मत्ती 17

ईसू आवूर मुरीत एर्रानो

(मरकू 9:2-10; लूका 9:28-36)

1 चोय दिनेल एर्रान पिटतेल ईसू पतरस, याकूब आरू ओन तोल्लेड एऊनेन पुटा ओक डेंगाट कोप्पे ती उञ्ञेड। 2 आरू ओर मुन्देल ओड आवूर मुरीत एञ्ञेड; ओन मोकोम पोकालीन आकाट मेडोतो आरू ओन गान्डेल चेक चेका विलीजीन आकाट एर चेन्डोव। 3 तेबे आना मुन्नीत जुग तो मूसाल आरू एलीया ईसून चेंगे ऊबूरान आकाट ओरूग देका पाट्टेर। 4 आदूग पतरस ईसून, “ए सियान आम इन्नी मेनोड निरबे रेच्चा आय। आरू इन मेन्न एरोड, आन इना मून्डू गुड़सेल काटरान: इनूंग ओकूत, मूसालूग ओकूत आरू एलीयेग ओकूत” एट्टेड। 5 ओड पोक-पोकी मेनेक, इद चूड़! ओक विलीज तो बादोर ओरीन कुमोतो आरू आ बादोर तीग, “ऊड आन्न चिन्ड आय। ऊड आनूंग लाडराल आय आरू ऊन तीग आन वेड़का एरमेन; ऊनोन वेनूर” एनी पोकरान ओक पोल्ला वेञ्ञो। 6 आदूग चेलालेर आदीन वेन्नी किली मुड़दील उरकेर आरू निक्के नारचेर। 7 तेबे ईसू एके ओर लेग्गाट वेरी ओरीन टोड्डी किली, “चुलपूर; नारचूमोर” एनी पोक्केड। 8 तेबे ओर आपला नेंजेर एतीक किली चूड़रानूग, ईसून चायी एरीनी बेले चूड़ेरा। 9 ओर कोप्पे तीग इड़ेक ईसू ओरीन, “ चाय्यरान कान तीग जियोम पाटतीकपारे, ईम चूड़रानोन एरीनी मुरले पोकरानो एरा” एनी चोमजाकतेड।

एलीया मुन्नी वेर्रान इसाब

(मरकू 9:11-13)

10 आदूग चेलालेर, “आटे आय एरोड नांग एलीया मुन्नी वेर्रानो मेन्डा एनी मूसाल नीतीन मेरचीकतानेर पोक्कूमेर गो?” एट्टेर। 11 आदूग ईसू, “एलीया गो वेर्राड आरू जाम्मा बानीन उजराकताड एन्डानो चेत्ते आय। 12 एरोड आन एके इमीन पोक्कूमेन, एलीया गो मुन्नी की वेञ्ञेड नाड आरू ऊर ओनीन चिताकपेरा, एरोड ओर एके ओनीन तामूंग मेन्न ती वेर्रान आकाट नातोन-नातोन चाजेर नार। आटनीची सरग तो मांजेग ओर केय्य तीग सताव एर्रा” एट्टेड। 13 तेबे चेलालेर ऊड ओरीन बपतीसमा चियरान एऊनेन बीतेर ती पोक्कूमेड एनी चोमजेर।

ईसू बापूर आटरान चेपालीन उजराकतानो

(मरकू 9:14-29; लूका 9:37-43a)

14 ओर जोप तो लोगीन लेग्गाट एदेक ओकूर मांजा ईसून लेग्गाट वेरी माटीकूटेल चियी किली, 15 “ए पोरबू! आन्न चिन्डूग ईन जियोम नोयपीक; ओड बापूर आटरानूग निक्के नोयमेड आरू ओड गेन-गेन किच ती चिलाड नीर ती उरकूराड। 16 आन ओनीन इन चेलालेरीन लेग्गाट एन्दरेन। एरोड ओर एके ओनीन उजराक ओड़ेर” एट्टेड। 17 आदूग, ईसू “ए ई जुग तो बिसवात चिला आरू एड़जाट चुरतेत लोगीने! आनूंग एत्ती दिनेत्तार्रे इम चेंगे मेनूंग एर्रा आले? इम्मोन आन एदरा सामालतान आले? आ चेपालीन इना आन्न लेग्गाट एन्देरपूर” एट्टेड। 18 तेबे ईसू बूत डुमेन कावडूरानूग आद ओन कान तीग पेतो। आ चेपाल तुरते उजरेड। 19 तेबे ईसून चेलालेर ओन लेग्गे पुटा वेरी किली, “आम नांग आदीन पुच्चू ओड़ोम?” एनी पोक्केर। 20 आदूग ईसू ओरीन, “इम बिसवात कोम मेन्डानूग आय; इमूंग सेरसून पिटकेन आञ्ञोती चोपूर तो बिसवात मेनोड, ईम ई कोप्पेन चूड़ी किली इना तीग गूच आरू आना चेन एनोडेल आद आटनी एर्रा आरू इमूंग नाम्बाया एन्डान इसाब तो नाती मेनाया एनी इमीन आन चेत्ते पोक्कूमेन” एट्टेड। 21 

ईसू तान चाय्यरानोन मारी पोकरानो

(मरकू 9:30-32; लूका 9:43b-45)

22 ईसू आरू ओन चेलालेर गलील देचे ती वेर्रानूग ओड ओरीन, “सरग तो मांजा लोगीन केय्य तीग चुमीक एर्राड। 23 ओर ओनीन आनकीकतार; एरोड ओड एके मुचीच तीग जियोम पाटतीक एर्राड” एट्टेड। आटनी एन्डानूग ओर निक्के मुर-मुरा एर चेन्डेर।

गुडीग चारी चियरानो

24 ईसू आरू ओन चेलालेर कपरनाऊम एदूरान पिटतेल, मापोरबून गुडीग चारी पातरानेर पतरसीन लेग्गे वेरी किली, “इम गुरू मापोरबून गुडीग चारी चियराड काय एटे?” एनी जाच आडेर। 25 आदूग ओड, “ओ, ओड चियराड” एनी पोक्केड। ओलेक वेर्रानूग ईसू ओड पोकरान ले मुन्नी ओनीन, “ए सिमोन ईन नान एनमोत आले? मोंजीपूर तो कोसकूल, मासूल आरू पोटी एरीन पात्तूमेर? आपला देचेतेरीन काय आवूर देचेतेरीन आय?” एनी पोक्केड। 26 आदूग पतरस, “आवूरतेरीन आय” एनी पोक्केड। आदूग ईसू “आटे तीग आपला देचेतेर आदीन चियू लागाया नाना? 27 एरोड बेले आम्मोर ओरीन रिच एरीकतानो एरा। आदूग ईन सोमून्द ती चेनी किली मीनचूब तीन्डूक आरू पोईल पातरान मीनीन चुम्मी किली आदीन चोन्डीन चानपोड आना ओक चान्दीत कुदरी पोयसा बेटूरात। आदीन पात्ती किली आन्न आरू इन बाटा ओरूग चारी चिय काड” एट्टेड।