मापोरबू आंगरूरान सरग ती मुकीयाल एड आय?
18
1 आतोडी चेलालेर ईसून लेग्गाट वेरी किली “मापोरबू आंगरूरान सरग ती मुकीयाल एड आय?”
एनी जाच आडेर।
2 आदूग ईसू ओक पिटीत पापीन लेग्गे कूयी किली ओर नाड़बूल नीतीकतेड।
3 आरू आन इमीन चेत्तेगी पोकूमेन,
ईम मेन्नीन उजराक किली पापकूल आकाट एराकोड मापोरबू जाम्मेनी आंगरूरानोन पातीयाक ओड़ार।
4 आदूगी ई पापीन आकाट आपलेनी पिटीतेड चोमजूरानेड मापोरबू जाम्मेनी आंगरेक आना मुकीयाल एर्राड।
5 एड एरको आन्न पिदीरीन चेत्तूग ईटो ओक पापूग मेन्न ती पाड चियोड,
ओड आनूंग मेन्न ती पाड चियराड।
बिसवात ती चेल्लान तीग उट तिरीकतान इसाबूल
6 आरू एड एरको ई पिटीलेकतेर कान तीग,
आन्न पोडे चेत्त चाजूरानेडीन ओकूरीन बेले बिसवात ती चेल्लान तीग उट तिरीकपोड,
ओन चार्र ती बान्नेत जेत्ता केल्लीन ऊटीक किली ओनीन सोमून्द तो निक्के गिड़ीया नीर ती बुड़ायपोड रेच्चा एर्रूमीन।
7 ओ!
ओ!
लोगीन बिसवात ती चेल्लान तीग उट तिरीकतान चेत्तूग मोंजीपूर ती मापोरबून माना लोगूग बेड़तो गेरा एर्रा।
बिसवात ती चेल्लान तीग उट तिरीकतान इसाबूल चेत्ते वेर्रावी।
एरोड एर कान तीग आव वेरमोव ओनूग,
ओ!
ओ!
बेड़तो गेरा एर्रा।
8 इन केय्य चिलाड इन केल इनीन ईन बिसवात ती चेल्लान तीग उट तिरीकमो एरोड आ केय्य चिलाड केलीन चिट्टी तीनतेन एनी चोमजू इनूंग इरडू केय्यूल चिलाड इरडू केलूल मेनेक-मेनेक एतोड नांग नीर-नीरी मेन्डान किच ती तीन्डूक एर्रान ले कोड़ीयाल आरू कोल्लाल एरी किली जुग-जुग तो जियोम टोन्डूरानेल चेन्डानो इनूंग रेच्चा आय।
9 आरू इन बोम्मा इनीन ईन बिसवात ती चेल्लान तीग उट तिरीकमो एरोड आ बोम्मेन पुच्ची तीनतेन एनी चोमजू।
इनूंग इरडू बोम्मेल मेनेक-मेनेक नरक कून्ड ती तीन्डूक एर्रान ले,
ओक बोम्मेत कानाल एरी किली ओक बोम्मेत कानाल एरी किली जुग-जुग तो जियोम टोन्डूरानेल चेन्डानो इनूंग रेच्चा एर्रूमीन।
10-11 ईम ई पिटीलेक पापकूल तीग एरीनी चुचायतेड आय एनी चोमजू कान्डूकमोर काय एटे?
ओर सरग दूतकूल सरग ती आन्न सरग तो बुवेन मोकोमीन एतोड नांग चूड़-चूड़ी मेन्डार।a
मायूरान मेन्डेत चोमजाकतान डाग्गा
12 ईम नान एनमोर आले?
आरो बेले ओक मांजेग चोव गोटा मेन्डेल मेनोड आरू आवीन तीग ओकूत माय चेनोड,
ओकूत गाट चेन्डू कोड़ मेन्डेलीन कोप्पे ती चाय काड्डी किली आ मायूरान मेन्डेन कान्डूक चेनाडा काय एटे?
13 आरू आदीन बेटोड मायाका मेन्डान ओकूत गाट चेन्डू कोड़ मेन्डेलूग वेड़का एर्रान ले आगेर ई मायी मेन्डान मेन्डेन बेटूरानूग निक्के वेड़का एर्राड एनी आन इमीन चेत्ते पोक्कूमेन।
14 आटनी ई पिटीलेकतेर कान तीग ओकूर बेले नाचा मेनकेर एनी इम सरग तो बुवेन मेन्न मेन्डा।
बिसवासी तोल्लेड इन विरूद ती पाप चाजूरानो
15 इन बिसवासी तोल्लेड इन विरूद एरी किलीb कियाल चाजोड चेन आरू ओकूरी मेनेक ओनीन ईन पापदेरोम चाजूमोत एनी चोमजाक।
ओड इन पाटेन मानोड ईन ओनीन मारी बिसवात ती मेन्डतोत नात।
16 आरू ओड इन पाटेन मानाकोड इरूल मूवीरीन गोवाईन तीग जाम्मा इसाबूल चेत्त एरको एनी चेंगे पात्ती किली चेन।c
17 आरू ओड ओरोन बेले मानाकोड,
पोरबून बिसवात चाजूरान मान्देत लोगीन पोक।
ओरोन बेले मानाकोड,
ओनीन मापोरबून माना लोगीन आकाट चिलाड पोटी पातरानेडीन आकाट चोमजी किली ओनूग ले कोमाड मेन।
18 ईम ई मोंजीपूर ती माना चाजूरानो नातो एरको सरग ती बेले माना एर्रा आरू ईम ई मोंजीपूर ती चेलोको एन्डानो नातो एरको सरग ती बेले चेलूरा एनी किली आन इमीन चेत्ते पोक्कूमेन।
19 आन इमीन मारी पोक्कूमेन,
“इम कान तीग इरूल मोंजीपूर ती ताम आडूरान इसाब ती ओकती चोर ती मेन्नी किली आडोड सरग ती मेन्डान आन्न बुवेन टिटाक तीग आद ओरूग एर चेन्डा।
20 एटे एनोड आरे एरको आन्न पिदीरीन चेत्तूग इरूल चिलाड मूवीर रून्डूरार आना आन ओर नाड़बूल मेन्डान” एट्टेड।
केरमा गोटोक बावा कामीयाल
21 आतोड पतरस ओन लेग्गे वेरी किली,
“ए पोरबू!
आन्न बिसवासी तोल्लेड आन्न विरूद ती पापदेरोम चाजी मेनोडेल आन ओनीन एंगोट गुबोड़ूल माप चाजूरानो आय?
सात गुबोड़ूल आर्रे एर्रा काय एटे?”
एट्टेड।
22 आदूग ईसू,
“सोजे सात गुबोड़ूली एरा एरोड सात गुबोड़ूल तो मून्डू कोड़ देस दुनाd आर्रे माप चाजूरानो आय एनी आन इमीन पोक्कूमेन।
23 आदूगी मापोरबू जाम्मेनी आंगरूरानो आपला कामीयालेरीन लेका पातरान ओक कोसीन आकाट मेन्डा।
24 ओड लेका पात्तू मुरीयायपेक देस आजार सोन तो पोयसेल लागा मेन्डान ओक मांजेन एन्दरेर।
25 ओनूग तान्न लागेन मेन्डूक नाती चिल्ला मेन्डू।
आदूग आ सावकार,
‘ऊनीन,
ऊन आयालीन आरू पापा पिलेन आरू ऊनूग मेन्डान जाम्मा जामूकूलीन वीड़ी किली लागेन मेन्डची काडेकेड’ एट्टेड।
26 आदूग आ कामीयाल केलूल पाड्डी किली,
‘ए सियान!
आनूंग जियोम नोयपीक;
आन जाम्मा बानीन मेनची काडरान’ एनी गुवारतेड।
27 आ सावकारूग केरमा गोटोक बावूरानूग ओनीन चायेड आरू ओन लागेन बेले माप चाजेड।
28 एरोड आ कामीयाल बाटतेल पेतानूग,
तानूंग चोव रूप तो पोयसेल लागा चियू लागूरान ओन चेंगेत ओक कामीयालीन बेट गाट एञ्ञेड।
आदूग ओड ओनीन चुम्मी किली ओन चार्र पिचकाकतेड आरू ‘ईन आडूरान लागेन मेन्डूक’ एनी ओरबोर चाजेड।
29 तेबे ओन चेंगेत कामीयाल केलूल पाड्डी किली,
‘आन्न कान इनूंग जियोम नोयको।
आन इन जाम्मा लागेन मेन्डची काडरान’ एनी गुवारतेड।
30 ओड एके मानेडा आरू चेनी किली ओनीन तान्न लागेन मेन्डपारे जेल ओलेक ती केटची काट्टेड।
31 ओन चेंगेत आवूर कामीयालेर आटे एर्रानोन चूड़ेर आरू निक्के मुर-मुरा एरी किली आपला सावकारीन जाम्मा पाटेलीन पोक्केर।
32 तेबे आ सावकार ओनीन कूयी किली,
‘ए एड़जाल कामीयालीने!
ईन आनीन गुवारतानूग आन आ लागेन जाम्मा इनीन बोरपीकपेना?
33 ईन बेले आन इनूंग जियोम नोयपीकतान आकाट आपला चेंगेत कामीयालीन जियोम नोयपीकतानो मेट्टो चिला?’
एट्टेड।
34 आरू ओड निक्के रिच एरी किली तान्न जाम्मा लागेन मेन्डपारे ओनीन सताक,
जेल ओलेक तो लोगीन केय्य ती बेटाकतेड।
35 आटनी ईम बेले इम बिसवासी तोल्लेडीन मेन्न तीग माप चाजाकोड,
आन्न सरग तो बुवा इमीन बेले माप चाजाडा” एनी ईसू पोक्केड।