आनी आंगूर टुन्डेत चेत्त मोदेलीन आकाटतेन आय
15
1 आनी आंगूर टुन्डेत चेत्त मोदेलीन आकाटतेन आय,
आरू आम्म बुवा आंगूर वाडे़न कामाकतानेडीन आकाटतेड मेन्डाड।
2 आन मोदेलीन आकाटतेन एरोड,
ईम टुन्डेल आकाटतोर आय।
पालकूल पाता टुन्डेन आम्म बुवा चिट काडराड।
आरू पालकूल पातरान ओक-ओक टुन्डेन आव आगेर निक्के पालकूल पातोकोव एनी चोकाडताड।
3 आन इमीन मेरचीकतेन जे?
आ पाटेलीन चेत्तूग मुन्नीत ले इम मेन्न चुकनाय एञ्ञो ना।
4 ईम आन्नोड ओकती चोर ती मेनूर आरू आन इम्मोड ओकती चोर ती मेन्डान।
एटे टुन्डा मोदेल तीग एलगी किली पालकूल पात्तू ओड़ा,
आटनी ईम आन्नोड ओकती चोर ती मेनाकोड,
पालकूल पात्तूa ओड़ार।
5 आनी आय आंगूर टुन्डेत मोदेलीन आकाट मेन्डान;
ईम टुन्डेल आकाट मेन्डार।
आरू एड आन्नोड ओकती चोर ती मेन्डार,
ओनोड आन बेले ओकती चोर ती मेन्डान;
आरू ओड निक्के पालकूल पातराड।
एटे एनोड आनीन चायी ईम नाती नी चाजू ओड़ार।
6 एड एरको आन्नोड ओकती चोर ती मेनाकोड,
आम्म बुवा ओनीन वेटरान टुन्डेन तीनतान आकाट तीनताड।
आ टुन्डेलीन लोग कुड़ाक किली किच पातीकतार।
7 ईम आन्न चेंगे बान्नी मेनोड आरू आन्न पोद्दूल इम चेंगे बान्नी मेनोड,
ईम इमूंग मेन्न चाजूरानोन नातोन एरको आडूर,
आरू आद इमूंग टोन्डूरा ई।
8 ईम कुबे पालकूल पात्तोड,
आम्म बुवा,
जाम्मेग ले बेड़तेड आय एनी लोग चूड़रार आरू ईम आन्न चेलालेर एनी ओर पुन्दार।
9 एटे आम्म बुवा आन्नोड चोग चाजेड,
आटनी आन बेले इम्मोड चोग चाजेन नान;
ईम आन्न चोग ती बान्नी मेनूर।
10 आन आम्म बुवेन तियारनीलीन मानी किली ओन चेंगे बान्नी मेन्डान आकाट,
ईम बेले आन्न तियारनीलीन मानोडी गो आन्न चोग ती बान्नी मेन्डार।
11 आन ई पाटेलीन इमीन,
आन्न आकाट ईम बेले वेड़का एरकोर आरू इमूंग वेड़का चेड़ीगेन टोन्डोको एनी आय पोक्कूमेन।
12 आन एटे इम्मोड चोग चाजेन आटनी ईम बेले ओकूरीन ओकूर चोग चाजूर;
इद्दी आय आन्न तियारनी।
13 ओक मांजा तान्न चेगा लोगूग तान्न जियोमीन चियरान ले आगेर चोग चाजूरानो,
एर कानी बेले चिल्ला।
14 आन्न तियारतानोन ईम चाजोडी गो,
ईम आन्न चेंगाटतोर आय।
15 इनात ले आन इमीन कामीयालेर एनी पोक्काना;
एटे एनोड कामीयाल तान्न सावकार नातो चाजूमेड एनी पूनाड;
एरोड आन इमीन आन्न चेंगाटतोर एट्टेन नान।
एटे एनोड आन नातीन आन्न बुवेन तीग वेट्टेन नान,
आवीन जाम्मेनी इमीन पोक्केन नान।
16 ईम आनीन आचोरा,
एरोड आन इमीन आचेन नान आरू ईम चेनी किली पालकूल पात्तूर एनी नीतीकतेन।
आरू आ पालकूल रोजे तीग तोव मेन्डानो आय;
तेबे गो ईम नातीन एरको आन्न पिदीर ती,
आम्म बुवेन बिन्ती जोड़ी किली आडूरार ओड आदीन इमूंग चियराड।
17 ईम ओकूरीन ओकूर चोग चाजूर;
इद्दी आय आन्न तियारनी।
मापोरबून बाकनूरानेर ओन चेलालेरीन गिन गिनाकतानो
18 एबे ई मोंजीपूर तो मापोरबून बाकनूरान लोग इमीन गिन गिनाकपोड,
ओर इम ले मुन्नी आनीन बेले गिन गिनाकतेर एनी ईम पुनूर।
19 ईम मोंजीपूरतोर एरोड गो,
मोंजीपूरतेर इमीन आपला लोग एनी इम्मोड चोग चाजूरीरमीन;
एरोड ईम मोंजीपूरतोर एरा कान्डूग,
आरू आन इमीन मोंजीपूर तीग आची मेन्डानूग आय,
मोंजीपूर तो लोग इमीन गिन गिनाकमेर।
20 आन इमीन,
कामीयाल आपला सावकारीन ले बेड़तेड एराडा एनी पोक्की मेन्डीन;
आदीन चुरता चाजूर।
ओर आनीन सताकतेर गो,
इमीन बेले सताकतार;
आरू ओर आन्न पोद्दीन मानेर एरोड,
इम्मोन बेले मानूरारी।
21 एरोड ओर आनीन चोटतानेडीन पूना कान्डूग,
ईम आन्न पिदीरीन पातरान चेत्तूग आय,
ओर ई जाम्मेनी इम चेंगे चाजूरार।
22 आन वेरी किली ओरीन मापोरबून पाटेलीन पोकाका मेनोड,
ओर आनीन बाकनूरानो ओरूग पापदेरोम तो केचूर एरोयामीन।
एरोड एबे एके ओर “आम बाकनूरानो पापदेरोम आय एनी पूनाका मेट्टोम” एनी नाती जोक्का बिड़ाक ओड़ार।
23 एड एरको आनीन गिन गिनाकताड,
ओड आम्म बुवेन बेले गिन गिनाकताड।
24 एडी चाजाका मेन्डान पोरलेत कामूलीन आन ओर नाड़बूल चाजाका मेनोड,
ओर आनीन गिन गिनाकतानो ओरूग पापदेरोम तो केचूर एरोयामीन।
एपोर गो,
ओर आन चाजूरानोन चूड़ेर,
एरोड बेले ओर आनीन आरू आम्म बुवेन इरूलीन गिन गिनाकतेर।
25 “ओर आनीन पोका गिन गिनाकतार”b एनी ओर नियोम तो कागेत ती मेन्डान लिका पूरा एरको एनी आय,
आटनी एञ्ञो।