Shiyanso 5

Ishisafi sha Adamu

1 Isi mola sa shisafi sha Adamu. Ilijuva lila uNguluvi pina wávawumbaga avaanu, wávawumbaga kwa shihwano shaakwe. 2 Wávawumbaga umugoosi nu mudala, wávayimiilila na kivatambulila ilitaawa lyanave “vaanu.”

3 UAdamu wáganile kifisa maakha ligana limo na mashumi gatatu (130), wáasava umwana yuna ahwaneene nu mwene, wámutambulila ilitaawa lyakwe Seeti. 4 UAdamu wáganile kimusava uSeeti, wákhalaga maakha magana munaana (800). Uluhaavi ulo, akhandi ana vaana avanji va shidiimi na va shihinja. 5 Amaakha goona aga Adamu gina wákhalaga pa nyi apa, gaali maakha magana gonja na mashumi gatatu (930), baheene wáafwa.

6 USeeti wáganile kifisa maakha ligana limo na gasaanu (105), wámusava uEnoshi. 7 USeeti wáganile kimusava uEnoshi, wáakhala maakha aganji magana munaana ni fungati (807). Uluhaavi ulo, akhandi ana vaana avanji ava shidiimi na va shihinja. 8 Amaakha goona gina wákhalaga uSeeti pa nyi apa, gaali maakha magana gonja ni lishumi limo na gavili (912), baheene wáafwa.

9 UEnoshi wáganile kifisa maakha mashumi gonja, wámusava uKenani. 10 UEnoshi wáganile kimusava uKenani, wákhalaga maakha aganji magana munaana ni lishumi limo na gasaanu (815). Uluhaavi ulo, akhandi ana vaana avanji ava shidiimi na va shihinja. 11 Amaakha goona aga Enoshi gina wákhalaga pa nyi apa, gaali maakha magana gonja na gasaanu (905), baheene wáafwa.

12 UKenani wáganile kifisa maakha mashumi fungati, wámusava uMahalaleeli. 13 UKenani wáganile kimusava uMahalaleeli, wáakhala maakha aganji magana munaana na mashumi gana (840). Uluhaavi ulo, akhandi ana vaana avanji ava shidiimi na va shihinja. 14 Amaakha goona aga Kenani gina wákhalaga pa nyi apa, gaali maakha magana gonja ni lishumi (910), baheene wáafwa.

15 UMahalaleeli wáganile kifisa maakha mashumi mutanda na gasaanu, wámusava uYaaledi. 16 UMahalaleeli wáganile kimusava uYaaledi, wáakhala maakha aganji magana munaana na mashumi gatatu (830). Uluhaavi ulo, akhandi ana vaana avanji ava shidiimi na va shihinja. 17 Amaakha goona aga Mahalaleeli gina wákhalaga pa nyi apa, gaali maakha magana munaana na mashumi gonja na gasaanu (895), baheene wáafwa.

18 UYaaledi wáganile kifisa maakha ligana limo na mashumi mutanda na gavili (162), wámusava uHenoki. 19 UYaaledi wáganile kimusava uHenoki wáakhala maakha aganji magana munaana (800). Uluhaavi ulo, akhandi ana vaana avanji ava shidiimi na va shihinja. 20 Amaakha goona aga Yaaledi gina wákhalaga pa nyi apa, gaali magana gonja na mashumi mutanda na gavili (962), baheene wáafwa.

21 UHenoki wáganile kifisa maakha mashumi mutanda na gasaanu, wámusava uMetuseela. 22 UHenoki wámuyinatilaga uNguluvi maakha magana gatatu (300). Uluhaavi ulo, akhandi ana vaana avanji ava shidiimi na va shihinja. 23 Amaakha goona aga Henoki gina wákhalaga pa nyi apa, gaali magana gatatu na mashumi mutanda na gasaanu (365). 24 Kwa kiiva uHenoki wámuyinatilaga uNguluvi, lulwene wáyajilinkhanaga, kiiva uNguluvi wámutoolaga.

25 UMetuseela wáganile kifisa maakha ligana limo na mashumi munaana ni fungati (187), wámusava uLameki. 26 UMetuseela wáganile kimusava uLameki, wáakhala maakha aganji magana fungati na mashumi munaana na gavili (782). Uluhaavi ulo akhandi ana vaana avanji ava shidiimi na va shihinja. 27 Amaakha goona aga Metuseela gina wákhalaga pa nyi apa, gaali magana gonja na mashumi mutanda ni gonja (969), baheene wáafwa.

28 ULameki wáganile kifisa maakha ligana limo na mashumi munaana na gavili (182) wáasava umwana. 29 Wámutambulila umwana uyo ilitaawa lyakwe Nuhu,^a kuno iijova, “Uyu yumwene akhatuyishilisa inumbula seesu kwa nsengo seesu isa malava makhome ga mawokho geesu mu nyi. Inyi iyi yoona uMutwa uNguluvi wáyiyiijilaga.” 30 ULameki wáganile kimusava uNuhu, wáakhala maakha aganji magana gasaanu na mashumi gonja na gasaanu (595). Uluhaavi ulo, akhandi ana vaana avanji ava shidiimi na va shihinja. 31 Amaakha goona aga Lameki gina wákhalaga pa nyi apa, gakhandi magana fungati na mashumi fungati ni fungati (777), baheene wáafwa.

32 UNuhu wáganile kifisa maakha magana gasaanu (500), wávasava uSheemu, uHamu nu Yafeti.