पोरबू नीतीकतान बारा जान चेलालेर
10
1 आनातले मारी ईसू आपला बारा जान चेलालेरीन लेग्गे कूयी किली ओरूग बूत डुमेलीन पुच्चू आरू जाम्मा बानीत नोयकूडूलीन आरू बेमारूलीन उजराक पान्न चिञ्ञेड।
2 मापोरबून पाटेन पोक चियू,
पोरबू नीतीकतान आ बारा जानीन पिदीरूल ईव आय:
पोईलतेड सिमोन,
(ओनीन पतरस बेले एन्डार)।
ओन तोल्लेड आन्दरीयास,
जबदी एन्डान मांजेन चिन्ड याकूब,
आरू ओन तोल्लेड एऊना,
3 पिलीपूस,
बरतूलमेय,
तोमाल,
पोटी पातरानेड मत्ती,
आलपाईन चिन्ड याकूब,
तद्दी,
4 सिमोन कनानीa आरू ईसून कुचनाय चुमीकतान एऊदा इसकारीयोती।
एडो पाटेन पोक्कू चेनेक नातोन उयरानो आय?
5 ई बारा जानीन ईसू तान्न एडो पाटेन पोक्कू चोटपेक ई पाटेलीन तियारची किली चोटतेड:
“ईम एऊदीकूल चिला लोगीन कान चेनमोर आरू सामरी देचेत गेड़ेल ती तान्नूमोर।
6 बूलकूरान मेन्डेल आकाट मेन्डान इसराएली कुटूमतेर लेग्गाटी चेनूर।
7 आटनी चेनेक,
मापोरबू जाम्मेनी आंगरूरानो लेग्गे एदोतो एनी मेरचीकपूर।
8 बेमारूल तो लोगीन उजराकपूर,
चाय्यरान लोगीन जियोम पाटतीकपूर,
कोड़ बेमारतेरीन उजराकपूर,
बूत डुमेल चुम्मी मेन्डान लोगीन कान तीग बूत डुमेलीन वालीकपूर।
ईम पोयसेल चियाका बेटूरानोन पोयसेल पाताका चियूर।
9 आपला किटे ती सोन चिलाड रूप चिलाड ताम्बेन आन्डरूक किली पातूमोर।b
10 पाव ताकू जोरा चिलाड,
आगेर पागेर गान्डेल चिलाड,
पानेयूल चिलाड,
बाड़या बेले पातूमोर।
एटे एनोड बूतीत मांजेग बोजी टोन्डूरानो ई आय।”
एडो पाटेन पोक्कू चेनेक आरे तेबूरानो आय?
11 आरो एरको गेड़े ती चिलाड पोलूब ती चेनोडेल,
आना एड बेले इमूंग पाड चियू तायार एरोड,
ईम आना तीग पेतेर्रान आर्रे ओन कानी डेरा मेनूर।
12 आरो एरको ओलेक ती तान्नेक आना मेन्डानेरूग आसतीर चियूर।
13 आ ओलेकतेर आदीन बेटूरान बातेरतेर मेनोडेल ईम चियरान आसतीर ओर कान तेबोको;
आदीन बेटूरान बातेरतेर चिलाकोड,
इम लेग्गाट मेलेरेको।
14 एड बेले इमूंग पाड चियाकोड आरू इम पाटेन पातीयाकपाकोड,
आ ओलेक तीग चिलाड आ गेड़े तीग पेपेक आपला केलूल तो गुन्डेन आन्नी टिटकी काडूर।c
15 आन इमीन चेत्ते पोक्कूमेन,
“नियाव एर्रान चिरीक आ गेड़ेत लोगूग एर्रान डेन्ड सदोम आरू अमोरेd ती एर्रान ले आगेर तो एर्रा।”
एडो पाटेन पोक्कू चेनेक आबोड़ूल वेर्राव
16 इद चूड़!
मेन्डेलीन मिना कोलीयेल नाड़बूल चोटतान आकाट आन इमीन चोडूकमेन।
आदूग बाम्बूल आकाट बुदीतेर आरू पांरवेल आकाट सोजालेर मेनूर।
17 मांजेग लेक ती मेनूर।
ओर इमीन पोँच उन्डरान कान उय्यी किली बेटाकतार।
आरू एऊदीकूल बिन्ती जोड़रान ओलेकूल ती इमीन कोड़ेनोड चाटतार।
18 आन्न चेत्तूग इमीन राजपालकूल मुन्देल आरू कोसकूलीन मुन्देल ओरूग आरू देचेल-देचेल तो लोगूग गोवाई चियतूर एनी उयरार।
19 ओर इमीन बेटाकपेक “नातीन पोकराम?
एटे ऊबूराम?”
एनी किसीयाकमोर।
इमूंग नातोन पोकरानो आय एनी मापोरबू आयची वादेक इमीन पोक चियराड।
20 पोकरानेर ईम एरा,
एरोड इम बुवेन जियोम इम कान तीग पोकराड।
21 तोल्लेड आपला तोल्लेडीन,
बुवा आपला चिन्डीन,
ओर चाय्येकेर एनी बेटाकतार;
चिन्डूल पापकूल आपला ईय्या बुवेन विरूद ती चुलची किली ओरीन चाय्यीक बेटाकतार।
22 आन्न पिदीरीन चेत्तूग जाम्मा इम्मोड विरूदी एर्रार।
एरोड चेरा चेरी आर्रे आनीन रेच्चा पात्ती मेन्डानेर एके बाचूरार।
23 ओक गेड़े ती इमीन सताकपोड आवूर गेड़े ती तूलूर।
आन इमीन चेत्ते पोक्कूमेन,
ईम इसराएली गेड़ेल ती जाम्मा चुल्लू पोलाका मेनेक सरग तो मांजा मारी वेर्राड।
24 चेलाल आपला गुरून ले बेड़तेड एराडा।
आरू कामीयाल एके आपला सावकारीन ले बेड़तेड एराडा।
25 चेलाल आपला गुरून सामान आरू कामीयाल आपला सावकारीन सामान मेनोडेल एर्रा।
ओलेक तो सावकारीन बालजाबूल एन्डान बूत डुमेन कोस एनी पोकोड,
ओलेक तो लोगीन आदीन ले आगेरe कियाल पोकरारी।
एरूग नारचूरानो आय?
26 आदूग ओरोड नारचूमोर।
एटे एनोड पाकी मेन्डान आरू पाड़चे-पाड़चे एर्रान आकाट तोव मापोरबून पाटेल नाती चिल्लाव;
जाम्मा पारगोड एर्राव।
27 इमीन आन चीकोड ती पोकरानोन ईम विलीज ती वेनपीकपूर।
इम केकोल ती चेव चेवी वेनपीकतानोन,
ईम इल पोडीf तीग पारगोड पोक्कूर।
28 जियोमीन नाचाक ओड़ाका,
मेनीन नाचाक नाम्बीकतानेडूग ईम नारचूमोर;
ईम एके मेनीन आरू जियोमीन इरडूकीनी नरक कून्ड ती नाचाक नाम्बीकतानेडूग नारचूर।
29 ओक पोयसेग इरडू गोरीयेलीन वीड़रार चिला?
एरोड बेले इम बुवेन मेन्न चिलाका आवीन तीग ओकूत बेले नेन्दील ती उरकाया।
30 इम तेल्ल तो जाम्मा तेलताकूलीन बेले मापोरबू नेकीकतेड नाड।g
31 आदूगी ईम नारचूमोर।
एटे एनोड ईम कुबे गोरीयेल ले बेले आगेर मोल्लेतोर आय।
ईसू ई मोंजीपूर ती नांग वेञ्ञेड?
32 एड एरको मांजेन मुन्देल आनीन मानूराड,
ओनीन आन बेले आपला सरग तो बुवेन मुन्देल मानूरान।
33 एरोड,
एड एरको मांजेन मुन्देल आनीन पूनान एनी पोकोड आन बेले ओनीन आपला सरग तो बुवेन मुन्देल पूनान एनी पोकरान।
34 आन मोंजीपूर ती लोगीन मिलाक वेञ्ञेन नान एनी चोमजूमोर काय एटे?
आन लोगीन मिलाक एरा,
एरोड ओर एके ओकूरीन ओकूर कान्डेल चेलाकपेकेर एनी आय वेञ्ञेन नान।
35 एटे एनोड,
आन,
चिन्ड तान्न बुवेन,
माल तान्न ईय्येन
आरू कोड़ोल तान्न आञ्ञेन विरूदी एरीक वेञ्ञेन नान।
36 मांजेन तान्न ओलेक तो लोगी विरूदी एर्रार।h
37 एड एरको आपला बुवेन चिलाड आपला ईय्येन आन्न ले आगेर चोग चाजूरानेर,
आन्न कानतेर एरारा।
आपला चिन्डीन चिलाड आपला मालीन आन्न ले आगेर माया चाजूरानेर बेले,
आन्न कानतेर एरारा।
38 कुरूस पारे ती चाय्यरानो आय एनी डेन्ड बेटूरानेड,
आ पारेन काञी किली चेन्डानो आय।
आटनी आपला कुरूस पारेन काञी किलीi आन्न पोटतेल वेरायेड आन्न कानतेड एराडा।
39 आपला जियोमीन बाचाकतानेड आदीन चेनीकताड;
एरोड आन्न चेत्तूग आपला जियोमीन चियरानेड आदीन बेटूराड।
40 इमूंग आपला मेन्न ती पाड चियरानेड आनूंग बेले आपला मेन्न ती पाड चियराड।
आरू आनूंग आपला मेन्न ती पाड चियरानेड एके आनीन चोटतानेडूग आपला मेन्न ती पाड चियराड।
41 मापोरबून कान तीग काबेर वेन्नी किली लोगीन पोक चियरान गुरून,
एड एरको ऊड मापोरबून कान तीग काबेर वेन्नी किली लोगीन पोक चियरान गुरू आय एनी मानूरानेड,
ओनूग नातो टोन्डूरा,
आदीन ओनीन मानूरानेड बेले बेटूराड।
देरमी एन्डानूग ओनीन मानूरानेड एके देरमी मांजेग नातो टोन्डूरा,
आदीन ओनीन मानूरानेड बेले बेटूराड।
42 एड एरको ई पिटीलेकतेर कान तीग ओकूरीन आन्न चेलाल आय एनी मानी किली ओक मुत्ता नीर उनतीकपोड,
एटे एरोड बेले ओड आपला पालटा बेटूराडी एनी आन इमीन चेत्ते पोक्कूमेन।