Uwunansi wa vaanu
6
1-2 Avaanu vayansaaga kiyonjelela na kiyalaalila pa nyi apa. Avaana va shidiimi va Nguluvia vavaaga avahinja va vaanu vanofu mandu na vavatoola kiiva vadala vaanave ngaja shina vavageene. 3 Baheene uMutwa uNguluvi wáaja, “Inumbula yangu yisikhasigala mwa muunub nsiku soona, kwa kiiva umwene wa kiifwa. Insiku saakwe sikhava maakha ligana limo na mashumi gavili (120).”c4 Uluhaavi ulo avaana va shigoosi va Nguluvi vakhandi vijenda na vahinja va vaanu baheene vaava viisava avaana vaanave. Avaana ava vatambulwagwa Vanefili, ava vakhandi vagoosi vanya ngufu na vakhandi vimanyikha mandu.
5 UMutwa uNguluvi wáwaaga uwunansi wa vaanu ava wukhome mu nyi yoona, na uluhaavi loona amahiiva goona aga vaanu gakhandi ga wunansi hela. 6 Wásigitikha mandu kwa kivawumba avaanu pa nyi apa, apo inumbula yaakwe yaaluma mandu. 7 Lino, wáaja, “Nikhavabuda avaanu woona vina navawumbaga pa nyi apa, kiyansa avaanu mbakha inkhanu soona, ifiinu fina fitambala ni nyuni sa kushaanya. Khanji nihiiva kwashi navawumbaga!” 8 Leelo, uNuhu wámushendefyaga uNguluvi.
UNuhu ni shipugo ishikhome
9 Iyi yiyeene mola ya Nuhu. UNuhu akhandi muunu mugolofu yuna agaya mangʼuulo pa Nguluvi, uluhaavi lwa vaanu vaakwe. 10 UNuhu akhandi na vaana vatatu va shigoosi, uSheemu, uHamu nu Yafeti.
11-12 Lino, uNguluvi wáyiloleelaga inyi, wáyaaga kiija, yinanjiishe mandu na vaanu woona vaveele vanansi na vanya mapuli. Khanji shila shiinu shina shuumi shikhandi shiigaha uwunansi. 13 Baheene uNguluvi wámujovela uNuhu, “Nalamula kivabuda avaanu woona kwa kiiva vayimemiise mandu inyi uwunansi. Shiyooli nisivabude woona lumo ni nyi!
14 “Lino tenda ishipugo shikhome mandu isha mabaani ga muvanga, tenda imwandi mukhati yaakwe ushipashe umupulya mukhati na kunja. 15 Ishipugo shina ukhatenda shiveesaje ndeeni, uwutali waakwe wuve mawokhod magana gatatu (300), uwupapaate waakwe wuve mawokho mashumi gasaanu, kiluta kushaanya yive mawokho mashumi gatatu. 16 Ishipugo shive sha juulu sitatu nu mulyango gumo mukhome mu luvafu. Usenje ulwansa na uleshe imwenshe ya liwokho limo paakhati ya luhengo nu lwansa.
17 “Puliisa, nalamula kileeta ulufuwukho mu nyi yoona, kiija shila shiinu ishuumi shifwe. 18 Leelo, nifinga kunyaakho kiija, owe usiyinjile mu shipugo lumo nu mudala waakho na vanaakho na vakhamwanaakho. 19 Uyinjise shila shiwumbwa shina shuumi fivili fivili, shimo shigoosi na shimo shidala, baheene fikulushe lumo noowe. 20 Shila nyuni, inkhanu sa mu lihakha ni sa kidiimwa na shila shiinu shina shitambala pansi, ifyo fyona fiyinse kunyaakho fivili fivili, baheene fikulushe. 21 Utoole ishakiilya shinshi ushiviishe, ushiyangalile kwa kiiva yeenyu ni nkhanu.”
22 UNuhu wáagaha goona ngaja shina uNguluvi akhandi amulajiise.