मत्ती 16

बादोर तीग चिना आडूरानो

(मरकू 8:11-13; लूका 12:54-56)

1  ओदेर आरू ओदेर ईसून लेग्गे वेरी किली ओनीन पोरकू, “इनीन सरग तीग मापोरबू चोटतेड एरोड, आ इसाब तो पोरलेत काम तो चिना ओकूत टोटीक” एनी पोक्केर। 2 आदूग ओड ओरीन, “आन्डेक, बादोर पाड़ञी मेनोड इने बादोर चानता एनी पोकरार। 3 ई देचे ती पोकाल पेपेक बादोर नेतरोत आरू मायकूड़-मायकूड़ मेनोड इने वाल्ल वाञी वेर्रा बे एन्डार। ईम बादोर एटे टोन्ड़ूमो एनी चूड़ी किली नातो एर्रा बे एनी आदीन बीतेर ती जानू नाम्बीकतार। एरोड, इमूंग एके बेरेत चिनेलीन बीतेर ती पोक्कू नाम्बाया काय एटे? 4 ई जुग तो एड़जालेर आरू दारीयालेर पोरलेत काम तो चिनेन कानतार। एरोड मापोरबून कान तीग काबेर वेन्नी किली लोगीन पोक चियरान यूनूस गुरून चिनेन चायी किली आवूरतोव नाती चिनेल ओरूग चियू एराया” एनी किली ओरीन चायी आना तीग चेन्डेड।

परीसीकूल आरू सदूकीकूलीन पुलपीकतान बानी

(मरकू 8:14-21)

5 आनातले मारी ओर सोमून्द आकलाट आड़ञेक, चेलालेर रोटील उय्यू बूलकेर। 6 आतोड ईसू ओरीन, “ईम परीसीकूल आरू सदूकीकूल पुलपीकतान बानीन तीग लेक ती मेनूर” एट्टेड। 7 आदूग ओर आदीन उलटा चोमजी किली, “आम रोटील एन्दरोमा, आदूगी आय ओड ईटे पोक्कूमेड” एनी तामूंग तामी कुचूर पुचूर एञ्ञेर। 8 ईसू ओर ऊबूरानोन पुन्नी किली, “ए कोमजोर बिसवात तो लोगीने! रोटील चिला कान्डूग नांग ओकूरीन ओकूर कुचूर पुचूर एरमोर? 9 ईम एबले बेले आन एड आय एनी चोमजोरा काय एटे? इदीन चुरता मेन्डा काय एटे? चेन्डू रोटीलीन पाँच आजार लोगूग पायची चियी किली चेरूंगूरानोन एंगोट गाप्पेल ती कोप्पारे इट्टोर? 10 आरू सात गोटा रोटीलीन चार आजार लोगूग पायची चियी किली चेरूंगूरानोन एंगोट गाप्पेल ती कोप्पारे इट्टोर? 11 परीसीकूल आरू सदूकीकूल पुलपीकतान बानीन तीग लेक ती मेनूर एनी आन इमीन रोटील इसाब ती पोकेना एन्डानोन ईम एटे चोमजोरा?” एट्टेड 12 तेबे ओड रोटीलीन पुलपीकतान बानीलीन बीतेर ती लेक ती मेनूर एनी ऊबाका परीसीकूल आरू सदूकीकूल मेरचीकतान पाटेल तीग लेक ती मेनूर एनी पोक्केड एनी चोमजेर।

पतरस ईसून, मसीयाल एनी पोकरानो

(मरकू 8:27-30; लूका 9:18-21)

13 आनातले मारी ईसू केसरीया पिलीप्पी पोलूबूल टिटाक चेन्डेड। आतोड ओड तान्न चेलालेरीन, “लोग सरग तो मांजेन नातेड आय एनमेर?” एनी जाच आडेड। 14 आदूग ओर, “ओदेर-ओदेर इनीन बपतीसमा चियरान एऊना आय एनमेर; आरू ओदेर-ओदेर एके इनीन एलीया आय एनमेर; आरू ओदेर-ओदेर एके इनीन इरमीया मेनगा चिलाड मापोरबून कान तीग काबेर वेन्नी किली लोगीन पोक चियरान मुन्नीत गुरूकूल कान तीग एड बेले ओकूर आय” एनमेर एट्टेर। 15 आदूग ईसू, ओरीन “एरोड, ईम आनीन एड आय एनमोर?” एट्टेड। 16 आदूग सिमोन पतरस, “ईन जियोम मेन्डान मापोरबून चिन्ड , आय” एट्टेड। 17 ईसू ओनीन, “ए सिमोन। योनेन चिन्डीने! इनूंग आसतीर एरको। एटे एनोड चेप्पूल आरू नेतीर तीग बान्नी मेन्डान मांजा एरा; सरग ती मेन्डान आन्न बुवा एके, ई पाटेन इनीन पारगाकतेड। 18 आरू आन इनीन पोक्कूमेन: ईन पतरस आय। (पतरस एनोड युनानी पाटे ती गाडार आय।) आरू ई गाडार ती आन पोरबून बिसवात चाजूरान आन्न मान्देत लोगीन नीतीकतान आरू किड़ीतपूर तो कापाटूल बेले ओरीन जीतू ओड़ाव। 19 आन इनूंग मापोरबू जाम्मेनी आंगरूरान सरग तो कापाटीन कुची कोयेल चियरान। ईन ई मोंजीपूर ती माना चाजूरानो नातो एरको सरग ती बेले माना एर्रा आरू ईन ई मोंजीपूर ती चेलोको एन्डानो नातो एरको सरग ती बेले चेलूरा” एट्टेड। 20 आनातले ओड आपला चेलालेरीन “आन मसीयाल आय एनी एरीनी मुरले पोकरानो एरा” एनी बारजाकतेड।

ईसू तान चाय्यरानोन मुन्नी की पोकरानो

(मरकू 8:31–9:1; लूका 9:22-27)

21 आतीत ले ईसू आपला चेलालेरीन, “आनूंग एरूसेलेम ती चेन्डानो ई आय; आना एऊदी लोगीन सियानकूल, बेड़कूल पेलाचकूल आरू मूसाल नीतीन मेरचीकतानेरीन केय्य तीग कुबे बानील तो सतावूल बेटू लागूरा; ओर आनीन चाय्यीकतानो आय आरू आन मुचीच तीग जियोम पाटतीक एर्रानो आय” एनी पोक्कू मुरीयाकतेड। 22 पतरस ओनीन पुटा उय्यी किली, “पोरबू ईटे एर्रानो एतोडी बेले इनूंग एरा मेनको” एनी कावडू मुरीयाकतेड। 23 आदूग ईसू उलटी चूड़ी किली पतरसीन, “ए चेयतान! आन्न मुन्देल तीग कोमाड गूच” एनी किली “ईन मापोरबू उवाट चाजूरान आकाट बिचार चाजाका, मांजाकूल उवाट तीग पोकी किली आनूंग मापोरबून उवाट ती चेलू मारकाडा एरमोत” एट्टेड। 24 तेबे ईसू तान्न चेलालेरीन, “एरूग बेले आन्न पोटतेल वेरू मेन्न मेनोड, ओड आपला मेन्न के लागेन तो बिचारूलीन चायी किली तान्न कुरूस पारेन काञी किली आन्न पोटतेल वेरकेड। 25 एड एरको आपला जियोमीन मेन्न चाजोड ओड आदीन चेनीकताड। आरू एड एरको आन्न चेत्तूग आपला जियोमीन चियरानेड, आदीन बेटूराड। 26 मांजा मोंजीपूर तो जाम्मा लाव तानूंग पुचोड बेले, तान्न जियोमीन बुड़ायपोड ओनूग नाती काम पाडाया। मांजा तान जुग जुगूग जियोमीन बेटू नाती नी पालटा चियू ओड़ाड। 27 एटे एनोड आपला बुवेन निरबे रेच्चाट चाबाव तीग मेडूरान रेग ती आपला सरग दूतकूल चेंगे वेर्राड। आतोड ओड जाम्मा लोगूग, ओर एटे-एटे कामूल चाजेर नार आटनी-आटनी पालटा चियराड। 28 इना निलतेर नार जे? ओर कान तीग ओदेर-ओदेर सरग तो मांजा कोसीन आकाट वेर्रानोन चूड़ाका मुन्नी की चाय्यारा एनी किली आन इमीन चेत्तेगी पोक्कूमेन” एट्टेड।