एऊना 4

ईसू आरू सामरी देचेत आयाल

1 आनातले , ईसू एऊनेन ले आगेर लोगीन बिड़ाक किली बपतीसमा चियमेड एनी पाता बेटेर नार एनी ईसूग पुनूंग एञ्ञो। 2 (ईसू कुदे तान एरा, एरोड ईसून चेलालेर गो बपतीसमा चियरीर।) 3 पाता बेटूरानूग ईसू एऊदीया देचेन चायी किली मारी गलील देचे ती मेल्लेड। 4 आरू ओनूग सामरी देचा पावोड चेन्डानो मेट्टो। 5 आदूग ओड सामरी देचे ती, सूकार पिदीर तो गेड़े ती वेञ्ञेड। आद कुबे बेरेकूल मुन्नी एऊदीकूल पुरकेत याकूब मेनगा तान्न चिन्ड यूसूप मेनगेग चियी मेन्डान नेलीन लेग्गे मेन्डू। 6 आरू याकूबीन जुवा बेले आन्नी मेन्डू; आतोड ईसू पाव ताक ताकी निक्के पान्डी मेन्डीड; आदूग ओड जुवा लेग्गाट उन्ड काट्टेड। आतोड टिटे देलकूल आकाट एरी मेन्डू।

7 आतोड सामरीत ओक आयाल नीरूग वेञ्ञो। ईसू आदीन, “आनूंग, उनूंग नीर चिय” एट्टेड। 8 (एटे एनोड ओन चेलालेर गेड़े ती बातीया कान्डूक चेनी मेन्डीर।) 9 आ सामरीत आयाल ओनीन, “आन गो सामरी आयाल आय आरू ईन ओक एऊदी मेन्नी किली बेले आनीन एटे ती नीर उनतीक एनमोत?” एट्टो। (एटे एनोड एऊदीकूलूग सामरीकूल केय्य तो नाती चेला मेन्डू।) 10 तेबे ईसू आदीन, “ईन मापोरबू लोगूग नातो इनाम चियराड आरू इनीन नीर उनतीक एन्डानेड एड आय एनी चिताकपोड, ईन ओनीन, ‘आनीन नीर उनतीक’ एनी आडूरूतमीन, आरू ओड इनूंग जुग-जुग तो जियोम चियरान नीरीन चियरीडमीन” एनी जवाब चिञ्ञेड। 11 आदूग आयाल ओनीन, “ए सियान इन लेग्गे नीर टोन्डू नाती बेले चिल्ला आरू जुवा निक्के गिड़ीया मेन्डा, मारी जुग-जुग तो जियोम चियरान नीर इनूंग आरे तीग टोन्डूरा आदूग? 12 एटे ईन आम्म पुरकेत बुवा याकूबीन ले बेले बेड़तोत आय आदूग? ई जुवेन ओडी आमूंग कोट चिञ्ञेड आरू कुदे तानी आरू तान्न चिन्डूल आरू तान्न जियादूल नातेक आन्नीत नीरीन उन्डेर” एट्टो। 13 आदूग ईसू आदीन, “ई जुवेत नीर उन्डानेर एरूग एरको मारी नीरूग आन्डरा। 14 एरोड आन चियरान नीरीन एड उन्डाड ओनूग मारी एतोडी आन्डाया। आन चियरान नीर बीजेत नीरीन आकाट, ओन मेन्न ती एरी किली ओनूग जुग-जुग तो जियोम चियरा” एट्टेड। 15 तेबे आ आयाल ओनीन, “ए सियान आनीन आ नीरीन उनतीक, तेबे आनूंग एतोडी नीर आन्डा मेनको आरू आनूंग इना गेन-गेन नीरूग वेरू बेले लागा मेनको” एट्टो।

16 आदूग ईसू आदीन, “ईन चेन आरू इन माईडीन कूयी किली एन्देर” एट्टेड। 17 आदूग आयाल, “आनूंग माईड चिल्लाड” एट्टो। आदूग ईसू आदीन, “ईन, ‘आनूंग माईड चिल्लाड’ एनी पोकरानो चेत्ते आय। 18 एटे एनोड ईन चेन्डू गेरतील एरी मेन्डूत आरू एबे ईन मारी एरूग चेन्डोत नात, ओडी बेले इन माईड एराड; आदूग ईन पोकरानो चेत्ते आय” एट्टेड। 19 आदूग आ आयाल ओनीन, “ए सियान! आनूंग गो ईन मापोरबून कान तीग काबेर वेन्नी किली लोगीन पोक चियरान गुरू आय आकाट बावूमो। 20 आम्म पुरकेतेर मापोरबून, ई कोप्पे ती मोड़केर नार; एरोड ईम एऊदीकूल एके, एरूसेलेम ती नी मोड़कूरानो आय एनमोर” एट्टो। 21 आदूग ईसू आदीन, “ए मा! आन्न पाटेन पातीयाक। आटो बेरा वेरमो आतोड ले ईम ई कोप्पे ती चिलाड एरूसेलेम ती आरू आरे एरको बेले आम्म बुवा मापोरबून मोड़कोड बेले नाती परक चिला कियाल एर्रा। 22 ईम सामरी लोग एरीन मोड़कूमोर एनी पूनार। एरोड आम एऊदीकूल एके एरीन मोड़कूमोम एनी पुट्टोम। एटे एनोड लोगीन बाचाकतानेड एऊदीकूल टिटाक तीगी पेताड। 23 एरोड आ बेरा वेरमो आरू एबे इना एदोतो ना, आतोड बुवा मापोरबून मोड़कूरानेर, नाती केचूर चिला जियोमीन बेरकेच आरू चेत्त तीग मोड़कूरार। आरू बुवा मापोरबू आटनी मोड़कूरान लोगीन कानताड। 24 मापोरबू जियोम आय। आदूगी ओनीन मोड़कूरानेर बेले नाती केचूर चिला जियोम आरू चेत्त तीग ओनीन मोड़कूरानो आय” एट्टेड। 25 मारी आ आयाल ओनीन, “मापोरबू चोटतान (किरीसताल एन्डानेड) वेर्राड आरू आमीन जाम्मा बानीन पोक चियराड एनी आन पुट्टेन” एट्टो। 26 आदूग ईसू आदीन, “आन इन्नोड ऊबूमेन जे? आनी आय वेर्रानेड” एट्टेड।

ईसून चेलालेर गेड़े तीग मेल्लेर्रानो

27 आतीत ले ईसून चेलालेर गेड़े तीग मेल्लेरनेर आरू ओड ओक आयालीनोड ऊबरानोन चूड़ी काबा एञ्ञेर; एरोड बेले “ईन नातोन कान्डूकमोत?” चिलाड “आदीनोड नांग ऊबूमोत?” एनी एडी बेले ओनीन जाच आडेरा। 28 तेबे आ आयाल तान्न टान्डीन चायी किली गेड़ा बीतराम चेन्डो आरू लोगीन, 29 “वेरूर आरू ओकूर मांजेन चूड़ूर। ओड आन चाजूरान जाम्मेनी पोक चिञ्ञेड। ऊडी मसीयाल आय काय एटे?” एट्टो। 30 आदूगी ओर ताम्म गेड़े तीग पेची किली ईसूनेल वेञ्ञेर। 31 आतीत ले तान्न चेलालेर ईसून, “ए गुरू! तिन” एनी आलवाल चिञ्ञेर। 32 एरोड ओड एके ओरीन, “आन्न लेग्गाट ईम पूना इसाब तो बोजी मेन्डा” एट्टेड। 33 तेबे ओन चेलालेर ओकूर ओकूरीन, “एड बेले ओनूग बातीया एन्दरी चिञ्ञेड काय एटे?” एन्डीर। 34 ईसू ओरीन, “आनीन चोटतानेडीन उवाटीन चाजी किली ओन कामीन पूरा चाजूरानो ई, आन्न बातीया आय। 35 एटे ईम, ‘कोय्यू एबे नालू नेलींगूल मेन्डाव गाट’ एन्डार जे? चूड़ूर! आन इमीन पोक्कूमेन, आपला नेंजेर एतीक किली कामेय टिटाक नेंजराकपूर; कोयरान बातेर एञ्ञोव नाव। 36 कोयरानेड एड एरको आपला बूतीन बेटूराड आरू ओड कोय्यी किली आवीन रुन्डाकतान आकाट जुग-जुग तो जियोमीन बेटूरान लोगीन रुन्डाकमेड। आदूग वीतूरानेड आरू कोयरानेड इरूली चेंगे बिड़ी वेड़का एर्रार। 37 एटे एनोड इना, ‘ओकूर वीतूराड आरू मारी ओकूर कोयराड’ एन्डान ई पोकरान पाटा चेत्ते तो आय। 38 आन इमीन, ईम मोयमोत चाजा कामेयीन कोय्यू चोटतेन नान। आरो कामेय ती आवूर लोग मोसागेत चाजेर नार आदीन कामेयीन ईम बेटूरार” एट्टेड।

सामरीत कुबे लोग बिसवात चाजूरानो

39 आतोड आ गेड़ेत कुबे सामरी लोग, “ओड आन चाजूरान जाम्मेनी पोक चिञ्ञेड” एनी आ आयाल पोकरान गोवाईन मानी किली ईसून बिसवात चाजेर। 40 आनातले सामरी लोग ओन लेग्गाट वेरी किली ओनीन, “आम्म पोलूब ती तेब” एनी गुवारतेर। आदूग ओड इरने आना तेबेड। 41 आरू ओन पाटेन वेनी किली मारी बेले कुबे लोग ओनीन बिसवात चाजेर। 42 ओर आ आयालीन, “आम एपोर ईन पोकरानूगी बिसवात चाजामा; आम कुदे ओनोन वेट्टोम नाम। आरू ऊड चेत्तेगी मोंजीपूर तो लोगीन बाचाकतानेड आय एनी पुट्टोम” एट्टेर।

ईसू ओक मुकीयालीन चिन्डीन उजराकतानो

(मत्ती 8:5-13; लूका 7:1-10)

43 सामरी ती इरने तेबी किली ओड आना तीग गलील देचा टिटाक पेतेड। 44 (कुदे ईसू ई “आरो एरको, मापोरबून कान तीग काबेर वेन्नी किली लोगीन पोक चियरान गुरून आपला देचे ती गो इजीत चाजारा” एनी पोक्की मेन्डीड।) 45 आटनी ओड गलील देचे ती वेरेक, ओनीन मापोरबू आड़ञूरान तियार वादेक एरूसेलेम ती चाजी मेन्डान जाम्मा पोरलेत कामूलीन गलीलतेर चूड़ी मेन्डानूग, ओर ओनीन वेर एनी जुवारतेर। एटे एनोड ओर बेले आ तियार तिनूंग वेरी मेन्डीर।

46 तेबे ईसू मारी ओपोट गलील देचेत काना पोलूब ती चेन्डेड। आन्नी ओपोट ओड नीरीन आंगूर रेस एरीक मेन्डीड। एपोर एके कपरनाऊम गेड़े ती ओक मुकीयालीन चिन्ड बेमार पाड्डी मेन्डीड। 47 आ मुकीयाल, ईसू एऊदीया देचे तीग गलील देचे ती वेञ्ञेड नाड एनी वेन्नी किली ईसून लेग्गाट चेन्डेड। आरू तान्न चिन्ड चाय्यरान बातेर एरी मेन्डानूग ओड ईसून, “आम्मेल वेरी किली आन्न चिन्डीन उजराक चिय” एनी गुवारतेड। 48 ईसू ओनीन, “आन पोरलेत काम तो चिनेल आरू आचरूत एरीकतान कामूल चाजूरानोन चूड़ाका इम कान तीग आनीन एडी बिसवात चाजारा” एट्टेड। 49 आ मुकीयाल एके, “ए सियान! आन्न चिन्ड चाय्यरान ले मुन्नी ईन आन्न चेंगे चेनाम” एट्टेड। 50 आदूग ईसू ओनीन, “ईन चेन। इन चिन्ड उजरूराड” एट्टेड। तेबे ओड ईसू पोकरान पोद्दीन चेत्त पातीयाक किली पेतेड। 51 ओड पाव ती चेन चेनी मेनेक ओन कामीयालेर ओनोड बेट गाट एरी किली, “इन चिन्ड उजरेड” एनी काबेर पोक्केर। 52 आदूग ओड, “आन्न चिन्ड एञ्ञोत बेरा उजरू मुरीयाकतेड?” एनी ओरीन जाच आडेड। आदूग ओर, “ओरी टिटे देलकूल ती ओन नूम्बीर इड़ोतो” एनी पोक्केर। 53 तेबे आ चेपालीन बुवा, इद गो ईसू “इन चिन्ड उजरूराड” एनी पोक्केड आयची बेरा आय एनी चुरता चाजेड। आटनी एर्रानूग ओड तान्न ओलेक तो जाम्मा लोगीनोड ईसून बिसवात चाजेर। 54 ईसू एऊदीया देचे तीग गलील देचा वेर्रान पिटतेल पोरलेत काम तो चिनेल इदीनोड इरडूक एञ्ञोव।