मापोरबून गुडीन बोसड़ाकतानोन ईसू पोकरानो
13
1 ईसू,
मापोरबून गुडी तीग पेपेक ओन चेलालेर कान तीग ओकूर ओनीन,
“इद!
ए गुरू!
मापोरबून गुडीन चूड़।
ओ-ओ बान्नेलेक केलकूलोड काट्टेर नार।
इञ्ञोत चाबाव ती काट्टेर नार” एट्टेड।
2 आदूग ईसू “ईम ई बेड़तो ओलेकीन एबे चूड़ूमोर जे?
एरोड आना तीग ओक केल्लीन पोडे ओक केल्लीन रेची मेन्डान तीग ओकती केल्ल बेले बाचा कियाल एर्रा।
जाम्मेनी बोसड़ाकतार” एट्टेड।
आबोड़ूल आरू सतावूल
3-4 आनातले ओर गेड़ेग ले बाटतेल चेनी किली जेतून कोप्पे ती उन्डी मेन्डीर।
आना तीग एके मुन्देल मेन्डान मापोरबून गुडीन चूड़ू एर्रू।
पतरस,
याकूब,
एऊना आरू आन्दरीयास एके ईसून एलगा कूयी किली “ईव जाम्मा एतोड एर्राव?
आरू आव जाम्मा पूरा एर्रान चिना नातोत आय?
एनी आमूंग पोक चिय” एट्टेर।
5 आटनी एन्डानूग ओड मारी ओरीन “लेक ती मेनूर।
एड एरको इमीन दोदू ओड़ा मेनकेर
6 कुबे लोग आन्न पिदीरीन पात्ती किली ‘आनी आय मसीयाल’ एनी पोक्की किली कुबे लोगीन टेगरार।
7 कोमाड आरू लेग्गे लेड़ेय एर्रान काबेरीन वेनूंग एर्रा।
एरोड बेले ईम नारचूमोर।
आटनीत लेड़ेयूल एर्रानो ई आय।
एरोड बेले चेरा चेरी वादेक चान्डे एराया।
8 ओक देचेत लोग आवूर देचेत लोगोड विरूद एर्रार।
आरू ओक राज तो लोग आवूर राज तो लोगोड लेड़ेय चाजूरार।
कुबे पोलूबूल ती नेन्दील मेलूरा आरू चाकोल पाडरा।
मेन ती मेन्डान आयालूग दिना पूरोड नोयकूड मुरीयाकतान आकाट ईव बेले आबोड़ूल वेरू मुरीयाकपेक उदापड़े एर्राव” एट्टेड।
9 आरू मारी ईसू “ईम लेक ती मेनूर।
इमीन पोँच उन्डरान कान उय्यी किली बेटाकतार।
आरू एऊदीकूल बिन्ती जोड़रान ओलेकूल ती इमीन कोड़ेनोड चाटतार।
आन्न चेत्तूग इमीन राजपालकूल मुन्देल आरू कोसकूलीन मुन्देल ओरूग गोवाई चियतूर एनी नीतीकतार।
10 आरू मापोरबून एडो पाटेन जाम्मा देचेल-देचेल तो लोगूग मुन्नी पोक चियू लागूरा।
11 इमीन चुम्मी उय्यी किली पेची ती बेटाकपेक ईम नातो पोकराम आले एनी मुन्नीत ले बिचार चाजी किली किसीयाकमोर।
गोवा चियेक इम मेन्न इमूंग पोक चियरानोन पोकूर।
नांग एनोड पोकरानेर ईम एरा;
एरोड मापोरबून नाती केचूर चिला जियोम इमीन पोकीकताड” एट्टेड।
12 ईसू मारी पोक्केड,
“तोल्लेड आपला तोल्लेडीन,
बुवा आपला चिन्डीन,
ओर चाय्येकेर एनी बेटाकतार;
चिन्डूल पापकूल आपला ईय्या बुवेन विरूद ती चुलची किली ओरीन चाय्यीक बेटाकतार।
13 आन्न पिदीरीन चेत्तूग जाम्मा इम्मोड विरूदी एर्रार।
एरोड चेरा चेरी आर्रे रेच्चा पातीयाक मेन्डानेर बाचूरार” एट्टेड।
किच किचाट बानी
14 “मापोरबून गुडीन चूत पाटतीक किली,
लोग आदीन चायूरान आकाट चाजूरान किच किचाट बानीन बीतेर ती दानीएल मापोरबून कागेत ती लिकेड नाड।
ca पोड़रानेड आदीन चोमजेकेड।
आद निलूक ओड़ा पाडb ती निलतानोन ईम चूड़ेक,
एऊदी देचेतेर पाटरे टूटरे कोप्पेकेल तूलेकेर।
15 इल पोडी मेन्डानेर ओलेक बीतराम तीग नातीन बेले उय्यू किड़ी इड़ा मेनकेर आरू ओलेक बीतराम तान्ना मेनकेर।”
16 “वाये ती मेन्डानेर मूयूरान गान्डेन एन्दरू मेल्ली चेना मेनकेर।
17 आ वादेक मेन ती मेन्डान आयचीलूग आरू कीला पापकूल तो पेल उनतीकतान आयचीलूग तूलू निक्के आबोड़ पाडरा।
18 पाञ्ञील वादेक तूलानो केट-केट आय।
आदूग ईटो आबोड़ूल पाञ्ञील वादेक एरा मेनको एनी,
मापोरबून बिन्ती जोड़ जोड़ी मेनूर।
19 एटे एनोड मापोरबू मोंजीपूरीन गेड़रान वादेक ले पात्ती,
एबेत आर्रे एराका मेन्डानो,
आरू पिटतेल बेले,
एरा कियाल तो निक्के आबोड़ूल आ जुग ती एर्रा।
20 पोरबू आ कालीन कोम चाजाकोड एडी बाचेरामीन।
ओड तानूंग एलगाक मेन्डान,
तान आचूरान लोगीन चेत्तूग एके,
आ कालीन कोम चाजेड नाड।
21 आ वादेक एड एरको इमीन,
‘चूड़ रे!
इना मसीयाल मेन्डाड’ चिलाड ‘चूड़ रे!
आना मसीयाल मेन्डाड’ एनोड आदीन बिसवात चाजूमोर।
22 एटे एनोड आन आय मसीयाल एनी टेगरानेर आरू आनी आय मापोरबून कान तीग काबेर वेन्नी किली लोगीन पोक चियरान एनी टेगरान गुरूकूल वेर्रार।
एरू नाम्बीकता,
मापोरबू आचूरान लोगीन बेले टेग्गू नातो-नातो पोरलेत काम तो चिनेल टोटीकतार आरू आचरूत एरीकतान कामूल चाजूरार।
23 आदूगी ईम लेक ती मेनूर।
मुन्नीत ले इमीन,
आन जाम्मेनी पोक चिञ्ञेन नान।”
सरग तो मांजा आंगरू वेर्रानो
24 “एरोड आ वादेक आबोड़ूल पोलान पिटतेल मारी,
पोकालीन चीकोड कुटराd
आरू नेलींग बेले विलीज आटाया।e
25 चुक्केल बादोर पोडी तीग उरकूराव।
पोडी बादोर ती मेन्डान बानील जाम्मा मेलूराव।f
26 आटनी एरेक सरग तो मांजा पान्न तीग बादोर ती निरबे रेच्चाट चाबाव तीग मेडूरान रेग तीग वेर्रानोन लोग चूड़रार।g
27 आरू ओड,
‘नालू कूटूल ती बादोर आरू मोंजीपूर तो टोकूल आर्रेत आन आचूरान लोगीन उड़चीकपूर’ एनी तान्न सरग दूतकूलीन चोटताड” एट्टेड।
तोय मेर तो पाटा
28 आनातले मारी ईसू,
“एपोट तोय मेर तीग ओक पाटेन मेरीयूर।
तोय मेरी पिलकाक किली कोड़चोड जेटा एदोतो एनी पुन्दार।
29 आटनी आन एबे पोकरान इसाबूल एर्रानोन चूड़ोड,
सरग तो मांजा वेर्रान काल एदाल-एदाल एर्रान आकाट एरमो एनी चोमजूर।
30 आन चेत्तेगी पोक्कूमेन,
ई जुग तो लोग आन पोकरान ई इसाबूल जाम्मा एर्रारे चाय्यारा।
31 बादोर आरू मोंजीपूर बेले मेट चेन्डाव।
एरोड आन्न पोद्दूल एतोडी जूकावा।”
एतोड ईसू मारी वेर्राड एनी एडी पूनार
32 आरू ईसू मारी “आ चिरीक चिलाड आ बेरा एतोड एर्रा एनी एडी पूनार।
सरग दूतकूल बेले पूनार।
मापोरबून चिन्ड बेले पूनाड।
एरोड बुवा मापोरबू ओकूरी पुट्टेड।
33 ओड वेर्रान काल एतोड आय एनी ईम पूनार।
आदूगी लेक ती मेनूर।
मेन्न तीग तायार मेन्नी किली पाव चूड़ चूड़ी मेनूर।
34 आद एके ओलेकीन चायी आवूर देचा चेन्डान मांजेन आकाट तो आय।
ओड एके आपला कामीयालेरीन का ओलेक बेटाक किली नातोन-नातोन चाजूरानो आय एनी तियारची किली राका चाजूरानेडीन,
‘चेता मेन’ एनी पोक्की किली चेन्डेड।
35 आटनी एर्रानूग ओलेक तो मांजा एतोड मेलेर्राड एनी ईम पूनार।
आदूगी पाव चूड़ चूड़ी मेनूर।
पुल सुन्दरीग काय नेनदूनालूग काय कोर्र कूयेक काय वेवेक वेर्राड एनी आदीन ईम पूनार।
36 ओड उदापड़े वेरोड;
ईम मेन्न तीग तायार एराका मेन्डानोन चूड़ा मेनकेड।
37 एबे आन इमूंग पोक चियरानो जाम्मेगी आय।
लेक ती मेनूर” एट्टेड।