लूका 6

पाबूरान चिरीक तो पोरबू

(मत्ती 12:1-8; मरकू 2:23-28)

1 ओकेच पाबूरान चिरीक ईसू कामेयूल पावोड चेन्डीड आरू ओन चेलालेर चेन्नूल पुटकीक-पुटकीक केय्योड तुयबी-तुयबी तिन तिनी चेन्डीर। 2 तेबे आदीन चूड़ी किली कान तीग ओदेर, “ईम नातेग पाबूरान चिरीक एऊदीकूल नीती ती चाजू बाना कामीन पाबूरान चिरीक चाजूमोर?” एनी पोक्केर। 3 तेबे ईसू ओरीन, “दाऊद कोस आरू ओन चेंगेतेरूग आन्डरानूग ओड नातो चाजेड एनी ईम एतोडी पोड़ारी काय एटे? 4 ओड मापोरबून गुड़से ती तान्नी किली मापोरबूग चोत्तीक मेन्डान रोटीलीन पेड्डी किली तिन्देड आरू तान्न चेंगाटतेरूग बेले चिञ्ञेड। आ रोटीलीन पेलाचकूलीन चायी एरूगी तिनूंग बाना मेन्डू।” 5 आरू ईसू ओरीन “ गो पाबूरान चिरीक तो पोरबू आय” एट्टेड।

ईसू कोल्लालीन उजराकतानो

(मत्ती 12:9-14; मरकू 3:1-6)

6 मारी ओकेच पाबूरान चिरीक ईसू एऊदीकूल बिन्ती जोड़रान ओलेक ती चेनी मेरचीकतीड आरू आना ओक मांजा मेन्डीड; ओन वेला केय्य वेट्टी मेन्डू। 7 आतोड मूसाल नीतीन मेरचीकतानेर आरू परीसीकूल ईसून केचूर लागाक पाबूरान चिरीक ओड ओनीन उजराकताड काय एटे एनी चूड़ चूड़ी मेन्डीर। 8 एरोड ईसू ओर बिचारूलीन पुन्नी किली आ कोल्लालीन, “ईन वेरी किली जाम्मेन मुन्देल निलूक” एट्टेड। आदूग ओड चुलची किली आना निलतेड। 9 तेबे ईसू ओरीन, “पाबूरान चिरीक नातो चाजोड बान्दा? रेच्चा चाजूरानो काय कियाल चाजूरानो आय? जियोमीन आय काय नाचाकतानो आय? एनी आन इमीन जाच आडूमेन” एट्टेड। 10 तेबे ओड ओर जाम्मेनीन बोँरेक चूड़ी किली आ मांजेन, “ईन आपला केय्यीन नीकीक” एट्टेड। आदूग ओड आटनी चाजेड आरू आद रेच्चा उजरोतो। 11 एरोड परीसीकूल आरू मूसाल नीतीन मेरचीकतानेर निक्के रिच एरी किली ईसून एटे चाजूराम एनी तामूंग तामी पोका पोकी एञ्ञेर।

मापोरबून काबेरीन पोक्कू बारा जानीन नीतीकतानो

(मत्ती 10:1-4; मरकू 3:13-19)

12 आ वादेक ओकेच ईसू कोप्पे ती बिन्ती जोड़ू चेन्डेड आरू चित्ता विलोमी मापोरबून बिन्ती जोड़ जोड़ी मेट्टेड। 13 पोका विलीज एर्रानूग ओड तान्न चेलालेरीन कूयी किली ओर कान तीग बारा जानीन आचेड आरू ओरीन पोरबू नीतीकतानेर (पेरीतकूल) एनी पिदीर चिञ्ञेड; 14 आरू ऊर पिदीरूल आय: सिमोन, ओनीन ईसू पतरस एनी पिदीर इड्डी मेट्टेड, ओन तोल्लेड आन्दरीयास, आरू याकूब, एऊना, पिलीपूस, बरतूलमेय। 15 आरू मत्ती, तोमाल आरू याकूब, ऊड आलपाईन चिन्ड आय, आरू सिमोन ऊनीन कनानी बेले एन्डार। 16 आरू याकूबीन चिन्ड एऊदा, आरू एऊदा इसकारीयोती। ऊडी ईसून कुचनाय चुमीकतानेड एञ्ञेड।

ईसू जोप तो लोगीन उजराकतानो

(मत्ती 4:23-25)

17 तेबे ईसू ओर चेंगे कोप्पे तीग इड़ी किली रेच्चाट बाट ती निलतेड। ओन चेंगे तान्न चेलालेर जाम्मा आरू गुलाय एऊदीया देचेतेर, एरूसेलेम गेड़ेतेर आरू सूर आरू सयदेत सोमून्द कुडीतेर कुबे लोग मेन्डीर। 18 ओर ईसून पाटेलीन वेनूंग आरू बेमारूल तीग उजरू वेरी मेन्डानेर आय। आरू बूत डुमेल चुम्मी मेन्डानूग आबोड़ एर्रानेरीन ऊड रेच्चा उजराकतीड। 19 ईसून मेन तीग ताकोत पेची किली लोगीन उजराकतानूग जोप तो जाम्मा लोग ओनीन टोड्डू कानतीर।

आसतीर आरू मुर मुरेत पाटेल

(मत्ती 5:1-12)

20 तेबे ईसू तान्न चेलालेर टिटाक चूड़ी किली ई पाटेन पोक्केड:

गेरीब लोगीने! इमूंग आसतीर एरको। एटे एनोड मापोरबू जाम्मेनी आंगरूरानोन ईम पातीयाकतार।

21 एबे आन्डकूड ती मेन्डानोरे, इमूंग आसतीर एरको। एटे एनोड ईम पोट्टा पाञीकतार।

एबे आड़ आड़ी मेन्डानोरे इमूंग आसतीर एरको। एटे एनोड ईम नावरार।

22 “सरग तो मांजेन चेत्तूग लोग इमीन गिन गिनाकतार आरू ओर इमीन जात चायूरार, आरू इमीन लाज पाटतीकतार, आरू इम पिदीरीन कियाल तो आय एनी निन्दरूरार। इमूंग निक्के आसतीर एरको।”

23 “आ दिने ती वेड़का एरी किली एन्दूर, एटे एनोड इद चूड़ूर! इमूंग सरग ती बेड़तो इनाम टोन्डूरा; एटे एनोड ओर बुवेर दादीलेर बेले मापोरबून कान तीग काबेर वेन्नी किली लोगीन पोक चियरान गुरूकूलीन आटनी चाजूरीर।”

24 “एरोड एबे सावकार मेन्डानोरे! ओ! ओ! इमूंग बेड़तो गेरा एरको। एटे एनोड ईम चुक तो जीवनेन बेटी पोलोर नार।

25 एबे तिन्नी उन्नी मेन्डानोरे ओ! ओ! इमूंग बेड़तो गेरा एरको। एटे एनोड ईम मुरानी मेन्डार।

आरू एबे नावरानोरे ओ! ओ! इमूंग बेड़तो गेरा एरको। एटे एनोड ईम तेल्ल ती केय्य आयबी आड़रार।”

26 “जाम्मा लोग इमीन रेच्चालेर आय एनी पोक्कूमेर एरोड ओ! ओ! इमूंग बेड़तो गेरा एरको। एटे एनोड ओर बुवेर दादीलेर मापोरबून कान तीग काबेर वेन्नी किली लोगीन पोक चियरान एनी टेगरान गुरूकूलीन चेंगे बेले आटनी चाजूरीर।”

कुचरेयकूलोड चोग चाजूर

(मत्ती 5:38-48; 7:12a)

27 “एरोड आन्न पाटेलीन वेनदान इमीन पोक्कूमेन: आपला कुचरेयकूलीन चोग चाजूर; एड बेले इमीन गिन गिनाकपोड ओरूग रेच्चा चाजूर। 28 आरू एड बेले इमीन चेरापोड ओरूग आसतीर चियूर। एड बेले इमीन इजीत चुमोड ओरूग बिन्ती जोड़ूर। 29 एड बेले इनीन ओक कुपलोंग ती ताप्पोड आवूर तोन बेले ओन टिटाक ओरचीक; आरू एड बेले ईन मूयी मेन्डान गान्डेन आयमोड, ओड इन कुड़तेन बेले उय्यू माना चाजूमेन। 30 एड एरको इनीन आडोडेल, ओनूग चिय काड; आरू एड बेले इन जामूकूलीन आयमोड, ओनीन बेरपेला मेन्डूक एनमेन। 31 ईम एटे लोग इम्मोड चाजेकेर एनी चोमजूमोर, आटनी ईम बेले ओर चेंगे चाजूर। 32 ईम आमान इमीन चोग चाजूरान लोगीनी चोग चाजोड इमूंग नातो पायदा एर्रा? एटे एनोड पापीयालेर बेले गो तामीन चोग चाजूरानेरीन चोग चाजूरार। 33 आरू एबे ईम इमूंगी रेच्चा चाजूरानेरूगी रेच्चा चाजोड इमूंग नातो पायदा एर्रा? एटे एनोड पापीयालेर बेले गो आटनी चाजूरार। 34 आरू ईम मारी मेन्डतान आचा मेन्डान लोगूगी लागा चियोड इमूंग नातो पायदा एर्रा? एटे एनोड पापीयालेर बेले गो पापीयालेरूग आंगोटी मारी बेटोकोम एनी लागा चियरार। 35 एरोड आपला कुचरेयकूलीन चोग चाजूर, आरू रेच्चा चाजूर आरू मारी बेटूरान एनी आचा चाजाका लागा चियूर। आरू इमूंग बेड़तो इनाम टोन्डूरा, आरू ईम पोडीत बेड़तो मापोरबून चिन्डूल एर्रार। एटे एनोड ओड मापोरबून जुवार एनी पोका लोगीन आरू कियालतेरीन बेले माया चाजूमेड। 36 एटे इम बुवा जियोम नोयपीकतानेड मेन्डाड, आटनी ईम बेले जियोम नोयपीकतानोर एरूर।

बोदी चियमोर

(मत्ती 7:1-5)

37 ईम आवूर लोगीन बोदी चियमोर, तेबे इमीन बेले मापोरबू बोदी चियाडा। आरू ईम आवूर लोगीन केचूरतेर एनी चिड़ाकमेन, तेबे इमीन बेले केचूरतेड एनी मापोरबू चिड़ाकपाडा। ईम आवूर लोगीन माप चाजूर, तेबे इमीन बेले मापोरबू माप चाजूराड। 38 ईम आवूर लोगूग चियूर तेबे इमूंग बेले मापोरबू चियराड। चेपाक-चेपाक किली आरू ऊचीक-ऊचीक किली आरू कोप्पी चेरूंगूरान आकाट ऊदीक किली इम कांगील ती चाप्प चियरार। एटे एनोड ईम एटे लोगूग ऊदीकतार आटनी इमूंग बेले मापोरबू उलटा ऊदीक चियराड” एट्टेड।

39 मारी ओड ओरीन ओक चोमजाकतान डाग्गा पोक्केड: “एटे कानाल कानालीन पाव टोटीक नाम्बीकताड आदूग? एटे इरूली कोदरे ती उरकारा? 40 चेलाल आपला गुरून ले बेड़तेड एराडा। एरोड एड एरको पूरा गियानीन मेरीयूरान पिटतेल आपला गुरून आकाट एर्राड। 41 ईन आपला बिसवासी तोल्लेडीन बोम्मे ती मेन्डान गुन्डेन आञ्ञोती पिटीत गेलतीन चूड़ी किली आपला बोम्मे ती मेन्डान वाचोमीन आकाट तो बेड़तो गेलतीन नांग लेक चाजाता? 42 आरू ईन आपला बोम्मे ती मेन्डान वाचोमीन आकाट तो बेड़तो गेलतीन चूड़ाता गो, तेबे बिसवासी तोल्लेडीन, ‘ए तोल्लेड इन बोम्मेत गुन्डेन आञ्ञोती पिटीत गेलतीन पुच चियरान’ एनी एटे पोक्कू नाम्बीकतात? ए पोबाक एर्रानोतीने! मुन्नी आपला बोम्मे तीग वाचोमीन आकाट तो गेलतीन पुच; तेबे गो ईन आपला तोल्लेडीन गुन्डेन आञ्ञोती पिटीत गेलतीन रेच्चा चूड़ी किली पुच्चू नाम्बीकतात।”

एट्टो मेरी आटनीत पाल

(मत्ती 7:17-20; 12:34b; 12:35)

43 “आरो एरको रेच्चाट मेरी कियाल तो पाल पाताया आरू कियाल तो मेरी एके रेच्चाट पाल पाताया। 44 ओक-ओक मेरीन आदीन पालकूलीन चूड़ी किली चिताकतार; एटे एनोड चाकेल तो पोर्रेल तीग एडी तोय पालकूलीन कोयारा आरू रेंगा मेर तीग आंगूर पालकूलीन कोयारा। 45 रेच्चाल मांजा आपला गेदीयेन आकाट तो रेच्चाट गेरोब तीग रेच्चाट पाटेल पुचराड। आरू एड़जाल मांजा एके आपला गेदीयेन आकाट तो एड़जाट गेरोब तीग एड़जाट पाटेलीनी गो पुचराड। एटे एनोड गेरोब ती कोप्पी मेन्डान पाटेली गो चोन्ड तीग बेले पेताव।”

ओलेक काटरानेर इरूल

(मत्ती 7:24-27)

46 “ईम आन पोकरानोन मानारा गो, नांग आनीन, ‘ए पोरबू ए पोरबू’ एन्डार? 47 एड एरको आन्न लेग्गाट वेर्राड आरू आन्न पाटेलीन वेन्नी किली आवीन मानूराड, ओड एर सामानतेड एर्राड एनी आन इमीन पोकरान: 48 ओड ओलेक काट्टेक नेन्दीलीन गिड़ीया कोट्टी किली गाडार तीग पाया चुनतीकतान मांजेन आकाटतेड आय। आरू वेरेड वेर्रानूग एलकेल आ ओलेक ती कुटीक एञ्ञो एरोड आदीन मेलकीक ओड़ो। एटे एनोड आद बेरकेच मान्डी मेन्डू। 49 आरू आन्न पाटेलीन वेन्नी किली आवीन मानायेड एके ओलेक काट्टेक नेन्दील ती पाया कोटाका ओलेक काटरान मांजेन आकाटतेड आय। आरू आना एलकेल कुटरानूग आद तुरते नी उरकोतो आरू पूरा नाचोतो।”