Shiyanso 36

Avaana va Esawu

1 Ishi shisheene shisafi sha Esawu. Ilitaawa ilinji lya Esawu akhandi yu Edomu. 2 UEsawu wátoolile avadala va Shikanaani. Uwa wutasi akhandi yu Ada, umwali wa Eloni uMuhiti, uwa wuvili akhandi yu Oholibama umwali wa Ana. UAna akhandi musukulu wa Sibeyoni uMuhivi. 3 Umudala wa wutatu akhandi yu Basemati, umwali wa Ishimayeli, wulumbu wa Nebayoti. 4 UEsawu nu Ada vaasava umwana umudiimi, ilitaawa lyakwe yu Elifaasi. Khanji uEsawu nu Basemati vaasava umwana uyunji umudiimi, vamutambulila ilitaawa lya Lewuheeli. 5 Khanji uEsawu nu Oholibama vaasava avaana avadiimi, uYewushi, uYalaamu nu Kolakhi. Ava vakhandi vaana va Esawu vina vakhasaviilwe ku nyi ya Kanaani.

6 UEsawu wávatoola avadala vaakwe, avanaakwe avadiimi na vaali, avaanu woona ava pakhaaya yaakwe, ifidiimwa fyakwe nu wusi waakwe wuna wápataga pala pa Kanaani, wáhaamila kutali pina akwali umaame uYaakobo. 7 Wágahaga ndeeno, kwa kiiva uwusi waanave wukhandi winshi, vapootwa kikhala lumo. Inyi ya ku wuhensa yina vaataga kikhala yisikhavakwiliile, kwa kiiva ifidiimwa fyanave fikhandi finshi. 8 Baheene uEsawu yuna akhandi itambulwa Edomu, wáaluta kikhala ku nyi ya fidunda fya Seyili.

9 Ishi shisheene shisafi sha vaana vadiimi va Esawu, uwihaanave wa Vaedomu uwa ku fidunda fya Seyili. 10 Amataawa ga vaana va Esawu gageene aga, uElifaasi umwana wa Ada umudala wa Esawu, uLewuheeli umwana wa Basemati umudala wa Esawu. 11 Avaana va Elifaasi vakhandi, uTemani, uOmali, uSeefo, uGatamu nu Kenasi. 12 UElifaasi akhandi ana mudala umunangʼana yuna akhandi itambulwa Timuna. UTimuna uyu wámusaviile uElifaasi, umwana yuna wátambulwagwa Amaleki. Ava vaveene vakhandi vasukulu va Ada umudala wa Esawu. 13 UBasemati umudala wa Esawu, yumwene wámusavile uLewuheeli. Na vaana va Lewuheeli vakhandi, uNahaati, uSeela, uShaama nu Miisa. 14 UOholibama akhandi mwana wa Ana, uAna akhandi mwana wa Sibeyoni. UOholibama akhandi asavile avaana nu Esawu umugoosi waakwe. Avaana awo vakhandi uYewushi, uYalaamu nu Kolakhi.

15 Ava vina nikivatambula vaveene vina vakhandi vakhome mu shikholo sha Esawu. UElifaasi yuna wátalile kisawa kwa Esawu, yu wihaanave wa Temani, Omali, Seefo, Kenasi, 16 Koola, Gatamu nu Amaleki. Ava vakhandi valongosaaji va nyi ya Edomu. Awo vakhandi vaana va Elifaasi na vasukulu va Esawu nu Ada. 17 Avalongosaaji va shikholo sha Esawu vina vahumile kwa Lewuheeli vakhandi, uNahaati, uSeela, uShaama nu Miisa. Ava vakhandi valongosaaji va mu nyi ya Edomu na vasukulu va Esawu nu Basemati. 18 Avaana va Esawu kwa mudala waakwe uOholibama vakhandi uYewushi, uYalaamu nu Kolakhi. Shila muunu akhandi mukhome wa shikholo shaakwe. Awo woona vakhandi vaana va Oholibama umwali wa Ana. 19 Awo vaveene vina vakhandi lusawo lwa Esawu, yuna itambulwa Edomu. Khanji vakhandi vakhome va fikholo fyanave.

Ishisafi sha Seyili

20-21 Ava vaveene vaana va Seyili uMuhooli vina vakhandi vakhaaya va nyi ya Edomu, uLotani, uShobaali, uSibeyoni, uAna, uDishoni, uEseeli nu Dishani. Ava vakhandi vakhome va fikholo fya Vahooli. 22 Avaana va Lotani vakhandi vava Hooli nu Hemani. ULotani akhandi ana wulumbu waakwe yuna akhandi itambulwa Timuna. 23 Avaana va Shobaali vakhandi vava, Aluvani, Manahati, Ebali, Sheefo nu Onamu. 24 Avaana va Sibeyoni vakhandi uAya nu Ana. UAna yumwene yuna wáfyagaga ifisansa fya malenga amapyo ku mbanda, kuna akhandi idiima idogovi sa wiihe uSibeyoni. 25 UAna akhandi nu mwana umudiimi yuna akhandi itambulwa Dishoni nu muhinja yuna akhandi itambulwa Oholibama. 26 Avaana va Dishoni vakhandi uHemudani, uEshibani, uItulani nu Kelaani. 27 Avaana va Eseeli vakhandi uBilihani, uSaawani nu Akaani. 28 Avaana va Dishani vakhandi uUsi nu Alani. 29-30 Ava, vaveene vakhandi vakhome va fikholo fya Vahooli, vina vakhandi viikhala mu nyi ya Seyili, uLotani, uShobaali, uSibeyoni, uAna, uDishoni, uEseeli nu Dishani.

Avatwa va nyi ya Edomu

31 Ava vaveene vatwa vina vatemaga inyi ya Edomu, pina inyi ya Isilaheli yikhandi yisinaatemwe nu mutwa yoyoona. 32 UBeela umwana wa Bewoli akhandi mutwa wa nyi ya Edomu. Ilijumbi lina akhandi iikhala likhandi litambulwa Dinihaba. 33 UBeela wáganile kiifwa, uYobabu umwana wa Seela kihuma ku Bosila wáava mutwa, wámupyanila uBeela. 34 UYobabu wáganile kiifwa, uHushamu uwa nyi ya Vatemani wápyanila kiiva mutwa. 35 UHushamu wáganile kiifwa, uHadadi umuswamuve uBedadi wáava mutwa, akhandi iikhala ku lijumbi lya Aviti. UHadadi uyu yumwene yuna wáyansaaga uwulugu na kivamena aVamidiyani ku Mowabu. 36 UHadadi wáganile kiifwa, uSamula kihuma ku lijumbi lya Masileka wáava mutwa. 37 USamula wáganile kiifwa, uShawuli kihuma ku lijumbi lya Lehoboti nkholeela nu mukhoga gwa Efulaati, wápyanila kiiva mutwa. 38 UShawuli wáganile kiifwa, uBaali Hanani umwana wa Akiboli wáava mutwa. 39 UBaali Hanani umwana wa Akiboli wáganile kiifwa, uHadadi wáava mutwa. Ilijumbi lina akhandi iikhala likhandi litambulwa Pawu. Umudala waakwe akhandi yu Mehetabeeli umwali wa Matiledi, uMatiledi akhandi mwali wa Mesahaba.

40 Ava vaveene vakhome va fikholo fina fyahumaga mu shisafi sha Esawu, kilingana ni litaawa lya shila shikholo na kuna viikhala, uTimuna, uAluva, uYeteti, 41 uOholibama, uEla, uPinoni, 42 uKenasi, uTemani, uMibisaali, 43 uMagidiyeeli nu Ilaamu. Awo vaveene vatwa vina vahumaga mu shisafi sha Edomu, ku luvala luna vakhandi viikhala ku nyi ya wutwa waanave. Uyo yu Esawu yuna akhandi mbuyaanave umukhome wa Vaedomu woona.