Yesu kapfonya muntu na nsiku ya Sabato kawii
14
1 Nsiku modza ya *Sabato, Yesu kenda kuḍyani chakuḍya nyumbani mwa mumodza jwa wakuu wa *Mafarisayo. Na wantu wamuchimiza waone adzechohenda. 2 Usoni pfa Yesu kwiwa muntu avimbie-vimbie hu mwii. 3 Yesu kawauza Mafarisayo na waalimu wa *Sharia kawamba, “Sharia yehu ihuseresa kupfonya na nsiku ya Sabato ambu hat̯a?” 4 Ela wao ntawakumwambukuya chuuwo. Ndookomu Yesu kamugija, kamupfonya, na kamugonzoza. 5 Makisa kawaperukia kawamba, “Ikiwa kwamba mumodza jwenu ana mwana ambu ngombe igwiyeyo kisimani na nsiku ya Sabato, nkawezi kwenda akaiyavye kwa dzambo kakushoogani kuhenda kazi na nsiku ya Sabato?” 6 Ela ntawakuweza hat̯a kumuḅaiya kanwa.Namutsedzihwaa kuwa wakuu
7 Yesu epfowaona wageni wakwakutsanani kukaa viti vya usoni usoni, kawambia hiḍi inganyo hiḍi: 8 “Ukihanigwa kwa jila ya harusi, nkudzokae kiti cha usoni. Koro kutseewa kwamba kuhanwa muntu mukuu kukuchia wewe, 9 hat̯a huyuḍe amuhaniye nyowii adzeakwambe, ‘Muyatse huyu akae hapfa.’ D̯ubva unalacha pfantu pfa nyuma pfa kukaa usipfopfatsaka huku ukiwa na yutswa. 10 Ishinu ukihanwa kwa jila ya harusi, enda ukakae nyuma, ili huyu akuhanie adzeakwambe, ‘Ḅamu, dzikuntie hapfaḍe usoni.’ Ndookomu kudzawa na hila usoni ya wageni wangine wonse. 11 Koro kula adzikuzie kadzasuswa nsi, na kula adzisusie nsi kadzakuzwa.”
Yesu kayongweeza dzuu ya kuhendea wantu mema
12 Makisa Yesu kamwambia huyuḍe muntu amuhaniye kamwamba, “Ukielekanya chakuḍya cha musikahi ambu cha mioro nkudzohane waḅamuzo, ambu wanduguzo ambu wantu wa sindowo nolawe wantu majabva mwiokukaani hafufi nao. Koro nao wanakuhana, na kukuipfa uwahendeyeo. 13 Wipfonawa na jila, hana makowesa, virema, vihewi na ntumbu matso. 14 Nawe unavodhyegwa, hat̯a ikiwa kwamba ntawa kintu cha kukuipfa. Koro Muungu kadzakuipfa nsiku ya kufufujwa hawaḍe wamuhikiziyeo.”
Inganyo ḍya jila nkuu
15 Mumodza jwa hawaḍe wantu wakaiyeo kuḍyani epfosikia haya, kamwamba Yesu, “Wadzawa na tsekea nkuu muno hawaḍe wadzeokaa kuḍyani jila ya Uhaju wa Muungu.” 16 Yesu kamwambukuya kamwamba, “Muntu mumodza kahenda jila nkuu, ahaniiyeo wantu wenji. 17 Saa ya jila ipfofika, kahuma muhumisijwe kwendawamba wageni, ‘Nzoni jilani, koro kula kintu cha t̯ayari.’ 18 Ela wonse waḍabva kuyavya vipfangizo. Jwa d̯ura kamwamba huyuḍe muhumisi, ‘Niguya nkonde, nami ni had̯i nyende nikaid̯oye, ndookomu sipate kudza.’ 19 Yungine kamwamba, ‘Niguya ngombe kumi za kuimia, nami nyendaziḍema, sikwakupata kudza.’ 20 Na yungine kamwamba, ‘Nihwaa muke si hat̯a kae, ndookomu sinaweza kudza.’ 21 D̯ubva huyuḍe muhumisi kauja kenda kamwambia ḅwana jwakwe hayo yonse. Mwenye nyumba kareja na kamwamba huyu muhumisijwe, ‘Rebva wende njia nkuu na ndoḍo za mudzi, ukawahane makowesa, virema, ntumbu matso na vihewi.’ 22 Na kapfachu, huyu muhumisi kadza kamwamba, ‘Ḅwana, uneneeyo yesakuhendwa, ela amaale kuna namfasi.’ 23 Ndookomu huyu ḅwana kamwambia kawii huyu muhumisi, ‘Enda njia zonse za mudzi na mipfakaye ukawasharut̯ise wantu wadze ili nyumba yangu idzae. 24 Koro nyakumwambiani kwamba ntaku hat̯a mumodza jwa hawa wageni weohanwa d̯ura adzeekit̯at̯a hichi chakuḍya changu.’ ”
Atsakie kuwa mwanafund̯i jwa Yesu
25 Vit̯aro vikuu vya wantu viwa kumuuḅani Yesu. Nae kawaperukia kawamba, 26 “Yuḍejwonse atsakiye kuniuḅa na kuwa mwanafund̯i jwangu, ni had̯i anitsake mimi kuchia babajwe na mamajwe, mukaziwe na wanawe, wanduguzwe na waimbuzwe na hat̯a maishaye mwenye. 27 Yuḍejwonse asiyeutsukuya muhiwe wa mpatsa na kuniuḅa mimi, huyo nkawezi kuwa mwanafund̯i jwangu. 28 Ni ga kahi yenu eyenaweza kumbaka nyumba pfasipfo kukaa chihako nguzi, ayowe kwamba ana vija vya kut̯osa kumbakia? 29 Koro akitsahenda dzavyo, anaweza kuimbaka hi nyumba hat̯a ikifika kahikahi vija vya kumbakia vimusiiye nae atseweza kuisa. Na wantu wanaḍabva kumutsezea 30 wakyamba, ‘Muntu huyu kaḍabva kumbaka ela nkakuweza kwisa.’ 31 Ambu ni haju ga, awee kwendani kujwanani viha na haju yungine, asikaa chihako nguzi ayowe kwamba wantuwe elefu kumi wanawaweza wantu elefu miyongo miwii wa huyuḍe haju mwenziwe? 32 Akiona kwamba nkawezi, anamuhumia wantu wamut̯angere huyuḍe haju asidzafika hafufi, wahende mashauri ya kungiza naghea. 33 D̯ubva ntaku mumodza jwenu adzeeweza kuwa mwanafund̯i jwangu pfasipfo kujibat̯a yonse eyonayo.”
Mwanafund̯i jwa Yesu ka dza munyu