwiihe. Wásindihisiwa na vasenga nsengo woona va Falawo na vagosiivaha woona va livansa lyakwe na vagosiivaha woona ava nyi ya Misili. 8 UYusufu wáaluta na vanaakwe woona na valukholo lwakwe woona na vaanu woona va nanda ya wihaanave. Leelo, avanaave ni fidiimwa vasigalaga veene duguli ku Gosheni. 9 Khanji vamusindihisa shipuga shikhome sha vaanu, vina vayangeele ifalaasi nu mutukha sina sikhandi sikwehwa ni falaasi.

10 Vaganile kifikha ku luuga lwa kitovela imbumbulu ya Atadi, luna luli ku mwambwa ya mukhoga gwa Yolodani, apo, vayansa ishivembo shikhome mandu. UYusufu wámukhoola uwihaanave nsiku fungati. 11 AVakanaani vina vakhandi viikhala mu nyi iyo, vaganile kishaaga ishivembo shila, baheene vaajova, “Shiyooli ulu luhaavi lwa shivembo ishikhome isha Vamisili.” Kwa kiiva ya ilyo, pa luvala lula pa mwambwa ya mukhoga gwa Yolodani, patambulwa Abeli-Misili.^a

12 Ndeeno avaana va Yaakobo vagahaga ngaja shina uwihaanave akhandi avalajiise. 13 Vatwala umufimba gwakwe mbakha inyi ya Kanaani, vamusiila mu lijooja lina lili mu mugunda guna guli ku Makipela, pina wiiluta ku Mamule. Umugunda ugo, uAbulahamu akhandi agulile kihuma kwa Efuloni uMuhiti, pave pa kisiilila avaanu vaakwe. 14 UYusufu wáganile kimala kimusiila uwihaanave, wáawuya ku Misili na valukholo lwakwe na vaanu woona vina vakhandi valutile nu mwene kimusiila uwihaanave.

UYusufu ikivasaajila avalukholo lwakwe

15 Avalukholo lwakwe va Yusufu vaganile kiwona uwihaanave wáafwa, baheene vayansa kijovana, “Vayaa, uYusufu akwiliile kiiva atukhalaliile ose, angava isakula kitutinisa uwuvi woona wuna tamugahilaga.” 16 Kwa kiiva ya ilyo, vamutwalila uYusufu imola vaajova, “Uwiiho wátulajisaaga indaji iyi, pina akhandi ashaanali muumi, 17 ‘Mumujovelaje uYusufu ndeeni, nilomba uvasaajile avamaamo uwuvi woona wuna vakugahilaga.’ Lino tikikulomba utusaajile ose ti vavanda va Nguluvi wa wiiho.” UYusufu wáganile kipulikha imola iso, wákhoola. 18 Apo, baheene avalukholo lwakwe vaaluta kwa Yusufu, vafugama pamwene, vamujovela, “Ose tili vavanda vaakho.”

19 Leelo, uYusufu wávajovela, “Musikhatiilaji! One nisili Nguluvi. 20 Omwe mukhandi mugulumiile kinigahila uwuvi, leelo uNguluvi wágulumilaga amanofu, kiija avaanu vinshi vave wuumi ngaja shina mukivaaga iminsiyaano. 21 Lino, musikhatiilaji. One nisivapeele ishakiilya omwe na vaneenyu.” Baheene wálogola nawo wunofu, vashendeeva.

Imfwa ya Yusufu

22 UYusufu wáyitenekha kikhala na valukholo lwakwe mu nyi ya Misili. Amaakha gina wákhalaga uYusufu pa nyi apa, gakhandi ligana limo ni lishumi (110). 23 UYusufu wáyimililwagwa mbakha wávaaga avaana na vasukulu va Efulahimu na vaana va Makili umwana wa Manaase, woope wávapeelaga uwuhaasi waanave ngaja vanaakwe.

24 UYusufu wávajovela avalukholo lwakwe, “One nili nkholeela kiifwa. Leelo shiyooli uNguluvi asiyinse kivatanga. Asivahumye inyi iyi na kivatwala inyi yina akhandi avatahiise uAbulahamu, uIsaaka nu Yaakobo.” 25 UYusufu wáyiyiiga kwa vaana va Isilaheli wáajova, “Shiyooli, uNguluvi akhayinsa kivatanga. Musikhajelaga kilekha amafupa gangu kuno, mulutaje nago.” 26 Baheene uYusufu wáafwa, akhandi ana maakha ligana limo ni lishumi (110). Umuvili gwakwe gwasusuutwa umugoda gwa mafuta kiija gusikhawolaga, vamuviikha mu lisandikho ilya kimusiilila.