ओक परीसी मांजेन ओलेक ती ईसू
14
1 मारी ईसू ओक पाबूरान चिरीक परीसीकूल मुकीयालेर कान तीग ओकूरीन ओलेक ती तिनूंग चेन्डेड।
आरू लोग ओड नातो चाजूराड एनी चूड़ चूड़ी मेन्डीर।
2 चूड़ूर!
आना केय्यूल केलूल नातेक वाची मेन्डान ओकूर मांजा ईसून मुन्देल मेन्डीड।
3 आदूग ईसू मूसाल नियोमूलीन रेच्चा पुन्दानेरीन आरू परीसीकूलीन “पाबूरान चिरीक उजराकतानो बान्दा काय एटे?”
एनी पोक्केड।
4 एरोड ओर किटूक काटूकनाय मेट्टेर।
तेबे ईसू आ नोयरान मांजेन पात्ती किली उजराकतेड आरू चेनूंग इट्टेड।
5 मारी ओड ओरीन,
“तान्न चिन्डa चिलाड बाड़ाव पाबूरान चिरीक जुवे ती उरकी मेनोड,
आदीन तुरते पुचायेड इम कान तीग एड बेले मेन्डाड काय एटे?”
एनी जाच आडेड।
6 ओर ई पाटेन जवाब चियू ओड़ेर।
चुरचा बोजीत चोमजाकतान डाग्गा
7 बोजी ती वेर्रान लोग एटे रेच्चाट-रेच्चाट पाडकूलीन कानची उन्डेर एन्डानोन ईसू चूड़ी किली ओरीन ओक चोमजाकतान डाग्गा पोक्केड।
8 “एड एरको इनीन चुरचा बोजी ती कूयोड,
रेच्चाट-रेच्चाट पाड्डीन कानची उन्डूमेन।
एरू नाम्बीकता ओड इन ले बेड़तो मांजेन काबेर पोक्की मेन्डाड बेले।
9 आरू एरू नाम्बीकता इनीन आरू ओनीन इरूलीनी काबेर चियरान मांजा वेरी किली,
ऊनूग पाड चिय एनी इनीन पोकोड,
आतोड ईन लाज पाड्डी किली जाम्मेग ले इनमान तो पाड ती उन्डू पाडरा बेले।
10 एरोड इनीन एतोड एरको काबेर चियोड,
सोब ले इनमान तो पाड ती उन्ड;
तेबे इनीन काबेर चियरानेड वेरी किली ‘ए चेंगेने मुन्देल वेरी किली उन्ड’ एनोड चेंगे उन्डरान लोगीन मुन्देल इनूंग इजीत तो मान टोन्डूरा।
11 एटे एनोड,
तामीन तामी बेड़तेड एरीकतानेर जाम्मा इनमानतेर एर्रार।
आरू तामीन तामी इनमानतेर एरीकतानेर बेड़तेड एर्रार” एट्टेड।
12 मारी ओड तानीन काबेर चियरानेडीन बेले,
“ईन एतोड एरको बोजी चियोड,
इन चेंगेतेरीन चिलाड तोल्लेनकूलीन चिलाड एके कुटूम तो लोगीन चिलाड लेग्गे लेग्गेत सावकारकूलीन कूयूमेन।
आटनी चाजोड ओर बेले इनीन कूयूरार आरू ईन ओरीन कूयूरान पालटा एर चेन्डा।
13 एरोड ईन बोजी चियोड,
गेरीबकूलीन लुलालेरीन,
कोड़ीयालेरीन आरू कानालेरीन कूय।
14 तेबे ईन आसतीर बेटूरात।
एटे एनोड इनूंग पालटा चियू ओर लेग्गाट नाती चिल्ला।
एरोड देरमीकूलूग जियोम पाड्डी चुलपेक इदीन पालटा टोन्डूरा।”
बेड़तो बोजी इसाब तो चोमजाकतान डाग्गा
15 ओन चेंगे तिनूंग उन्डरानेड ओकूर ई पाटेलीन वेन्नी किली,
“मापोरबून देचे ती बोजी तिन्दानेड एड बेले कुबे आसतीरतेड आय” एनी पोक्केड।
16 एरोड ईसू ओनीन,
“ओपोट ओकूर मांजा बेड़तो बोजी चिञ्ञेड आरू कुबे लोगीन काबेर चिञ्ञेड।
17 बोजी तायार एर्रानूग ओड तान निवती मेन्डानेरीन बोजी ती,
‘वेरूर बोजी तायार एञ्ञो ना’ एनी तान्न कामीयालीन काबेर चोटतेड।
18 एरोड ओर जाम्मा ई जोक्का बिड़ाक मुरीयाकतेर।
पोईलतेड ‘आन वायेल पात्तेन नान आरू आनूंग आदीन चूड़ू चेन्डानो ई आय;
आन वेरू ओड़ान’ एनी पोक्केड।
19 आरू मारी ओकूर एके,
‘आन चेन्डू जोड़ेल बाड़ाल मोलयाकतेन नान,
आरू आवीन पोरकू चेनमेन;
आन वेरू ओड़ान’ एनी पोक्केड।
20 आरू मारी ओकूर एके,
‘आन चुरचा एञ्ञेन नान,
आदूगी आन वेरू ओड़ान’ एट्टेड।
21 आ कामीयाल वेरी किली तान्न सावकारीन ई पाटेलीन वेनपीकतेड।
तेबे ओलेक तो सावकार रिच एरी किली ‘गेड़ेत सेड़ेकूल ती आरू पावूल ती तुरते चेनी किली चाकोल लोगीन,
लुलालेरीन,
कोड़ीयालेरीन आरू कानालेरीन कूयी किली इना एन्देर’ एनी तान्न कामीयालीन चोटतेड।
22 आदूग कामीयाल लोगीन एन्दरी किली ‘ईन एटे पोक्कोत आटनी चाजेन सावकार;
एरोडी बेले पाड मेन्डा ई’ एट्टेड।
23 सावकार कामीयालीन,
‘सेड़ेकूल ती आरू जोड़ानूल ती चेनी किली लोगीन उच उचाक एन्देरपूर;
आन्न ओलेक कोप चेनको।
24 एटे एनोड आन इमीन पोक्कूमेन,
काबेर चियरान लोगीन तीग एडी आन्न बोजीन चाकारा’ एनी पोक्केड” एट्टेड।
चेलाल एर्रान मोल्ला
(मत्ती 10:37, 38)
25 एपोर बेड़तो जोप ईसून चेंगे चेन्डू आरू ओड पोटतेल उलटी चूड़ी किली ओरीन,
26 “एड बेले आन्न लेग्गाट वेरी किली आपला बुवेन आरू ईय्येन आरू आयालीन आरू पापकूलीन आरू तोल्लेनकूलीन आरू चालाचीलीन चिलाड आपला जियोमीन बेले गिन-गिनाकपाकोड ओड आन्न चेलाल एरू ओड़ाड।
27 आरू एड एरको तान्न कुरूस पारेन काञी किलीb आन्न पोटतेल वेराकोड ओड आन्न चेलाल एरू ओड़ाड।
28 इम कान तीग एड बेले बेड़तो डेंगाट कोमेन काट्टू मेन्न चाजोड ओड पोईल उन्डी किली आदीन पूरा चाजू तानूंग लाव मेन्डा काय एटे एनी केरचेन जोड़ायेड मेन्डाड आदूग?
29 आटनी चाजाकोड पाया कोट्टी किली आदीन पूरा चाजू ओड़ाकोड चूड़रान लोग,
30 ‘ई मांजा काट्टू गो मुरीयाकतेड एरोड निबड़ाक ओड़ेड’ एनी पोकी किली नाव्वू मुरीयाकतार।
31 चिलाड एके आरो एरको कोस तान विरूद ती बीस आजार लोगीनोड लेड़ू वेर्रान कोसीनोड तान कान मेन्डान देस आजार लोगीनोड लेड़ू नाम्बीकतान काय एटे एनी मुन्नी बिचार चाजाका चेन्डाड काय एटे?
32 नाम्बाया एरोड ओड कोमाड मेनेकी तान्न काबेर तो लोगीन चोटची किली ओनोड मिलूरान बिचार चाजूराड।
33 आटनी इम ले एड बेले रेच्चा बिचार चाजी किली तानूंग मेन्डानोन जाम्मेन चाय काडाकोड ओड आन्न चेलाल एरू ओड़ाड।”
केर चिला चुप