ईसून आनकीक गात चुमरानो
26
1 ईसू ई जाम्मा पाटेलीन पोक्कू पोल्लानूग,
आपला चेलालेरीन,
2 “इरने मेन्नी मापोरबू आड़ञूरान तियारba एर्रानोन ईम पुट्टोर आरू आतोड सरग तो मांजेन कुरूस पारे ती कूटील कोटीक एनी चुमीक एर्राड बे” एट्टेड।
3 आनातले बेड़कूल पेलाचकूल,
मूसाल नीतीन मेरचीकतानेर आरू एऊदी लोगीन सियानकूल,
कायपा पिदीर तो मुकीयाल पेलाच ओलेकीन कोरी ती उलजेर।
4 आरू ईसून कुचनाय चुम्मी किली आनकीकपार एनी गात चुम्मेर।
5 एरोड ओर एके,
“तियार वादेक चुमोड लोग पोडे चेन्डार एनी किली आतोड एराया” एनी पोक्केर।
ईसून नेय मेरपीकतानो
6 ईसू बेतनीया पोलूब ती रोग बेमार तीग उजरूरान,
सिमोन एन्डान पिदीर तो ओक मांजेन ओलेक ती तिनूंग उन्डी मेनेक,
7 ओक आयाल चंगमरमरc केल्ल तो सीसी पाप ती कुबे मोल्लेत बास तो नेय्यीन एन्दरोतो।
आद सीसीत बास तो नेय्यीन,
ओन तेल्ल ती चाप्पोतो।
8 ओन चेलालेर आदीन चूड़ेर आरू रिच एरी किली “बास तो नेय्यीन पोका नांग नाचाकतोत?
9 इदीन कुबे पोयसेलूग वीड़ी किली आ पोयसेलीन गेरीब लोगूग चियू एर्रूमीन” एनी पोक्केर।
10 ईसू आदीन पुन्नी किली “आदीन नांग आबोड़ चियमोर आले?
आद आनूंग रेच्चायी गो चाजोतो।
11 गेरीब लोग एके इम्मोड एतोड नांग मेन्डार,
एरोड आन एके इम्मोड रोजे मेनाना बे।
12 आदूगी आय इद आनीन माटी चियरानोन तायार चाजूरान इसाब ती,
आन्न चोले ती मुन्नी की बास तो नेय्यीन चाप्पोतो।
13 आन चेत्ते पोक्कूमेन,
गुलाय मोंजीपूर ती आट-आट ई एडो पाटेन पोक चियरार,
आना ई आयाल चाजूरानोन चुरता चाजू,
ई इसाबीन बेले पोकरार” एट्टेड।
एऊदा ईसून चुमीक चियरान एन्डानो
14 आनातले बारा जान चेलालेर कान तीग ओकूर एऊदा इसकारीयोती बेड़कूल पेलाचकूल का चेनी किली,
15 “ईसून आन इमूंग चुमीक चियोड,
ईम आनूंग नातो चियरार” एट्टेड।
आदूग ओर ओनूग तीस गोटा रूप तो पोयसेलीन नेकीक किली चिय काट्टेर।
16 आन्नीत ले एऊदा ईसून चुमीक चियरान एनी दांव कातीड।
पुलपा पोर्र तो रोटी तियार
17 आनातले पुलपा पोर्र तो रोटी तियारdf तिन्दान पोईल चिरीक एदोतो।
आदूग ईसून चेलालेर ओनीन “मापोरबू आड़ञूरान तियार तिनूंगe इनूंग आरे वेन्डरानो आय?”
एट्टेर।
18 आदूग ईसू,
गेड़ेकेल चेनूर।
आना पालनाल मांजेन,
“गुरू पोक्कूमेड ‘आन्न बेरा एदोतो;
आन आरू आन्न चेलालेर मापोरबू आड़ञूरान तियार इन ओलेक ती तिन्दाम’ एनूर” एनी चोटतेड।
19 आदूग चेलालेर ईसू पोकरान आकाट चाजेर आरू मापोरबू आड़ञूरान तियारीन इसाब तोन वेन्डेर।
20 आन्डेक मारी ईसू बारा जान चेलालेर चेंगे आना टेबूल ती तिनूंग उन्डेड।
21 आरू ओर तिनेक ओड “आन चेत्तेगी पोक्कूमेन।
इम कान तीग ओकूर आनीन चुमीक चियराड” एट्टेड।
22 आदीन वेन्नी ओर किसीयाक किली ओकूरीन पिटतेल ओकूर “एटे आन आय पोरबू?”,
“एटे आन आय पोरबू?”
एनी पोक्कू मुरीयाकतेर।
23 आदूग ईसू “आन्न चेंगे तान्न केय्यीन,
बेटकी ती तुरबी तिनमेडg ओडी गो आय,
आनीन चुमीक चियराड।
24 मापोरबून पोद्द ती लिका एटे मेन्डा,
आटनी सरग तो मांजा चेन्डाड।
एरोड सरग तो मांजेन चुमीक चियरानेडूग ओ!
ओ!
बेड़तो गेरा एर्रा।
ओड जेनोम एराका मेन्डीड एनोड ओनूग आद रेच्चा एर्रूमीन” एट्टेड।
25 ओनीन चुमीक इडरान एऊदा बेले,
“एटे आन आय गुरू?”
एट्टेड।
आदूग ओड,
“ओ ईन पोकरान आकाट आय” एट्टेड।
ईसून चेरा चेरीत बोजी
26 ओर तिन तिन्नी मेनेक ईसू रोटीन केय्य ती पात्तेड आरू मापोरबून “जुवार” एनी किली आदीन गोन्दाकतेड आरू तान्न चेलालेरूग चिञ्ञेड आरू “इदीन एची किली तिनूर।
इद आन्न चोला आय” एट्टेड।
27 मारी मुत्तेन केय्य ती पात्ती किली मापोरबून “जुवार” एनी किली ओरीन,
“इदीन तीग ईम जाम्मा लोग उनूर।
28 इद कुबे लोगूग ओर पापदेरोमूल माप एरकोव एनी आन इड़कीकतान जुमानीन इसाब तो नेतीर आय।
29 इम चेंगे आम्म बुवा आंगरूरान राज ती पुन इसाब ती आंगूर रेसीन उन्डान आर्रे आन आंगूर पालकूल तो ई रेसीन मारी एतोडी बेले उनाना एनी आन इमीन चेत्ते पोक्कूमेन” एट्टेड।
30 आनातले ओर मापोरबून जुवारतान पाटेन पाडेर आरू जेतून कोप्पेकेल पेतेर।
पतरस दोदूराड एनी ईसू पोकरानो
31 आनातले ईसू तान्न चेलालेरीन,
“इने चित्ता ई,
ईम आन्न पाटे ती चेला लोगीन आकाट एर्रार।
मापोरबून कागेत ती,
‘आन गाडीडीन आनकीकतान आरू मान्देत मेन्डेल इट आट बुरलूराव’h एनी लिका मेन्डा।
32 एरोड आन जियोम पाड्डी चुलतान पिटतेल एके,
इम ले मुन्नी गलील देचे ती चेन्डान” एट्टेड।
33 आदूग पतरस,
“जाम्मा इन पाटे ती चेला लोगीन आकाट एरोड बेले आन आटनी एराना” एट्टेड।
34 आदूग ईसू,
“आन इनीन चेत्तेगी पोक्कूमेन।
इने चित्ता कोर्र कूयाका मेनेक ईन मुप्पोट,
आन ईसून पूनान एनी दोदूरात” एट्टेड।
35 आदूग पतरस एके “इन चेंगे आन चाय्यरानो आय एनोड बेले इनीन पूनान एनी आन मुरले पोकाना” एट्टेड।
आरू जाम्मा चेलालेर बेले आटनी पोक्केर।
गतसमने पार्र ती ईसू
36 आनातले ईसू आना तीग पेची किली चेलालेर चेंगे गतसमने एन्डान पार्र ती चेन्डेर।
ओड तान्न चेलालेरीन “आन आना चेनी किली बिन्ती जोड़ेक,
ईम इना उन्डी मेनूर गाट” एट्टेड।
37 ओड चेनेक पतरस आरू जबदीन चिन्डूल,
तोल्लेड इरूलीन चेंगे उञ्ञेड आरू ओड मुर मुरा एरू आरू निक्के डालबीकोल एरू मुरीयाकतेड।
38 तेबे ओड ओरीन,
“जियोम पेची चेन्डान आत्ती आन्न जियोम निक्के मुर मुरा एरमो,
ईम इन्नी मेन्नी किली आन्न चेंगे चेता मेनूर” एट्टेड।
39 आनातले ओड किन्डीक आकाट कोमाड चेन्डेड आरू नेन्दील ती मुड़दील उरकी किली “ए आन्न बुवा!
एरू नाम्बीकपोड डेन्ड एर्रान इसाब तो ई बेटकीन आकाट तो आन्न तीग गुचाक एरको।
एरोड बेले आन्न बिचार ती एरा;
इन बिचारीन आकाटी एरको” एनी बिन्ती जोड़ेड।
40 मारी ओड तान्न चेलालेर का वेरी किली ओर तुञरानोन चूड़ेड।
आरू पतरसीन “एटे ईम ओक गेन्टा बेले आन्न चेंगे चेता मेनूंग ओड़ार काय एटे?
41 पोरकूरान ती बीड़ा मेनकोर एनी चेता मेन्नी बिन्ती जोड़ूर।
जियोमूग बिन्ती जोड़ू बावूमो।
मेनूग एके लाव चिल्ला” एट्टेड।
42 ओड मारी दूड़ा चेनी किली,
“ए आन्न बुवा!
आन ई आबोड़ूल ती डेन्ड एराका,
ई बेटकीन आकाट तो आबोड़ीन गुचाक एराया एरोड इन बिचारीन आकाटी एरको” एनी मापोरबून बिन्ती जोड़ेड।
43 मारी ओड मेल्ली वेरेक ओर मारी बेले तुञरानोन चूड़ेड।
एटे एनोड ओर बोम्मेल गुरगोनूग कुड़मा-कुड़मा एरी मेन्डूव।
44 आदूग ओड ओरीन चायी किली मारी ओपोट चेनी किली तीड़ा मुन्नीत आकाट बिन्ती जोड़ेड।
45 आनातले ओड मारी चेलालेरेल वेञ्ञेड आरू ओरीन “एबलेतार्रे बेले तुञ्ञूमोर आरू बिसाकमोर।
चूड़ूर!
सरग तो मांजेन चुमीक किली पापीयालेर केय्य ती ओपीक चियरान बेरा एदोतो ना।
46 चुलपूर;
चेनार बे।
आनीन चुमीक चियरानेड वेरमेड” एट्टेड।
ईसू चुमीक एर्रानो
47 ओड ईटे ऊब ऊबी मेनेक बारा जान चेलालेर कान तीग ओकूर एऊदा वेञ्ञेड।
ओन चेंगे बेड़तो जोप तो लोग कान्डेल आरू बाड़येल पात्ती किली वेञ्ञेर।
ओरीन बेड़कूल पेलाचकूल आरू एऊदीकूलीन पोँच तो सियानकूल चोटची मेन्डीर।
48 चुमीक चियरानेड एके “आन एरीन चोन्ड मोटरान ओनीन ईम चुमूर” एनी ओक चिना ओरूग पोक्की मेन्डीड।
49 एऊदा डेन्डीक ईसून का चेनी किली “ए रब्बी!
(गुरू) जुवार” एनी किली ओनीन चोन्ड मोट्टेड।
50 आदूग ईसू,
“ए आन चेंगेने!
नातो कामूग ईन वेञ्ञोत नात,
आदीन चाज” एट्टेड।
ओर ईसून लेग्गे वेरी किली ओनीन मोटीयाकतेर आरू चुम्मेर।
51 आतोड ईसून चेंगाटतेड ओकूर,
तान्न केय्य नीकीक किली आपला कान्डेन पुच्चेड आरू मुकीयाल पेलाचीन कामीयालीन ओक केकोलीन कुट्टेड।
52 तेबे ओनीन ईसू,
“आपला कान्डेन,
कान्डेन इडरान पाड ती इड काड।
एड एरको कान्डेलीन चेलाकतानेर कान्डेन तीगी चाय्यरार।
53 एटे ईन,
आन आन्न बुवेन बिन्ती जोड़ोड,
ओड बारा गोटा पालटेनकूलi मान्देन ले बेले आगेर सरग दूतकूलीन एबे नी आन्न लेग्गाट चोटतेर्राड एनी पूनात आदूग?
54 एरोड आन आटे चाजोड मापोरबून कागेत ती ईटे एर्रानो ई आय एनी लिका मेन्डानो एटे पूरा एर्रा?”
एट्टेड।
55 आतोड ईसू मारी जोप तो लोगीन “एटे आन लोगीन आबूच एरीकतान आदूग?
ईम कान्डेल आरू बाड़येल पात्ती आनीन चुम्मू वेञ्ञोर नार?
आन मारी रोजे इम चेंगे नी गो मेट्टेन।
मापोरबून गुडीत आवारी बीतराम उन्डी किली केडीकतीन।
आरू ईम आनीन चुमोरा।
56 एरोड मापोरबून कान तीग काबेर वेन्नी किली लोगीन पोक चियरान गुरूकूल पाटे ती लिकी मेन्डानो पूरा एरको एनी,
ईव जाम्मा एञ्ञोव नाव” एट्टेड।
आनातले जाम्मा चेलालेर ओनीन चायी किली तूलेर।
ईसून इसाब ती पोँच उन्डतीकतानो
57 आनातले चुमरानेर ईसून मुकीयाल पेलाच कायपेन का उञ्ञेर।
बेड़कूल पेलाचकूल,
मूसाल नीतीन मेरचीकतानेर आरू एऊदीकूलीन पोँच तो सियानकूल आना उलजेर।
58 पतरस एके ईसून पोटतेल किन्डीक कोमाड बिड़ी किली एकदाय मुकीयाल पेलाचीन ओलेक कोरी ती चेन्डेड।
आना ओड तान्नी किली एटे एर्रा आले एनी चूड़ू पारा वालीयालेर चेंगे किच आतरे ती उन्ड काट्टेड।
59 बेड़कूल पेलाचकूल आरू जाम्मा एऊदीकूलीन पोँच तो सियानकूल ईसून आनकीकतान उवाटूग टेगू टेगूत केचूर कानतीर।
60 कुबे लोग टेगू टेगूत गोवाई पोक्केर;
एरोड बेले नाती केचूर बेटेरा।j
61 चेरा चेरी इरूल वेरी किली,
“आम ऊड मापोरबून गुडीन बोसड़ाकतान आरू मुचीच ती मारी निबड़ाक नाम्बीकतान एनी ई मांजा पोकरानोन वेट्टोम नाम” एट्टेर।
62 आनातले मुकीयाल पेलाच चुलची किली ईसून,
“ईन नांग नाती पोकाता?
ओर इनीन ईटे पोक्कूमेर,
ईन नान एनमोत आले?”
एट्टेड।
63 ईसू एके मुर्रे एना मेन्डीड।
आदूग मुकीयाल पेलाच ओनीन,
“‘आन मापोरबून चिन्ड मसीयाल’ आय एनी जियोम मेन्डान मापोरबून पोडे किरीया तिन एनी इनीन तियारूकमेन” एट्टेड।
64 आदूग ईसू ओनीन,
“ओ ईन पोकरान आकाटी आय।
आरू आन एके इमीन जाम्मेनी,
ईम एपोर ले,
सरग तो मांजा सोब ले लाव तो मापोरबून वेला केय्य तेल उन्डरानोनk आरू पोडी बादोर ती वेर्रानोन चूड़रार एनी पोक्कूमेन” एट्टेड।
65 आदीन वेन्नी किली मुकीयाल पेलाच,
तान्न कुड़तेन चीकेड आरू “ऊड मापोरबून निन्दरेड नाड।
एपोट एडी गोवाई पोक्कू लागाया।
चूड़ूर!
एबे ऊड तानीन तानी मापोरबून बीतेर ती बिड़ाक किली मापोरबून निन्दरूरानोन वेट्टोर जे?
66 ईम इदीन नान एन्डार आले?”
एट्टेड।
आदूग आना मेन्डानेर “ओनूग आनकीकतान डेन्ड चियू लागूरा” एट्टेर।
67 आनातले ईसून मोकोम ती ओर ऊचेर आरू मुटकेलोड ताप्पेर।
ओदेर ओन बोम्मेल आयबी किली ताप्पेर।
68 आरू “ए मसीयालीने!
इनीन एड ताप्पेड एनी जान” एट्टेर।
पतरस तान ईसून पूनान एन्डानो
69 आतोड पतरस कोरी ती उन्डी मेन्डीड आरू मुकीयाल पेलाचीन ओक कामीयाट,
ओन लेग्गे वेञ्ञो आरू “ईन बेले गलील तो ईसून चेंगे मेन्डूत चिला?”
एट्टो।
70 आदूग ओड एके ओर जाम्मेन मुन्देल “एरा,
ईन नातोन पोक्कूमोत आले आदीन आन पूनान” एट्टेड।
71 आनातले मारी ओड आवारीत काड़वेल ती चेन्डेड।
आना मारी ओक कामीयाट,
ओनीन चूड़ी किली बोँरेक मेन्डान लोगीन “ई मांजा नासरत तो ईसून चेंगे मेट्टेड” एट्टो।
72 ओड मारी बेले किरीया तिन्नी किली “एरा आन आ मांजेन पूनान” एट्टेड।
73 डेन्डीक मेन्नी आना निलची मेन्डानेर,
पतरसीन लेग्गाट चेनी किली,
“चेत्तेई ईन ओन चेलालेर कान तीग ओकूर आय।
इन ऊबाल तीग आदीन पुनूंग एरमो” एट्टेर।
74 आटनी एन्डानूग ओड “ईम पोक्कूमोर जे?
आ मांजेन आन पूनान” एनी किली किरीया तिनूंग मुरीयाकतेड।
आरू तुरते कोर्र कूयोतो।
75 आनातले पतरस,
“कोर्र कूयाका मेनेक ईन मुप्पोट ‘आन ईसून पूनान’ एनी दोदूरात” एनी ईसू पोकरान पाटेन चुरता चाजेड।
आरू ओड वाल पेची किली पाचताक किली निक्के आड़रीड।