केटाल बेंट इडरानो
21
1 आनातले ईसू मारी नेंजेर एतीक किली सावकारकूल आपला-आपला बेंटीन गुडीत सुन्दूप ती इडरानोन चूड़ेड।
2 आरू ओक चाकोल केटाल बेले आना इरडू ताम तो पिटीलेक कुदरी पोयसेलीन इडेक ओड चूड़ेड।
3 तेबे ओड,
“आन इमीन चेत्तेगी पोक्कूमेन,
मापोरबून नेंजेरूग ई चाकोल केटाल जाम्मेग ले आगेर,
ई चान्दा इडरान सुन्दूप ती इट्टो ना।
4 एटे एनोड ओर जाम्मा लोग मारी तामूंग मेन्डान चेड़ीगेन तीग इना बेंट चिञ्ञेर।
आ केटाल एके चाकोल ती मेनेक,
तानूंग जीवनेग मेन्डान जाम्मेनी चिय काट्टो” एट्टेड।
ईसू गुडीन उजड़ाकतान इसाब ती मुन्नी पोकरानो
5 ओदो लोग गुडीन बीतेर ती आदीन एञ्ञोत चाबाव तो केल्लकूलोड आरू बेंट aचियरान बानीलोड चिंगारतेर नार एनी पोकरीर।
आदूग ईसू,
6 “आटो दिनेल वेर्राव,
आतोड ईम चूड़ूमोर जे?
आना तीग ओक केल्लीन पोडे ओक केल्लीन रेची मेन्डान तीग ओकती केल्ल बेले बाचा कियाल एर्रा।
पुयतेनी उजड़ाकतार” एट्टेड।
ईव जाम्मा एतोड एर्राव?
7 आरू ओर ओनीन,
“ए गुरू,
ईव जाम्मा एतोड एर्राव?
आरू ईव जाम्मा एरू कानपेक तो चिना नातोत आय?”
एनी जाच आडेर।
8 ओड ओरीन,
“ईम लेक ती मेनूर;
एड एरको इमीन दोदू ओड़ा मेनकेर।
एटे एनोड कुबे लोग आन्न पिदीरीन पात्ती किली,
‘आनी आय मसीयाल आरू मसीयाल कोस आकाट आंगरूरान बेरा लेग्गे एदेरनो ना’ एन्डार।
ईम ओर पोटतेल चेनमोर।
9 आरू ईम लेड़ेयूल आरू बुमकाल एर्रान काबेरीन वेनोड नारचूमोर,
एटे एनोड ईव पोईल एर्रानोवी आय;
एरोड चेरा चेरी वादेक चान्डे एराया” एट्टेड।
आबोड़ूल आरू सतावूल
10 आनातले ओड ओरीन,
“ओक देचेत लोग आवूर देचेत लोगोड विरूद एर्रार।
आरू ओक राज तो लोग आवूर राज तो लोगोड लेड़ेय चाजूरार।
11 बेड़कूल-बेड़कूल नेन्दील मेलूरानोव एर्राव आरू कुबे पोलूबूल ती चाकोल पाडरा आरू मोरनील एर्राव।
बादोर ती निक्के नार्र देलीत गेटनेल एर्राव आरू निक्के बेड़कूल चिनेल देका पाडराव।
12 एरोड ई पाटेल एर्रान ले मुन्नी ओर इमीन आन्न पिदीरीन चेत्तूग चुम्मी उयरार,
आरू इमीन सताकतार,
आरू एऊदीकूल बिन्ती जोड़रान ओलेकूल ती ओपीक चियरार,
आरू जेल ती केटपीकतार,
आरू कोसकूल आरू राजपालकूल मुन्देल उयरार।
13 एरोड इद इमूंग आन्न बीतेर ती गोवाई चियरान पोलोंग टोन्डूरा।
14 आदूगी आम नातो जवाब चियराम एनी मुन्नीत ले बिचार चाजी किली किसीयाकपामा एनी मेन्न तीग बेरकेच मेनूर।
15 एटे एनोड आन इमूंग ऊबाल आरू बुदी चियरान;
आदीन इम विरूदीकूल काटू ओड़ार आरू इमीन गेलती पोक्कू ओड़ार।
16 इम ईय्या बुवेर,
आरू तोल्लेनकूल,
आरू कुटूमतेर,
आरू चेंग जोंरीयेतेर बेले इमीन चुमीकतार;
इम कान तीग एंगोटा लोगीन गो चाय्यीकतार बेले।
17 आन्न पिदीरीन चेत्तूग जाम्मा लोग इम्मोड विरूदी एर्रार।
18 एरोड इम तेल्ल तो ओक तेलताकीन बेले उरकीक ओड़ार।b
19 ईम रेच्चा पातीयाक मेन्डान ती ईम इम जियोमीन जुग जुगूग बाचाकतार।”
एरूसेलेम उजड़ूरान इसाब ती मुन्नी पोकरानो
20 एरोड एरूसेलेम बोँरेक पालटेनकूल मान्देल कोपरानोन चूड़ेक,
आद उजड़ूरानो लेग्गे एदेरनो ना एनी चोमजूर।
21 तेबे एऊदी देचेतेर पाटरे टूटरे कोप्पेकेल तूलेकेर;
आरू एरूसेलेम गेड़ा बीतराम मेन्डानेर आना तीग पेपेकेर;
आरू गेड़ेन बाटतेल मेन्डानेर आना तान्ना मेनकेर।
22 एटे एनोड लिकी मेन्डान जाम्मा पाटेल पूरा एर्रान डेन्ड बेटूरान दिनेल ईव्वी एर्राव।
23 आ वादेक मेन ती मेन्डान आयचीलूग आरू कीला पापकूल तो पेल उनतीकतान आयचीलूग तूलू निक्के आबोड़ पाडरा।
एटे एनोड मोंजीपूर ती निक्के आबोड़ आरू आनात लोगीन कान मापोरबून रिच लागूरा।
24 ओरीन कान्डेल तो वान्डूलोड उरकीक काडरार।
आरू लोग ओरीन आवूर देचेल-देचेल ती काटकी किली उयरार आरू एऊदीकूल चिला लोगीन बेरा पूरारे,
एरूसेलेमीन एऊदीकूल चिला लोग रेमदूरार।
सरग तो मांजा वेर्रानो
25 “पोकाल,
नेलींग आरू चुक्केल ती चिनेल देका पाडराव;
आरू सोमून्द निक्के एलकीर आट्टी किली आर्रानूग,
मोंजीपूर ती देचेल-देचेल तो लोग बायबीताल आरू आबोड़ एर्रार।
26 पोडी बादोर ती मेन्डान बानील जाम्मा मेलकीक एर्रानूग मोंजीपूर ती वेर्रान गेटनेल मारी एट्टोव-एट्टोव वेर्राव बे एनी पाव चूड़ चूड़ी लोगूग नार्रीन मारूग बुकचूडी आटरा।
27 तेबे ओर सरग तो मांजा ताकोत आरू निरबे रेच्चाट चाबाव तीग मेडूरान बेड़तो रेग तीग बादोर ती वेर्रानोन चूड़रार।
28 एपोर ई पाटेल एरू मुरीयाकपेक,
इमीन चोड़ाकतान बेरा एदाल-एदाल एरमो एनी ईम डाडू एरी किली आचा चाजूर।”
तोय मेर तो चोमजाकतान डाग्गा
29 ईसू ओरीन मारी ओक चोमजाकतान डाग्गा पोक्केड:
“तोय मेरीन आरू जाम्मा मेरकूलीन चूड़ूर।
30 आव कोड़चू मुरीयाकपोड ईम चूड़ी किली कुदे जेटा एदोतो एनी पुन्दार।
31 आटनी आन एबे पोकरान इसाबूल एर्रानोन चूड़ोड,
मापोरबू जाम्मेन आंगरूरानो एदाल-एदाल एर्रान आकाट एरमो एनी चोमजूर।
32 आन चेत्तेगी पोक्कूमेन,
ई जुग तो लोग आन पोकरान ई इसाबूल जाम्मा एर्रारे चाय्यारा।
33 बादोर आरू मोंजीपूर मेट चेन्डाव,
एरोड आन्न पोद्दूल एतोडी जूकावा।”
लेक ती मेनूर
34 “निक्के निसा उन्नी चोरनी किली कियाल चाजूरान तीग आरू इम जियोमूग किसीयाकतान तीग इम मेन्न बूड़ चेना मेनको एनी आरू सरग तो मांजा वेर्रान दिना इम कान किटूक मेन्नी उदापड़े पान्दा आकाट वेरा मेनको एनी लेक ती मेनूर।
35 एटे एनोड आद मोंजीपूर ती मेन्डान जाम्मा लोगीन कान वेर्रा।
36 एरोड एतोड नांग चेता मेन्नी वेर्रान ई जाम्मा गेटनेल तीग बाचू ताकोत बेटू एरको आरू सरग तो मांजेन मुन्देल निलूक एरको एनी बिन्ती जोड़ जोड़ी मेनूर” एट्टेड।