एऊना 14

आनी पाव आरू चेत्त आरू जियोम आय

1 आनातले ईसू तान्न चेलालेरीन, “इम मेन्न बायबीताल एरा मेनको; मापोरबून पोडे बिसवात चाजूर; आन्न पोडे बेले बिसवात चाजूर। 2 आम्म बुवेन ओलेक ती कुबे बाकरेल मेन्डाव; आटनी चिलाकोड आन इमीन, ‘आन इमूंग पाड तायार चाजू आना चेनमेन’ एनी पोकेनामीन। 3 आरू आन चेनी किली इमूंग पाड तायार चाजोड, आन मारी वेरी किली, आन आरे मेन्डान, आना ईम बेले मेनकोर एनी, इमीन आन्न कान उयरान। 4 आरू आन आरे चेनमेन आनात पावीन ईम पुट्टोर” एट्टेड। 5 आदूग तोमाल ओनीन, “ए पोरबू, आम ईन आरे चेनमोत एनी पूनाम। मारी पावीन एटे ती पुनूंग नाम्बीकताम गाट?” एट्टेड। 6 तेबे ईसू ओनीन, “आनी पाव आरू चेत्त आरू जियोम आय; एडी आनीन चायी बुवेनेल चेनूंग ओड़ार। 7 एबे ईम आनीन पुट्टोर आदूग आम्म बुवेन बेले पुट्टोर; आरू एबेत ले ईम ओनीन चेत्ते पुट्टोर, आरू ओनीन चूड़ोर नार बेले” एट्टेड।

8 तेबे पिलीपूस ओनीन, “ए पोरबू, बुवेन आमीन टोटीक चिय; आद्दी आमूंग बाल्ले एर्रा” एट्टेड। 9 ईसू ओनीन, “ए पिलीपूस, आन आञ्ञोत कोम्बेर ले इम चेंगे नी मेन्डान, आरू एबले बेले ईन आनीन पूनात आदूग? एड आनीन चूड़ेड नाड ओड बुवेन बेले चूड़ेड नाड। मारी एटे ती ईन बुवेन टोटीक एनमोत गो? 10 एटे आन आम्म बुवेन कान, आरू आम्म बुवा आन कान मेन्डाड एनी, ईन बिसवात चाजाता आदूग? आन इमीन पोक्कूमेन, आन पोकरान पाटेल आन्नोव एराव, एरोड आन्न गेरोब ती बुवा डेरा पात्ती किली तान्न कामूलीन चाजूराड। 11 आन आम्म बुवेन कान मेन्डान आरू आम्म बुवा एके आन्न कान मेन्डाड एनी, आन पोकरानोन ईम बिसवात चाजूर; चिलाड आन चाजूरान कामूलीन चेत्तूग बेले गो बिसवात चाजूर। 12 एड एरको आन्न पोडे बिसवात चाजूराड, ओड आन चाजूमेन जे? आटनीत कामूलीन चाजूराड। आरू आन आम्म बुवेन लेग्गाट चेन्डानूग, ईवीन ले बेले बेड़कूल कामूलीन बेले चाजूराड एनी, आन इमीन चेत्ते पोक्कूमेन। 13 आरू ईम नातीन एरको आन्न पिदीर ती आडोड, चिन्डीन तीग, लोग आम्म बुवेन जाम्मेग ले बेड़तेड आय एनी चूड़ेकेर एनी आदीन चाजूरान। 14 ईम आनीन आन्न पिदीर ती नातोन एरको आडोड, आन आदीन चाजूरान।

नाती केचूर चिला जियोमीन चोटतेर्रान एनी पोकरानो

15 एबे ईम आन्नोड चोग ती मेनोड आन्न तियारनीलीन मानूरार। 16 आरू आन आम्म बुवेन बिन्ती जोड़रान ओड इमूंग एतोड नांग इम चेंगे मेनूंग मारी ओक चेंग चियरानेडीन चोटताड। 17 ऊड मापोरबून चेत्त इसाबूलीन पारगाकतान जियोम आय। ओनीन ई मोंजीपूर तो मापोरबून बाकनूरानेर चूड़ा कान्डूग आरू पूना कान्डूग बेटारा। एरोड ओड इम चेंगे मेन्नी किली इम गेरोब ती डेरा पातरानूग ईम ओनीन पुट्टोर।

18 आन इमीन, पोरटालेर आकाट चायी किली चेनाना; आन इम लेग्गे मेल्ली वेर्रान। 19 मारी डेन्डीक ले, ई मोंजीपूर तो मापोरबून बाकनूरानेर आनीन मुरले चूड़ारा। एरोड ईम एके आनीन चूड़रार। आन मारी जियोम पाडरानूग ईम बेले जुग जुगूग पीयरार। 20 आन आरू आम्म बुवा ओकती चोर ती मेन्डाम; आरू ईम आन्नोड आरू आन इम्मोड ओकती चोर ती मेन्डाम एनी, ईम आन जियोम पाडरान पिटतेल पुन्दार। 21 एड एरको आन्न तियारनीलीन मेन्न ती पात्ती किली मानूराड, ओडी आय आन्न चेंगे चोग ती मेन्डानेड। आरू एड आन्नोड चोग ती मेन्डाड, ओनोड आम्म बुवा बेले चोग ती मेन्डाड; आरू आन बेले ओनोड चोग ती मेन्डान आरू आनीन ओनूग पारगाकतान” एट्टेड। 22 तेबे एऊदा (इसकारीयोती चिलायेड) ओनीन, “ए पोरबू, एटे, ईन इनीन आमूंग पारगाकतात आरू मोंजीपूर तो लोगूग एटे पारगाकपाता?” एट्टेड। 23 आदूग ईसू ओनीन, “एड एरको आन्नोड चोग ती मेनोड, ओड आन्न पोद्दीन मानूराड आरू आम्म बुवा ओनोड चोग ती मेन्डाड, आरू आम इरूली ओन कान वेर्राम आरू ओन गेरोब ती डेरा पातराम। 24 एड एरको आन्नोड चोग ती मेनाडा, ओड आन्न पोद्दूलीन मानाडा; आरू ईम वेनमोर जे? ई पोद्द आन्नोत एरा, आद आनीन चोटतान बुवेनो आय।

25 आन ई पाटेलीन, इम चेंगे मेनेकी इमीन पोक्केन नान। 26 एरोड बुवा आन्न पिदीर ती चोटताड जे? आ चेंग चियरानेड नाती केचूर चिला जियोम आय। ओड जाम्मा इसाबूलीन इमीन मेरचीकताड आरू आन इमीन पोक्की मेन्डान जाम्मा बानीन इमीन चुरता चाजपीकताड। 27 आन इमूंग चुक्कीन चायी किली चेनमेन, आरू आन्न चुक्कीन आन इमूंग चियरान। आरू आन इमूंग चियरान चुक, ई मोंजीपूर चियरान चुक्कीन आकाट तो एरा। इम मेन्न बायबीताल एरा मेनको आरू नारचा मेनको। 28 ‘आन इमीन चायी किली चेन्डान आरू मारी इम्मेल मेल्ली वेर्रान’ एनी आन पोकरानोन ईम वेट्टोर। ईम आन्नोड चोग ती मेनोड, आन आन्न बुवेनेल चेनमेन एन्डानूग, ईम वेड़का एर्रूरमीन, एटे एनोड बुवा आन्न ले मुकीयाल आय। 29 आरू एबे नी, आन आटे एर्रान ले मुन्नी की, ईम आटनी एरेक बिसवात चाजोकोर एनी, इमीन पोक्केन नान। 30 ई मोंजीपूर तो मापोरबून बाकनूरानेरीन आंगरूरान चेयतान वेरमेड; आदूग आन एबे तीग इम्मोड कुबे पाटेलीन ऊबाना गाट; ओनूग आन्न पोडे नाती पान्न चिल्ला। 31 एरोड आन बुवेनोड चोग ती मेन्डान एन्डानोन मोंजीपूर तो लोग पुनकेर एनी, आम्म बुवा तियारतान आकाटी चाजूमेन। एपोर चुलपूर, इना तीग चेनार बे” एट्टेड।