मायी मेन्डान मेन्डेन बीतेर तो चोमजाकतान डाग्गा
15
1 पोटी पातरानेर आरू पापीकूलa ओर जाम्मा ईसून पाटेलीन वेनूंग ओन लेग्गाट वेर्रीर।
2 एरोड परीसीकूल आरू मूसाल नीतीन मेरचीकतानेर गुर-मुरा एरी किली,
“ऊड गो पापीकूलोड मिसूराड आरू ओर चेंगे तिन्दाड बेले” एनी पोक्केर।
3 तेबे ईसू ओरीन ई चोमजाकतान डाग्गेन पोक्केड:
4 “इम कान तीग एरूग बेले सोव गोटा मेन्डेल मेनोड,
आरू आवीन तीग ओकूत माय चेनोड,
ओकूत गाट चेन्डू कोड़ मेन्डेलीन गोटानेल चाय काड्डी किली मायूरानोन बेटारे कानपायेड एड बेले मेन्डाड आदूग?
5 आरू आदीन बेटोड,
ओड निक्के वेड़के तीग आदीन चार्र ती काञी किली एन्देर्राड;
6 आरू ओलेक वेरी किली चेंगाटतेरीन आरू तान्न ओलेक लेग्गाट तो लोगीन उड़चीक किली,
‘आन्न चेंगे वेड़का एरूर;
एटे एनोड आन मायूरान मेन्डेन बेटेन नान’ एनी पोकराड।
7 आन इमीन पोक्कूमेन आटनी मेन्नीन उजराक लागा ओकूर गाट चेन्डू कोड़ मापोरबून मानूरान देरमीकूल इसाब ती वेड़का एर्रान ले आगेर ओकूर पापी मांजा मेन्न उजराक किली मापोरबून पाव ती चेलोड सरग ती आदीक वेड़का एर्रा” एट्टेड।
मायी मेन्डान कुदरी पोयसेत चोमजाकतान डाग्गा
8 “चिलाड ओक आयालीन लेग्गाट देस गोटा चान्दीत कुदरी पोयसेल मेनोड,
आरू आवीन तीग ओकूत माय चेनोड आद दिया पात्ती किली आरू ओलेकीन आयची किली आदीन बेटारे कानपायो आरो बेले आयाल मेन्डा आदूग?
9 आरू बेटोड,
आद तान्न चेंग जोंरीयेन आरू तान्न लेग्गाट तो लोगीन उड़चीक किली ‘आन्नोड वेड़का एरूर;
एटे एनोड आन्न मायूरान कुदरी पोयसेन बेटेन नान’ एनी पोकरा।
10 आन इमीन पोक्कूमेन आटनी ओकूर पापी मांजा मेन्नीन उजराकपोड ओन इसाब ती सरग दूतकूल मापोरबून मुन्देल वेड़का एर्रार।”
देन बुड़ाकतान चिन्डीन चोमजाकतान डाग्गा
11 ईसू मारी ओक चोमजाकतान डाग्गा पोक्केड:
“एड आले ओकूर मांजेन इरूल चिन्डूल मेन्डीर।
12 ओर कान तीग पिटीतेड बुवेन,
‘ए बुवा देन तीग एञ्ञोत आन्न बाटे तो आय आदीन आनूंग चिय काड’ एट्टेड।
आदूग ताम्म बुवा ओरूग तान्न देनीन पायची चिञ्ञेड।
13 कुबे दिनेल एराका मेनेक पिटीत चिन्ड तान्न जाम्मा देनीन उड़चीक किली कोमाड देचा चेनूंग पाव ताकेड आरू आना चेनी किली कियाल तो कामूल ती तान्न देनीन बुड़ाकतेड।
14 ओड जाम्मा पोयसेलीन केरचा चाजी पोल्लान पिटतेल आ देचे ती चाकोल एञ्ञो।
आरू ओड तिनूंग उनूंग नाती चिलायेड एञ्ञेड।
15 आदूग ओड आयची देचे ती मेन्डान ओकूर मांजेन कान कामीयाल मेनूंग चेन्डेड।
ओड ओनीन तान्न कामेय ती पेन्डकूलb कोक चोटतेड।
16 आरू ओड पेन्डकूल तिन्दान पोल्लीन तिन्नी किली पोट्टा पाञ्ञीक आचा चाजूरीड।
एरोड ओनूग एडी नाती चियेरा।
17 आनातले ओड तान्न चुरते ती वेर्रानूग,
‘आन्न बुवेन एंगोटा बूतीत लोगूग लागूरान ले आगेर रोटील टोन्डूराव;
एरोड आन एके इना मुरानी चाय्यमेन।
18 एपोर आन चुलची किली आन्न बुवेन लेग्गाट चेन्डान आरू ओनीन,
आन सरग तो मापोरबून विरूद ती आरू इन नेंजेर ती पापदेरोम चाजेन नान।
19 एपोर इन चिन्ड एन्डान बातेरतेन बेले चिल्लान।
आनीन ईन ओक बूती मांजा आकाट इड एनी पोकरान’ एट्टेड।”
20 “तेबे ओड चुलची किली ताम्म बुवेन लेग्गाट चेन्डेड।
ओड कोमाडी मेनेक ले ताम्म बुवा ओनीन चूड़ी किली जियोम नोयपीकतेड आरू तूल तूली चेनी किली ओनीन चार्र मिलाकतेड आरू चोन्ड मोट्टेड।
21 आरू चिन्ड ओनीन,
‘ए बुवा,
आन सरग तो मापोरबून विरूद ती आरू इन नेंजेर ती पापदेरोम चाजेन नान।
आरू एपोर इन चिन्ड एन्डान बातेरतेन बेले चिल्लान’ एट्टेड।
22 एरोड बुवा एके तान्न कामीयालेरीन,
‘जेटके नी सोब ले रेच्चाट कुड़तेन एन्दरी किली ऊनीन तुन्दीकपूर आरू ओन केय्य ती वात्त आरू केलूल ती पानेयूल तुन्दीकपूर।
23 आरू कोड़कूड तो पेया पापीन एन्दरी किली कात्तूर;
तेबे आम्मोर तिन्नी किली वेड़का एरू एर्रा।
24 एटे एनोड ऊड आन्न चिन्ड चाय्यी मेन्डीड;
मारी जियोम पाट्टेड।
मायी मेन्डीड;
एपोर टोन्डेड नाड’ एट्टेड आरू ओर वेड़का एरू मुरीयाकतेर।”
25 “आतोड ओन बेड़तो चिन्ड वायेकेल मेन्डीड।
ओड वेरी किली ओलेक लेग्गाट एदेक,
बाजा बाजाकतान आरू एन्दूरान पोल्लेन वेट्टेड।
26 आदूग ओड ओक कामीयालीन,
‘इद नातो एरमो?’
एनी जाच आडेड।
27 ओड ओनीन,
‘इन तोल्लेड वेञ्ञेड नाड आरू इम बुवा ओनीन रेच्चा चुकनाय मारी बेटूरानूग कोड़कूड तो पेया पापीन कातीकतेड नाड’ एट्टेड।
28 आदीन वेन्नी किली ओड निक्के रिच एञ्ञेड आरू बीतराम चेनूंग मेन्न बेले चाजा मेन्डीड।
एरोड ताम्म बुवा बाटतेल वेरी किली ओनीन बीतराम वेरू गुवारतेड।
29 एरोड ओड एके ताम्म बुवेन,
‘चूड़!
आन इंगोट बेरेकूल ले इन कामूलीन चाजूमेन आरू एतोड नांग ईन तियारतान पाटेन चाजाना एनानी;
एरोड बेले ईन एतोडी बेले आनूंग आन्न चेंगेनोड वेड़के ती तिन एनी ओक बोकड़ा पापीन बेले चियोता।
30 एरोड दारीयाट आयचीलूग देनीन बुड़ाकतान,
इन चिन्ड वेर्रानूग,
ईन कोड़कूड तो पेया पापीन कातीकतोत’ एनी पोक्केड।
31 ओड ओनीन,
‘चिन्डीने!
ईन गो एतोड नांग आन्न चेंगे मेन्डात;
आरू एञ्ञोत बानी आन्नोत मेन्डा आव जाम्मा इन्नोती आय।
32 एरोड एपोर ऊदीम एर्रानो आय आरू वेड़का एर्रानो आय।
एटे एनोड ऊड इन तोल्लेड चाय्यी मेट्टेड आरू मारी जियोम पाट्टेड नाड;
मायी मेन्डीड,
एपोर टोन्डेड नाड’ एट्टेड” एनी ईसू पोक्केड।