लूका 22

ईसून आनकीक गात चुमरानो

(मत्ती 26:1-5, 14, 16; मरकू 14:1, 2, 10, 11; एऊना 11:45-53)

1 पुलपा पोर्र तो रोटीत तियार लेग्गे एदी मेन्डू। आदीन तियार बेले एन्डार। 2 आरू बेड़कूल पेलाचकूल आरू मूसाल नीतीन मेरचीकतानेर एके ईसून एटे चाजी आनकीकताम एनी गात चुम्मी मेन्डीर, एरोड ओर लोग नातो एरको चाजूरार एनी नारचूरीर।

एऊदा ईसून चुमीक चियरानो

3 तेबे बारा जान चेलालेर कान तीग, एऊदा इसकारीयोती एन्डानेडीन मेन्नीन चेयतान आपला काबजे ती चाजोतो। 4 ओड बेड़कूल पेलाचकूलीन आरू गुडीन राका चाजूरानेरीन मुकीयालेर लेग्गाट चेनी किली ईसून एटे चुमीक चियरान एन्डान इसाब ती ओरोड ऊबेड। 5 आदूग ओर वेड़का एञ्ञेर, आरू ओनूग पोयसेल चियराम एनी पाटा चिञ्ञेर। 6 आदूग ओड राजी पाड्डी किली जोप चिला वादेक ओनीन ओर केय्य ती ईसून चुमीक चियरान एनी दांव कातीड।

ईसू चेलालेर चेंगे मापोरबू आड़ञूरान तियार बोजी तिनूंग तायार एर्रानो

(मत्ती 26:17-25; मरकू 14:12-21; एऊना 13:21-30)

7 आनातले पुलपा पोर्र तो रोटी तियार तिन्दान दिना एदोतो। आ चिरीक मापोरबू आड़ञूरान तियार तिनूंग ओक मेन्डा पापीन जेतरा चाजूरानो आय। 8 आदूग ईसू पतरस आरू एऊनेन, “चेनी किली आमूंग मापोरबू आड़ञूरान तियार तिनूंग तायार चाजूर” एनी चोटतेड। 9 आदूग ओर ओनीन, “आम इदीन आरे वेन्डरानो आय?” एनी जाच आडेर। 10 आदूग ईसू ओरीन, “चूड़ूर! एरूसेलेम गेड़े ती तान्नूके ओक मांजा ओक टान्डी ती नीर काञी उयरानोन बेटूरार। ओन पोटतेल-पोटतेल ओड चेन्डान ओलेक ती चेनूर। 11 आरू आ मांजा तानरान ओलेक तो सियानीन, ‘आन आरू आन्न चेलालेर मापोरबू आड़ञूरान तियार तिन्दान चेगा बाकरा आरोत आय? एनी गुरू जाच आडूमेड’ एनूर। 12 तेबे ओड इमीन जुगाड चाजी मेन्डान ओक बेड़तो पोडीत बाकरेन टोटीक चियराड; आन्नी तायार चाजूर” एट्टेड। 13 आदूग ओर चेन्डेर, आरू ओड एटे पोक्की मेन्डीड आटनी बेट गाट एञ्ञेर। आटनी एर्रानूग मापोरबू आड़ञूरान तियार इसाब तोन आना वेन्डेर।

पोरबून बोजीन नीतीकतानो

(मत्ती 26:26-30; मरकू 14:22-26; 1कुरी 11:23-25)

14 बेरा एदूरानूग ईसू, पोरबू नीतीकतानेर चेंगे आना टेबूल ती तिनूंग उन्डेड। 15 आरू ओड ओरीन, “आबोड़ बेटूरान ले मुन्नी मापोरबू आड़ञूरान ई तियार इम चेंगे तिनूंग आन निक्के मेन्न चाजूरीन। 16 एटे एनोड मापोरबून राज ती आद पूरा एर्रारे आन आदीन मारी एतोडी तिनाना एनी आन इमीन पोक्कूमेन” एट्टेड। 17 तेबे ओड बेटकीन पात्ती किली मापोरबून जुवार पोक्की किली, “इदीन पातूर आरू ईम जाम्मेगी पायपूर। 18 एटे एनोड मापोरबून राज वेर्रारे आन ई आंगूर रेसीन मारी एतोडी बेले उनाना एनी आन इमीन पोक्कूमेन” एट्टेड।

19 मारी ओड रोटीन पात्ती किली मापोरबून जुवार पोक्केड आरू रोटीन गोन्दाक किली ओरूग चियी किली, “इद इम चेत्तूग ओपीक चियरान आन्न मेन आय। आनीन चुरता चाजू इटनी चाजारे मेनूर” एनी पोक्केड।

20 आटनी ओर तिन्दान ले पिटतेल मुत्तेन बेले पात्तेड आरू “ई मुत्तेत रेस, इम चेत्तूग आन चिड़ाकतान पुन जुमान इसाब तो आन इड़कीकतान आन्न नेतीर आय। 21 एरोड चूड़ूर आनीन चुमीक चियरानेड आन्न चेंगे उन्डी किली तिनमेड। 22 एटे एनोड गो ओनूग एटे नीतीकतानो मेन्डा आटनी चेनमेड, एरोड ओनीन चुमीक चियरानेडूग ओ! ओ! बेड़तो गेरा एर्रा” एट्टेड। 23 तेबे ओर ओकूर ओकूरीन आम्म कान तीग एड आय ईटो कामीन चाजूरानेड एनी जाच आडूरीर।

बेड़तेड एड एनी पोका पोकी एर्रानो

24 बारा जान चेलालेर ताम्म कान तीग मुकीयाल एड आय एनी बेले ऊबा ऊबी एञ्ञेर। 25 ईसू ओरीन, “एऊदीकूल चिला लोगीन कोसकूल ओरीन दामकाक-दामकाक आंगरूरार आरू ओर कान पान्न चेलाकतानेर ओरीन चेंग चियरानेर एन्डार। 26 एरोड ईम आटे एरमोर। एरोड इम कान तीग एड एरको बेड़तेड मेन्डानेर इनमानतेर आकाट आरू मुकीयालेर एके सेवा चाजूरानेर आकाट एरकेर। 27 एटे एनोड एड इजीत्तेड आय? तिनूंग उन्डरानेड इजीत्तेड आय? काय ओनूग टोन्ड चियरानेड इजीत्तेड आय? एटे तिनूंग उन्डरानेड इजीत्तेड एराड आदूग? एरोड आन इम नाड़बूल सेवा चाजूरानेन आकाटतेन आय।”

28 “ईम आनूंग केट-केट एरेक आन्न चेंगे मेन्डानोर आय। 29 आरू एटे आन्न बुवा आनूंग ओक राजीन नीतीक चिञ्ञेड, आटनी आन बेले इमूंग नीतीक चियमेन। 30 तेबे ईम आन्न राज ती आन्न तिन्दान कान तिनकोर उनकोर, आरू राज गाद्दील ती उन्डी किली इसराएल लोगीन बारा गोटा कुटूमतेरीन नियाव चाजोकोर एनी आन इमीन नीतीकमेन” एट्टेड।

पतरस दोदूराड एन्डानोन मुन्नी की पोकरानो

(मत्ती 26:31-35; मरकू 14:27-31; एऊना 13:36-38)

31 “सिमोन, ए सिमोन चूड़, चेयतान गोंगकूलीन केडूरान आकाट इमीन पोरकू आडोतोना। 32 एरोड ईन बिसवात चाजूरानोन चाया मेनकोत एनी आन इनूंग बिन्ती जोड़ेन नान आरू ईन आन्नेल मारी मेल्लेक आवूर चेलालेरीन बेरकेच चाज” एट्टेड। 33 आदूग ओड ईसून, “ए पोरबू! आन इन चेंगे जेल ती चेनूंग आरू चाय्यू बेले तायार मेन्डान” एनी पोक्केड। 34 आदूग ईसू, “ए पतरस, आन इनीन पोक्कूमेन इने कोर्र कूयाका मेनेक ईन मुप्पोट, आन ईसून पूनान एनी दोदूरात” एट्टेड।

ईसून बीतेर ती लिकी मेन्डानो पूरा एर्रानो आय

35 मारी ईसू ओरीन, “आन इमीन तेयलील, जोरेल, आरू पानेयूल चिलाका चोटची मेनेक, इमूंग नातोव बेले कोम पाट्टो काय एटे?” एनी पोक्केड। आदूग ओर, “नाती कोम पाडोया” एनी पोक्केर। 36 आदूग ईसू ओरीन, “एरोड एपोर एरूग तेयली मेन्डा ओड आदीन पातेकेड आरू आटनी जोरा बेले मेनोड आदीन बेले पातेकेड आरू एरूग बेले कान्डा चिलाकोड ओड आपला मूयूरान गान्डेन वीड़ी किली ओकूत पातेकेड। 37 आन इमीन पोक्कूमेन, ‘ओनीन ओदेरोम चाजूरानेर बीतेर ती बिड़ाकतेर’ एनी मापोरबून कागेत ती लिका मेन्डानो आन कान पूरा एर्रानो ई आय; एटे एनोड आन्न बीतेर ती लिकी मेन्डान पाटेल पूरा एरमोव बे” एनी पोक्केड। 38 आदूग ओर, “ए पोरबू, चूड़, इना इरडू कान्डेल मेन्डाव” एनी पोक्केर। आदूग ओड “ई पाटेन ऊबूमोर; एर्रा” एट्टेड।

जेतून कोप्पे ती ईसू बिन्ती जोड़रानो

(मत्ती 26:36-46; मरकू 14:32-42)

39 तेबे ईसू गेड़े तीग वाल पेची किली तान रोजे चाजूरान आकाट जेतून कोप्पे ती चेन्डेड आरू ओन चेलालेर बेले पोटतेल-पोटतेल चेन्डेर। 40 आ पाड ती एदी किली ओड ओरीन, “ईम पोरकूरान ती बीड़ा मेनकोर एनी बिन्ती जोड़ूर” एनी पोक्केड। 41 आरू ओड कुदे ओर ले केल्ल तापरान आत्ती कोमाड आकाट चेन्डेड, आरू माटीकूटेल चियी किली ईटे बिन्ती जोड़ू मुरीयाकतेड: 42 “ए बुवा, इन मेन्न मेनोड, डेन्ड एर्रान इसाब तो ई बेटकीन आकाट तोन आन्न तीग गुचाक। एरोड बेले आन्न बिचार ती एरा। इन बिचारीन आकाटी एरको” एट्टेड। 43 तेबे सरग तीग ओक सरग दूत ओनूग देका पाड्डी किली बेरकेच चिञ्ञेड। 44 ईसू निक्के बायबीकाल एरी किली पूरा मेन्न लागाक किली बिन्ती जोड़ेड। आरू ओन मुड़कूब एके नेतीर तो बेड़कूल तीपेल आकाट नेन्दील ती तीपूरू। 45 आरू ईसू बिन्ती जोड़रान कान तीग चुलची किली तान्न चेलालेर लेग्गाट वेञ्ञेड आरू ओर मुर मुरा एर्रान चेत्तूग तुञ्ञूमेर एनी चूड़ेड। 46 आरू ओड ओरीन, “नांग तुञ्ञूमोर? चुलपूर, ईम पोरकूरान ती बीड़ा मेनकोर एनी बिन्ती जोड़ूर” एनी पोक्केड।

ईसून चुमीक चियरानो

(मत्ती 26:47-56; मरकू 14:43-50; एऊना 18:3-11)

47 ईसू ईवीन ऊब ऊबी मेनेक आना ओक जोप वेञ्ञो आरू बारा जान चेलालेर कान तीग ओकूर एऊदा मुन्देल-मुन्देल वेर्रीड। ओड ईसून चोन्ड मोटरान एनी लेग्गे वेञ्ञेड। 48 एरोड ईसू ओनीन, “ए एऊदा, चोन्ड मोटी किली सरग तो मांजेन चुमीकमोत चिला?” एनी पोक्केड। 49 ओन बोँरेक मेन्डानेर एटे एर्रानो मेन्डा एनी चूड़ी किली, “ए पोरबू कान्डेल चेलाकताम आदूग?” एट्टेर। 50 आरू ओर कान तीग ओकूर मुकीयाल पेलाचीन कामीयालीन कान कान्डा चेलाक किली ओन वेला केकोलीन कुट्टेड। 51 एरोड ईसू, “एर्रा, आगेर एरा” एनी किली ओन केकोलीन टोड्डी किली ओनीन रेच्चा चाजेड। 52 तेबे ईसू तानीन चुम्मू वेरी मेन्डान बेड़कूल पेलाचकूल आरू गुडीन राका चाजूरानेरीन मुकीयालेरीन आरू सियानकूलीन, “एटे आन लोगीन आबूच एरीकतान आदूग? ईम कान्डेल आरू बाड़येल पात्ती आनीन चुम्मू वेञ्ञोर नार? 53 आन मारी रोजे मापोरबून गुडीत आवारी बीतराम इम चेंगे नी गो मेट्टेन, आतोड गो चुमोरा। एरोड इद इम बेरा आय आरू एबे चीकोड आकाट मेन्डान चेयतान पान्न चेलाकमो” एट्टेड।

पतरस आन ईसून पूनान एनी पोकरानो

(मत्ती 26:57, 58, 67-75; मरकू 14:53, 54, 66-72; एऊना 18:12-18, 25-27)

54 मारी ओर ईसून चुम्मी किली उञ्ञेर आरू मुकीयाल पेलाचीन ओलेक ती एन्दरेर। पतरस एके ईसून पोटतेल किन्डीक कोमाड बिड़ी किली चेन्डीड। 55 आरू ओदेर कोरी ती किच ऊन्दी किली उलजी मेन्डीर, आरू पतरस ओर नाड़बूल उन्ड काट्टेड। 56 तेबे ओक कामीयाट ओनीन किच विलीज ती उन्डरानोन चुड़ोतो आरू ओन टिटाक केचीक किली, “ऊडी बेले गो ओन चेंगे मेन्डीड” एनी पोकोतो। 57 ओड एके, “एरा ए आयालीने! आन पूनान” एनी पोक्केड। 58 डेन्डीक मेन्नी मारी ओकूर ओनीन चूड़ी किली, “ईन बेले गो ओर चेंगेतोती आय” एट्टेड। आदूग पतरस एके, “ए मांजेने आन एरान” एट्टेड। 59 मारी ओक गेन्टा आकाट मेन्नी किली मारी ओकूर “चेत्तेगी ई मांजा बेले गो ओन चेंगे मेट्टेड, एटे एनोड ऊडी बेले गो गलीलतेड आय” एनी पोक्केड। 60 आदूग पतरस एके, “ए मांजेने, ईन नान एनमोत आले; आन ऊनीन पूनान” एनी पोकरीड। आरू ओड पोक पोक्की मेनेक कोर्र कूयोतो। 61 तेबे पोरबू मोकोम ओरची किली पतरसीन टिटाक चूड़ेड आरू पतरस “इने कोर्र कूयाका ईन मुप्पोट ‘आन ईसून पूनान’ एनी दोदूरात” एनी पोरबू पोकरान पाटेन चुरता चाजेड। 62 आरू ओड वाल पेची किली पाचताक किली निक्के आड़रीड।

ईसून इजीत चुमरानो

63 ईसून राका चाजूरानेर ईसून मोचका पाटा ऊब ऊबी चाटतेर। 64 आरू ओन बोम्मेल आयबी किली ओनीन, “इनीन एड ताप्पेड एनी जान” एट्टेर। 65 आरू ओर ईसून कुबे पाटेल ओन विरूद ती निन्दरी किली ओनीन इजीत चुम्मेर।

बेड़तो पोँचीन मुन्देल ईसू

(मत्ती 26:59-66; मरकू 14:55-64; एऊना 18:19-24)

66 पोका वेवूरानूग एऊदीकूलीन सियानकूल, बेड़कूल पेलाचकूल आरू मूसाल नीतीन मेरचीकतानेर उलजेर। आरू ईसून ताम्म बेड़तो पोँच तो कान उय्यी किली जाच आडेर। 67 “ईन आय एरोड आमीन पोक काड” एट्टेर। एरोड ईसू ओरीन, “आन इमीन पोकोड बेले, ईम चेत्त पातीयाकपारा। 68 आरू जाच आडोड जवाब बेले चियारा। 69 एरोड इने तीग सरग तो मांजा सोब ले लाव तो मापोरबून इजीत तो पाड ती उन्डी मेन्डाड” एनी पोक्केड। 70 इदीन वेन्नी किली जाम्मा लोग, “आटे तीग ईन मापोरबून चिन्ड आय काय एटे?” एट्टेर। आदूग ईसू ओरीन, “ईम गो कुदे आटनी पोक्कूमोर” एट्टेड। 71 तेबे ओर, “एपोट एडी गोवाई पोक्कू लागाया; एटे एनोड आम कुदे ओन चोन्डतोन वेट्टोम” एनी पोक्केर।