मत्ती 4

ईसून पोरकूरानो

(मरकू 1:12-13; लूका 4:1-13)

1 तेबे आतोड मापोरबून नाती केचूर चिला जियोम ईसून, चेयतान पिदीर तो बूत डुमेलीन मुकीयाट पोरकोको एनी चिड़ा बाट ती उञ्ञेड। 2 ईसू चालीस गोटा पाकटेल आरू चालीस गोटा चीकोचील नीवता मेन्डानूग ओनूग पोट्टा आन्डोतो। 3 तेबे पोरकूरान चेयतान ओन लेग्गाट वेरी किली, “एबे ईन मापोरबून चिन्ड आय एरोड ई केलकूलीन पोक; आव रोटील एरकोव” एट्टो। 4 आदूग ईसू,

“‘आमान रोटीलीन तिन्दान ती मांजा जियोम मेनाडा;

एरोड आमूंग चेत्त जियोम ती मेनूंग, मापोरबून चोन्ड तीग पेतान ओक-ओक पोद्द लागूरा’

एनी मापोरबून कागेत ती लिका मेन्डा” एट्टेड। 5 आनातले चेयतान ओनीन मापोरबू आची मेन्डान एरूसेलेम गेड़े ती उञ्ञो आरू गुडीत चिक ती नीतीकतो, 6 आरू ईसून, “ईन मापोरबून चिन्ड आय एरोड इना तीग किड़ी तिर्र। एटे एनोड,

‘मापोरबू तान्न सरग दूतकूलीन इन बीतेर ती तियारताड

आरू इन पोदोमूल केल्ल ती पोरचा मेनको एनी

ओर इनीन आपला केय्यूल ती पोडी एतीकतार’

एनी मापोरबून कागेत ती लिका मेन्डा” एट्टो। 7 आदूग ईसू,

“‘ईन, आपला मापोरबू यावेन पोरकूरानो एरा’

एनी किली बेले लिकूरानो मेन्डा” एट्टेड। 8 आनातले मारी चेयतान ओक निक्के डेंगाट कोप्पे ती ओनीन उय्यी किली मोंजीपूर तो जाम्मा राजूलीन आरू आनात निरबे चाबाव तो मोल्लेत बानीलीन टोटीकतो, 9 आरू “एबे ईन मुड़दील उरकी किली आनीन मोड़कोड आन ईव जाम्मेनी इनूंग चियरान” एनी पोक्कोतो। 10 आदूग ईसू आदीन, “आन्न लेग्गाट तीग कोमाड गूच चेयतान! एटे एनोड,

‘ईन आपला मापोरबू यावेन मोड़कू

आरू ओनीनी सेवा चाज’ एनी मापोरबून कागेत ती लिका मेन्डा”

एट्टेड।

11 तेबे चेयतान ओन लेग्गाट तीग पेची चेन्डो, आरू चूड़! मापोरबून सरग दूतकूल वेरी किली ओनीन देक-रेक चाजू मुरीयाकतेर।

ईसू लोगीन मेरचीक मुरीयाकतानो

(मरकू 1:14-15; लूका 4:14-15)

12 आनातले ईसूग, एऊनेन जेल बीतराम केटतेर एन्डान काबेर पाता चेलोतो। आदूग ओड गलील देचे ती मेलेरनेड। 13 आरू नासरत पोलूबीन चायी किली जबूलूनीन आरू नपतालीन कुटूमतेर मेन्डान सोमून्द कुडीत कपरनाऊम गेड़े ती चेनी किली मेनूंग मुरीयाकतेड।

14-16 “सोमून्द कुडीत जबूलून आरू नपताली देचेल तीग

पात्ती एरदन पेरेड तीग पोकाल पाडरान टिटाक आर्रे गलील देचा आय।

एऊदीकूल चिला आवूर जातीत लोग आना मेन्डार।

आनातेर चीकोडीन आकाट तो कियाल ती पीयमेर।

बेड़तो विलीज आट्टोड रेच्चा चूड़ू एर्रान आकाट

ओर मापोरबून पाटेलीन रेच्चा चोमजेर नार

आरू आनातेर चेत्त जियोम ती चेलाका

चाय्यकूडीन नीड़े ती मेन्डानेर आकाट मेन्डार।

मापोरबून पाटेल तो विलीज ओर पोडे आट्टोतो ना”

एनी मापोरबून कान तीग काबेर वेन्नी किली लोगीन पोक चियरान एसाया गुरू पोक्की मेन्डान पाटा पूरा एरको एनी ईटे एञ्ञो। 17 आयची वादेक ले ईसू, “मेन्नीन उजराकपूर, एटे एनोड मापोरबू जाम्मेनी आंगरूरानो लेग्गे एदेरनो ना” एनी मेरचीक मुरीयाकतेड।

मीनूल चुमरानेरीन चेलालेर एरू कूयूरानो

(मरकू 1:16-20; लूका 5:1-11)

18 ईसू गलील सोमून्द कुडी चेन चेनी मेनेक, तोल्लेड इरूल, सिमोन एन्डान पतरस आरू ओन तोल्लेड आन्दरीयासीन चूड़ेड। ओर मीनूल चुम चुम्मी पोरूरानेर मेन्डानूग, सोमून्द ती जारील तीनची-तीनची मेन्डीर। 19 ईसू ओरीन “ईम आन्न पोटतेल वेरूर। आटनी एरोड, आन इमीन लोगीन मेरचीक किली ओरीन आन्न चेलालेर एरीकतानेर एरीकतान” एनी पोक्केड। 20 आदूग तुरते नी ओर आपला जारीलीन चायी किली ओन पोटतेल-पोटतेल चेन्डेर। 21 आरू आना तीग पेची किली चेनेक ओड मारी आवूर तो तोल्लेड इरूल जबदीन चिन्ड याकूब आरू ओन तोल्लेड एऊनेन चूड़ेड। ओर आपला बुवा जबदीन चेंगे ओडेल ती आपला जारीलीन जेतनाकतीर। ईसू ओरीन बेले कूयेड। 22 आदूग ओर तुरते आपला ओडेन आरू बुवेन चायी किली ओन पोटतेल-पोटतेल चेन्डेर।

ईसू नोयरान लोगीन उजराकतानो

(लूका 6:17-19)

23 ईसू गुलाय गलील देचे ती चुल-चुल्ली एऊदीकूल बिन्ती जोड़रान ओलेकूल ती मेरचीकतेड। मापोरबू जाम्मेनी आंगरूरान इसाब तो एडो पाटेलीन पोक चिञ्ञेड। लोगीन जाम्मा बेमारूल तीग आरू नोयकूडूल तीग उजराकतीड। 24 आरू गुलाय सूरीया देचे ती ओन काबेर वेलोतो। आदूग लोग बानीग-बानीग तो बेमार तो लोगीन, निक्के नोयकूड तो लोगीन, बूत डुमेल चुम्मी मेन्डानेरीन, बापूर आटरान लोगीन, कोल्लालेर आरू माटलालेरीन, ओनेल एन्देर्रानूग, ओड ओरीन उजराकतेड। 25 आरू गलील तीग, दिकपूलीस तीग, एरूसेलेम तीग, एऊदीये तीग आरू एरदन पेरेड आकलाट तीग, जोप तीग जोप ओन पोटतेल वेरू मुरीयाकतो।