एऊना 3

ईसू निकूदेमूसीन केडीकतानो

1 आना निकूदेमूस पिदीरतेड ओकूर आरू एऊदीकूलीन पान्न चेलाकतान पोँच तो सियान मेन्डीड। 2 ओड चित्ता ईसून लेग्गाट वेरी किली, “ए गुरू! ईन मापोरबून कान तीग वेर्रान गुरजी आय एनी आम पुट्टोम। एटे एनोड ईन चाजूमोत जे? ई पोरलेत काम तो चिनेलीन, मापोरबू ओन चेंगे मेनाकोड एडी चाजू ओड़ाड” एट्टेड। 3 आदूग ईसू ओनीन, “आन इनीन चेत्तेगी पोक्कूमेन, एड एरको मारी जेनमाकोड ओड मापोरबू आंगरूरानोन चूड़ू ओड़ाड” एनी जवाब चिञ्ञेड। 4 तेबे निकूदेमूस ओनीन, “मांजा मुत्ताक एरी किली मारी एटे जेनमू नाम्बीकताड? ओड तान्न ईय्येन पोट्टे ती मारी तान्नी किली जेनमू ओड़तेड आदूग?” एट्टेड। 5 आदूग ईसू ओनीन, “आन इनीन चेत्तेगी पोक्कूमेन एड एरको नीर आरू मापोरबून जियोम तीग मारी जेनमाकोड ओड मापोरबू आंगरूरानोन चूड़ू ओड़ाड। 6 एटे एनोड ईय्या बुवेन तीग जेनमूरानेर ओर चोलेनतेर आय, एरोड मापोरबून जियोम एके आम्म जियोमूग जियोम चियराड। 7 आन इमीन, ‘ईम मारी जेनमूरानो आय’ एन्डानूग काबा एर्रानो एरा। 8 वाल्ली आट चेनूंग बावोड आट चेन्डा। आरू ईन आदीन पोल्लेन वेनदात, एरोड आद आरे तीग वेरमो आरू आरेकेल चेनमो एनी पूनात। मापोरबून जियोम तीग जेनमूरानेड एड एरको आटनीतेड आय” एट्टेड।

9 आदूग निकूदेमूस, “आटे एटे तीग एरू एर्रा?” एट्टेड। 10 तेबे ईसू ओनीन, “ईन इसराएल लोगीन मेरचीकतानेड मेन्नी किली बेले, एटे ई पाटेलीन चोमजाता गो? 11 आम नातीन पुट्टोम नाम आदीनी पोकराम, आरू आम नातीन चूड़ोम नाम, आदीनी गोवाई पोकराम आरू ईम आम्म गोवाईन पातीयाकपारा एनी आन इनीन चेत्ते पोक्कूमेन। 12 आन इमीन ई मोंजीपूर तो पाटेलीन पोक चिञ्ञेन, आरू ईम एके बिसवात चाजोरा; मारी आन इमीन सरग तो पाटेलीन पोक चियोड एटे ती बिसवात चाजूरार गो? 13 आरू सरग तीग मोंजीपूर ती इड़ूरान चायी एडी सरग ती चोत्तेडा। आदूग ओडी सरग तो इसाबूलीन पुट्टेड। 14-15 तेबे एड एरको सरग तो मांजेन बिसवात चाजूरानेर जुग-जुग तो जियोम बेटेकेर एनी मूसाल मेनगा पीतेल तो बाम्बीन चिड़ा बाटतेल पोडी एतीकतान आकाट ओनीन बेले एतीक लागूरा।”

16 “एटे एनोड मापोरबू ई मोंजीपूर तो लोगीनोड निक्के चोग ती मेन्डानूग, ओड तान्न ओकूरी चिन्डीन चिञ्ञेड। तेबे एड एरको ओन कान बिसवात चाजूरानेर जाम्मा जुग जुगूग मुरजारा; एरोड ओर एके जुग-जुग तो जियोमीन बेटूरार। 17 मापोरबू तान्न चिन्डीन मोंजीपूर तो लोगीन चाय्यीकतान डेन्ड बेटूरान बातेरतेर आय एनी चिड़ाक चोटपेडा, एरोड मोंजीपूर तो लोग ओन तीग बाचेकेर एनी आय चोटतेड। 18 तान्न चिन्डीन एड बिसवात चाजूराड, मापोरबू ओनीन चाय्यीकतान डेन्ड बेटूरान बातेरतेड एनी चिड़ाकपाडा, एरोड एड बिसवात चाजाडा ओनीन एके, ओड मापोरबून ओकूरी चिन्डीन पिदीर ती बिसवात चाजा कान्डूग, मापोरबू मुन्नी की चाय्यीकतान डेन्ड बेटूरान बातेरतेड आय एनी चिड़ाकतेड नाड; 19 आरू नियाव चिड़ाकतान पाटेन इसाब इद आय: विलीजीन आकाटतेड ई मोंजीपूर ती वेञ्ञेड; एरोड लोग एके, ताम चाजूरान कामूल एड़जाचीली मेन्डानूग, मापोरबून कान तीग वेर्रान विलीज ती मेन्डान ले चीकोड ती मेनूंग मेन्न चाजेर। 20 एटे एनोड एड एरको एड़जाट कामूल चाजूरानेड विलीजीन आकाटतेडीन मेन्न चाजाडा, आरू ओनेल वेरारा। एटे एनोड ओड तान्न एड़जाट कामूलीन विलीज ती मापोरबू पारगाकतानोन मेन्न चाजाडा। 21 एरोड एड एरको चेत्त ती चेलानेर विलीजीन आकाटतेडीन लेग्गे वेर्रार, तेबे आटे एरोड, विलीज ती चाजूरानोन, मापोरबून मानूरानूग चाजूमेड एनी लोग चूड़रार।”

एऊना ईसून बीतेर ती पोकरानो

22 आनातले ईसू आरू ओन चेलालेर एऊदीया पेरगेन ती वेञ्ञेर। आरू आना ओड ओदो दिनेल आर्रे, चेलालेर चेंगे मेन्नी किली लोगूग बपतीसमा चिञ्ञेड। 23 आरू एऊना बेले सालेम पोलूब लेग्गे मेन्डान एनोन पोलूब ती बपतीसमा चियरीड। एटे एनोड आना निक्के नीर मेन्डू, आरू लोग आना वेरी किली बपतीसमा एतीर। 24 (एटे एनोड आतोड एऊनेन जेल ती केटपाका मेन्डीर।)

25 एपोर एऊनेन चेलालेर ओक एऊदी मांजेनोड ओगराक एर्रान इसाबूग पोका पोकी एञ्ञेर। 26 आदूग ओर एऊनेन लेग्गे चेनी किली “ए गुरू! एरदन पेरेड आकलाट इन चेंगे ओकूर मेन्डीड जे? आरू ईन ओन बीतेर ती गोवाई चिञ्ञोत जे? चूड़! ओड एबे बपतीसमा चियमेड आरू जाम्मा ओनेल चेनमेर” एट्टेर। 27 तेबे एऊना, “एरूग एरको सरग तीग मापोरबू ईटोवीन चियाकोड ओड नाती नी बेटाडा। 28 ‘आन एरा, एरोड ऊन ले मुन्नी चोटतेर्रानेन आय’ एन्डान आन्न पाटेग ईम गो कुदे गोवेतोर आय। 29 चालनीड, चुरचा ओलेक तो मुकीयाल आय। कोड़ोल ओनोत आय। एरोड पेर चेपाल ओन चेंगे निलची किली ओनोन वेनदाड आरू चालनीडीन पोल्लेन वेनेक, निक्के वेड़का एर्राड। आटनी आन ईसून चेंगा आय, आनूंग मेन्डान वेड़का ओन इसाब ती पूरा एञ्ञो। 30 आन इनमानतेन एर्रानो आय आरू ओड आन्न ले मुकीयाल एर्रानो ई आय।”

31 सरग तीग वेर्रानेड जाम्मेग ले मुकीयाल आय। मोंजीपूर तीग वेर्रानेड मोंजीपूरतेड आय आरू ओड मोंजीपूर तो इसाबूलीन ऊबूराड। सरग तीग वेर्रानेड एके जाम्मेग ले मुकीयाल आय। 32 ओड तान चूड़रान आरू वेनदान पाटेत गोवाई पोक्कूमेड, एरोड एडी ओन गोवाईन पात्तीयाकपारा। 33 ओन गोवाईन एड पातीयाकताड, ओड मापोरबू चेत्तेतेड आय एनी नीतीकमेड। 34 एटे एनोड एरीन मापोरबू चोटतेड नाड, ओड मापोरबून पोद्दूलीन पोकराड। एटे एनोड मापोरबू ओनूग तान्न जियोमीन चेड़ीगेन चियराड। 35 बुवा मापोरबू तान्न चिन्डीन चोग चाजूराड, आरू ओड जाम्मा बानीन ओन केय्य ती बेटाकतेड नाड। 36 चिन्डीन कान बिसवात चाजूरानेड एरूग एरको जुग-जुग तो जियोम मेन्डा। एरोड एड चिन्डीन मानाडा ओनूग जुग-जुग तो जियोम चिल्ला; एरोड मापोरबू डान्डूरानो ओन कान बान्नी मेन्डा।