Shiyanso 25

Avaana avanji va Abulahamu

1 UAbulahamu wámutoolaga umudala uyunji ilitaawa lyakwe akhandi yu Ketuula. 2 Uyu wámusavilaga uAbulahamu avaana ava, Simulani, Yokishani, Medaani, Midiyani, Ishibaki nu Shuwa. 3 UYokishani akhandi wihaanave wa Sheeba nu Dedani. Avaana va Dedani vakhandi aVaashuulu, aValetushi na Valewumi. 4 Avaana va Midiyani vakhandi ava, Efa, Efeeli, Hanooki, Abida nu Elida. Ishisafi ishi shoona shikhandi sha Ketuula.

5 UAbulahamu wámuhasaaga uIsaaka uwusi waakwe woona. 6 Leelo, avanaakwe va vadala avanji avanangʼana, wávapeelaga ulutono lunofu. Baheene wávawuusa, vaaluta kikhala ku nyi iya kunena yina yili kutali nu mwanaakwe uIsaaka.

Imfwa ya Abulahamu

7 UAbulahamu wákheele pa nyi maakha ligana limo na mashumi fungati na gasaanu (175). 8 UAbulahamu pina akhandi muumi, akhandi akheele luhaavi lutali na lunofu mandu na lwa kiyimiililwa. Wáganile kiifwa, wáhansiwaagwa na vambuye vina vatalaga kiifwa. 9 Avanaakwe uIsaaka nu Ishimayeli vamusiila uwihaanave mu mongolo iya Makipela, ulubali ulwa kunena ulwa Mamule, ku mugunda guna gukhandi gwa Efuloni umwana wa Sohaali uMuhiti. 10 Umugunda ugo, uAbulahamu wágulile kihuma kwa Vahiti.^a Apo baheene pina uAbulahamu nu mudala waakwe uSaala vavasiilaga.

11 UAbulahamu wáganaga kiifwa, uNguluvi wámuyimililaga uIsaaka umuswamu waakwe uAbulahamu. UIsaaka wálutile kikhala nkholeela ni lisima lya Beeli-Lahayi-Loyi.^b

Avaana va Ishimayeli

12 Ifi fifyene fisafi fya Ishimayeli umwana wa Abulahamu nu Hajili uMumisili yuna akhandi muvanda wa Saala. 13 Amataawa ga vaana va Ishimayeli kwa kitunjililana kisawa gageene aga, uwa wutasi yu Nebayoti, umutunjililano uKedaali, uAdebeeli, uMibisamu, 14 uMishima, uDuuma, uMasa, 15 uHadadi, uTeema, uYetuuli, uNafishi nu Kedeema. 16 Awo vaveene vaana ishumi na vavili va Ishimayeli, khanji vakhandi shiyanso sha fikholo ishumi na fivili fya Ishimayeli. Injinji saanave, amatinga gaanave ni fikholo fyanave, fyatambulwagwa kwa mataawa gaanave.

17 Amaakha ga Ishimayeli gina wákheele pa nyi, gakhandi ligana limo mashumi gatatu ni fungati (137) baheene wáfwile, wáhansiwa na vambuye. 18 Avaana va Ishimayeli vakheele mu njinji kihuma ku Havila mbakha ku Shuuli. Uluvala ulo, lukhandi panena ya Misili, kiluta ku Ashuulu. Avaana va Ishimayeli vikhalaga veene duguli vasikhahansikheene na valukholo lwanave.

Kisawa kwa Esawu nu Yaakobo

19 Ifi fifyene fisafi fya Isaaka, umwana wa Abulahamu. 20 UIsaaka wáganile kifisa maakha mashumi gana, wámutoola uLebeka, uwulumbu wa Labani, umwana wa Betuweli. UBetuweli akhandi Mualaamu muunu wa ku Padani-Alaamu. 21 ULebeka akhandi mugumba, kwa kiiva ya ilyo uIsaaka akhandi ikimulomba uMutwa uNguluvi, woope wámupulikha uIsaaka. Baheene uLebeka wásumula ulwanda. 22 Ulwanda lwa Lebeka lukhandi lwa mapasa. Avaana awo vaava vimenana mu wutumbu umo mbakha uLebeka wáaja, “Kwashi gisenjekha aga kunyangu ndeeni?” Ndeeno wáaluta kimuposa uNguluvi. 23 UNguluvi wámujovela wáaja, “Mu wutumbu waakho, kuna fikholo fikhome fivili. Ifikholo ifi, fisibagunkhane kihuma mu wutumbu waakho. Yumonga, asiive ni ngufu kishila uyunji. Umukhome asiive ikimusenjela umunangʼana.”

24 Insiku isa kisava saganile kifikha, shiyooli uLebeka wáasava avaana mapasa va shidiimi. 25 Umwana uwa wutasi akhandi muduuhu ana nyele muvili goona, kwa kiiva ya ilyo vamupeela ilitaawa lya Esawu.^c 26 Uwa wuvili wáasawa amukheete ishinsikiliinyi umukhome waakwe, kwa kiiva ya ilyo vamupeela ilitaawa lya Yaakobo.^d Uluhaavi luna uLebeka wásavile avaana vala, uIsaaka akhandi afisiise maakha mashumi mutanda.

UEsawu iigusa uwutawulilwa uwa kiiva mukhome

27 UEsawu nu Yaakobo vaakula. UEsawu wáava mufwimaaji munofu na idobokha kikhala ku lunyikha. UYaakobo wáava muhuugu na idobokha kikhala pakhaaya. 28 UEsawu akhandi ikimutwalilaga uIsaaka uwiihe inyama isa wufwimaaji, ndeeno uIsaaka wámugana uEsawu, leelo uLebeka wámugana uYaakobo.

29 Ilijuva limonga uYaakobo pina wáali itelekha idengu, uEsawu wáawuya kihuma kifwima, leelo injala yikhandi yimulumile mandu. 30 Baheene uEsawu wámujovela uYaakobo wáaja, “Miyaa, lino ni muyaago nisiifwe ni njala, nilomba unipeele nyangu ishakiilya isho ishiduuhu nilye.” (Lulwene vamupeelaga uEsawu ilitaawa lya Edomu, uluganulo lwakwe kiija muduuhu.) 31 UYaakobo wámujovela wáaja, “Tangusiina nigusisa uwukhome waakho uwa kitala kisawa.”^e 32 UEsawu wáaja, “Niilwa kiifwa, hambi nishepushilwa shishi one kiiva nu wutawulilwa uwa kiiva mwana wa wutasi kisawa?” 33 Baheene uYaakobo wámujovela wáaja, “Yiyiiga tangusiina.” Baheene wáyiyiiga, ndeeno wámugusisa uYaakobo uwutawulilwa uwa kiiva mwana wa wutasi kisawa. 34 Apo uYaakobo wámupeela uEsawu umukhaate ni dengu, wáalya na kiingʼwa, baheene wáwuukha. Shiisho ndeeno uEsawu wásalaga uwukhome waakwe uwa kitala kisawa.