आंगूर पार्र तो बूती लोग
20
1 ईसू तान पोकरानोन चोमजाक ओक डाग्गा पोक्केड।
मापोरबू जाम्मेनी आंगरूरानो ईटे मेन्डा:
ओक कामेय तो सावकार मेन्डीड।
ओड पोका वेवूके आपला आंगूर पार्र ती बूती लोगीन एन्दरू चेन्डेड।
2 आरू ओड बूती लोगूग रूप तो ओक पोयसा ओकेच तो बूती चियरान एनी राजी पाटतीकतेड आरू ओरीन आपला आंगूर पार्र ती चोटची काट्टेड।
3 आनातले ओक पारी पोलान पिटतेल पेची किली आवूरतेरीन आट ती पोका निलतानोन चूड़ी किली,
4 ओरीन,
“ईम बेले आन्न आंगूर पार्र ती चेनूर आरू नातो एरको बूती रेच्चाट आय आदीन चियरान” एट्टेड।
आदूग ओर चेन्डेर।
5 मारी टिटे देलकूल आत्ती आरू आड़ बेरा आकाट बेले ओड पेची चेनी किली आटनी चाजेड।
6 आरू ओड नीर बेरा आत्ती बेले पेची चेनी किली आवूरतेरीन बेले पोका निलतानोन चूड़ी किली,
“पाकटा पोकाली इना नांग पोका निलची-निलची मेनमोर?”
एट्टेड।
7 आदूग ओर,
“आमीन एडी बूतेग पोकेरा” एट्टेर।
तेबे ओरीन,
“ईम बेले आन्न आंगूर पार्र ती चेनूर आरू बूता चाजूर” एट्टेड।
8 आन्डेक-आन्डेक कामेय तो मांजा आपला कामीयालीन,
“बूती लोगीन कूयू आरू पिटतेल तो लोगीन पात्ती किली मुन्नी वेर्रान लोगूग नातेक बूती चिय काड” एट्टेड।
9 नीर बेरा आत्ती बिड़रान लोग वेञ्ञेर।
ओरूग जाम्मेगी रूप तो ओक पोयसा टोन्डोतो।
10 आदूग मुन्नी वेर्रान लोग तामूंग आगेर टोन्डूरा एनी बिचार चाजेर।
एरोड ओरूग बेले ओक-ओक रूप तो पोयसा टोन्डोतो।
11 ओर आदीन पात्ती किली कामेय तो मांजेन,
12 “ई पिटतेल तो लोग गो ओकती गेन्टा बूता चाजेर।
आम मारी पाकटा पोकाली बोजा एतीकतोम आरू नेन्ड ती मेट्टोम।
ईन ओरूग बेले आमूंग चियरान आतीनी चिञ्ञोत तेबे?”
एनी गुर-मुरेर।
13 एरोड ओड एके,
ओर कान तीग ओकूरीन,
“ए आन्न चेंगेने!
आन इन्नोड नाती कियाल चाजेना;
ईन आन ओक रूप तो पोयसा चियरान एन्डानूग राजी पाड्डी मेन्डूत चिला?
14 इन बूतीन ईन पात्ती किली चेन।
आनूंग मेन्न लागूरानूग इनूंग चियरान आत्ती पिटतेल वेर्रानेरूग बेले चियरान।
15 आन्न पोयसेलीन आन एटे एरको चाजू नाम्बीकतान।
आन निक्के चियरानूग ईन नांग कुचेर एरमोत आले?”
एट्टेड।
16 “आटनी पोटतेल मेन्डान लोग मुन्देल एर्रार आरू मुन्देल मेन्डान लोग पोटतेल एर्रार” एट्टेड।
ईसू मारी बेले तान चाय्यरानोन पोकूमेड
17 आनातले मारी ईसू एरूसेलेम गेड़ा चेन्डान पाव ती तान्न बारा जान चेलालेरीन एलगा कूयी किली,
18 “इद चूड़!
आम एरूसेलेम ती चेनमोम।
सरग तो मांजा,
बेड़कूल पेलाचकूल आरू मूसाल नीतीन मेरचीकतानेर केय्य ती ओपीक एर्राड।
ओर ओनीन चाय्यीकतान डेन्ड बेटूरान बातेरतेड आय एनी चिड़ाकतार।
19 आरू ओनीन एऊदीकूल चिला लोगीन केय्य ती ओपीक चियरार;
ओर ओनीन आँसी डेकली चाजूरार,
कोड़ेनोड चाटतार,
आरू कुरूस पारे ती कूटील कोट्टू इडरार;
एरोड ओड मुचीच तीग जियोम पाटतीक एर्राड” एट्टेड।
ओक ईय्या गुवारतानो
20 आनातले जबदीन चिन्डूलीन ईय्या आपला चिन्डूल चेंगे,
ईसून लेग्गाट वेरी किली ओनीन केलूल पाट्टो आरू ओनीन,
“इनीन ओक बानी आडूरान एनमेन” एट्टो।
21 ईसू आदीन,
“इनूंग नातोत लागूरा?”
एट्टेड।
आदूग आद,
“इन राज ती आन्न चिन्डूल इरूल कान तीग ओकूरीन इन वेला टिटाक,
a आरू ओकूरीन इन डेबरा टिटाक उन्डतीकतान एनी पाटा चियू” एट्टो।
22 ईसू ओरीन,
“ईम पूनाका नातोन पोक्कू कान्डूकमोर?”
एनी किली “आन आबोड़ एर्रान आत्ती ईम एरू नाम्बीकतार काय एटे?”
b एट्टेड।
ओर मारी “आम नाम्बीकताम” एट्टेर।
23 आदूग ईसू ओरीन “आन आबोड़ एर्रान आकाट ईम आबोड़ एर्रारी।
एरोड बेले आन एके वेला टिटाक आरू डेबरा टिटाक एरीनी उन्डतीक ओड़ान।
आना उन्डू एरीन आन्न बुवा मेन्न चाजी,
पाड्डीन तायार चाजेड नाड,
ओर-ओर उन्डरार” एट्टेड।
24 आदीन वेन्नी किली आवूर देस जान चेलालेर आ तोल्लेड इरूलोड रिच एञ्ञेर।
25 ईसू तान्न चेलालेरीन जाम्मेनी चेंगे उड़चीक किली “एऊदीकूल चिला लोगीन आंगरूरानेर ओरीन दामकाक-दामकाक आंगरूमेर।
आंगरूरानेर ले मुकीयालेर मारी ओर कान पान्न चेलाकतार एन्डानोन ईम पुट्टोर।
26 ईम आटे चाजूरानो एरा।
इम कान तीग एड एरको बेड़तेड एरू कानपोड ओड इम कामीयाल एर्रानो आय।
27 आरू एड एरको मुकीयाल एरू कानपोड ओड मुन्नी इमूंग रोजे तीग कामीयाल आकाट एरू कानतानो आय।
28 आटनी सरग तो मांजा बेले लोग तान्न कामीयालेर एरकेर एनी वेरेडा।
ओड एके लोगूग कामीयाल एरू आरू तान्न जियोमीन चियी किली कुबे लोगीन तान्न नेतीर तीग मोलयाक किली चोड़ाक वेञ्ञेड नाड।”
ईसू इरूल कानालेरीन चूड़ीकतानो
29 ईसूलेर एरीयो गेड़े तीग पेतेर आरू ओक बेड़तो जोप ओर पोटतेल-पोटतेल चेन्डो।
30 आना इरूल कानालेर चेड़ेक कुडी उन्डी मेन्डीर।
ओर ईसू आ पावोड चेनमेड एनी वेन्नी किली,
“ए पोरबू दाऊदीन चिन्डीने!
आम्म पोडे जियोम नोयपीक” एनी कोलार एञ्ञेर।
31 जोप तो लोग ओरीन किटूक मेनूर एनी कावडूरानूग ओर मारी आगेर कोलार एरी किली,
“ए पोरबू दाऊदीन चिन्डीने!
आम्म पोडे जियोम नोयपीक” एट्टेर।
32 ओरोन ईसू वेनदानूग तेब चेन्डेड आरू ओरीन कूयी किली,
“आन इमूंग नातो चाजूरान एनी इमूंग मेन्न लागूमो?”
एट्टेड।
33 आदूग ओर,
“पोरबू!
आमूंग बोम्मेग चूड़ू एरको” एट्टेर।
34 ईसू जियोम नोयपीक किली ओर बोम्मेन टोट्टेड।
आरू तुरते ओर चूड़ू मुरीयाकतेर।
आनातले ओर ओन पोटतेल चेन्डेर।