पाबूरान चिरीक
12
1 आतोड ईसू पाबूरान चिरीक आपला चेलालेर चेंगे कामेय पावोड चेन्डेड।
ओन चेलालेरूग आन्डरानूग चेन्नूल पुटकीक-पुटकीक तिनूंग मुरीयाकतेर।
2 आदीन चूड़ी किली परीसीकूल ईसून,
“इद चूड़!
पाबूरान चिरीक एऊदीकूल नीती ती चाजू बाना कामीन इन चेलालेर चाजूमेर”a एट्टेर।
3 आदूग ईसू,
“दाऊद कोस आरू ओन चेंगेतेरूग आन्डरानूग ओड नातो चाजेड एनी ईम पोड़ारी काय एटे?
4 ओड मापोरबून गुड़सेb ती तान्नी किली पेलाचकूलीनc चायी एडी तिनूंग बाना मापोरबूग चोत्तीक मेन्डान रोटीलीन,
ओड आरू ओन चेंगेतेर तिन्देर।d
5 आरू पाबूरान चिरीक,
पेलाचकूल मापोरबून गुडी ती सेवा चाजूरानो आय एनी मूसाल नीती ती पोक्की मेन्डानूग ओर बूता चाजूरार।
e एरोड बेले ओरूग आद बोदी एराया।
आदीन ईम पोड़ारी काय एटे?
6 आन इमीन,
‘मापोरबून गुडीन ले बेले बेड़तेड इना मेन्डाड’ एनी पोक्कूमेन।
7 एरोड एबे ईम,
‘जेतरा चाजूरान ले आगेर जियोम नोयपीकतानूग आन वेड़का एर्रान’f एन्डानो नाताय एनी पुन्नी मेनोड ईम केचूर चिलायेरीन केचूरतेर एनी चिड़ाकपोरामीन।
8 सरग तो मांजा गो पाबूरान चिरीक तो पोरबूg आय” एट्टेड।
कोल्लाल उजरूरानो
9 ईसू आर्र तीग पेची किली एऊदीकूल बिन्ती जोड़रान ओलेक ती वेञ्ञेड।
10 आना ओकूर कोल्लाल मेन्डीड।
तेबे ओर ईसून केचूर लागाक,
“एटे पाबूरान चिरीक उजराकतानो बान्दा काय एटे?”
h एनी जाच आड़ेर।
11 आदूग ओड,
“इम कान तीग एरूग बेले ओक मेन्डा मेन्नी किली,
आद पाबूरान चिरीक कोदरे ती उरकी मेनोड आदीन चुम्मी किली एडी पुचारा आदूग?
12 मेन्डेन ले मांजा निक्के मोल्लेतेड आय।
आदूग पाबूरान चिरीक रेच्चाट काम चाजूरानो,
नीती ती बान्दा” एनी किली,
13 ईसू आ मांजेन,
“इन केय्यीन नीकीक” एट्टेड।
आदूग ओड केय्यीन नीकीकतेड।
आदूग आद आवूर तो केय्यीन आकाट रेच्चा उजरोतो।
14 तेबे परीसीकूल बाटतेल चेनी किली ईसून एटे तीग आनकीकताम एनी उवाट चाजेर।
मापोरबू आची मेन्डान कामीयाल
15 आदीन जानी किली ईसू आना तीग पेतेड।
कुबे लोग ओन पोटतेल-पोटतेल चेन्डेर।
नोयकूडतेरीन जाम्मेनी ओड उजराक किली,
16 ओर लेक ती मेन्नी किली तान चाजूरानोन लोगीन पारगोड पोका मेनकेर एनी तियारतेड।
17 मापोरबून कान तीग काबेर वेन्नी किली लोगीन पोक चियरान एसाया गुरू पोकरानो पूरा एरको एनी ईटे एञ्ञो।
ओड ईटे पोक्केड नाड:
18 “इद चूड़!
आन आची मेन्डान आन्न कामीयाल इना मेन्डाड।
ऊड आनूंग लाडराल आय;
आन ओन तीग वेड़का एरमेन;
आन आपला जियोमीन ओन कान तापरान,
आरू ऊड देचेल-देचेल तो लोगूग नियाव तो काबेर पोक चियराड।
19 ऊड कावडी उयाडा;
कोलार एराडा;
ऊन पोल्लेन सेड़ेकूल ती एडी वेनारा।
20 नियाव जीतूरान आर्रे ऊड बीली मेन्डान तुंगा लाटेन पुटकीकपाडा
आरू गूञूकूड़ चियरान विलीजीन बेले चिटीकपाडा।i
21 ऊन पिदीर ती देचेल-देचेल तो लोग आचा चाजी मेन्डार”j
एनी पोक्केड नाड।
ईसू आरू बालजाबूल
22 आनातले ओक कानाल आरू बायरालीन ईसून लेग्गाट एन्दरेर।
ओनीन बूत डुमेल चुम्मी मेन्डूव।
ईसू ओनीन उजराकतेड।
आदूग ओड ऊबू आरू चूड़ू मुरीयाकतेड।
23 इदीन चूड़ी किली जाम्मा लोग काबा एर चेन्डेर आरू,
“एटे ऊड दाऊदीन चिन्ड एराड आदूग?”
एनी पोक्केर।
24 एरोड परीसीकूल एके,
इदीन वेन्नी किली,
“बालजाबूल एन्डान बूत डुमेलीन कोसीन बेरकेच तीग ई मांजा बूत डुमेलीन पुच्चूमेड” एट्टेर।
25 आदूग ईसू ओर मेन्न तो बिचारूलीन ताड़ी किली ओरीन,
“आरो एरको देचे ती आपलेग-आपलेग लेड़ा जुजा एरोड,
आद उजड़ी चेन्डा;
आरो एरको गेड़ा चिलाड ओलेक ती बेले आपलेग-आपलेग लेड़ा जुजा एरोड,
आव रेन-बेन एर चेन्डाव।
26 चेयतान बूतीन चेयतान बूती पुचोड गो आद आपला ई विरूद ती एञ्ञो ना;
आटेकोड आदीन राज एटे बान्नी मेन्डा?
27 आन बालजाबूलीन ताकोत तीग बूत डुमेन पुच्चूमेन एनी ईम पोक्कूमोर जे?
एरोड इम चेलालेर एर ताकोत तीग पुच्चूमेर गो?
आटे तीग ओर चाजूरानोन चूड़ोड ईम बोदी चियरानो गेलती आय एनी पाता चेलूमो।
28 आन मापोरबून जियोमीन ताकोत तीग बूत डुमेन पुचरानूग,
आद मापोरबू आंगरूरानो इम लेग्गे एदेरनो ना एनी टोटीकमो।
29 आन एटे बूत डुमेलीन वालीकतान एनी चोमजाक ओक डाग्गा पोकरान:
एड एरको ओक लाव तो मांजेन ओलेक ती तान्नी किली मुन्नी आ बेरकेच तो मांजेन काटकाका ओन देनीन डोंगू ओड़ाड।
काटकोड गो ओन ओलेकतोन डोंगू नाम्बीकताड।k
30 एड आन्न चेंग चियाडा ओड आन्न विरूदतेड आय;
आरू एड आन्न चेंगे (लोगीन) उड़चीकपाडा ओड बुरलाकतानेड आय।
31 आदूगी आन इमीन पोक्कूमेन:
एट्टो एरको पापदेरोमूल आरू नातो एरको नेडीकतान इसाबूल,
मांजेग माप एर्राव;
एरोड नाती केचूर चिला जियोमीन निन्दरूरानो एके माप एराया।
32 एड एरको सरग तो मांजेन विरूद ती नातो एरको पोकोड ओनूग मापी टोन्डूरा।
एरोड नाती केचूर चिला जियोमीन विरूद ती निन्दरोड,
ओनूग ई जुग ती आरू पिटतेल तो जुग ती बेले मापी टोन्डाया।”
मेरी आरू आदीन पालकूल
33 “मेरी रेच्चाट एनोड आदीन पालकूलीन बेले रेच्चाचील एनूर;
मेरी कियाल तो आय एनोड आदीन पालकूलीन बेले कियाल तोव मेन्डाव एनी ईम पुट्टोर।
एटे एनोड मेर तो पालकूलीन चूड़ी किली आदीन चिताकतार।
34 ए किरीच बाम्बीन पापकूल आकाट तो कियालतोरे!
ईम कियालतोर मेनोड,
एटे रेच्चाट पाटेल पोक्कू नाम्बीकतार?
गेरोब ती कोप्पी मेन्डान पाटेली गो चोन्ड तीग बेले पेताव।
35 रेच्चाल मांजा आपला गेदीयेन आकाट तो रेच्चाट गेरोब तीग रेच्चाट पाटेल पुचराड।
आरू एड़जाल मांजा एके आपला गेदीयेन आकाट तो एड़जाट गेरोब तीग एड़जाट पाटेलीनी गो पुचराड।
36 मांजा पोकरानो जाम्मा पोकात पोद्दूल इसाब ती,
नियाव एर्रान चिरीक लेका चियू पाडरा,
एनी आन एके इमीन पोक्कूमेन।
37 एटे एनोड ईन आपला पोद्दूल चेत्तूगी देरमी आरू आपला पोद्दूल चेत्तूगी केचूरतोत एनी चिड़ाक एर्रात” एट्टेड।
परीसीकूल चिना कानतानो
38 आनातले परीसीकूल ओदेर आरू मूसाल नीतीन मेरचीकतानेर ओदेर ओनीन,
“ए गुरू!
इनीन सरग तीग मापोरबू चोटतेड एरोड,
आ इसाब तो पोरलेत काम तो चिना ओकूत आम इन तीग चूड़राम एनमोम” एट्टेर।
39 आदूग ओड ओरीन,
“ई जुग तो एड़जालेर आरू दारीयालेर पोरलेत काम तो चिनेन कानतार।
एरोड मापोरबून कान तीग काबेर वेन्नी किली लोगीन पोक चियरान यूनूस गुरून चिनेन चायी किली आवूरतोव नाती चिनेल ओरूग चियू एराया।
40 एटे यूनूस मून्डू पाकटेल आरू मून्डू चीकोडूल ओक बेड़तो मीनीन पोटे ती मेट्टेड;
l आटनी सरग तो मांजा बेले मून्डू पाकटेल आरू मून्डू चीकोडूल नेन्दील बीतराम मेन्डाड।
41 निनवे गेड़ेत लोग यूनूस केडीकतानोन मानी किलीm मेन्नीन उजराकतेर।
इद चूड़!
यूनूसीन ले बेले बेड़तेड इना मेन्डाड।
आदूगी नियाव एर्रान चिरीक निनवे गेड़ेत लोग ई जुग तो लोगीन चेंगे निलची किली ओरीन नियाव चिड़ाकतार।
42 किड़ेड देचेत रानी,
o सुलेमानीनn गियानीन वेनूंग मोंजीपूर तो टोकूल तीग वेञ्ञो।
इद चूड़!
सुलेमानीन ले बेड़तेड इना मेन्डाड।
आदूगी नियाव एर्रान चिरीक आ रानी ई जुगतेर चेंगे निलची किली ओरीन नियाव चिड़ाकता।”
बूत डुमा मेलेर्रानो
43 बूत डुमा ओक मांजेन कान तीग पेची चेनोड,
वेटरान पाडकूल ती चुल्ली किली बिसाकतानोन कानता आरू आरे नी पाड बेटाकोड,
44 तान पेची किली चेनी मेन्डान ओलेक ती मेल्ली किली चेन्डान एनी पोकरा;
आरू वेरी किली आ ओलेकीन मेला मेन्डानोन आरू आयची किली चिंगारची मेन्डानोन चूड़ी किली
45 मारी चेनी किली तान्न चेंगे,
तान्न ले एड़जाट आवूर तो सात गोटा बूत डुमेलीन एन्देर्रा आरू आना तान्नी किली डेरा पातराव।
तेबे आ मांजा मुन्नीत ले बेले आगेर कियाल एर चेन्डाड।
ई जुग तो एड़जालेर बेले आटनी एर चेन्डार।
ईसून ईय्या आरू तोल्लेर
46 ईसू ईटे जोप तो लोगीनोड ऊब-ऊबी मेनेक ओन ईय्या आरू तोल्लेनकूल ओनोड ऊबूराम एनी वाल निलची मेन्डीर।
47 तेबे ओकूर ओनीन “इम ईय्या आरू तोल्लेनकूल इन्नोड ऊबूराम एनी वाल निलतेर नार” एट्टेड।
48 आदीन वेन्नी ईसू ओनीन,
“एड आय आन्न ईय्या आरू आन्न तोल्लेनकूल?”
एनी किली
49 आपला चेलालेर टिटाक आपला वान्दा टोटीक किली,
“ऊरी आय आन्न ईय्या आरू आन्न तोल्लेनकूल।
50 सरग ती मेन्डान आम्म बुवेन उवाट ती चेलानेरी आन्न तोल्लेड,
चालाल आरू ईय्या आय” एनी पोक्केड।