मरकूस
लिकूरान एडो पाटा
बपतीसमा चियरान एऊना ईसूग पाव तायार चाजूरान पाटा
1
1 मापोरबून चिन्डa ईसू मसीयालीन b एडो पाटा ईटे ती मुरीयाकता:
2 “इद!
ईन चेनाका मेनेक,
मुन्नी आन्न काबेर तो मांजेन आन चोटतान।
ओड,
लोग इनूंग पाव चूड़ चूड़ी मेनकेर एनी तायार चाजी मेन्डाड”c
3 आरू “चिड़ा बाटd ती मेन्नी किली,
‘पोरबूग पाव तायार चाजूर आरू ओनूग पावीन टिट्टे चाज चियूर’eg एनी ओक मांजा पोक चियरान पोल्लेन इमूंग वेनूंग एर्रा” एनी एसाया एन्डान मापोरबून कान तीग काबेर वेन्नी किली लोगीन पोक चियरान गुरूf मापोरबू पोकरानोन तान्न कागेत ती लिकेड नाड।
4 ओड एटे लिकी मेन्डीड आटनी बपतीसमा चियरान एऊना वेञ्ञेड।
तान वेरी किली लोगूग चिड़ा बाट ती बपतीसमाh चिञ्ञेड आरू ओड,
“मापोरबू इम पापदेरोमीन माप चाजू ईम मेन्न चाजोड मेन्नीन उजराकपूर आरू बपतीसमा एपूर” एनी मेरचीकतेड।
5 आतोड एऊदी देचेत कुबे पोलूबूल तो लोग आरू एरूसेलेम गेड़ेत कुबे लोग ओन कान चेन्डेर।
आरू आपला-आपला पापदेरोमूलीन मानी किली ओन कान तीग एरदन पेरेड ती बपतीसमा एतेर।
6 एऊना एके ऊँट गेच्चील तो गान्डेल नूड़ी मेन्डीड आरू आपला किटे ती तोल तो केरदेन काट्टी मेन्डीड।
i आरू ओड मिटाकेल आरू तीन नेय्यीन तिन्दीड उन्डीड।
7 ओड,
“आन वेर्रान ले पिटतेल ओकूर वेर्राड बे।
ओड आन्न ले बेड़तेड आय।
आन ओन पानेयूल तो टोडूलीन कुयकीक चियरान ओन कामीयाल एर्रान बातेरतेन बेले एरान।
8 आन इमूंग नीरोड बपतीसमा चियरान।
एरोड ओड एके इमूंग मापोरबून नाती केचूर चिला जियोमोड बपतीसमा चियराड”j एनी काबेर पोकरीड।
एऊना ईसूग बपतीसमा चियरान पाटा
9 आटनी एऊना बपतीसमा चियरान वादेक,
ईसू गलील देचेत नासरत गेड़े तीग एरदन पेरेड कुडी एऊनेन लेग्गे,
ओन तीग बपतीसमा पात्तू वेञ्ञेड।
10 ओड बपतीसमा एची किली नीर तीग पेपेक,
पोडी सरग चीकी एर्रानोन आरू मापोरबून कान तीग वेर्रान नाती केचूर चिला जियोमk पांरवेन आकाट वेरी किली तान्न पोडे इड़ूरानोन ईसू चूड़ेड।
11 आरू,
“ईन आन्न लाडराल चिन्ड आय आरू ईन आनूंग मेन्न ती वेर्रानोत आय”l एनी सरग तीग ओक पोल्ला वेनूंग एञ्ञो।
चेयतान ईसून पोरकूरान पाटा।
12 डेन्डीक ले नाती केचूर चिला जियोम ईसून चिड़ा बाट ती चेन एनी चोटतेड।
13 आरू ओड आना चेनी किली चालीस दिनेल मेट्टेड आरू चेयतानm पिदीर तो बूत डुमेलीन मुकीयाट,
ईसून पोरकोतो।
ओड मेराम तो जेत जियादूल चेंगे मेन्डीड।
सरग दूतकूलn एके वेरी किली ओनीन देक-रेक चाजू मुरीयाकतेर।
ईसू मापोरबून एडो पाटेन मेरचीक मुरीयाकतानो
14 बपतीसमा चियरान एऊनेन जेल बीतराम केटतान पिटतेल ईसू गलील देचे ती चेनी किली मापोरबून कान तो एडो पाटेन पोक चिञ्ञेड।
15 ईसू,
“बेरा पूरोतो ना।
मापोरबू जाम्मेनी आंगरूरानो लेग्गे एदेरनो ना।
मेन्नीन उजराकपूर आरू ई एडो पाटेन बिसवात चाजूर” एट्टेड।
मीनूल चुमरानेरीन ईसू तान्न चेलालेर एरू कूयूरानो
16 ओकेच ईसू गलील सोमून्द कुडी-कुडी चेनेक,
सिमोन आरू ओन तोल्लेड आन्दरीयास सोमून्द ती जारील तीनपेक चूड़ेड।
ओर मीनूल चुम चुम्मी पोरूरानेर आय।
17 ईसू ओरीन,
“ईम आन्न पोटतेल वेरूर।
आटनी एरोड,
आन इमीन लोगीन मेरचीक किली ओरीन आन्न चेलालेर एरीकतानेर एरीकतान” एनी पोक्केड।
18 आदूग तुरते नी ओर आपला जारीलीन चायी किली ओन पोटतेल-पोटतेल चेन्डेर।
19 आतूर-आतूर एदूरानूग जबदीन चिन्ड याकूब आरू ओन तोल्लेड एऊनेन ओक ओडे ती जारीन जेतनाकपेक ओड चूड़ेड।
20 ओरीन चूड़ूके,
ईसू ओरीन बेले कूयूरानूग,
ओर ताम्म बुवा जबदीन बूती लोगीन चेंगे ओडे ती चायी किली ईसून पोटतेल-पोटतेल चेन्डेर।
ईसू बूत डुमेन वालीकतान पाटा
21 आनातले ईसू आरू ओन चेलालेर कपरनाऊम गेड़े ती चेन्डेर।
आरू पाबूरान चिरीकo ओड,
एऊदीकूल बिन्ती जोड़रान ओलेक ती चेनी किली आना मेरचीक मुरीयाकतेड।
22 ईसू मेरचीकतानोन वेनदानेर काबा एञ्ञेर;
नांग एनोड ओड मूसाल नीतीन मेरचीकतानेरp आकाट मेरचीकपेडा।
एरोड ओड एके पान्न तीग मेरचीकतेड।
23 आतोडी एऊदीकूल बिन्ती जोड़रान ओलेक ती ओकूर बूत डुमा चुम्मी मेन्डानेड मेन्डीड।
ओड ईसून,
24 “ए!
नासरत तो ईसूने!
इनूंग आम्मोड नातो काम मेन्डा?
एटे ईन आमीन नाचाक वेञ्ञोत नात आदूग?
ईन एड आय एनी आन पुट्टेन।
ईन मापोरबून नाती केचूर चिलायोत आय” एनी जोड़ ती कोलार एञ्ञेड।
25 आदूग मारी ईसू बूत डुमेन,
“किटूक मेन,
आरू ई मांजेन कान तीग पेची किली तूल” एनी कावडेड।
26 आनातले बूत डुमा आ मांजेन निक्के बापूर आटरान आकाट चाजी किली कोलार एञ्ञो आरू आ मांजेन कान तीग पेची किली तूलोतो।
27 आदीन चूड़रान लोग निक्के काबा एञ्ञेर आरू,
“इद एट्टोत रे?
पुन पाटेन आकाट चेलूमो।
ओड पान्न तीग बूत डुमेलीन बेले तियारूकमेड,
आव ओन पाटेन मानूमोव” एनी तामूंग तामी ऊबूरीर।
28 आनातले,
ईसू चाजूरान कामूल इसाब तो काबेर गुलाय गलील देचे ती डेन्डीक पारगोव।
ईसू सिमोनीन आञ्ञेन उजराकतानो
29 आनातले ईसू एऊना आरू याकूबीन चेंगे एऊदीकूल बिन्ती जोड़रान ओलेक तीग पेची किली सिमोन आरू आन्दरीयासीन ओलेक तान्नेर।
30 आना एके सिमोनीन आञ्ञा नूम्बीरूग माड्डी मेन्डू।
आदूग ओर मारी ईसून पोक्केर।
31 आनातले ईसू आदीन चूड़ू चेन्डेड आरू केय्य पात्ती चुनतीकतेड।
केय्य पात्ती चुनतीकतानूग आदीन नूम्बीर चायोतो आरू आद ओरूग मान दान चाजू मुरीयाकतो।
ईसू कुबे नोयकूडूल तो लोगीन उजराकतेड
32 आ चिरीक पोकाल पाडरान पिटतेल आन्डेकq नोयरान लोगीन आरू बूत डुमेल चुमरान लोगीन ईसून कान लोग एन्दरेर।
33 ओलेक काड़वेल ती गेड़ेतेर कुबे लोग उलजेर।
34 आरू आना मेन्डान लोगीन का कुबे लोगूग मेन्डान जाम्मा बानीत नोयकूडूलीन ईसू चायपीकतेड।
आरू बूत डुमा चुम्मी मेन्डान लोगीन का मेन्डान बूत डुमेन बेले वालीकतेड।
ओड एके बूत डुमेलीन ऊबू इडेडा।
एटे एनोड आव ईसू एड आय एनी पुन्दूव।
ईसू बिन्ती जोड़रान पाटा
35 ईसू पोकाई,
चीकोड मेनेक चुलतेड आरू ओलेक तीग पेची किली ओक चिम चामनाय तो पाड ती चेनी आना मापोरबून बिन्ती जोड़ेड।
36 सिमोन आरू ओन चेंगेतेर एके ईसून कान्डूक चेन्डेर।
37 आरू ओर ईसून बेटी किली,
“इनीन जाम्मा लोग कान्डूकमेर” एनी पोक्केर।
38 आदूग ईसू ओरीन,
“आमूंग,
लेग्गे मेन्डान आवूर पोलूबूल ती चेन्डानो आय।
आना बेले आनूंग मापोरबून पाटेन पोक चियरानो आय।
आदूगी आय आन वेञ्ञेन नान” एट्टेड।
39 आनातले ओड गुलाय गलील देचे ती चुल-चुल्ली एऊदीकूल बिन्ती जोड़रान ओलेकूल ती मापोरबून पाटेन पोक चिञ्ञेड आरू बूत डुमा चुम्मी मेन्डान लोगीन कान मेन्डान बूत डुमेन बेले वालीकतेड।
ईसू रोग तो मांजेन उजराकतेड
40 ओकेच,
रोग बेमारr मेन्डानेड ओकूर ईसून का वेरी किली माटीकूटा चियी केलूल पाट्टेड आरू,
“इन मेन्न मेनोडेल आनीन चूत पाडरान तीग उजराक नाम्बीकतात” एनी गुवारतेड।
41 आदूग ईसूग निक्के केरमा गोटोक बावूरानूग तान्न केय्यीन नीकीक किली रोग तो मांजेन टोट्टेड आरू,
“आनूंग मेन्न मेन्डा;
ईन ओगराक एर” एट्टेड।
42 आटनी एन्डानूग तुरते नी ओन रोग चायोतो आरू ओड उजरेड।
43 आनातले ईसू ओनीन,
“आन उजराकतेन एनी एरीनी मुरले पोकूमेन।
44 ईन एके चेनी किली ईन उजरोत एन्डानोन पेलाचीनs का टोटीक।
ओड इनीन चूड़ेकेड आरू ईन उजरूरानूग मूसाल मेनगाt पोक्की मेन्डान बोदनेन चिय।
आटनी एरोड ईन उजरूरानूग ओगराक एञ्ञोत एनी लोगूग पुनूंग एर्रा” एनी पोक्की ओनीन चेनूंग इट्टेड।
45 एरोड ओड एके चेनी किली जाम्मा लोगूग पारगार्रे पोक चिञ्ञेड।
आटनी एन्डानूग ईसू जाम्मा लोग पुन्नारे पोलूबूल चुरलू ओड़ा कियाल एञ्ञेड।
ओड पोलूब ले किन्डीक कोमाड चिड़ा बाट ती डेरा मेन्डीड।
एरोड बोँरेक तो लोग आन्नी ईसून चूड़ू वेञ्ञेर।