मरकू 10

आयालीन रोजे तीग चायूरान पाटा

(मत्ती 19:1-12)

1 ईसू आना तीग पेची किली एऊदीया देचेत राचे ती आरू एरदन पेरेड आकलाट पोकाल पेतान टिटाक चेन्डेड। आना बेले लोग निक्के ओन लेग्गे वेञ्ञेर। आदूग ओड रोजे मेरचीकतान आकाट ओरीन बेले मेरचीकतेड। 2  ओदेर ओन लेग्गाट पोरकू वेरी किली “एड बेले आपला आयालीन रोजे तीग चायूरानो नीती ती बान्दा काय एटे?” एट्टेर। 3 आदूग ओड, “मूसाल नीती ती एटे मेन्डा?” एनी उलटा पोक्केड। 4 आदूग ओर, “‘कागेत ती लिकी चियी किली चायोड चायू एर्रा’ एनी मूसाल पोक्केड नाड” एट्टेर। 5 आदूग ओड, “ईम मापोरबून पोद्दूलीन माना ऊबागेरी मेन्न तो लोग मेन्डानूग आय मूसाल ईटो नीती इमूंग चिञ्ञेड नाड। 6 एरोड मापोरबू जाम्मेनी गेड़ू मुरीयायपेक ओरीन माईड आरू आयाल एनी गो गेड़ेड। 7 ‘आदीन चेत्तूग माईड ईय्या बुवेन ले एलगी किली आपला आयालीन चेंगे मेन्डाड। 8 आरू ओर इरूल ओकती मेनतेर एरी किली मेन्डार।’ आदूगी ओर एपोर इरूल एरा एरोड ओकती मेनतेर आय; 9 आदूगी मापोरबू जूली जोड़रानेरीन मांजा एलगाकपा मेनकेर” एनी पोक्केड।

10 मारी ईसू ओलेक ती मेनेक ओन चेलालेर आ इसाबीन जाच आडूरीर। 11 आदूग ईसू “एड एरको माईड, तान्न आयालीन रोजे तीग चायी किली आवूर आयालीन एन्दरोड, आदीन विरूद ती ओड दारीयाल काम चाजूराड। 12 आरू एड एरको आयाल तान्न माईडीन रोजे तीग चायी किली आवूर माईडूग गेर एरोड, आद बेले दारीयाट काम चाजूरा” एट्टेड।

ईसू आरू पिटीलेक पापकूल

(मत्ती 19:13-15; लूका 18:15-17)

13 आनातले लोग पापकूलीन ईसून लेग्गाट, ईसू ओर तेल्ल ती केय्य इड्डी किली आसतीर चियकेड एनी एन्दरेर। एरोड चेलालेर एन्देर्रानेरीन कावडेर। 14 आदीन चूड़ी किली ओड रिच एञ्ञेड आरू तान्न चेलालेरीन “पापकूलीन आन्न लेग्गाट वेरू इडूर, आरू ओरीन माना चाजूमोर; एटे एनोड मापोरबू जाम्मेनी आंगरूरान इसाब इटनीत लोगीनो। 15 आन इमीन चेत्तेगी पोक्कूमेन; एड एरको पापकूल आकाट मापोरबू जाम्मेनी आंगरूरानोन पातीयाकपाकोड ओड आदीन बेटू ओड़ार” एट्टेड। 16 आटनी एनी किली पिटीत बातेर तो पापकूलीन डेन्डीक-डेन्डीक ओंगेड आरू तेल्ल ती केय्य इड्डी किली आसतीर चिञ्ञेड।

सावकार मांजा जुग-जुग तो जियोम बेटू कानतानो

(मत्ती 19:16-30; लूका 18:18-30)

17 ईसू पेची किली पावोड चेनेक ओक मांजा, आर्र तीग ओन का तूल तूली वेञ्ञेड आरू माटीकूटा चियी केलूल पाट्टेड। आरू ओड ईसून “ए रेच्चाल गुरू! जुग-जुग तो जियोमीन बेटू आनूंग नातो चाजू लागूरा?” एट्टेड। 18 आदूग ईसू ओनीन, “ईन आनीन नांग रेच्चाल एनमोत? मापोरबू ओकूरीन चायी एडी बेले रेच्चाल चिल्लाड। 19 ईन नियोमूलीन पुट्टोत जे? ‘दारीयाट कामूलीन चाजूरानो एरा, एरीनी बेले चाय्यारे तापरानो एरा, डोंगरानो एरा, टेगू टेगूत गोवाई चियरानो एरा, टेगरानो एरा, आपला ईय्या बुवेन इजीत चाजूरानो आय’ एन्डान ई नियोमूलीन गो पुनमोत” एट्टेड। 20 आदूग ओड, “गुरू! आन पाप मेनेक ले ई जाम्मेनी गो आन मानूमेन” एट्टेड। 21 आदूग ईसू ओनीन चूड़ी, ओनीन चोग चाजेड आरू, “इन कान ओकती पाटा कोमी मेन्डा। आद नाताय एनोड ईन चेनी किली इनूंग मेन्डान जाम्मा जामूकूलीन वीड़ी किली नाती चिला लोगूग पायची चियू। तेबे इनूंग सरग ती कुबे देन माल टोन्डूरा। आनातले पिटतेल आन्न पोटतेल वेर” एट्टेड। 22 ओड एके इदीन वेन्नी किली चिंगरू जीत काट्टेड। आरू तानूंग निक्के देन माल मेन्डानूग मुर-मुरा एरी चेन्डेड। 23 आनातले ईसू बोँरेक चूड़ी किली तान्न चेलालेरीन “सावकार मांजेग मापोरबू आंगरूरानोन पातीयाकतानो निक्के केट-केट आय” एट्टेड। 24 आदीन वेन्नी किली ओन चेलालेर निक्के काबा एञ्ञेर। ईसू एके मारी “इद रे पापकूले! मापोरबू आंगरूरानोन पातीयाकतानो केट-केट आय। 25 सावकार मांजा मापोरबू आंगरूरानोन पातीयाकतान ले ऊँट एके चूचूब तो बोत्तेनोड चिंगड़ूरानो उमीया एर्रा” एट्टेड। 26 आदीन वेन्नी किली ईसून चेलालेर मारी आगेर काबा एञ्ञेर आरू “आटे तीग मारी एरूग बाचू नाम्बरा गो?” एनी तामूंग तामी पोकरीर। 27 आदूग ईसू ओरीन चूड़ी किली “मांजेनोड गो, ई काम एरू ओड़ा; मापोरबू एरोड बाचाक नाम्बीकताड। मापोरबूनोड एके जाम्मा बानी एरू नाम्बीकता” एट्टेड। 28 आदूग पतरस ओनीन “चूड़! आम गो जाम्मा बानीन चायी किली इन पोटतेल वेञ्ञोम नाम जे?” एनी पोक्कू मुरीयाकतेड। 29 आदूग ईसू, “आन इमीन चेत्तेगी पोक्कूमेन। एड एरको आन्न चेत्तूग आरू मापोरबून एडो पाटेन पोक चियरान चेत्तूग ताम्म ओलेकीन चिलाड तोल्लेरीन चिलाड चालाचीलीन, ईय्या बुवेन चिलाड पापकूलीन चिलाड वायेलीन एरको चायी मेनोड, 30 सतावूल चेंगे चोव गोटा गुबोड़ूल आगेर ई जुग ती ओरूग (ओलेकूल आरू तोल्लेनकूल आरू चालाचील आरू ईय्योव आरू पापकूल आरू वायेल) जाम्मा टोन्डूराव। आरू वेर्रान जुग ती जुग-जुग तो जियोमीन बेटूरार। 31 एरोड मुन्देल मेन्डान कुबे लोग एके पोटतेल एर्रार आरू पोटतेल मेन्डान लोग एके मुन्देल एर्रार” एट्टेड।

ईसू पिटतेल तानूंग एर्रानोन मारी पोकरानो

(मत्ती 20:17-19; लूका 18:31-34)

32 ओर एरूसेलेम गेड़ा चेन्डान पावोड चेनेक ईसू मुन्देल चेन्डेड। आरू ओन चेलालेर निक्के काबा एञ्ञेर। आरू ओन पोटतेल चेन्डानेर नारचेर। तेबे ओड बारा जान चेलालेरीन एलगा कूयी किली पिटतेल तानूंग एटे-एटे एर्रा एनी मारी बेले पोक चिञ्ञेड। 33 ओड, “इद! एबे आम एरूसेलेम गेड़ा आर्रे चेन्डाम; आरू बेड़कूल पेलाचकूल आरू मूसाल नीतीन मेरचीकतानेर केय्य ती ओपीक एर्राड। आरू ओर ओनीन चाय्यीकतान डेन्ड बेटूरान बातेरतेड आय एनी चिड़ाकतार। आरू ओनीन एऊदीकूल चिला लोगीन केय्य ती ओपीक चियरार। 34 आरू ओर ओनीन आँसी डेकली चाजी किली मोकोम ती ऊचूरार आरू कोड़ेनोड चाटतार आरू आनकीकतार। ओड मुचीच मेन्नी मारी जियोम पाडराड” एट्टेड।

याकूब आरू एऊना ईसून गुवारतानो

(मत्ती 20:20-28)

35 आनातले जबदीन चिन्डूल याकूब आरू एऊना ईसून कान वेञ्ञेर। आरू “ए गुरू, आम आरोन-आरोन आडूराम आवीन आमूंग चाज चियू” एट्टेर। 36 आदूग ओड “इमूंग आन नातोन चाज चियरानो आय?” एट्टेड। 37 आदूग ओर “ईन इजीत तो मान तीग कोस आकाट आंगरेक आम्म कान तीग ओकूर इन वेला टिटाक आरू ओकूर इन डेबरा टिटाक उन्डोकोम” एट्टेर। 38 ओड मारी “ईम पूनाका नातोन पोक्कू कान्डूकमोर?” एनी किली “आन आबोड़ एर्रान आत्ती ईम एरू नाम्बीकतार काय एटे? आरू आन चाय्यरान आकाट ईम चाय्यू नाम्बीकतार काय एटे?” एट्टेड। 39 आदूग ओर मारी “आम नाम्बीकताम” एट्टेर। आदूग ओड ओरीन “आन आबोड़ एर्रान आकाट ईम आबोड़ एर्रारी आरू आन चाय्यरान आकाट चाय्यरारी। 40 एरोड बेले आन एके वेला टिटाक आरू डेबरा टिटाक एरीनी उन्डतीक ओड़ान। आना उन्डू एरीन आन्न बुवा मेन्न चाजी, पाड्डीन तायार चाजेड नाड, ओर-ओर उन्डरार” एट्टेड। 41 आदीन वेन्नी किली आवूर देस जान चेलालेर याकूब आरू एऊनेनोड रिच एञ्ञेर। 42 ईसू ओरीन जाम्मेनी चेंगे उड़चीक किली “एऊदीकूल चिला लोगीन आंगरूरानेर आकाटतेर ओरीन दामकाक-दामकाक आंगरूमेर। आंगरूरानेर ले मुकीयालेर मारी ओर कान पान्न चेलाकतार एन्डानोन ईम पुट्टोर। 43 ईम आटे चाजूरानो एरा। इम कान तीग एड एरको बेड़तेड एरू कानपोड ओड इम कामीयाल एर्रानो आय। 44 आरू एड एरको मुकीयाल एरू कानपोड ओड मुन्नी जाम्मेग रोजे तीग कामीयाल आकाट एरू कानतानो आय। 45 एटे एनोड, सरग तो मांजा बेले लोग तान्न कामीयालेर एरकेर एनी वेरेडा। ओड एके लोगूग कामीयाल एरू आरू कुबे लोगीन तान्न नेतीर तीग मोलयाक किली चोड़ाक वेञ्ञेड नाड” एट्टेड।

तिमाईन चिन्ड बरतीमाई चूड़ू एर्रानो

(मत्ती 20:29-34; लूका 18:35-43)

46 आनातले ओर एरीयो गेड़े ती वेञ्ञेर। ईसू आरू ओन चेलालेर कुबे जोप तो लोगीन चेंगे आ गेड़े तीग पेपेक पाव कुडी ओक कानाल उन्डी मेन्डीड। ओड तिमाईन चिन्ड बरतीमाई आय। ओड पाव कुडी उन्डी किली मुटी आडूरीड। 47 नासरत तो ईसू वेरमेड एनी वेनदानूग ओड “ए ईसू! दाऊदीन चिन्डीने! आन्न पोडे जियोम नोयपीक” एनी निक्के पोक्कू मुरीयाकतेड। 48 आदीन वेन्नी किली कुबे लोग ओनीन कावडेर आरू “किटूक मेन” एट्टेर। एरोड ओड एके “दाऊदीन चिन्डीने! आन्न पोडे जियोम नोयपीक” एनी आगेर कोलार एञ्ञेड। 49 ईसू ओनोन वेन्नी किली तेब चेन्डेड आरू “ओनीन एन्देरपूर” एट्टेड। आदूग ओर आ कानालीन कूयी किली “ईन वेड़का एर। इनीन ईसू कूयूमेड, चुलूक” एट्टेर। 50 आदीन वेन्नी किली, ओड तान मूयूरान गान्डेन मिन तीनची किली ईसून का तूलेरनेड। 51 आदूग ओड ओनीन “आन इनूंग नातो चाजूरान एनी इनूंग मेन्न लागूमो?” एट्टेड। आदूग कानाल “रब्बी (गुरू) आनूंग बोम्मेग चूड़ू एरको” एट्टेड। 52 आदूग ईसू, “ईन ओलेक चेन; इन बिसवात इनीन उजराकतो” एट्टेड। आटनी पोकेक ओनूग चूड़ू एञ्ञो आनातले ओड, आयची पावोडी ईसून पोटतेल चेन्डेड।