ईसून आनकीक गात चुम्मेर
14
1 आनातले मारी मापोरबू आड़ञूरान c तियारa तिनूंग आरू पुलपा पोर्र तो रोटीतd तियारb तिनूंग इरनेई बाची मेन्डू।
बेड़कूल पेलाचकूल आरू मूसाल नीतीन मेरचीकतानेर ईसून कुचनाय चुम्मी किली आनकीक गात चुम्मेर।
2 एरोड ओर एके,
“तियार वादेक चुमोड लोग मारी पोडे वेर्रार आदूग आतोड एराया” एट्टेर।
बास तो नेय्यीन ईसून तेल्ल ती चापरानो
3 ईसू बेतनीया पोलूब ती रोग बेमार तीग उजरूरान,
सिमोन एन्डान पिदीर तो ओक मांजेन ओलेक ती तिनूंग उन्डी मेनेक,
ओक आयाल चंगमरमर केल्ल तो सीसी पाप ती कुबे मोल्लेत बास तो नेय्यीन एन्दरोतो।
आ नेय जाटामासी एन्डान पोर्रे तीग पीदूरान नाती मिसड़ा चिला नेय आय।
आ आयाल सीसी तेल्लीन ओटीक किली बास तो नेय्यीन ईसून तेल्ल ती चाप्पोतो।
4 आदूग आना मेन्डानेर ओदेर आदीन चूड़ेर आरू रिच एरी किली “बास तो नेय्यीन पोका नांग नाचाकतो?
5 इदीन ओक बेरचीकार ती कामाकतान पोयसेलूग ले आगेर पोयसेलूगe वीड़ी किली आ पोयसेलीन गेरीब लोगूग चियू एर्रूमीन” एनी ताम तामी पोक्केर।
आरू आ आयालीन बेले निक्के कावडेर।
6 आनातले ईसू “आदीन चाय काडूर।
आदीन नांग आबोड़ चियमोर आले?
आद आनूंग रेच्चायी गो चाजोतो।
7 गेरीब लोग एके इम्मोड एतोड नांग मेन्डार आरू ओरूग ईम एतोड एरको रेच्चाट चाजू बावोड चाजू नाम्बीकतार।
आन एके इम्मोड रोजे मेनाना।
8 आद तान नाम्बीकतानोन चाजोतो।
इद आनीन माटी चियरानोन तायार चाजूरान इसाब ती आन्न चोले ती मुन्नी की बास तो नेय्यीन चाप्पोतो।
9 आन चेत्ते पोक्कूमेन,
गुलाय मोंजीपूर ती आट-आट एडो पाटेन पोक चियरार,
आना ई आयाल चाजूरानोन चुरता चाजू,
ई इसाबीन बेले पोकरार” एट्टेड।
एऊदा ईसून चुमीक चियरान एन्डानो
10 आनातले बारा जान चेलालेर कान तीग ओकूर एऊदा इसकारीयोती बेड़कूल पेलाचकूल का चेनी किली “ईसून आन इमूंग चुमीक चियरान” एट्टेड।
11 आदूग ओड पोकरानोन वेन्नी किली ओर वेड़का एञ्ञेर आरू “आटनी चुमीक चियोड इनूंग पोयसेल चियराम” एनी पाटा चिञ्ञेर।
आटनी एर्रानूग एऊदा ईसून चुमीक चियरान एनी दांव कातीड।
ईसू तान्न चेलालेर चेंगे तियार तिन्दानो
12 आनातले पुलपा पोर्र तो रोटी तियार तिन्दान पोईल चिरीक एदोतो।
आ चिरीक एऊदीकूल नीती ती मापोरबू आड़ञूरान तियार तिनूंग ओलेकूग ओक मेन्डा पापीन गुडी ती उय्यी जेतरा चाजूरानो आय।
आदूग मेन्डा पापीन कुडरान पिटतेल ईसून चेलालेर ओनीन “मापोरबू आड़ञूरान तियार तिनूंग इनूंग आरे वेन्डू चेन्डानो आय?”
एट्टेर।
13 आदूग ओड तान्न चेलालेर कान तीग इरूलीन “एरूसेलेम गेड़ेकेल चेनूर।
आना ओक मांजा ओक टान्डी ती नीर काञी उयरानोन बेटूरार।
ओन पोटतेल-पोटतेल चेनूर।
14 आरू आ मांजा तानरान ओलेक तो सियानीन,
‘आन आरू आन्न चेलालेर मापोरबू आड़ञूरान तियार तिन्दान चेगा बाकरा आरोत आय?
एनी गुरू जाच आडूमेड’ एनूर।
15 तेबे ओड इमीन जाम्मा जाक चाजी जुगाड चाजी मेन्डान ओक बेड़तो पोडीत बाकरेन टोटीक चियराड;
आना आमूंग वेन्डी मेनूर” एनी ओरीन चोटतेड
16 आनातले चेलालेर कान तीग इरूल आर्र तीग पेची किली गेड़ेकेल चेन्डेर।
आरू ओड एटे पोक्की मेन्डीड आटनी बेट गाट एञ्ञेर।
आटनी एर्रानूग मापोरबू आड़ञूरान तियार इसाब तोन आना वेन्डेर।
17 आन्डेक मारी ओड बारा जान चेलालेर चेंगे आना एदेड।
18 ओर तिन तिनी मेनेक ओड “आन इमीन चेत्तेगी पोक्कूमेन।
इम कान तीग ओकूर आनीन चुमीक चियराड।
ओड बेले आन्न चेंगे नी एबे तिनमेड” एट्टेड।
19 आदीन वेन्नी किली ओर मुर मुरा एञ्ञेर आरू जाम्मा लोग “एटे आन आय?”,
“एटे आन आय?”
एनी ओनीन पोक्केर।
20 आदूग ओड “ओड बारा जानीन कान तीग ओकूर आय।
ओड आन्न चेंगे रोटीन बेटकी ती तुरबी तिनमेड।
21 मापोरबून पोद्द ती लिका एटे मेन्डा,
आटनी सरग तो मांजा चेन्डाड।
एरोड सरग तो मांजेन चुमीक चियरानेडूग ओ!
ओ!
बेड़तो गेरा एर्रा।
ओड जेनोम एराका मेन्डीड एनोड ओनूग आद रेच्चा एर्रूमीन” एट्टेड।
22 ओर मारी तिन तिनी मेनेक ओड रोटीन केय्य ती पात्तेड आरू मापोरबून “जुवार” एनी किली आदीन गोन्दाकतेड आरू तान्न चेलालेरूग चिञ्ञेड आरू “इदीन एची किली तिनूर।
इद आन्न मेन आय” एट्टेड।
23 मारी आंगूर रेस तो मुत्तेन केय्य ती पात्ती किली मापोरबून “जुवार” एनी किली तान्न चेलालेरूग चिञ्ञेड।
आदूग ओर जाम्मा लोग आनातोन उन्डेर।
24 ओड ओरीन,
“इद कुबे लोगूग आन इड़कीकतान जुमानीनf इसाब तो आन्न नेतीर आय” एनी पोक्केड।
25 मारी ओड,
“मापोरबू जाम्मेनी आंगरूरान चिरीक,
पुन इसाब ती आंगूर रेसीन उन्डान आर्रे आन आंगूर रेसीन मारी एतोडी बेले उनाना एनी आन इमीन चेत्ते पोक्कूमेन” एट्टेड।
26 आनातले ओर मापोरबून जुवारतान पाटेन पाडेर आरू जेतून कोप्पेकेल पेतेर।
पतरस, दोदूराड एन्डानोन ईसू मुन्नी की पोकरानो
27 आनातले ईसू तान्न चेलालेरीन “ईम आनीन चायी किली तूलार।
मापोरबून कागेत ती ‘आन गाडीडीन चाटतान आरू मेन्डेल इट आट बुरलूराव’g एनी लिका मेन्डा।
28 एरोड आन जियोम पाड्डी चुलतान पिटतेल एके,
इम ले मुन्नी गलील देचे ती चेन्डान” एट्टेड
29 आदूग पतरस,
“जाम्मा इन पाटे ती चेला लोगीन आकाट एरोड बेले आन आटनी एराना” एट्टेड।
30 आदूग ईसू,
“आन इनीन चेत्तेगी पोक्कूमेन।
इनेनी चित्ता कोर्र दूड़ा कूयाका मेनेक ईन मुप्पोट ‘आन ईसून पूनान’ एनी दोदूरात” एट्टेड।
31 आदूग पतरस मारी “इन चेंगे चाय्यरानो आय एनोड बेले,
इनीन पूनान एनी आन मुरले पोकाना” एट्टेड।
आवूर चेलालेर बेले आटनीची पोक्केर।
गतसमने पार्र
32 आनातले ईसूलेर,
आना तीग पेची किली गतसमने एन्डान पार्र ती चेन्डेर।
ओड तान्न चेलालेरीन “आन बिन्ती जोड़ेक ईम इना उन्डी मेनूर गाट” एट्टेड।
33 ओड चेनेक पतरस याकूब आरू एऊनेन बेले चेंगे उञ्ञेड।
मारी ओड जियोम केरूरानूग निक्के डालबीकोल एरू मुरीयाकतेड।
34 आरू ओरीन,
“जियोम पेची चेन्डान आत्ती आन्न जियोम निक्के मुर मुरा एरमो,
ईम इन्नी मेन्नी किली आन्न चेंगे चेता मेनूर” एट्टेड।
35 आनातले ओड किन्डीक आकाट कोमाड चेनी किली नेन्दील ती मुड़दील उरकी किली “एरू नाम्बीकपोड ई आबोड़ तो बेरा आन्न कान तीग गूचोकोव” एनी बिन्ती जोड़ेड
36 ओड मारी,
“ए आब्बाh,
ए बुवा” एनी किली “इनूंग जाम्मा बानी एरू नाम्बीकता।
डेन्ड एर्रान इसाब तो ई बेटकीन आकाट तोन आन्न तीग गुचाक।
एरोड बेले आन्न बिचार ती एरा।
इन बिचारीन आकाटी एरको” एनी मापोरबून बिन्ती जोड़ेड।
37 मारी ओड तान्न चेलालेर का वेरी किली ओर तुञरानोन चूड़ेड,
आरू पतरसीन “ए सिमोन!
तुञ्ञूमोत?
ओक गेन्टा आत्ती बेले तुञाका मेनूंग ओड़ात काय एटे?
38 ईम पोरकूरान ती बीड़ा मेनकोर एनी चेता मेन्नी बिन्ती जोड़ूर।
जियोमूग बिन्ती जोड़ू बावूमो।
मेनूग एके लाव चिल्ला” एट्टेड।
39 आटनी ओड दूड़ा चेनी किली मुन्नीत आकाट बिन्ती जोड़ेड
40 मारी ओड मेल्ली वेरेक ओर मारी बेले तुञरानोन चूड़ेड।
एटे एनोड ओर बोम्मेल गुरगोनूग कुड़मा-कुड़मा एरी मेन्डूव।
ओर ओनोड नातो जवाब चियराम एनी पूना मेन्डीर।
41 ओड तीड़ा चेनी किली वेञ्ञेड आरू ओरीन,
“एबलेतार्रे बेले तुञ्ञूमोर आरू बिसाकमोर।
चूड़ूर!
सरग तो मांजेन चुमीक किली पापीयालेर केय्य ती ओपीक चियरान बेरा एदोतो ना।
42 चुलपूर;
चेनार बे।
आनीन चुमीक चियरानेड वेरमेड” एट्टेड।
एऊदा ईसून चुमीकतेड
43 ओड ऊब ऊबी मेनेक बारा जान चेलालेर कान तीग ओकूर एऊदा वेञ्ञेड।
ओन चेंगे जोप तो लोग कान्डेल आरू बाड़येल पात्ती किली वेञ्ञेर।
ओरीन बेड़कूल पेलाचकूल,
मूसाल नीतीन मेरचीकतानेर आरू एऊदीकूलीन पोँच तो सियानकूल चोटची मेन्डीर।
44 चुमीक चियरानेड एके “आन एरीन चोन्ड मोटरान ओनीन ईम चुमूर आरू लेक ती उय्यूर” एनी ओक चिना ओरूग पोक्की मेन्डीड।
45 एऊदा डेन्डीक ईसून का चेनी किली “ए रब्बी!”
(गुरू) एनी किली ओनीन चोन्ड मोट्टेड।
46 आदूग आ लोग जेटके ईसून मोटीयाकतेर आरू चुम्मेर।
47 आना मेन्डान चेलालेर कान तीग ओकूर तान्न कान्डेन पुच्चेड आरू मुकीयाल पेलाचीन कामीयालीन ओक केकोलीन कुट्टेड।
48 ईसू मारी “एटे आन लोगीन आबूच एरीकतान आदूग?
ईम कान्डेल आरू बाड़येल पात्ती आनीन चुम्मू वेञ्ञोर नार?
49 आन मारी रोजे इम चेंगे नी गो मेट्टेन।
मापोरबून गुडीत आवारी बीतराम गो केडीकतीन।
आरू ईम आनीन चुमोरा।
एरोड मापोरबून कागेत ती मेन्डानो पूरा एरको एनी ईव जाम्मा एञ्ञोव नाव” एट्टेड।
50 आनातले जाम्मा ओनीन चायी किली तूलेर।
51 एरोड ओक इलेड एके ओकती गान्डेनी मूयी किली ईसून पोटतेल चेन्डीड।
ओर आ इलेडीन चुम्मेक,
52 जेटके गान्डा देरा चेन्डो।
आदूग आ इलेड बान्डाल एरी तूलेड।
ईसून आनकीक केचूर कानतानो
53 आनातले ओर ईसून मुकीयाल पेलाचीन का उञ्ञेर।
आरू जाम्मा बेड़कूल पेलाचकूल,
एऊदीकूलीन पोँच तो सियानकूल आरू मूसाल नीतीन मेरचीकतानेर आना उलजेर।
54 पतरस एके ईसून पोटतेल किन्डीक कोमाड बिड़ी किली एकदाय मुकीयाल पेलाचीन ओलेक कोरी ती चेन्डेड।
आना ओड पारा वालीयालेर चेंगे किच आतरे ती उन्डी किली किच केरजूरीड।
55 बेड़कूल पेलाचकूल आरू जाम्मा एऊदीकूलीन पोँच तो सियानकूल ईसून आनकीकतान उवाटूग केचूर कानतीर।
एरोड बेले नाती केचूर बेटेरा।
56 कुबे लोग टेगू टेगूत गोवाई पोक्केर।
एरोड ओर पोकरानो एके बीड़ोया।
57 आनातले ओदेर-ओदेर चुलतेर आरू ईसून उलटा,
टेगरान पाटा पोक चिञ्ञेर।
58 ओर “‘ऊड मांजा काटरान ई मापोरबून गुडीन बोसड़ाकतान आरू मुचीच ती मांजा काटा मापोरबून गुडीन काटरान’ एनी पोकरानोन वेट्टोम नाम” एट्टेर।
59 एरोड ओर पोकरानो बेले बीड़ोया।
60 मारी मुकीयाल पेलाच एके ओर नाड़बूल चुलतेड आरू ईसून,
“ईन नाती पोकाता?
ओर इनीन ईटे पोक्कूमेर,
ईन नान एनमोत आले?”
एट्टेड।
61 ईसू एके मुर्रे एना मेन्डीड।
नाती नी पोकेडा।
मारी ओपोट मुकीयाल पेलाच ईसून “आम जुवारतान मापोरबून चिन्ड मसीयाल ईन आय चिला?”
एट्टेड।
62 आदूग ईसू “आन आय।
आरू ईम सरग तो मांजाj सोब ले लाव तो मापोरबून वेला केय्य तेल उन्डरानोनi आरू पोडी बादोर ती वेर्रानोन चूड़रार” एट्टेड।
63 आदीन वेन्नी किली मुकीयाल पेलाच तान्न कुड़तेन चीकेडk आरू “एपोट एडी गोवाई पोक्कू लागाया।
64 ईसू तानीन तानी मापोरबून बीतेर ती बिड़ाक किली मापोरबून निन्दरूरानोन वेट्टोर।
ईम इदीन नान एन्डार आले?”
एट्टेड।
आदूग आना मेन्डानेर जाम्मा “ओड चाय्यीकतान डेन्ड बेटूरान बातेरतेड आय” एनी चिड़ाकतेर।
65 आनातले ईसून पोडे ओदेर-ओदेर ऊचू मुरीयाकतेर।
आरू बोम्मेल आयबी किली मुटकेलोड ताप्पेर आरू “इनीन एड ताप्पेड एनी जान” एट्टेर।
पारा वालीयालेर ईसून उय्यी किली चाटतेर।
पतरस, “आन ईसून पूनान” एन्डानो
66 पतरस किड़ी,
कोरी ती उन्डी मेनेक मुकीयाल पेलाचीन कामीयाचील कान तीग ओकाल आना वेञ्ञो।
67 आद पतरस किच केरजूरानोन चुड़ोतो आरू ओन टिटाक केचीक किली “ईन बेले नासरत तो ईसून चेंगे मेन्डूत चिला?”
एट्टो।
68 आदूग ओड एके “एरा आन पूनान आरू ईन नातोन पोक्कूमोत आले आदीन चोमजेना” एनी किली,
वेल पाव तो काड़वेल ती चेन्डेड।
आरू कोर्र कूयोतो।
69 आरू आ कामीयाट आना बेले ओनीन चूड़ी किली,
बोँरेक मेन्डान लोगीन “ई मांजा ईसून चेलालेर कान तीग ओकूर आय” एट्टो।
70 एरोड पतरस एके मारी बेले “एरा” एट्टेड।
डेन्डीक मेन्नी आना मेन्डानेर पतरसीन,
“चेत्तेगी ईन ईसून चेलालेर कान तीग ओकूर आय।
ईन गलीलतोत आय” एट्टेर।
71 आटनी एन्डानूग पतरस “ईम पोक्कूमोर जे?
आ मांजेन आन पूनान” एनी किली,
किरीया तिनूंग आरू बाद आट्टू मुरीयाकतेड।
72 आरू तुरते कोर्र दूड़ा कूयोतो।
आनातले पतरस “कोर्र दूड़ा कूयाका मेनेक ईन मुप्पोट ‘आन ईसून पूनान’ एनी दोदूरात” एनी ईसू पोकरान पाटेन चुरता चाजेड।
आरू ओड पाचताकतेड आरू आड़ू मुरीयाकतेड।