ईसू पाँच आजार आत्ती लोगीन तितीकतानो
6
1 इदीन ले पिटतेल ईसू मारी गलील सोमून्दीन ले आकलाट चेन्डेड।
आदीन तिबीरीयास सोमून्द एनी बेले पोकरार।
2 आरू ओड नोयकूड तो लोगीन उजराक किली पोरलेत काम तो चिना चाजूरानोन चूड़रान कुबे लोगीन जोप ओन पोटतेल चेन्डेर।
3 तेबे ईसू ओक कोप्पे ती चोक्की किली,
तान्न चेलालेर चेंगे आना उन्डेड।
4 आरू एऊदीकूल मानूरान मापोरबू आड़ञूरान तियार लेग्गे एदी मेन्डू।
5 तेबे ईसू,
बोँरेक नेंजराक किली बेड़तो जोप तो लोगीन,
तान्न टिटाक वेर्रानोन चूड़ेड।
आरू पिलीपूसीन,
“ई जाम्मा लोगूग बोजी आरे तीग पात्तू नाम्बीकताम?”
एट्टेड।
6 एरोड ओड इदीन,
पिलीपूसीन पोरकू आय आटे पोक्केड;
एटे एनोड ओड,
तान एटे चाजूरान एनी पुन्दीड।
7 पिलीपूस ओनीन,
“ई जाम्मा लोगूग गो देस कोड़ी दिनेल तो कूली पोयसेलोड रोटील पात्तोड बेले,
ऊरूग ओक-ओक गोन्दा बेले पूराया” एनी जवाब चिञ्ञेड।
8 मारी ओक आवूर चेलाल सिमोन पतरसीन तोल्लेड आन्दरीयास ईसून,
9 “इना ओक पिटीत चेपाल लेग्गे जोव पिसान तो चेन्डू रोटील,
आरू इरडू मीनूल मेन्डाव।
एरोड इंगोट लोगूग आवीन एटे पूराकताम?”
एट्टेड।
10 तेबे ईसू,
“लोगीन उन्डतीकपूर” एट्टेड।
आना निक्के दूप लाटेल मेन्डूव।
आदूग जाम्मा लोग आना उन्डेर।
आना पाँच आजार आत्ती माईंड चिन्ड मेन्डीर।
11 तेबे ईसू,
रोटीलीन पात्ती किली मापोरबून जुवारतेड आरू आवीन आना उन्डी मेन्डान लोग,
एंगोटेच आडेड आंगोटेच पायची चिञ्ञेड।
आटनी ओर एंगोट मीनूल आडेर आंगोटी मीनूलीन बेले ओरूग चियारे चेन्डेर।
12 ओर पोट्टा पाञारे तिन्दान पिटतेल,
ईसू तान्न चेलालेरीन,
“चेरूंगूरान गोन्देलीन पेटकूर।
किन्डीक बेले पोका चेना मेनको” एट्टेड।
13 आदूग ओर आवीन पेटकेर आरू लोग तिन्दान जोव पिसान तो चेन्डू रोटील तीग चेरूंगूरान गोन्देलीन बारा गोटा गाप्पेल ती कोप्पीकतेर।
14 तेबे ईसू चाजूरान ई पोरलेत काम तो चिनेन चूड़ी किली आनात लोग,
“ई मोंजीपूर ती वेर्रानेड मेट्टेड जे?
आ मापोरबून कान तीग काबेर वेन्नी किली लोगीन पोक चियरान गुरू चेत्ते ऊडी आय” एट्टेर।
15 ओर वेरी किली तानीन चुमरार आरू बेरपेला कोस एरीकतार एनी,
ईसू ताड़ी किली तान ओकूरी कोप्पेकेल कुचनाय मारी पेतेड।
ईसू नीर पोडी ताकूरानो
16 मारी आन्डूरान बातेर ती,
ईसून चेलालेर सोमून्द कुडी चेन्डेर।
17 आरू ओक ओडे ती चोत्ती किली सोमून्द आकलाट कपरनाऊम मेल्ली चेनूंग मुरीयाकतेर।
आतोड चीकोड एरी मेन्डू,
आरू ईसू एके एबलेतार्रे ओर लेग्गाट मेलेरपाका मेन्डीड।
18 आरू निक्के वाल्लीन चेत्तूग,
सोमून्द ती निक्के एलकेल आट्टू मुरीयाकतोव।
19 ओर गाट गाटी पाँच चिलाड चोय किलो मीटेरूल आकाट चेनी मेनेक,
ओर ईसून सोमून्द तो नीर पोडी ताक ताकी ओडा लेग्गाट वेर्रानोन चूड़ेर,
आरू निक्के नारचेर।
20 एरोड ओड एके ओरीन,
“आन आय,
नारचूमोर” एट्टेड।
21 आनातले ओर वेड़का एरी किली ओनीन ओडे ती चोक्कीकतेर आरू तुरते ओडा ओर चेन्डीर आ कुडी एदोतो।
लोग ईसून कानतानो
22 पिटतेल तो चिरीक सोमून्दीन आकलाट मेन्डान जोप तो लोगूग,
आना ओकती ओडेन चायी मारी आवूर ओडेल चिला मेन्डूव,
आरू ईसू तान्न चेलालेरोड आ ओडे ती चोत्ताडी,
एरोड आमान चेलालेर चेन्डीर एनी चोमजू एञ्ञो।
23 तिबीरीयास तीग आवूर तो ओडेल,
पोरबू जुवारतान पिटतेल ओर रोटील तिन्दीर जे?
आ पाड लेग्गाट वेरी किली तेबोव।
24 आना बेले ईसू चिल्लाड आरू ओन चेलालेर बेले चिल्लार एनी,
जोप तो लोग चूड़ेर आरू ओर तामी ओडेल ती चोत्ती किली ईसून कानची-कानची कपरनाऊम टिटाक एदेर।
ईसू आय जियोम चियरान रोटीन आकाटतेड
25 आरू लोग ईसून सोमून्द आकलाट बेटेर आरू ओर ओनीन,
“ए गुरू!
ईन इना एतोड वेञ्ञोत?”
एट्टेर।
26 आदूग ईसू ओरीन,
“आन इमीन चेत्ते पोक्कूमेन,
ईम आन चाजूरान पोरलेत काम तो चिनेलीन चूड़रानूग आनीन कानपारा,
एरोड रोटीलीन तिन्नी किली पोट्टा पाञीकतोर,
आदूग आय कान्डूकमोर।
27 आ चामरान बोजीग ईम मोयमोत चाजूरानो एरा,
एरोड एतोडी चाम्मा बोजीन आकाट तो,
जुग-जुग तो जियोमूग केच-केच एरूर।
आदीन सरग तो मांजा चियराड।
एटे एनोड आटनी चियरान पान्न ओनूग मेन्डा,
एनी आम्म बुवा मापोरबू मानेड नाड” एट्टेड।
28 आदूग लोग ओनीन,
“मापोरबू मेन्न चाजूरान कामूलीन चाजू,
आमूंग एटे चाजूरानो आय?”
एट्टेर।
29 आदूग ईसू ओरीन,
“मापोरबू एरीन चोटतेड नाड,
ओन कान बिसवात चाजूरानोन ओड मेन्न चाजूराड” एट्टेड।
30 आदूग ओर “आम चूड़ी किली इनीन बिसवात चाजूरान आकाट तो,
एटो पोरलेत काम तो चिनेन ईन आमीन टोटीकतात?
ईन नातो चाजूरात आले?
31 आम्म पुरकेतेर चिड़ा बाट ती मन्ना a एन्डानोन तिन्देर।
b मापोरबून कागेत ती लिका मेन्डान आकाट,
‘ओड,
ओरूग तिनूंग सरग तीग रोटील चिञ्ञेड’”c एट्टेर।
32 ईसू ओरीन,
“आन इमीन चेत्ते पोक्कूमेन मूसाल मेनगा इमूंग सरग तो रोटीन चियेडा।
एरोड चेत्त रोटीन सरग तीग चियरानेड आम्म बुवा आय।
33 एटे एनोड सरग तीग वेरी किली,
मोंजीपूर तो लोगूग चेत्त जियोम चियरानेडी गो,
मापोरबू चियरान रोटी आय” एट्टेड।
34 आदूग ओर ओनीन,
“ए सियान,
एपोर आमूंग आयची रोटीन रोजे चियारे मेन” एट्टेर।
35 तेबे ईसू ओरीन,
“आनी आय जुग-जुग तो जियोम चियरान रोटीन आकाटतेन;
एड एरको आन्न लेग्गे वेरोड,
ओड एतोडी मुरानी मेनाडा,
आरू एड एरको आनीन बिसवात चाजोड ओनूग एतोडी नीरूग आन्डाया।
36 एरोड,
ईम आनीन चूड़ोर नार;
एरोड बेले,
ईम आनीन बिसवात चाजारा,
एनी आन इमीन मुन्नी की पोक्केन नान।
37 बुवा आनूंग ओपीक चियरान जाम्मा लोग आन्न लेग्गे वेर्रार।
आरू एड-एड आन्न लेग्गे वेर्राड,
ओनीन आन एतोडी मेच मोडाना।
38 एटे एनोड आन सरग तीग आन्न उवाट तो काम चाजू वेरानी;
एरोड आनीन चोटतानेडीन उवाटीन पूरा चाजू आय वेञ्ञेन नान।
39 आरू आनूंग एरीन मापोरबू ओपीक चिञ्ञेड नाड,
ओर कान तीग एरीनी बेले जुकाकपा मेनकेन,
आरू चेरा चेरी वादेक ओरीन जियोम पाटतीकपेकेन एनी,
आनीन चोटतानेडीन उवाट मेन्डा।
40 एटे एनोड चिन्डीन नेंजराकतान आरू बिसवात चाजूरान जाम्मा ई लोग जुग-जुग तो जियोमीन बेटेकेर,
आरू चेरा चेरी वादेक आन ओरीन जियोम पाटतीकपेकेन एनी,
आम्म बुवेन उवाट मेन्डा” एट्टेड।
41 “सरग तीग इड़ूरान रोटी आन आय” एनी ओड पोकरानूग एऊदीकूल आदीन वेन्नी किली ओनोड गुर-मुरू मुरीयाकतेर।
42 आरू ओर,
“ई मांजा यूसूपीन चिन्ड ईसू गो आय?
आरू आम ओन बुवेन आरू ईय्येन पुट्टोम जे?
मारी ऊड एटे,
‘आन सरग तीग वेञ्ञेन’ एनी पोक्कू नाम्बीकताड?”
एट्टेर।
43 आदूग ईसू ओरीन,
“इमूंग ईमी गुर-मुरूरानोन चायूर।
44 आनीन चोटतान बुवा एरीनी एन्दराका ओड आन्न लेग्गे वेरू ओड़ाड,
आरू आन आन्न लेग्गे वेर्रानेडीन चेरा चेरी चिरीक मारी जियोम पाटतीकतान।
45 मापोरबून कान तीग काबेर वेन्नी किली लोगीन पोक चियरान गुरूकूल कागेत ती,
‘ओरीन जाम्मेनी मापोरबू मेरचीकताड’d एनी मेन्डा।
एड एरको बुवेन तीग वेट्टेर नार,
आरू मेरीयेर नार,
ओर आन्न लेग्गाट वेर्रार।
46 मापोरबून टिटाक ले वेर्रानेडीन चायी,
एडी बुवेन चुड़ाडी;
ओड ओकूरी,
बुवेन चूड़ेड नाड।
47 आन इमीन चेत्ते पोक्कूमेन,
एड एरको आनीन बिसवात चाजूरानेड जुग-जुग तो जियोमीन बेटूराड।
48 आनी आय जुग-जुग तो जियोम चियरान रोटीन आकाटतेन।
49 इम पुरकेत लोग चिड़ा बाट ती मन्ना एन्डान बोजीन तिन्देर;
एरोड बेले ओर चाञ्ञेर।
50 एरोड इद सरग तीग वेर्रान रोटी आय आरू आदीन तिन्दानेड चाय्याडा।
51 सरग तीग इड़ूरान जियोम चियरान रोटी आन आय।
एड एरको ई रोटीन तिनोड ओड जुग जुगूग जियोम मेन्डाड।
आरू आरो रोटीन आन मोंजीपूर तो लोगूग जुग जुगूग जियोम मेनूंग चियरान बे,
आद आन्न चेप्पूल आय” एट्टेड।
52 आदीन वेन्नी किली एऊदीकूल तामूंग तामी रिच एरी किली,
“ऊड तान्न चेप्पूलीन आमूंग एटे ती तिनूंग चियराड?”
एनी पोका पोकी एरू मुरीयाकतेर।
53 आदूग ईसू ओरीन,
“सरग तो मांजेन चेप्पूलीन तिनाका,
आरू ओन नेतीरीन उनाका,
ईम जुग-जुग तो जियोमीन बेटारा एनी,
आन इमीन चेत्ते पोक्कूमेन।
54 एड एरको आन्न चेप्पूलीन तिन्दार आरू नेतीरीन उन्डार,
जुग-जुग तो जियोम ओरोती आय;
आरू आन ओनीन चेरा चेरी चिरीक जियोम पाटतीकतान।
55 एटे एनोड आन्न चेप्पूल चेत्तेगी बोजी आरू आन्न नेतीर चेत्तेगी उन्डान बानी आय।
56 एड एरको आन्न चेप्पूलीन तिन्दार आरू नेतीरीन उन्डार,
ओर आन्न चेंगे बान्नी मेन्डार,
आरू आन ओन चेंगे बान्नी मेन्डान।
57 एटे जियोम मेन्डान बुवा आनीन चोटतेड नाड,
आरू आम्म बुवेन चेत्तूग आन पीयमेन,
आटनी आनीन तिन्दानेड एड एरको आन्न चेत्तूग पीयराड।
58 सरग तीग इड़ूरान रोटी इद्दी आय।
आरू आद इम पुरकेत लोग तिन्दान रोटीन आकाट तो एरा।
ओर तिन्देर आरू पिटतेल चाञ्ञेर।
ई रोटीन तिन्दानेड एके जुग जुगूग पीयराड” एट्टेड।
59 ईसू ई पाटेलीन कपरनाऊम ती एऊदीकूल बिन्ती जोड़रान ओलेक ती मेरचीक-मेरचीक पोक्केड।
कुबे चेलालेर ईसून चायूरानो
60 ईसून चेलालेरe कान तीग कुबे लोग इदीन वेन्नी किली “ई केडीकतान इसाबूल निक्के केट-केट तोव आय।
इदीन एड मानू नाम्बीकताड आले?”
एट्टेर।
61 ईसू तान्न चेलालेर तामूंग तामी,
ई पाटेग कुचूर पुचूर एरमेर एनी तान्न मेन्न ती ताड़ी किली,
ओरीन,
“इमूंग ई पाटे तीग टोकोरना एदूमो काय एटे?
62 आरू एबे ईम सरग तो मांजा,
पोईल आरे मेन्डीड,
आ पोडी चेन्डानोन चूड़ोड एटे एर्रा?
63 मापोरबून जियोमी गो,
लोगूग जुग-जुग तो जियोमीन चियराड।
मांजा चाजूरान काम तीग ओड आदीन बेटू ओड़ाड।
आन इमीन पोक्केन जे?
आ पोद्दूल मापोरबून जियोमीन कान तोव आय;
आरू आव्वी जियोम चियरानोव आय।
64 एरोड इम कान तीग ओदेर एके बिसवात चाजारा” एट्टेड।
(एटे एनोड ईसू गो पोईल वादेक ले ई तानीन एड बिसवात चाजारा आरू एड तानीन चुमीकताड ओरीन ताड़रीड।)
65 आरू ओड,
“आदूगी आय आन इमीन एरीन एरको,
आम्म बुवा आन्न लेग्गाट वेरू इडाकोड,
ओड आन्न लेग्गाट वेरू ओड़ाड एनी पोक्की मेन्डीन” एट्टेड।
66 आदीन पिटतेल ओन चेलालेर कान तीग एंगोटा लोग,
उलटा बादलेर आरू ओन पोटतेल चेनूंग चाय काट्टेर।
67 तेबे ईसू तान्न बारा जान चेलालेरीन,
“एटे इमूंग बेले आनीन चायू मेन्न बावूमो काय एटे?”
एट्टेड।
68 आदूग सिमोन पतरस ओनीन,
“ए पोरबू!
आम एर कान चेन्डाम गो?
जुग-जुग तो जियोम चियरान पोद्दूल इनकानी गो मेन्डाव।
69 आरू आम बिसवात चाजोम नाम,
आरू मापोरबून नाती केचूर चिलायोत ईनी आय एनी आमूंग पुनूंग एञ्ञो ना” एट्टेड।
70 आदूग ईसू ओरीन,
“एटे आन ईम बारा जानीन आचानी आदूग?
एरोड बेले इम कान तीग ओकूरीन चेयतान तान्न काबजे ती पाटतीकतो ना” एट्टेड।
71 ओड सिमोन इसकारीयोतीन चिन्ड एऊदेन इसाब ती आटे पोकरीड।
एटे एनोड एऊदा बारा जान चेलालेर कान तीग ओकूर मेन्डीड,
आरू ओड ईसून चुमीक चियरान उवाटतेड मेन्डीड।