एऊना 5

ईसू नोयरान लोगीन उजराकतानो

1 आनातले पिटतेल, ईसू एऊदीकूल देरोम तो ओक तियार तिनूंग एरूसेलेम ती चेन्डेड। 2 एरूसेलेम तो मेन्डा पिदीर तो वेल लेग्गे ओक मुन्डा मेन्डू। आदीन इबरानी पाटे ती बेतसदा एन्डार। आदीन कुडी चेन्डू चेलेल मेन्डूव। 3 आना कानालेर, कोड़ीयालेर, आरू लकवा बेमारूल तीग नोयरान निक्के जोप तो लोग माड्डी मेन्डीर। 4 (एटे एनोड आना नीतीकतान बेरे ती मापोरबून सरग दूत मुन्डे ती इड़ी किली नीरीन मेलकीकतीड। आरू नीर मेलूके, एड एरको पोईल इड़ोड ओड एट्टो एरको बेमार मेनोड बेले रेच्चा एर चेन्डीड।) 5 आना ओकूर कोड़ेक अटारा बेरेक ले बेमार पाड्डी मेन्डानेड मेन्डीड। 6 ईसू ओनीन आना माड्डी मेन्डानोन चूड़ी ई मांजा निक्के कोम्बेर ले नोयकूड ती मेन्डाड एनी ताड़ेड आरू ओनीन, “इनूंग उजरू बावूमो काय एटे?” एनी जाच आडेड। 7 आ नोयरान मांजा ओनीन, “ए सियान, नीरीन मेलकीकपेक आनीन मुन्डे ती इड़कीकतानेड एडी चिल्लाड; आरू आन एदू-एदू आवूरतेड आन्न ले मुन्नी इड़ूराड” एनी जवाब चिञ्ञेड। 8 आदूग ईसू ओनीन, “चुलूक, इन चाट्टेन पात्त आरू ताक” एनी तियारतेड। 9 आटनी पोक्कूके आ मांजा उजरी किली चाट्टेन चुनतीकतेड, आरू ताकू मुरीयाकतेड।

ओड उजरूरानो एऊदीकूल पाबूरान चिरीक आय। 10 आदूग एऊदीकूलीन सियानकूल आ उजरूरान मांजेन, “इने पाबूरान चिरीक आय आरू आम्म एऊदीकूल नीती ती ईन इने चाट्टेन पात्ती किली चेन्डानो बानाया” एनी पोक्कू मुरीयाकतेर। 11 आटनी पोकरानूग ओड ओरीन, “आनीन उजराकतान मांजा गो चाट्टेन पात्ती किली ताक एनी पोक्केड” एट्टेड। 12 ओर एके ओनीन, “इनीन एड आय चाट्टेन चुनतीक आरू ताक एट्टेड?” एनी जाच आडेर। 13 एरोड आ उजरूरान मांजा एके एड तानीन उजराकतेड ओनीन पूना मेन्डीड। एटे एनोड आ पाड ती निक्के जोप मेन्डू आरू ईसू कुचनाय आना तीग पेची चेनी मेन्डीड। 14 आदीन ले पिटतेल ईसू आ मांजेन गुडी ती चूड़ेड आरू ओनीन, “चूड़ ईन एपोर रेच्चा उजरोत नात, आदूगी पापदेरोम चाजूरानोन चाय काड। चिलाड नातो एरको आगेर तो गेरा इनूंग वेरू नाम्बीकता” एट्टेड। 15 आरू आ मांजा चेनी किली एऊदीकूल सियानकूलीन, “आनीन उजराकतानेड ईसू आय” एनी पोक्केड।

16 ईसू ओनीन पाबूरान चिरीक उजराक मेन्डीड, आदूग एऊदीकूलीन सियानकूल ईसून सताक मुरीयाकतेर। 17 ईसू ओरीन, “आम्म बुवा एबेतार्रे लोगूग रेच्चाट कामीन चाज चाजी मेनमेड आरू आन बेले एतोड नांग आटनी चाज चाजी मेन्डान” एट्टेड। 18 ईसू, आमान पाबूरान चिरीकीन माना कान्डूगी एरा, एरोड ओड मापोरबून ताम्म बुवा एनी किली आपलेन आपला ई, मापोरबून सामान एरीकतानूग एऊदीकूलीन सियानकूल ओनीन मुन्नीत ले आदीक चाय्यीक कानतीर।

मापोरबून चिन्डूग मेन्डान पान्न

19 आदूगी ईसू ओरीन, “आन इमीन चेत्ते पोक्कूमेन, चिन्ड, नाती नी तानी चाजू ओड़ाड। एरोड ताम्म बुवा चाजूरानोन चूड़ी किली आदीनी चाजूराड। एटे एनोड बुवा नातीन-नातीन चाजूराड आटनी चिन्ड बेले चाजूराड। 20 एटे एनोड बुवा तान्न चिन्डीनोड चोग चाजूराड, आरू ओड तान चाजूरान जाम्मा कामीन ओनीन टोटीकताड। आरू ओड ओनीन ईवीन ले बेले बेड़कूल कामूलीन टोटीकताड। ईम आवीन चूड़ी काबा एरकोर एनी आटनी चाजूराड। 21 एटे एनोड एटे बुवा चाय्यरान लोगीन जियोम पाटतीकताड आटनी चिन्ड बेले एरूग पोरचोड ओरूग जियोम चियराड। 22 आरू बुवा एरीनी बेले नियाव चाजाडा, एरोड ओड एके, तान चिन्डीन केय्य ती नियाव चिड़ाकतान जाम्मा पान्नीन चिञ्ञेड नाड। 23 जाम्मा लोग बुवेन एटे इजीत मानूरार, आटनी चिन्डीन बेले इजीत मानेकेर एनी आटनी चाजूराड। एड ओन चिन्डीन इजीत मानारा ओर चिन्डीन चोटतान बुवेन बेले इजीत मानारा। 24 एड एरको आन्न पाटेलीन वेन्नी किली आनीन चोटतानेडीन बिसवात चाजूरार, ओर जुग-जुग तो जियोमीन बेटेर नार। आरू ओर डेन्ड बेटारा, एरोड चायकूड तीग बाची किली जियोमीनेल चेन्डेर नार एनी आन इमीन चेत्ते पोक्कूमेन।

25 आटो बेरा वेरमो आरू आद एबे नी वेञ्ञो ना; आतोड चाञ्ञेर नार जे? ओर मापोरबून चिन्डीन पोल्लेन वेनदार आरू वेनदानेर एके पीयरार एनी, आन इमीन चेत्ते पोक्कूमेन। 26 एटे एनोड, एटे ती बुवा तान्न कान तानी जियोम तो मुर मेन्डाड, आटनी ओड तान्न चिन्डीन बेले जियोम तो मुर एरीकतेड नाड। 27 आरू ओड ओनूग, नियाव चिड़ाकतान पान्नीन बेले चिञ्ञेड नाड। एटे एनोड ओड आय। 28 आन पोकरानोन वेन्नी किली काबा एरमोर। आटो बेरा वेरमो; आतोड चाय्यी किली मोट ती मेन्डानेर जाम्मा ओन पाटेन वेनदार, 29 आरू मोट तीग पेत्तेर्रार। एड रेच्चाटीन चाजेर नार ओर जुग-जुग तो जियोमूग मारी जियोम पाडरार, आरू एड कियाल चाजेर नार, ओर एके, जुग-जुग तो डेन्डीन बेटू जियोम पाडरार।

30 आन, आन्न मेन्न तीग नाती चाजू ओड़ान। मापोरबू तियारतान आकाट आन लोगीन नियाव चिड़ाकतान, आरू आन लोगीन नियाव चिड़ाकतानो देरोम तो आय। एटे एनोड आन आन्न उवाट ती एरा, आनीन चोटतानेडीन उवाट ती नी आन लोगीन नियाव चिड़ाकतान।

ईसून इसाब ती गोवाई चियरानेर

31 एबे आन ओकूरी, आन्न इसाब ती गोवाई चियोड, आन्न गोवाई ती नाती चेत्त चिल्ला एन्डान आकाट एर्रा। 32 मारी ओकूर आन्न इसाब ती गोवाई चियराड। आरू आन्न इसाब ती ओड चियरान गोवाई चेत्ते तो आय एनी पुट्टेन। 33 ईम एऊनेन लेग्गे लोगीन चोटची जाच आडीकतोर, आरू ओड आन्न इसाब ती चेत्त गोवाई चिञ्ञेड। 34 आन मांजा चियरान गोवाईन मेन्न चाजूरानूग एरा, एरोड बेले ईम बाचोकोर एनी आय ई पाटेलीन पोक्कूमेन। 35 एऊना नीरूरान आरू मेडूरान दियेन आकाट विलीज चियरानेड मेन्डीड, आरू डेन्डीक तीग ईम ओन विलीजीन पातीयाक वेड़का एरी मेन्डूर। 36 एरोड आन कान मेन्डान गोवाई एऊना चियरान गोवाईन ले आगेर तो आय। एटे एनोड आन चाजूमेन जे? इयची कामूलीन आय बुवा मापोरबू आनीन पूरा चाजू ओपीकतेड नाड, आरू आनीन बुवा चोटतेड नाड एनी आयची कामूली गोवाई चियूमोव। 37 आनीन चोटतान बुवा बेले आन्न इसाब ती गोवाई चिञ्ञेड नाड। ईम ओन पोल्लेन एतोडी वेनारी, आरू ओनीन ईम एतोडी चूड़ारी बेले। 38 आरू ओन पोद्दीन ईम, इम गेरोब ती मेनूंग बेले इडारा। एटे एनोड ईम ओड चोटतानेडीन बिसवात चाजारी। 39 ईम मापोरबून कागेत तीग जुग-जुग तो जियोम टोन्डूरा एनी बिचार चाजूरानूग, आदीन दियान ती पोड़ूमोर; आद्दी आय आन्न इसाब ती गोवाई पोक्कूमो। 40 एरोड बेले ईम जुग-जुग तो जियोम बेटू, आन्न लेग्गे वेरामा एनमोर। 41 आन मांजा आनीन इजीत तो मान चियेकेर एनी मेन्न चाजाना। 42 एरोड इम मेन्न ती मापोरबूग चोग चिल्ला, एनी आन पुट्टेन। 43 आन आम्म बुवेन पिदीर ती वेञ्ञेन नान, एरोड बेले ईम एके आनीन पातीयाकपारा; एरोड एड बेले आवूरतेड कुदे तान्न पिदीर ती वेरोड, ईम ओनीन पातीयाकतार। 44 ईम, ओकूरी मापोरबू इमूंग चियरान इजीत तो मानीन कानपारा; ओकूर ओकूरीन तीग इजीत तो मान टोन्डोको एनी कान्डूकमोर। आटे चाजोड एटे ईम आनीन पातीयाक नाम्बीकतार? 45 आन इमीन आम्म बुवेन मुन्देल बोदी चियरान एनी ईम चुरता चाजूमोर। एरोड ईम आचा चाजोर नार जे? आयची मूसाल मेनगा इमीन बोदी चियराड। 46 एटे एनोड ईम मूसाल मेनगा लिकी चियरान नियोमूलीन बिसवात चाजोड, आनीन बेले बिसवात चाजूरूरमीन। एटे एनोड ओड आन्न इसाब ती नी गो लिकेड नाड। 47 एरोड ईम ओड लिकूरानोन बिसवात चाजारा गो? मारी एटे ती आन्न पोद्दूलीन बिसवात चाजूरार?” एट्टेड।