ईसू तान्न चेलालेरीन केलूल नोडरानो
13
1 मापोरबू आड़ञूरान तियारूग ले मुन्नी ईसू,
तानूंग मोंजीपूरीन चायी बुवेन लेग्गाट चेन्डान बेरा एदोतो ना एनी पुन्दीड।
आरू मोंजीपूर ती मेन्डान तान्न लोगीन,
ओड एटे चोग चाजूरीड,
आटनी चेरा चेरी आर्रे चोग चाज चाजी मेट्टेड।
2 ईसू आरू ओन चेलालेर बात बेरा तिनूंग उन्डी मेन्डीर।
चेयतान एन्डानो ईसून चुमीक चियरान उवाटीन,
सिमोनीन चिन्ड,
एऊदा इसकारीयोतीन गेरोब ती उपजाक मेन्डू।
3 ईसू ताम्म बुवा,
जाम्मेनी तान्न काबजे ती ओपीक चिञ्ञेड नाड,
आरू तान मापोरबून टिटाक ले वेञ्ञेन नान,
आरू मापोरबूनेली मारी मेल्लान बे एनी पुन्नी किली,
4 तिनूंग उन्डरान पाड तीग चुलची किली,
तान पोडी तुन्दरान कुड़तेन पुच्चेड आरू ओक तुवालीन किटे ती काट्टेड।
5 आनातले ओक नेकी ती नीर कोप्पीक किली,
तान्न चेलालेरीन केलूलीन नोडू मुरीयाकतेड आरू तान किटे ती काट्टी मेन्डान तुवालीनोड ताच्चू मुरीयाकतेड।
6 ओड सिमोन पतरसीनेल वेञ्ञेड।
आदूग पतरस ओनीन,
“ए पोरबू आन्न केलूलीन ईन नोडरात आदूग” एट्टेड।
7 आदूग ईसू ओनीन,
“ईन एबे आन नातो चाजूमेन एनी पूनात,
एरोड पिटतेल ईन चोमजूरात” एट्टेड।
8 तेबे पतरस ओनीन,
“एरा ईन आन्न केलूलीन एतोडी मुरले नोडूमेन” एट्टेड।
आदीन वेन्नी किली ईसू ओनीन,
“एबे आन इनीन नोडाकोड,
आन्नो,
इन चेंगे नाती चेगेय चिल्ला” एट्टेड।
9 आदूग सिमोन पतरस,
“ए पोरबू,
आटे आय एरोड ईन आमान आन्न केलूलीनी एरा,
एरोड आन्न केय्यूल आरू तेल्लीन बेले नोड तेबे” एट्टेड।
10 तेबे ईसू ओनीन,
“एड नीर मिञ्ञेड नाड,
ओनीन केलूलीन चायी नाती नी नोडू लागाया,
एरोड ओड पूरा चुकनाय मेन्डाड।
आरू ईन बेले चुकनाय मेन्डात,
एरोड ईम जाम्मा लोग एरा” एट्टेड।
11 ईसू तानीन चुमीक चियरानेड एड आय एनी पुन्दीड,
आदूगी आय ओड,
“ईम जाम्मा चुकनाय चिल्लार” एन्डीड।
12 ईसू,
ओर केलूलीन नोडीक पोल्लानूग,
तान्न कुड़तेन तुन्दी किली मारी तान्न पाड ती उन्डेड आरू ओरीन,
“आन इम्मोड एटे चाजेन आदीन ईम चोमजोर काय एटे?
13 ईम आनीन गुरजी आरू पोरबू एनी कूयमोर जे?
आद रेच्चा आय।
एटे एनोड आन आटनीतेन आय।
14 एबे आन इमूंग पोरबू आरू गुरू मेन्नी किली बेले इम केलूलीन नोट्टेन गो,
आटनी ईम बेले ओकूर ओकूरीन केलूलीन नोडरानो आय।
15 एटे एनोड आन इमीन एटे चाजूरानो आय एनी टोटीक चिञ्ञेन नान।
आटनी आन इमूंग चाजूरान आकाट ईम बेले चाजूरानो आय।
16 कामीयाल आपला सावकारीन ले बेड़तेड एराडा,
आरू काबेर तो मांजा एके तानीन चोटतानेडीन ले बेड़तेड एराड एनी आन इमीन चेत्ते पोक्कूमेन।
17 एबे ईम ई पाटेलीन पुट्टोर आरू आटनी चेलोड ईम निक्के आसतीरीन बेटूरार।
18 आन ईम जाम्मेन बीतेर ती पोकाना;
एरीन आन आचेन नान ओरीन आन पुट्टेन।
एरोड इद मारी ‘एड आन्न चेंगे तिन्दाड,
ओडी आन विरूदी एञ्ञेड नाड’a एनी मापोरबून कागेत ती लिकूरान पाटा पूरा एरू आय।
19 ई जाम्मा पाटेल एरेक आन ओडी आय एनी,
ईम बिसवात चाजोकोर एनी,
आन आटे एर्रान ले मुन्नी की इमीन पोक्कूमेन।
20 एड आन चोटतानेडीनोन पातीयाकताड,
ओड आनीन पातीयाकताड;
आरू एड आनीन पातीयाकताड,
ओड आनीन चोटतानेडीन पातीयाकताड एनी,
आन इमीन चेत्ते पोक्कूमेन” एट्टेड।
इम कान तीग ओकूर आनीन चुमीकताड
21 ईवीन पोकरान पिटतेल ईसून जियोम बायबीताल एञ्ञो आरू ओड,
“आन इमीन चेत्तेगी पोक्कूमेन,
इम कान तीग ओकूर आनीन चुमीक चियराड” एट्टेड।
22 आदूग ओन चेलालेरूग एके ओड एर इसाब ती ईटे पोक्कूमेड एनी बुदी बूलकी किली,
ओकूरीन ओकूर चूड़ू मुरीयाकतेर।
23 आरू ओन चेलालेर कान तीग,
ईसूग लाडराल मेन्डान ओक चेलाb,
ईसून लेग्गे उन्डी मेन्डीड।
24 तेबे सिमोन पतरस ओनेल चायगा टोटीक किली ओनीन,
“ओड एर इसाब ती पोक्कूमेड” एनी जाच आडू पोक्केड।
25 तेबे ओड आटनी ईसून एदरोम लेग्गे ओतकी किली,
“ए पोरबू ओड एड आय?”
एनी जाच आडेड।
26 आदूग ईसू,
“आन एरूग ई रोटी गोन्देन,
काट ती तुरबी किली चियरान ओडी आय” एट्टेड आरू ओड रोटी गोन्देन तुरबी किली सिमोनीन चिन्ड एऊदा इसकारीयोतीग चिञ्ञेड।
27 आ गोन्देन एतान पिटतेल,
चेयतान ओन गेरोब ती तान्नोतो।
तेबे ईसू ओनीन,
“ईन नातो चाजू कान्डूकमोत,
आदीन तुरते नी चाज” एट्टेड।
28 एरोड आना तिनूंग उन्डी मेन्डानेर ईसू नांग ओनीन ईटे पोक्कूमेड एनी एडी चोमजू ओड़ेर।
29 आरू एऊदेन केय्य ती पोयसेल तो जोरा मेन्डू।
आदूग ईसू ओनीन,
“तियारूग आमूंग नातो-नातो लागूरा आवीन पात” चिलाड “गेरीब लोगूग नातो एरको चिय काड” एनमेड एनी ओदेर चोमजेर।
30 तेबे एऊदा आ रोटी गोन्देन पात्ती किली तुरते बाटतेल पेतेड आरू आतोड चीकोड एरी मेन्डू।
पुन नियोम
31 ओड बाटतेल चेन्डान पिटतेल ईसू,
“एपोर मापोरबू सरग तो मांजेन जाम्मेग ले बेड़तेड चाजूराड आरू ओन तीग लोग मापोरबून जाम्मेग ले बेड़तेड आय एनी मानूरार।
32 आरू ओन तीग लोग मापोरबून जाम्मेग ले बेड़तेड आय एनी मानेक,
मापोरबू तानी,
तान्न चिन्डीन जाम्मेग ले बेड़तेड चाजूराड आरू आदीन तुरते नी चाजूराड।
33 ए आन्न चिन्डूल आकाटतोरे,
आन डेन्डीकी इम चेंगे मेन्डान बे।
आनातले ईम आनीन कानतार;
आन एऊदीकूलीन सियानकूलीन,
‘आन चेन्डान कान ईम वेरू ओड़ार’ एनी मेन्डीन।
आटनी एपोर आन इमीन बेले पोक्कूमेन।
34 आन इम्मोड चोग चाजेन,
आटनी ईम बेले ओकूरीन ओकूर चोग चाजूर एनी,
इमूंग ओक पुन नियोमीन चियमेन।
35 एबे ईम ओकूरीन ओकूर चोग चाजोड,
ईम आन्न चेलालेर आय एनी लोग इमीन पुन्दार” एट्टेड।
ईसू पतरस दोदूरानोन मुन्नी की पोकरानो
36 सिमोन पतरस ओनीन,
“ए पोरबू ईन आरे चेनमोत?”
एट्टेड।
ईसू ओनीन,
“एबे आन आरे चेनमेन,
आना ईन आन्न पोटतेल-पोटतेल वेरू ओड़ात।
एरोड इदीन ले पिटतेल आन्न पोटतेल वेर्रात” एट्टेड।
37 पतरस ओनीन,
“ए पोरबू आन नांग इन पोटतेल वेरू ओड़ान?
आन गो,
इन चेत्तूग आन्न जियोमीन बेले ओपीक चियरान” एट्टेड।
38 आदूग ईसू ओनीन,
“एटे,
ईन आन्न चेत्तूग चेत्तेगी इन जियोमीन बेले चियरात आदूग?
‘इने कोर्र कूयाका मेनेक ईन मुप्पोट आन ईसून पूनान एनी दोदूरात’ एनी चेत्तेगी पोक्कूमेन” एट्टेड।