एऊना
लिकूरान एडो पाटा
पोद्द एन्डानेड मांजा एञ्ञेड
1
1 पोईल-पोईल,
मापोरबू गुलाय देचेन गेड़रान ले मुन्नी पोद्द एन्डानेड मेन्डीड,
आरू पोद्द मापोरबून चेंगे मेन्डीड।
पोद्दी आय मापोरबू मेन्डीड।a
2 ओड मुन्नीत ले मापोरबून चेंगे मेन्डीड।
3 मापोरबू ओन तीगी जाम्मा बानीलीन उपजाकतेड।
आरू एंगोट बेले बानील उपजोव,
आना तीग नातोवीनी बेले ओड चिलाका उपजाकपेडा।
4 ओडी आय जियोम तो मुर मेन्डीड आरू जियोम विलीजीन आकाट मेन्नी किली जाम्मा लोगीन चेत्तीन चिताक इट्टेड।
5 आरू विलीज चीकोड ती मेडूरा;
एरोड चीकोड एके आ विलीजीन चिटीकपोया।b
6 मापोरबू ओक मांजेन तान्न काबेरीन पोक्कू लोगीन लेग्गे चोटतेड,
ओन पिदीर आय एऊना।
7 ओड जाम्मा लोग तान पोकरानोन वेन्नी किली विलीजीन आकाटतेडीन बिसवात चाजेकेर एनी,
आ विलीजीन आकाट मेन्डानेडीन काबेरीन लोगूग पोक चियू गोवेतेड एरी वेञ्ञेड।
8 एऊना तानी कुदे बेले आ विलीजीन आकाटतेड चिला मेन्डीड।
एरोड ओड एके आ विलीजीन आकाट मेन्डानेडीन बीतेर तो गोवाई पोक चियू वेर्रानेड आय।
9 जाम्मा लोगूग विलीज चियरान चेत्त विलीजीन आकाटतेड मोंजीपूर ती वेर्रीड।
10 ओड ई मोंजीपूर ती मेन्डीड,
आरू ओन तीगी मोंजीपूर उपजोतो,
आरू मोंजीपूर तो लोग एके ओनीन चिताकपेरा।
11 ओड आपला लोगीन कानी वेञ्ञेड,
एरोड आपला लोगी एके ओनीन पातीयाकपेरा।
12 एरोड एंगोट लोग ओनीन पातीयाकतेर आरू ओन पिदीर ती बिसवात चाजेरc,
ओरूग जाम्मेगी,
ओड मापोरबून पापकूल एरू पान्न चिञ्ञेड।
13 मापोरबून पापकूल एर्रानेर,
चेप्पूल आरू नेतीर तो मेन एरी जेनमूरानूग एरा,
माईडीन कान तीग मेन ती तेबी जेनमूरानूग बेले एरा आरू माईड उवाट गेड़ी किली जेनमूरानूग बेले एरा,
एरोड मापोरबून तीग जेनोम एर्रानेर आय।
14 आरू पोद्द एन्डानेड गेरोब पात्ती किली मांजा एञ्ञेड आरू आम्म नाड़बूल डेरा पात्तेड,
आरू आम ओन आचरूत तो बेड़तो ताकोतीन चूड़ोम।
आ आचरूत तो बेड़तो ताकोत ओकूरी चिन्डीनो आय।
ओड तान्न बुवा मापोरबून कान तीग वेञ्ञेड।
ओड चेड़ीगेन माया पेम चाजेड आरू ओड पोकरानोव जाम्मा चेत्तेतोव मेन्डूव।
15 (एऊना ओन बीतेर ती गोवाई चिञ्ञेड।
“‘आन्न ले पिटतेल ओकूर वेर्राड,
ओड आन्न ले मुकीयाल आय,
एटे एनोड ओड आन जेनमाका मेनेक ले मेन्डीड’ एनी आन ओन बीतेर ती आय पोक्केन नान” एनी कोलार एर एरी पोकरीड।)
16 आरू ओड पूरा माया पेम ती मेन्डानूग आम जाम्मा ओन तीग माया पेमीन पोडे माया पेमीन बेटोम।
17 एटे एनोड नियोमूलीन मापोरबू मूसालीन तीग चिञ्ञेड,
एरोड माया पेम आरू चेत्तीन एके मापोरबू ईसू मसीयालीन तीग चिञ्ञेड।
18 एडी मापोरबून एतोडी चूड़ारी;
एरोड बुवेन लेग्गे मेन्डान ओकूरी चिन्ड एके ओनीन पारगाकतेड।
एऊना तान मसीयाल एरा एन्डानो
19 एरूसेलेम तीग एऊदीकूलीन सियानकूल,
एऊनेन “ईन एड आय?”
एनी जाच आडू पेलाचकूलीन आरू लेवी बोसतेरीनd चोटतेर।
आदूग एऊना ईटे गोवाई चिञ्ञेड:
20 “आन मापोरबू जुमान चियी मेन्डान मसीयालe एरा” एनी नाती नी पाकीकपाका चेर चेरा पोक चिञ्ञेड।
21 तेबे ओर ओनीन,
“आटे तीग ईन एड आय गो?
ईन एलीया आय काय एटे?”
एट्टेर।
आदूग ओड,
“आन एलीया बेले एरा” एट्टेड।
आदूग ओर,
“एटे ईन मापोरबून कान तीग काबेर वेन्नी किली लोगीन पोक चियरान गुरू आय काय एटे?”
एट्टेर।
आदूग एऊना,
“आन एरा” एट्टेड।
22 तेबे ओर,
“आटे तीग ईन एड आय गो?
ईन,
इन बीतेर ती नान एनमोत आले?
आमीन पोक;
तेबे,
आम चेनी किली आमीन इनीन जाच आडू चोटतेर्रानेरीन जवाब चियराम” एट्टेर।
23 आदूग एऊना,
“मापोरबून कान तीग काबेर वेन्नी किली लोगीन पोक चियरान गुरू एसाया मेनगा पोकरान आकाट,
‘आन चिड़ा बाट ती,
पोरबूग पावीन टिट्टे चाज चियूर एनी कूयूरान ओक पोल्ला आय’f” एट्टेड।
24 (ऊरीन परीसीकूल चोटची मेन्डीर।)
25 तेबे ओर ओनीन,
“ईन मसीयाल चिलाड एलीया चिलाड मापोरबून कान तीग काबेर वेन्नी किली लोगीन पोक चियरान गुरू एरा एरोड,
एटे ती बपतीसमा चियमोत गो?”
एनी जाच आडेर।
26 आदूग एऊना ओरीन,
“आन गो लोगूग नीरोड बपतीसमा चियमेन;
एरोड ओकूर इम नाड़बूल निलतेड नाड,
ईम ओनीन चिताकपारा।
27 ओडी आय आन्न ले पिटतेल वेर्रानेड;
आन ओन पानेयूल तो टोडूलीन कुयकीक चियरान,
ओन कामीयाल एर्रान बातेरतेन बेले एरान” एट्टेड।
28 ई जाम्मा पाटेल एऊना बपतीसमा चियरीड,
आ बेतनीया पोलूब ती एरदन पेरेड आकलाट एञ्ञोव।
ईसू आय मापोरबूग जेतरे ती कुडरान मेन्डेन आकाटतेड
29 पिटतेल तो चिरीक एऊना ईसून तान्नेल वेर्रानोन चूड़ी किली,
“इद रे चूड़ूर!
ऊडी आय मापोरबू मोंजीपूर तो लोगीन पापदेरोमीन गुचाक,
मापोरबूग जेतरे ती चोत्तीक एर्रान मेन्डा पापीन आकाटतेड।g
30 ‘आन्न ले पिटतेल ओकूर वेर्राड,
ओड आन्न ले मुकीयाल आय,
एटे एनोड,
ओड आन जेनमाका मेनेक ले मेन्डीड’ एनी आन ओन इसाब ती नी गो आय पोक्केन नान।
31 आन एके,
कुदे ओड एड आय एनी पूना मेन्डीन।
एरोड इसराएल लोगूग ओड पारगाक एरकेड एनी आय,
आन नीरोड बपतीसमा चियू वेञ्ञेन” एट्टेड।
32 आरू एऊना ईसून बीतेर ती ईटे गोवाई चिञ्ञेड:
“पांरवेन आकाट एरी नाती केचूर चिला जियोम सरग तीग वेरी किली ओन पोडे इड़ी किली उन्डरानोन चूड़ेन।
33 आरू आन गो ओनीन चिताकपा मेन्डीन,
एरोड आनीन नीरोड बपतीसमा चियू चोटतानेड आनीन,
‘ईन एर कान नाती केचूर चिला जियोम वेरी किली पोडी इड़ी किली उन्डरानोन चूड़रात,
ओडी आय नाती केचूर चिला जियोम तीग बपतीसमा चियरानेड’h एनी आनीन पोक्केड।
34 आरू आन आदीन चूड़ेन नान,
आरू ओडी आय मापोरबून चिन्ड एनी गोवाई चियमेन” एट्टेड।
ईसून पोईल-पोईल तो चेलालेर
35 पिटतेल तो चिरीक मारी एऊना तान्न इरूल चेलालेर चेंगे निलची मेन्डीड।
36 आरू ईसू चेन्डानोन नेंजराक किली “इद रे चूड़ूर!
ऊडी आय लोग मापोरबूग जेतरे ती चोत्तीक एर्रान मेन्डा पापीन आकाटतेड” एट्टेड।
37 तेबे ओन पोकरानोन वेनी किली आ इरूल चेलालेर ईसून पोटतेल चेन्डेर।
38 ईसू उलटी चूड़ेड आरू ओरीन तान्न पोटतेल वेर्रानोन चूड़ी किली,
“ईम नातोन कान्डूकमोर?”
एट्टेड।
आदूग ओर ओनीन,
“ए रब्बी!
(रब्बी एनोड गुरू आय) ईन आरे डेरा मेन्डात?”
एट्टेर।
39 आदूग ओड “चेनार,
तेबे गो चूड़रार” एट्टेड।
तेबे ओर वेरी किली ओड मेन्डान डेरेन चूड़ेर,
आरू आ चिरीक ओन चेंगे नी मेट्टेर,
आद आड़ बेरा आकाट एरी मेन्डू।
40 एऊना पोकरानोन वेनी किली ईसून पोटतेल चेन्डान इरूल कान तीग ओकूर सिमोन पतरसीन तोल्लेड आन्दरीयास आय।
41 ओड पोईल तान्न तोल्लेड सिमोन पतरसीन कान्डूक चेन्डेड आरू बेटी किली ओनीन,
“आम मसीयालीनi बेटोम नाम” एट्टेड।
युनानी पाटे ती मसीयालीन किरीसताल एन्डार।
42 आनातले आन्दरीयास पतरसीन ईसूनेल उञ्ञेड।
ईसू ओनीन चूड़ेड आरू,
“ईन एऊनेन चिन्ड सिमोन आय चिला?
इनीन इनात ले केपा एन्डार” एट्टेड।
केपा एनोड गाडार एन्डान पतरस आय।
ईसू पिलीपूसीन आरू नतनीएलीन कूयूरानो
43 मारी पिटतेल तो चिरीक ईसू गलील देचे ती चेनूंग बिचार चाजेड।
आरू मारी ओड पिलीपूसीन बेट गाट एरी किली,
ओनीन “आन्न पोटतेल वेर” एट्टेड।
44 पिलीपूस,
आन्दरीयास आरू पतरस मूवीर बेतसयदा गेड़ेतेर आय।
45 पिलीपूस नतनीएलीन बेटी किली ओनीन,
“आम मूसाल मेनगेन नियोम तो कागेत ती आरू मापोरबून कान तीग काबेर वेन्नी किली लोगीन पोक चियरान गुरूकूलीन कागेत ती लिकी मेन्डानेडीन बेटोम।
ओड नासरत पोलूब तो यूसूपीन चिन्ड ईसू आय” एट्टेड।
46 नतनीएल ओनीन,
“एटे नासरत तीग नातो एरको रेच्चाट बानी पेक नाम्बीकता आदूग?”
एनी जाच आडेड।
आदूग पिलीपूस ओनीन,
“चेनी किली चूड़” एट्टेड।
47 ईसू नतनीएलीन तान्नेल वेर्रानोन चूड़ेड आरू ओन बीतेर ती,
“इद रे चूड़ूर!
चेत्तेगी ऊडी आय ओक इसराएली मांजा।
ऊन कान दोका चियरानो मुरले चिल्ला” एट्टेड।
48 आदूग नतनीएल काबा एरी किली “ईन आनीन एटे पुट्टोत?”
एनी जाच आडेड।
आदूग ईसू “पिलीपूस इनीन कूयूरान ले मुन्नी,
ईन तोय मेर किड़ी मेन्डूत,
आतोड इनीन आन चूड़ी मेन्डीन” एट्टेड।
49 आनातले नतनीएल,
“ए गुरू!
ईन मापोरबून चिन्ड आय।
ईन इसराएली लोगीन कोस आय” एट्टेड।
50 आदूग ईसू,
“आन इनीन तोय मेर किड़ी मेनेक चूड़ेन एन्डानूग ईन आनीन बिसवात चाजूमोत चिला?
ईन इदीन ले निरबे बेड़कूल इसाबूलीन चूड़रात” एट्टेड।
51 आरू ओड ओनीन मारी,
“आन चेत्तेगी पोक्कूमेन,
सरग चानतानोन आरू सरग तो मांजेनj तीग मापोरबून सरग दूतकूल पोडी चोकरानोन आरू किड़ी इड़ूरानोन ईम चूड़रार” एट्टेड।