Shiyanso 37

UYusufu na valukholo lwakwe

1 UYaakobo wákhalaga ku Kanaani, kuna uwiihe woope akhandi akheele ngaja muhensa. 2 Isi siseene mola sa nanda ya Yaakobo.

Uluhaavi ulo uYusufu akhandi ana maakha ishumi na fungati. UYusufu akhandi idiima ishipuga sha fidiimwa na vamaame, avaana va Biliha nu Silipa vina vakhandi vadala va wiihe. UYusufu akhandi ikimutaviilila uwiihe imola imbi sina viigaha avavaha vaakwe.

3 Lino, uIsilaheli^a wámuganaga mandu uYusufu kishila avanaakwe avanji, kwa kiiva wámusavile mu wugogolo waakwe. Wámuhonela inkhansu inali yina yikogwelwe wunofu. 4 Leelo, avavaha vaakwe vaganile kimanya kiija, uwihaanave amugeene uYusufu kishila aveene, baheene vamukhalalila na vaalekha kilogola nawo wunofu.

5 Ilijuva limonga uYusufu wáloota. Wáganile kivajovela avavaha vaakwe, baheene vamukhalalila kishila ulwamwandi. 6 Shilushwali shina wávajovela wáaja, “Puliisi amalooto gina naloota. 7 Naloota ose woona taava ku mugunda tikungula ingano na tiipinya ifilundo. Baaho naawona ishilundo shangu shayiima na ifilundo fyenyu fyashipilima ishilundo shangu, baheene fyashisungamila ishilundo shangu!” 8 Avavaha vaakwe vamujovela vaaja, “Aasi, shiyooli usiive mutwa weesu? Shiyooli usituteme ose, uve mukhome weesu?” Baheene vamukhalalila mandu, kwa kiiva ya malooto gaakwe na maswi gaakwe.

9 UYusufu wáloota khanji, wávajovela avavaha vaakwe wáaja, “Puliisi shina naloota khanji. Naawona ilijuva, umwesi ni nondwe ishumi na yimo sikinisungamila one.” 10 Wáganile kimujovela uwiihe na vavaha vaakwe, uwiihe wámudalishila wáaja, “Malooto mashi ago? Lino wihiiva one nu maayi weenyu na vavaha vaakho, tikhayinsa kikufugamila owe?” 11 Ndeeno, avavaha vaakwe vaava vikimufyoshela, leelo uwihaanave wáava apihiiva amaswi ago.

UYusufu igusiwa na vamaame

12 Ilijuva limonga avavaha va Yusufu valutaga kidiima ifidiimwa fya wihaanave nkholeela ni lijumbi lya Shekemu. 13 Baheene uIsilaheli wámujovela uYusufu wáaja, “Avavaha vaakho vidiima ifidiimwa nkholeela ni Shekemu. Lino, nisakula nikufilishe kunyaanave.” UYusufu wámujovela, “Eena, napulikha.” 14 Uwiihe wámujovela waaja, “Luta, uvaloleele avavaha vaakho nda vali finofu ni fidiimwa, baheene uyinse unitaviilile.” Lino uYaakobo wámufilikha uYusufu kihuma ku lukwawo lwa Hebuloni alute ku Shekemu. Wáganile kifikha ku Shekemu, 15 umuunu yumonga wámwaga uYusufu iilava ku livindi, baheene wámuposa, “Wisakula shishi?” 16 UYusufu wámujovela, “Nikivasakula avavaha vangu. Nilomba unijovele nda wavaaga uluvala luna vidiimila.” 17 Umuunu yula wámujovela, “Vawuukha apa, kwa kiiva napulikha vijovelana kiija, ‘Tilute ku Dotaani.’” Baheene, uYusufu wávafwata ku Dotaani.

18 Avavaha vaakwe pina vamwagaga kwa kutali iyinsa, vapulinkhana kimubuda. 19 Vajovelana viija, “Loleela, yula umulotaaji iyinsa. 20 Lino timubude, timutaaje mu lisima. Tikhamujovela uwiheesu kiija, ‘UYusufu wáliwaagwa ni nkhanu sa mu lihakha,’ baheene tikhaloleela amalooto gaakwe shina gakhava!”

21 Leelo, uLubeni umuvaha waanave wáganile kipulikha ndeeno, wáyansa kisakula insila ya kimukulusa uYusufu, wávalomba wáajova, “Musikhajelaga kimubuda! 22 Musikhakunulaji idanda! Shiba mumudubujise mu lisima muno, kuno ku lunyikha, leelo musikhajelaji kimupyasa.” Wávajovela ndeeno kiija, paanyuma hambi amukuluse uYusufu kwa wufiho na amutinie kwa wihaanave. 23 UYusufu wáganile kifikha kwa vavaha vaakwe, vamuyalushila, vamuyaawula inkhansu yaakwe inali, yina yikhandi yikogwelwe wunofu mandu. 24 Baheene, vamukhata vamudubujisa mu lisima. Ilisima ilyo likhandi lingaya malenga.

25 Vaganile kikhala kiilya ishakiilya, baheene vaawona ishipuga sha vagulaaji aVaishimayeli, vahumile inyi ya Gileyadi viiluta ku Misili. Ingamiya saanave sikhandi sisumwile ingaagulwa sa kinunshilila^b ni fiinu fina fiigaha ishakiilya shinunshilile. 26 Apo, uYuuda wávajovela avamaame wáaja, “Lutono lushi tisiipate nda timubude umunangʼana weesu na kifiha imfwa yaakwe? 27 Shiba timuguse kwa Vaishimayeli. Tileshe kimubuda kwa kiiva umwene lukholo lwesu, umwene noose tili danda yimo.” Avamaame vamuyiitikha. 28 Avagulaaji vala^c vaganile kishila pala, avamaame vamuhumya uYusufu kihuma mu lisima, vamugusa kwa Vaishimayeli kwa hela mashumi gavili. Baheene aVaishimayeli vaaluta nawo mbakha ku Misili.

29 ULubeni wáganaga kitina pa lisima pala, wáawona uYusufu akwasiina, apo baheene wásugumilwa mandu wádeemula amenda gaakwe. 30 Wáatina kwa vamaame wávajovela, “Umudiimi akwasiina mu lisima! Lino one nilute kwi?”

31 Baheene vatoola inkhansu ya Yusufu, vaabuda inyana mene ipongo, baheene vajabikha inkhansu yila mu danda. 32 Vatoola inkhansu yila vamutwalila uwihaanave. Vaganile kifikha, vamujovela, “Taahola inkhansu iyi. Lino loleela nda ya mwanaakho awu nda yisili yiyeene.” 33 Wáganile kiloleela hela, baheene wávajovela wáaja, “Vayaa! Mbona iyi nkhansu ya mwanangu! Vayaa! Inkhanu ya mu lihakha yamubuda uYusufu!”

34 Pala uYaakobo wádeemula amenda gaakwe, baheene wáfwala amagunila,^d wákhoola na kiyaalama kwa nsiku nyinshi kwa kiiva ya mfwa ya Yusufu. 35 Avanaakwe woona ava shigoosi na va shidala vayinsa kiija vamushiviilise na kimuvatamya. Leelo, umwene wákhaana kivatama wáaja, “Nileshi! Nisikhoole mbakha pina nikhafwa, nimufwate kuna akwali umwanangu.” Shilushwali ndeeno, shina uwiihe wámukhoolaga uYusufu.

36 Uluhaavi ulo, avagulaaji vala vakhandi vafishile ku Misili, baheene vamugusa uYusufu kwa Potifa. UPotifa uyo, akhandi mukhome wa vasulukhali va Falawo, umutwa uwa ku Misili.