एऊना 12

ईसून केलूल ती बास तो नेय्यीन चापरानो

(मत्ती 26:6-13; मरकू 14:3-9)

1  तियार एदाका मेनेक, चोय दिना मुन्नी बेतनीया पोलूब ती तान जियोम पाटतीक मेन्डीड जे? आ लाजरीन ओलेक ती ईसू वेञ्ञेड। 2 आना ओर ओनूग बोजी चिञ्ञेर; मारता ओरूग टोन्ड चियरू, आरू ईसून चेंगे तिनूंग उन्डी मेन्डानेर कान तीग ओकूर लाजर मेन्डीड। 3 तेबे मरीयम ओक कुबे मोल्लेत, जाटामासी एन्डान पोर्रे तीग पीदूरान नाती मिसड़ा चिला बास तो नेय मेन्डान सीसीन एन्दरी किली, ईसून केल पोदोम ती नेय्यीन चाप्पोतो आरू तान्न तेल्लताकूलोड ताचोतो। आ नेय्यीन बास जाम्मा ओलेक ती कोप चेन्डो। 4 एरोड ओन चेलालेर कान तीग ओकूर, पिटतेल ईसून चुमीक चियरान एऊदा इसकारीयोती एन्डानेड एके, 5 “ई बास तो नेय्यीन पोन्दरा कोड़ रूप तो पोयसेलूग वीड़ी किली आ पोयसेलीन गेरीब लोगूग नांग चियोया?” एट्टेड। 6 ओड ईटे ओनूग गेरीब लोगूग केरमा गोटोक बावूरानूग पोकेडा; एरोड ओड डोंगाल मेन्डीड, आरू ओन लेग्गाट ईसूलेर पोयसेल तो जोरा मेन्डू आरू आना नातीन एरको इडोड, ओड आवीन पुच्ची किली तानूंग केरचा चाजूरीड। 7 तेबे ईसू ओनीन, “आदीन चाय काड; इद आनीन माटी चियरानोन तायार चाजूरान इसाबूग तायार चाजू ई बास तो नेय्यीन बाचाक मेन्डू। 8 एटे एनोड गेरीब लोग एके इम्मोड एतोड नांग मेन्डार, एरोड आन एके इम्मोड रोजे मेनाना बे” एट्टेड।

9 आतोड कुबे एऊदीकूल ईसू बेतनीये ती मेन्डाड एनी पुन्नी किली, ओर आमान ईसूनी एरा, एरोड ओड जियोम पाटतीक मेन्डान लाजरीन बेले चूड़राम एनी वेञ्ञेर। 10 आदूग बेड़कूल पेलाचकूल लाजरीन बेले आनकीकताम एनी उवाट चाजेर। 11 एटे एनोड ओन चेत्तूगी कुबे एऊदीकूल आपला पेलाचकूलीन चायी किली ईसून पोडे बिसवात चाजू मुरीयाक मेन्डीर।

ईसू एरूसेलेम ती कोसीन आकाट तानरानो

(मत्ती 21:1-11; मरकू 11:1-11; लूका 19:28-40)

12 आनातले पिटतेल तो चिरीक मापोरबू आड़ञूरान तियारूग, एरूसेलेम ती वेरी मेन्डान, कुबे जोप तो लोग ईसू एरूसेलेम ती वेरमेड एनी वेट्टेर। 13 आदूग ओर चिन्द रेपेलीन पात्ती किली ओनोड बेट गाट एरू पेतेर, आरू ओर कोलार एरी किली, “ओसना! यावेन पिदीर ती वेर्रानेड आसतीरतेड आय आरू इसराएली लोगीन आंगरूरान कोस आसतीरतेड आय” एनी जोड़ ती पोक्केर। 14 आरू ईसू ओक गेदेय पापीन बेटी किली आदीन पोडे चोत्तेड।

15 “ए सियोन तो लोगीने नारचूमोर;

चूड़ूर, इम कोस वेरमेड,

ओड गेदेय पापीन पोडे चोत्ती किली वेरमेड”

एनी मापोरबून कागेत ती लिका मेन्डान आकाट एञ्ञो। 16 पोईल गो ओन चेलालेर इदीन चोमजेरा, एरोड मापोरबू, ईसून जियोम पाटतीक किली सरग ती उय्यी किली इजीत तो मान चियरान पिटतेल मापोरबून कागेत ती, ई इसाब ती लिका मेन्डानोन चुरता चाजेर, आरू ओर आदीन चेत्तूगी ओनूग ईटे चाजेर एनी चोमजेर। 17 ईसू लाजरीन मोट तीग वाल पेक एनी कूयी किली, ओनीन जियोम पाटतीकपेक, ओन चेंगे मेन्डान जोप तो लोग आटे एर्रानोन गोवाई चिय चियी मेट्टेर। 18 इटनीत पोरलेत काम तो चिनेन ईसू चाजेड एनी वेनदानूग आय, जोप तो लोग ओनोड बेट गाट एरू वेरी मेन्डीर। 19 तेबे ओकूरीन ओकूर, “ईम मुरले नाती चाजू ओड़ोर नार। चूड़ूर, गुलाय मोंजीपूर तो लोग ईसून पोटतेल चेनमेर” एट्टेर।

युनानी लोग ओदेर ईसून कानतानो

20 तियार वादेक एरूसेलेम ती, मापोरबून मोड़कू वेरी मेन्डान लोगीन कान तीग, ओदेर युनानी लोग मेन्डीर। 21 ओर गलील देचेत बेतसयदा पोलूब तो पिलीपूसीन लेग्गाट वेरी किली, “ए सियान, आम ईसूनोड बेट गाट एर्राम एनमोम” एनी गुवारतेर। 22 आनातले पिलीपूस आन्दरीयासीन लेग्गे चेनी किली पोक्केड; तेबे आन्दरीयास आरू पिलीपूस ईसून लेग्गे चेनी किली पोक्केर।

23 ईसू ओरीन, “ मापोरबू इजीत तो मान चियरान बेरा एदेरनो ना। 24 आन इमीन चेत्ते पोक्कूमेन: गोंग पिटका नेन्दील ती उरकी किली चाम्माका मेनेक, आद ओकतीची मेन्डा। एरोड आद चामरान पिटतेल चान्दी किली निक्के पिटकेल काटरा। 25 एड एरको तान्न जियोमीन चोग चाजोड ओड आदीन मायपीकताड, एरोड एड एरको आपला जियोमीन, ई मोंजीपूर ती गिन-गिनाकतानेड एके, आदीन जुग-जुगूग चाकली मेन्डाड। 26 आनूंग सेवा चाजू एरूग एरको मेन लागोड, ओड आन्न पोटतेल वेर्रानो आय; तेबे आन आरे मेन्डान आना आनीन सेवा चाजूरानेड बेले मेन्डाड; आरू आनूंग सेवा चाजूरानेडीन, आन्न बुवा इजीत मानूराड” एट्टेड।

ईसू तान चाय्यरानोन पोकरानो

27 “एपोर आन्न जियोम बायबीताल एरमो, आदूगी एपोर आन नातोन पोकरान? ए बुवा, आनीन ई आबोड़ तो बेरे तीग एन्डान काय एटे? एरा, आटनी एनाना। एटे एनोड आन इयची आबोड़ बेटू गो आय, ई मोंजीपूर ती वेञ्ञेन आरू ई बेरे ती एदेन नान। 28 ए बुवा, ईन जाम्मेग ले बेड़तोत आय एनी पारगाक” एट्टेड। तेबे “आन जाम्मेग ले बेड़तेन आय एनी पारगाकतेन आरू मारी बेले आन जाम्मेग ले बेड़तेन आय एनी पारगाकतान” एनी सरग तीग पोकरान पोल्ला वेनूंग एञ्ञो। 29 तेबे आना मेन्डान जोप तो लोग, आ पोल्लेन वेन्नी किली “आद रे, वाञी गुडरूमो” एट्टेर। मारी आवूर ओदेर एके, “आरो सरग दूत आले ओनोड ऊबेड” एट्टेर। 30 आदूग ईसू, “ई पोल्ला आनूंग एरा, एरोड इमूंग आय वेञ्ञो ना। 31 एपोर ई मोंजीपूर तो लोगीन नियाव चाजूरान बेरा वेरमो आरू मापोरबू ई मोंजीपूर ती आनीन बाकनूरानेरीन आंगरूरान चेयतानीन आराकताड। 32 आनीन कुरूस पारे ती चोत्तीकपेक, आन जाम्मा लोगीन आन्न लेग्गे उड़चीकतान” एट्टेड। 33 ईटे पोक्की किली तान एटे तीग चाय्यरान एन्डानोन पारगाकतेड।

34 जोप तो लोग, “आम्म नीती ती जुग जुगूग पीयराड एनी वेट्टोम नाम। एरोड ईन सरग तो मांजेन कुरूस पारे ती चोत्तीक पाडरा एनी एटे पोक्कू नाम्बीकमोत आले? ई सरग तो मांजा एड आय?” एट्टेर। 35 आदूग ईसू ओरीन, “विलीज मारी किन्डीक कोम्बेर आकाटी इम लेग्गे मेन्डा बे। चीकोड वेरी किली इमीन पिरीचनाय एरीकतान ले मुन्नी, विलीज मेनेकी ईम चेल चेली मेनूर। एटे एनोड चीकोड ती चेलानेड तान आरे चेनमेन एनी पूनाड। 36 आरू ईम विलीज ती चेलू एरको एनी, विलीज मेनेक, विलीज आकाट मेन्डान आनीन बिसवात चाजूर” एट्टेड। ईसू ई पाटेलीन पोक्की किली चेन काट्टेड आरू ओर ले पाकी मेट्टेड।

लोग ईसून बिसवात चाजेरा

37 ईसू कुबे पोरलेत काम तो चिनेल ओर मुन्देल टोटीकतेड, एरोड बेले ओर ओनीन बिसवात चाजेरा। 38 आद मारी मापोरबून कान तीग काबेर वेन्नी किली लोगीन पोक चियरान गुरू एसाया मेनगा पोकरानो चेत्ते एरको एनी आय आटे एञ्ञो। एटे एनोड:

“ए पोरबू! आम केडीकतान पाटेन एडी बिसवात चाजेरा।

आरू पोरबू तान्न ताकोतीन पारगाकतानोन एडी चोमजेरा।”

एनी पोक्की मेन्डीड। 39-40 एसाया मेनगा मारी ईटे बेले पोक्की मेन्डीड:

“ओर बोम्मेग चूड़ा मेनकेर

आरू मेन्न तीग चोमजा मेनकेर

आरू आन ओरीन उजराक

आपला मेन्नीन उजराकपा मेनकेर एनी

ओड ओर बोम्मेलीन कानाचील एरीकतेड नाड

आरू ओर मेन्नीन ऊबागेरीयाट एरीकतेड।”

आदूगी आय ओर बिसवात चाजू ओड़ेर। 41 मापोरबू, एसायेग ईसून आचरूत तो बेड़तो ताकोतीन चूड़पीकतानूग ईसून इसाबीन ओड मुन्नीत ले ईटे पोक्की मेन्डीड। 42 एरोड बेले कुबे एऊदीकूलीन मुकीयालेर ईसून बिसवात चाजेर, एरोड तामीन एऊदीकूल बिन्ती जोड़रान ओलेक वेल ती गीर कीची वाल पुचरार एनी परीसीकूल नार्रीन मारूग पारगोड माना मेन्डीर। 43 एटे एनोड ओर मापोरबू तामूंग इजीत तो मान चियरान ले आगेर, लोग तामूंग इजीत तो मान चियेकेर एनी ओर मेन्न चाजूरीर।

ई मोंजीपूर तो लोगीन बाचाक ईसू वेञ्ञेड

44 आनातले ईसू जोड़ ती कूयी किली, “एड एरको आन्न पोडे बिसवात चाजोड, ओड आमान आनीनी एरा, एरोड आनीन चोटतानेडीन बेले बिसवात चाजूमेड। 45 आरू एड एरको आनीन चूड़रानेड, आनीन चोटतानेडीन बेले चूड़ूमेड। 46 एड एरको आनीन बिसवात चाजूरानेड, चीकोड ती आमदीया मेना मेनकेड एनी, आन ई मोंजीपूर ती विलीजीन आकाट एरी वेञ्ञेन नान। 47 एबे एड एरको आन्न पोद्दूलीन वेनी किली आवीन मानाकोड, आन ओनीन नियाव चिड़ाकपाना; एटे एनोड आन ई मोंजीपूर तो लोगीन नियाव चिड़ाक एरा, एरोड ओरीन आय वेञ्ञेन नान। 48 एड एरको आनीन बाकनूरानेड आरू आन्न पाटेन मानायेडीन नियाव चिड़ाकतानो ओकूत मेन्डा। आन पोकरान पोद्दी, चेरा चेरी चिरीक ओनीन नियाव चिड़ाकता। 49 एटे एनोड आन आन्न पान्न तीग पोक्केना, एरोड आनीन चोटतान आम्म बुवा आनीन नातो पोकरानो आय आरू एटे पोकरानो आय एनी तियारतानोनीनी आय आन पोक्केन नान। 50 आरू ओन तियारनीची लोगूग जुग-जुग तो जियोम चियरा एनी आन पुट्टेन। आदूगी आय आन पोकरानो, चायगो, आन्न बुवा आनीन पोक काड एनी तियारची मेन्डानोन पोक्कूमेन” एट्टेड।