ईसू नीरीन आंगूर रेस चाजूरानो
2
1 तिसेर चिरीक गलील देचेत काना पोलूब ती ओकान चुरचा एर्रू,
आरू ईसून ईय्या आना मेन्डू।
2 चुरचे ती ईसून आरू ओन चेलालेरीन बेले निवती मेन्डीर।
3 आना आंगूर रेसa पोलोतो,
आदूग ईसून ईय्या ओनीन,
“ओर लेग्गे आंगूर रेस एपोर पोलोतो ना” एट्टो।
4 ईसू एके आदीन,
“ए ईय्या,
ईन नांग आनीन पोक्कूमोत?
आन काम चाजूरान बेरा एदायी” एट्टेड।
5 आदूग ईसून ईय्या कामीयालेरीन,
“ऊड एटे पोकोड आटनी चाजूर” एट्टो।
6 आना एऊदीकूल ओगराक एर्रान नियोमीन इसाब ती चोय गोटा केलकूल तो चोरेल,
आस्सी तीग एक सोव बीस लिट्टेर आत्ती पातरान बातेर तोव मेन्डूव।
7 ईसू कामीयालेरीन,
“ई चोरेल ती नीर कोप्पीकपूर” एट्टेड।
आरू कामीयालेर चोरेल ती नीरीन तेल्ल तेला कोप्पीकतेर।
8 आनातले ओड ओरीन,
“एपोर इना तीग किन्डीक नीरीन टोन्डी किली बान्डारीन केय्य ती चियूर” एट्टेड।
आदूग ओर बान्डारीन लेग्गे नीरीन उञ्ञेर।
9 आनातले बान्डारी आदीन चाक चूड़ेड।
आतोड एके नीर आंगूर रेस एरी मेन्डू।
आ रेस आरे तीग वेञ्ञो एनी ओड पूना मेन्डीड;
(एरोड नीरीन टोन्डी चियरान कामीयालेर एके पुन्दीर।)
आदूग बान्डारी चालनीडीन कूयेड।
10 आरू ओनीन,
“जाम्मा लोग पोईल रेच्चाट रेसीन चियरार,
आरू चेगा लोग निक्के उन्डान पिटतेल नीरसाट रेसीन चियरार।
एरोड ईन एके एबलेतार्रे रेच्चाट रेसीन बाचाकतोत नात” एट्टेड।
11 ईसू गलील देचेत काना पोलूब ती पोईल ई पोरलेत काम तो चिनेन टोटीक किली तान्न आचरूत तो बेड़तो ताकोतीन पारगाकतेड आरू ओन चेलालेर ओन कान बिसवात चाजेर।
12 इदीन ले पिटतेल ईसू,
ताम्म ईय्या,
तोल्लेनकूल आरू तान्न चेलालेर चेंगे कपरनाऊम गेड़े ती चेनी किली आना ओदो दिनेल तेबेड।
ईसू मापोरबून गुडी ती चेन्डानो
13 एऊदीकूलीन पसक एन्डान मापोरबू आड़ञूरान तियारb एदी मेन्डू।
आदूग ईसू एरूसेलेम ती चेन्डेड।
14 आरू ओड मापोरबून गुडीत कोरी ती बाड़ालीन मेन्डेलीन आरू पांरवेलीन वीड़रानेर आरू आवूर देचेत पोयसेलीन गुडी ती इडरान पोयसेल पालटूरानेर आना उन्डी मेन्डानोन चूड़ेड।
15 आदूग ओड ओक टोडून कोड़ा चाजी किली ओर बाड़ालीन आरू मेन्डेलीन जाम्मेनी बेले गुडी तीग वालीकतेड।
पोयसेलीन पालटूरानेरीन पाकीलूलीन उलटाक किली कुदरी पोयसेलीन गुलाय वीत काट्टेड।
16 आरू पांरवेलीन वीड़रान लोगीन “ईवीन इना तीग गुचाकपूर।
आन्न बुवेन ओलेकीन आट पाचरा चाजूमोर” एट्टेड।
17 ओन चेलालेर,
मापोरबून कागेत ती “आनूंग इन ओलेकूग मेन्डान चोगी आनीन चाय्यीक उयरा”c एनी मेन्डान लिकेन चुरता चाजेर।
18 आदूगी एऊदीकूलीन सियानकूल ओनीन,
“इनूंग ईटोवीन चाजू पान्न मेन्डा एनी एट्टो पोरलेत काम तो चिनेन टोटीकतात?”
एट्टेर।
19 आदूग ईसू ओरीन,
“ई गुडीन बोसड़ाकपूर आरू आदीन आन मुचीच ती काटरान” एट्टेड।
20 आदूग एऊदीकूलीन सियानकूल,
“ई गुडीन काट्टू इरडू कोड़ चोय गोटा बेरेकूल लागोव नाव,
आरू ईन एटे ती इदीन मुचीच ती काटरान एनमोत आले?”
एट्टेर।
21 एरोड ओड एके तान्न चोलेन बीतेर ती गुडी एनी पोकरीड।
22 पिटतेल ओड चाय्यरान कान तीग जियोम पाडरानूग,
ओड पोकरानोन तान्न चेलालेर चुरता चाजेर आरू मापोरबून कागेतीन आरू ईसू पोकरान पोद्दीन बिसवात चाजेर।
23 ओड मापोरबू आड़ञूरान तियार वादेक एरूसेलेम गेड़े ती मेनेक,
कुबे लोग ओन पोरलेत काम तो चिनेलीन चूड़ी किली ओन पिदीर ती बिसवात चाजेर।
24 एरोड ईसू एके जाम्मा लोगीन बीतेर ती पुन्दान चेत्तूग आपलेनी ओरूग ओपीक चियेडा।
25 एड एरको ओनीन मांजेन बीतेर ती पोक्कू लागा मेन्डू।
एटे एनोड लोगीन मेन्न ती नातो मेन्डा आदीन ओड कुदे पुन्दीड।