<<    <     मत्ती     5     >    >> 
ईसू कोप्पे ती मेरचीकतान पाटेल
5
1 आतोड ईसू जोपीन चूड़ी किली कोप्पे ती चेनी किली उन्डेड।
आरू ओन चेलालेर ओन लेग्गाट वेञ्ञेर।
2 ओड ओरीन ईटे मेरचीक मुरीयाकतेड:
मापोरबून आसतीर
3 बोकतीत इसाबूलूग आपलेनी चाकोल लोग एनी मानी किली मापोरबून कान आचा चाजी मेन्डानेरूग,
मापोरबू आसतीर चियराड।
एटे एनोड मापोरबू जाम्मेनी आंगरूरानोन ओर बेटूरार।
4 मुर मुरेग जियोम केरी मेन्डानेरूग,
मापोरबू आसतीर चियराड।
एटे एनोड ओर जियोमीन मापोरबू मान्डाकताड।
5 सोजाल मेन्डानेरूग मापोरबू आसतीर चियराड।
एटे एनोड मोंजीपूर ओर काबजे ती एर्रा।
6 वेयूग आरू नीरूग आन्डेक केच-केच एर्रान आकाट देरोम तो पाव ती चेनूंग केच-केच एर्रान लोगूग मापोरबू आसतीर चियराड।
एटे एनोड ओरूग आन्डरानोन मापोरबू मिडीकताड।
7 लोगूग जियोम नोयपीकतानेरूग मापोरबू आसतीर चियराड।
एटे एनोड ओर पोडे मापोरबू जियोम नोयपीकताड।
8 गेरोब तो चुरतेल तीग केचूर चिलायेर मेन्डानेरूग मापोरबू आसतीर चियराड।
एटे एनोड ओर मापोरबून चूड़रार।
9 लोगीन मिलाकतानेरूग मापोरबू आसतीर चियराड।
एटे एनोड मापोरबू ओरीन आपला पापकूल एन्डाड।
10 देरोम तो कामूल चाजूरान चेत्तूग सतावीन बेटूरानेरूग,
मापोरबू आसतीर चियराड।
एटे एनोड ओर मापोरबू जाम्मेनी आंगरूरानोन बेटूरार।
11 आन्न चेत्तूग इमीन लोग लाज पाटतीक किली,
सताव चाजी किली,
इमीन कियाल पोकी किली,
पोन्द पाटेल पोकोड,
इमूंग मापोरबू आसतीर चियराड।
12 आटनी एरोड ईम वेड़के तीग ऊदीम एरी मेनूर।
एटे एनोड इमूंग सरग ती बेड़तो इनाम टोन्डूरा।
इम ले मुन्नी मेन्डान,
मापोरबून कान तीग काबेर वेन्नी किली लोगीन पोक चियरान गुरूकूलीन बेले आटनी गो सताकतीर।
चुप आरू विलीजीन आकाट मेन्डानो
13 ईम ई मोंजीपूर तो चुपीन आकाटतोरa आय।
एरोड चुपीन केर नाचोड आदीन मारी नातोड केर चाजू ओड़तार?
आनातले आद नाती काम चियाया।
आदीन सोजे तीनची किली केलोड रेमदूरान ले आगेर नाती काम पाडाया।
14 ईम ई मोंजीपूर तो लोगूग विलीजूल आकाटतोर आय।
कोप्पे ती मेन्डान गेड़ा एके पाकू ओड़ा।
15 आरू लोग दियेन पातीक किली गाप्पा मूयारा।
आदीन कोलकी ती इडरार।
तेबे आदीनोड जाम्मा ओलेक तो लोगूग विलीज टोन्डूरा।
16 आटनी इम विलीज बेले जाम्मा लोगीन मुन्देल मेडोको।
तेबे ओर,
इम रेच्चाट कामूलीन चूड़ी किली सरग ती मेन्डान इम बुवेन चाराकपेकेर।
नियोमूल बीतेर ती मेरचीकतानो
17 आन मापोरबू चियरान नियोमूलीन आरू मापोरबून कान तीग काबेर वेन्नी किली लोगीन पोक चियरान गुरूकूल काटावीन नाचाक वेञ्ञेन नान एनी चोमजूमोर काय एटे?
आन,
नाचाक एरा,
आवीन पूरा चाजू आय वेञ्ञेन नान।
18 बादोर आरू मोंजीपूर मेट चेनोड बेले मापोरबून नियोम ती मेन्डानो पूरा एर्रारे आदीन ओकती मातरा चिलाड ओकती टिका बेले मेटाया एनी किली आन इमीन चेत्ते पोक्कूमेन।
19 आदूग एड एरको ई पिटीत ले पिटीत नियोमीन मानाका,
आदीनी लोगीन मेरचीकतानेड मापोरबू आंगरूरान लोगीन कान तीग सोब ले इनमानतेड एर्राड।
आरू नियोमूलीन मानी किली मेरचीकतानेड एके मापोरबू आंगरूरान लोगीन कान तीग इजीत्तेड एर्राड।
20 मूसाल नीतीन मेरचीकतानेर आरू परीसीकूल,
आम देरमीकूल आय एनमेर।
आदीन ले आगेर ईम देरोम तो कामूलीन चाजूरानो आय।
चिलाड ईम मापोरबू जाम्मेनी आंगरूरानोन पातीयाक ओड़ार एनी आन इमीन पोक्कूमेन।
रिच एर्रान विरूद ती मेरचीकतानो
21 आनकीकतानो एरा आरू एड एरको आनकीकतानेडीन नियाव चिड़ाक किली डेन्ड चियू लागूराb एनी मुन्नी पोकरानोन ईम वेट्टोर नार।
22 एरोड आन इमीन पोक्कूमेन:
एड एरको ओक बिसवासी तोल्लेडीन कान रिच एरोडेल ओनीन पोँच उन्डतीक लागूरा आरू ओक बिसवासी तोल्लेडीन,
इजीत चुमोड ओनीन नियाव चिड़ाक किली डेन्ड चियू लागूरा।
आरू एड एरको ओक बिसवासी तोल्लेडीन बाकवाल एनी पोकोडेल ओनीन नरक कून्ड तो किच ती तीन्डूक लागूरा।
23 आदूग ईन जेतरा पाड तीc मापोरबूग बेंट चोत्तीक वेरी किली,
इन कान ओक बिसवासी तोल्लेडूग नातो एरको इन पोडे विरूदी मेन्डा एनी ईन आना चुरता चाजोड,
24 आ बेंटीन आन्नी जेतरा पाड मुन्देल चाय काड्डी,
पोईल चेनी किली आ बिसवासी तोल्लेडीनोड मिल आरू पिटतेल वेरी किली बेंट चोत्तीक।
25 एतोड आर्रे ईन आपला कावडी उयरान मांजेन चेंगे पाव ती मेन्डात गो,
जेटके ओनोड मिल।
चिलाड आ कावडी उयरान मांजा इनीन नियाव चिड़ाकतान मांजेग बेटाकताड आरू ओड इनीन पालटेनकूलीन मुकीयालीन केय्य ती बेटाकताड आरू ऊड इनीन जेल ती केटताड।
26 आटनी मिलाकोड,
जाम्मा जुरमानेत पोयसेलीन बोरारे आना तीग पेक ओड़ात एनी आन इनीन चेत्ते पोक्कूमेन।
दोस पाडरान विरूद ती मेरचीकतानो
27 लोगीन आयालीनोड चिलाड माईडीनोड दोस पाडरानो एराd एनी मुन्नी पोकरानोन ईम वेट्टोर नार।
28 एरोड आन पोक्कूमेन,
एड एरको ओक आयालीन कियाल तो नेंजेर ती चूड़ोड ओड आपला मेन्न ती आ आयालीनोड दोस पाट्टेड नाड।
29 एबे इन वेला बोम्मा इनीन ईन बिसवात ती चेल्लान तीग उट तिरीकमो एरोड आ बोम्मेन पुच्ची तीनतेन एनी चोमजू।
इन जाम्मा मेन नरक कून्ड ती तीन्डूक एर्रान ले आगेर इन मेन तो ओक बागीन पुच्ची तीनतानो इनूंग रेच्चा एर्रूमीन।
30 आरू इन वेला केय्य इनीन ईन बिसवात ती चेल्लान तीग उट तिरीकमो एरोड आ केय्यीन चिट्टी तीनतेन एनी चोमजू।
एटे एनोड इन जाम्मा मेन नरक कून्ड ती चेन्डान ले आगेर,
इन मेन तो ओक बागीन चिट्टी तीनतानो इनूंग रेच्चा एर्रूमीन।
आयालीन चायूरान विरूद ती मेरचीकतानो
31 एड एरको आपला आयालीन रोजे तीग चायोडेल,
ओड आदीन चायूरान इसाब ती ओक कागेत ती लिकी किली चायेकेडe एनी पोकरानो मेन्डू।
32 एरोड आन एके इमीन पोक्कूमेन:
एड एरको आपला आयालीन आद दोस पाट्टो एन्डान इसाबीन चायी,
आवूर मारी नातेग बेले रोजे तीग चायूरान मांजा,
आदीन दारीयाट आयाल एरू इडराड।
f आदीन राकूरानेड बेले दारीयाल काम चाजूराड।
किरीया तिन्दान विरूद ती मेरचीकतानो
33 टेगू-टेगूत किरीयेल तिनाका आपला किरीयेलीन यावे मापोरबून मुन्देल पूरा चाजूरg एनी मुन्नीत जुग तो लोगीन पोकरानोन ईम वेट्टोर नार।
34 एरोड आन इमीन,
ईम एतोडी किरीया तिनमोर एनमेन।
सरग तो पिदीर ती बेले किरीया तिनमोर।
आद मापोरबून गाद्दी आय।
35 आरू मोंजीपूर तो पिदीर ती बेले किरीया तिनमोर।
आद मापोरबून केलूल मान्डूरान पाकील आय।
एरूसेलेमीन पिदीर ती बेले किरीया तिनमोर।
आद जाम्मेन ले बेड़तो कोसीन गेड़ा आय।
36 आपला तेल्ल तो बेले किरीया तिनमोर।
एटे एनोड ईम आपला तेल्ल तो ओक तेलताकीन बेले विल्लोत चिलाड मांजोत चाजू ओड़ार।
37 एरोड इम ऊबाल ओ एनोड ओ आरू एरा एनोड एरा एनी मेनको।
आदीन ले आगेर पोकोड आद एड़जाटh ई एर्रा।
पालटा पातरान विरूद ती मेरचीकतानो
38 बोम्मेन पालटा बोम्मा;
पेल्लीन पालटा पेल्लi एन्डानोन ईम गो वेट्टोर नार।
39 एरोड आन इमीन पोक्कूमेन:
एड़जाटोड जिकाटाना एरमोर;
एड बेले इनीन वेला कुपलोंग ती ताप्पोड आवूर तोन बेले ओन टिटाक ओरचीक।
40 आरू एड बेले इनीन जुरमाना इसाब ती इन कुड़तेन आडोड मूयूरानोन बेले चिय काड।j
41 आरू एड बेले इनीन तान्न बोजेन बेरपेला काञू ओक किलो मीटेर उसकाकपोडk ओन चेंगे दुय किलो मीटेर चेन।
42 एड एरको इनीन आडोडेल ओनूग चिय काड आरू एड बेले इनीन लागा आडोडेल ओनीन मेच मोडूमेन।
विरूदी लोगीन बेले माया चाजूर
43 आपला लेग्गाट तो लोगोड चोग चाजूर आरू आपला विरूदी लोगोड विरूदी एरूरl एन्डानोन ईम वेट्टोर नार।
44 एरोड आन,
आपला कुचरेयकूलीन चोग चाजूर।
इमीन सताकतानेरूग बिन्ती जोड़ूरm एनी इमीन पोक्कूमेन।
45 ईटे चाजोड,
ईम आपला सरग तो बुवेग चिन्डूल एर्रार;
ओड रेच्चालेर आरू कियालतेरीन कान पोकाल पेपीकताड आरू देरमीकूल आरू ओदेरमीकूलीन कान वाञी पाडीकताड।n
46 ईम आमान इमीन चोग चाजूरान लोगीनी चोग चाजोड,
इमूंग नातो इनाम टोन्डूरा?
पोटी पातरानेरo बेले आटनी गो चाजूरार।
47 आरू ईम आमान बिसवासी लोगीनी जुवारपोड,
ईम नातो बेड़तो कामीन चाजूमोर आदूग?
मापोरबून माना लोग बेले गो,
आटनी चाजूरार।
48 आदूगी इम सरग तो बुवा जाम्मा रेच्चाट पाटेल आरू कामूल तीग कोप्पी मेन्डान आकाट,
ईम बेले रेच्चाट पाटेल आरू कामूल तीग कोप्पी मेनूर।