लूका 12

परीसीकूलीन पोबाकतान इसाब ती लेक ती मेनूर

1 आतीत ले आजारोँ लोगीन जोप एर चेन्डो आरू निक्के जोप एर्रान चेत्तूग कुन्दा मान्डा एरी किली ओकूरीन पोडे ओकूर उरकूरीर। ईसू पोईल तान्न चेलालेरीन ईटे पोक्कू मुरीयाकतेड: “पुलपीकतान बानीन आकाट पोबाकतान इसाबूल लोगीन नाचाकताव आदूग ईम लेक ती मेनूर। 2 पाकी मेन्डान आरू पाड़चे-पाड़चे एर्रान आकाट तोव मापोरबून पाटेल नाती चिल्लाव; जाम्मा पारगोड एर्राव। 3 आदूगी नातीन एरको ईम चीकोड ती पोक्कोर नार आव विलीज ती वेनपीक एर्राव आरू ईम नातीन बाकरे ती चेव चेवी केकोल ती पोक्कोर नार आव इल पोडी तीग पारगाक एर्राव।”

मुरले नारचूमोर

(मत्ती 10:28-31)

4 ए आन्न चेंगाटतेरीने! आन इमीन पोक्कूमेन, आमान मेनीन नाचाक नाम्बीकतान, आरू आदूग ले आगेर नाती चाजू ओड़ा लोगूग ईम नारचूमोर। 5 एरोड एरूग नारचूरानो आय एनी आन इमीन पोकरान: इमीन चाय्यीक किली पिटतेल नरक कून्ड ती तीन्डूक पान्न मेन्डान मापोरबूगी नारचूर। ओ, आन पोक्कूमेन ओनूगी नारचूर। 6 एटे दुय पोयसेलूग चेन्डू गोरीयेलीन वीड़रार चिला? एरोड बेले मापोरबू आवीन तीग ओकतीन बेले बूलकाडा। 7 इम तेल्ल तो जाम्मा तेलताकूलीन बेले मापोरबू नेकीकतेड नाड। ईम नारचूमोर। एटे एनोड ईम कुबे गोरीयेल ले बेले आगेर मोल्लेतोर आय।

लोगीन मुन्देल सरग तो मांजेन मानूरानो

(मत्ती 10:32, 33; 12:32; 10:19, 20)

8 आन इमीन पोक्कूमेन: एड एरको मांजेन मुन्देल आनीन मानूराड ओनीन बेले मापोरबून सरग दूतकूल मुन्देल मानूराड। 9 एरोड एड एरको मांजेन मुन्देल आनीन पूनान एनी पोकोड ओनीन ओड मापोरबून सरग दूतकूल मुन्देल पूनान एनी पोकराड। 10 एड एरको सरग तो मांजेन विरूद ती नातो एरको पोकोड ओनूग मापी टोन्डूरा। एरोड नाती केचूर चिला जियोमीन विरूद ती निन्दरोड, ओनूग मापी टोन्डाया।

11 लोग इमीन एऊदीकूल बिन्ती जोड़रान ओलेकूल ती उन्डरान पोँच ती आरू कोसकूल मुन्देल आरू आंगरूरानेर मुन्देल आरू आदीकारीकूल मुन्देल उयोड, आम एटे ती नातो जवाब चियराम बे एनी किसीयाकमोर। 12 एटे एनोड नाती केचूर चिला जियोम आयची बेरा ईम एटे पोकरानो आय एनी मेरचीक चियराड।

बाकवाल सावकार इसाब तो चोमजाकतान डाग्गा

13 आतोड जोप तीग ओकूर ईसून, “ए गुरजी! आन्न बुवेन देनीन आनूंग पायची चिय एनी आन्न तोल्लेडीन पोक चिय” एनी गुवारतेड। 14 आदूग ईसू ओनीन, “ए मांजेने! एड आनीन इम नियाव चिड़ाकतानेड चिलाड पायतानेड नीतीकतेड नाड आदूग?” एनी पोक्केड। 15 आरू ईसू ओरीन, “चेतूर ती मेनूर आरू जाम्मा बानीत जिवड़ेय एर्रान कान तीग बाची मेनूर; एटे एनोड एड बेले आपलेग कुबे देनीन रुन्डाकतान तीग आपलेन मुकीयाल एरीक ओड़ाड” एनी पोक्केड।

16 आरू ओड ओरीन ओक चोमजाकतान डाग्गा पोक्केड: “ओकूर सावकारीन नेन्दील ती कामेय चेड़ीगेन एञ्ञो। 17 तेबे ओड, ‘आन एटे चाजूरान बे? आन कोयरानोन इडरान आकाट तो पाड आरे नी चिल्ला’ एनी तान्न मेन्न ती बिचार चाजेड। 18 आरू ओड, ‘आन आन्न गेदीयेलीन बोसड़ाक किली आवीन ले बेड़कूल चाजूरान आरू आना आन्न कामेयीन आरू जामूकूलीन इडरान; 19 आरू आन्न जियोमीन, जियोमीने इनूंग कुबे बेरेकूलूग चेड़ीगेन रेच्चाट बानील मेन्डाव; बिसाक, तिन, ऊन आरू वेड़के ती मेन एन्डान’ एट्टेड। 20 एरोड मापोरबू एके ओनीन, ‘ए बाकवालीने, इने चित्ता इन जियोम चेनोड, ईन रुन्डाक मेन्डान जाम्मा देन एरोत एर्रा?’ एट्टेड। 21 मापोरबून इसाबूल ती सावकार मेनाका देनीन तानूंग तानी रुन्डाकतान मांजा बेले आटनीतेड आय” एनी ईसू डाग्गा पोक्केड।

किसीयाकमोर

(मत्ती 6:25-34)

22 मारी ईसू तान्न चेलालेरीन, “आदूगी आन इमीन पोक्कूमेन, आदूगी आन पोक्कूमेन, ईम आपला जियोमूग आम नातीन तिन्दाम आरू आपला मेनूग नातीन नूड़राम एनी किली किसीयाकमोर। 23 एटे एनोड जियोम बोजीग ले आरू मेन गान्डेलूग ले बेड़तोत आय। 24 कावरेलीन चूड़ूर; आव वीतावा आरू कोयावा, आरू आवूग गेदीया आरू डिकील बेले चिल्लाव; एरोड बेले मापोरबू आवीन तितीकमेड। एटे ईम तीतेलूग ले आगेर तो मोल्लेतोर एरा आदूग? 25 इम कान तीग एड बेले किसीयाक किली आपला पीयरान तीग ओक गेन्टा बेले चान्दीक नाम्बीकतानेड मेन्डाड। 26 आटे ती ईम ई सोब ले पिटीत कामीन बेले चाजू ओड़ार गो, मारी नांग आवूर पाटेलूग किसीयाकमोर आले? 27 मेराम तो पूवूल एटे चान्दूमोव एनी चूड़ूर; आव मोयमोत चाजाका गान्डेल चाजाका चान्दूमोव; एरोड बेले आन इमीन पोक्कूमेन, सुलेमान कोसूग आञ्ञोत देन माल मेन्डू। एरोड बेले ओड आ पूवूल तीग ओक पूवीन आकाट तो निरबे चाबाव तो मोल्लेत गान्डा नूड़ा मेन्डीड। 28 एरोड मापोरबू इने मेन्नी तोल्ली किच पातीकतान बाटकूल तो लाटेलीन ईटे नूड़पीकमेड गो, ए कोमजोर बिसवात तो लोगीने! ओड इमीन आवीन ले आगेर नांग नूड़पीकपाडा आदूग? 29 आरू ईम नातीन तिन्दाम आरू उन्डाम एन एनी कानची मेनमोर आरू किसीयाकमोर। 30 एटे एनोड मापोरबून माना लोग ई जाम्मा बानीलीन कानची-कानची मेन्डार, आरू इम बुवा इमूंग ई जाम्मा बानील लागूराव एनी पुट्टेड। 31 एरोड ओड आंगरूरानोन कानतानेल बिड़ी मेनूर आरू ओड ई बानीलीन बेले इमूंग चियराड।”

देनीन सरग ती रुन्डाकतानो

(मत्ती 6:19-21)

32 ए पिटीत मान्देत लोगीने! नारचूमोर। एटे एनोड इम बुवा तान आंगरूरान इसाब ती इमीन बिड़ाक मेन्न चाजूमेड। 33 आपला देनीन वीड़ी किली चिला लोगूग चिय काडूर। आरू आपलेग आटोव एरा तेयलील चाजूर। एटे एनोड कोमी एरा देनीन सरग ती रुन्डाकपूर आरू आदीन लेग्गाट डोंगालेर चेनारा आरू आदीन एलूब तिनाया। 34 एटे एनोड आरे इम देन मेन्डा आन्नी इम मेन्न बेले लागी मेन्डा।

तायार मेनूर

(मत्ती 24:45-51)

35 इम किट्टेल काटरानोव मेन्नी तायार ती मेनूर आरू इम दियेल नीर नीरी मेनकोव, 36 चुरचा ओलेक चेनी मेन्डान तान्न सावकार एतोड वेर्राड एनी पाव चूड़ी ओड मेलेरी किली टोक टोकाकपोड तुरते ओनूग कापाट चानतान एनी काची मेन्डान कामीयालेर आकाटतोर एरूर। 37 सावकार वेरी किली चेता मेन्डानोन बेटूरान कामीयालेर आसतीरतोर आय; आन इमीन चेत्ते पोक्कूमेन सावकार तानी पायूक तायार एरी किली आपला कामीयालेरीन टेबूल ती उन्डतीक किली ओरीन मान दान चाजूराड। 38 ओड चित्तेत नेनदूनाल ती चिलाड कोर्र कूयूरान बेरा वेरी किली चेता मेन्नी तायार मेन्डानोन बेटूरान कामीयालेर निक्के आसतीरतोर आय।

39 एरोड इदीन एके चोमजूर: ओलेक तो सावकार तान्न ओलेक ती आरो बेरा डोंगाल वेर्राड एनी पुन्नी मेनोडेल ओड आपला ओलेक ती बोत्ता कोरू इडेडामीन। 40 एटे डोंगाल एडी बिचार चाजा बेरे ती वेर चेन्डाड आटनी ईम बिचार बेले चाजा बेरे ती सरग तो मांजा वेर चेन्डाड। आदूगी ईम बेले तायार मेनूर।

चेत्त चाजू एर्रान बातेर तो बान्डारी

41 तेबे पतरस, “ए पोरबू! ईन ई चोमजाकतान डाग्गेन आम्म चेलालेरीनी पोक्कूमोत काय जाम्मा लोगीन आय?” एनी जाच आडेड। 42 आदूग पोरबू, बिसवात चाजू एर्रान बातेर तो आरू बुदीत बान्डारी एड आय? ओनीन तान्न सावकार जाम्मा कामीयालेरूग बेरे ती ओर बाटेल तो तिन्दान बानील चियू मुकीयाल चाजूराड। 43 आपला सावकार वेरेक ऊड तियारची मेन्डानोन चाजूरानोन सावकार बेटोड ओड आसतीरतेड आय। 44 आन चेत्ते पोक्कूमेन, आ सावकार ओनीन आपला देन माल तो आदीकारी चाजूराड। 45 एरोड आ कामीयाल एके तान्न मेन्न ती “आन्न सावकार गेरी किली वेर्राड” एनी बिचार चाजी, कामीयालेरीन आरू कामीयाचीलीन ताप्पू, चाडूक आरू तिन्नी उन्नी मातवार एरू मुरीयाकताड एनी बिचार चाजूर। 46 आ कामीयाल आपला सावकारीन पाव चूड़ा चिरीक, चिलाड ऊड पूना बेरे ती ओन सावकार वेर चेन्डाड। आरू ऊनीन निक्के डेन्ड चियी किली ओनीन चेत्त चिल्ला लोगीन चेंगे बीड़ाकताड।

47 सावकारीन उवाटीन पुन्नी किली बेले तायार मेनाका आरू ओड मेन्न चाजूरान आकाट चेलाका मेन्डान कामीयाल निक्के मार तिन्दाड। 48 एरोड पूना कान्डूग मार तिन्दान आकाट तो काम चाजूरानेड किन्डीक आकाट मार तिन्दाड। आदूगी एरूग निक्के चियरानो मेन्डा ओनीन निक्के आडूरार; आरू एरूग निक्के ओपीकतानो मेन्डा ओनीन आदीन ले आगेर एजा पातरार।

ईसू मारी वेर्रान वादेक तो चिनेल

(मत्ती 10:34-36)

49 आन मोंजीपूर ती किच पातीक वेञ्ञेन नान; आरू मुन्नीत ले आद पातीक मेनोड एर्रूमीन। 50 आनूंग ओक बपतीसमा एतानो मेन्डा। आरू आदीन एपारे आन निक्के डेन्ड एर एरी मेन्डान। 51 आन मोंजीपूर ती लोगीन मिलाक वेञ्ञेन नान एनी चोमजूमोर काय एटे? आन लोगीन मिलाक एरा एरोड एलगाक एनी आय वेञ्ञेन नान एनी पोक्कूमेन। 52 एटे एनोड एबेत ले ओकती ओलेक तो चेवीर पुटा-पुटा एर्रार। मूवीर इरूलोड आरू इरूल मूवीरोड विरूद मेन्डार। 53 बुवा चिन्डीनोड आरू चिन्ड बुवेनोड कुचेर एर्राड; ईय्या मालीनोड, आरू माल एके ईय्येनोड, आञ्ञा कोड़ोलीनोड, आरू कोड़ोल एके आञ्ञेनोड कुचेर एर्रा।

ओक-ओक वादेकीन चोमजूरानो

(मत्ती 16:2, 3; 5:25, 26)

54 आरू ईसू जोप तो लोगीन, “ई देचे ती एतोड एरको पोकाल पाडरान टिटाक तीग बादोर चुनतीकपोड, वाञी पाडरा एनी ईम तुरते ताड़रार आरू आटनी एर्रा ई। 55 आरू किड़ेड टिटाक तीग वाल्ली वेर्रानोन चूड़ी किली एके नेन्डी निक्के टेडरा बे एनी जानूरार आरू आटनी एर्रा। 56 ए पोबाकतानोरे! ईम बादोर आरू नेन्दील एटे टोन्ड़ूमो एनी चूड़ी किली नातो एर्रा बे एनी आदीन बीतेर ती जानू नाम्बीकतार एरोड, ई जुग ती मापोरबू नातोन चाजूमेड एन्डान इसाबीन एटे ताड़ू ओड़ोर नार?” एट्टेड।

कावडी उयरान लोगीनोड मिलेन ती मेन्डानो

57 “नातो रेच्चा आय एनी नांग ईमी चोमजू ओड़ार गो? 58 ईन इन्नोड कावडी उयरानेडीनोड नियाव चिड़ाकतान मांजेन कान चेनेक, पाव ती नी ओनोड मिलान उवाट चाज। चिलाड इन्नोड कावडी उयरानेड इनीन टान्डी किली नियाव चिड़ाकतान मांजेन लेग्गाट उयराड आरू ओड इनीन पालटेनकूलीन मुकीयालीन केय्य ती बेटाकताड आरू ऊड इनीन जेल ती केटताड। 59 आन इमीन पोक्कूमेन जाम्मा जुरमानेत पोयसेलीन बोरारे ईम आना तीग पेक ओड़ार।”