नासरत गेड़े ती लोग ईसून मानेरा
6
1 ईसू तान्न चेलालेर चेंगे आना तीग पेची किली तान चान्दरान पोलूब ती वेञ्ञेड।
2 पाबूरान चिरीक एर्रानूग ओड एऊदीकूल बिन्ती जोड़रान ओलेक ती मेरचीक मुरीयाकतेड।
ओड मेरचीकतानोन वेनदानेर कुबे लोग काबा एञ्ञेर।
आरू ओर,
“ओनूग ईव आरे तीग टोन्डोव?
आरू एट्टो आकेलीन बेटेड रे?
आरू ओड चाजूरान पोरलेत कामूल एट्टोव आय की?”
एट्टेर।
3 ओर,
“एटे ऊड मारी बेड़ेय आय चिला?
ऊड मरीयमीन चिन्ड एरा आदूग।
याकूब,
यूसूप,
एऊदा आरू सिमोन ओन तोल्लेनकूल एरा आदूग?
ओन चालाचील बेले आम्म नाड़बूली गो मेन्डाव।
ओन पाटेन मारी नांग पातीयाकताम?”
एनी ओन पाटेन पातेरा।
4 आदूग ईसू ओरीन,
“मापोरबून कान तीग काबेर वेन्नी किली लोगीन पोक चियरान गुरूग आपला पोलूब,
आरू आपला लोग,
आरू आपला ओलेकीन चायी आरे एरको इजीत टोन्डूरा” एट्टेड।
5 आटनी एन्डानूग ओड आना इरूल मूवीरीन आकाट नोयरान लोगीन टोड्डी किली जेतनाकतेड आरू आवूर तो नाती पोरलेत कामूलीन चाजू ओड़ेड।
6 आ लोग बिसवात चाजायोन चूड़ी किली ओड काबा एञ्ञेड।
ईसू बारा जान चेलालेरीन चोटतेड
आनातले ईसू आना तीग पेची किली पोलबूल-पोलबूल चुल्ली किली मेरचीकतेड।
7 मारी ओड बारा जान चेलालेरीन तान्न लेग्गाट कूयी किली,
ओरूग बूत डुमेन वालीक पान्न चियी किली,
ओरीन इरूलेच इरूलेचीन पोलूबूल ती चेनूंग चोटतेड।
8 ओरीन चोटपेक ईसू ई तियारनी पाटेलीन पोक्केड:
“ईम पाव ताकू ओक बाड़येन चायी आवूर तोन नाती नी उयमोर।
बाता बेले उयमोर,
जोरेन बेले उयमोर आरू तेयली ती पोयसेल बेले उयमोर।
9 पानेयूलीन तुन्दी मेनूर,
आगेर पागेर गान्डेलीन उयमोर।
10 आरू आरो ओलेक ती चेनोड,
ईम आ पोलूब तीग चेन्नारे,
आयची ओलेक ती नी मेनूर।
11 आरू आरे एरको लोग इमूंग पाड चियाकोड चिलाड इमीन पातीयाकपाकोड,
आ पाड तीग पेपेक आपला केलूल तो गुन्डेन आन्नी टिटकी काडूर।
आद मापोरबू ओर तानीन पातीयाकपा कान्डूग ओरीन रिच एञ्ञेड एन्डान इसाब तो गोवाई एरको।”
12 आटनी एन्डानूग ओर आना तीग चेनी किली लोगीन,
“ईम मेन्नीन उजराकपूर” एनी मेरचीकतेर।
13 ओर कुबे बूत डुमेलीन वालीकतेर,
कुबे नोयरान लोगीन नेय मेरपीकतेर आरू ओर नोयकूडीन बेले चायपीकतेर।
बपतीसमा चियरान एऊनेन तेल्लीन चिटीकतानो
14 ईसू चाजूरानोन एरोदेसa कोसूग पुनूंग एञ्ञेड।
एटे एनोड ईसून पिदीर निक्के एञ्ञो।
ओदेर-ओदेर एके ईसून,
“बपतीसमा चियरान एऊना चाय्यरान कान तीग जियोम पाड्डी किली वेञ्ञेड नाड।
आदूगी पोरलेत कामूलीन चाजूरान ताकोत ओनूग मेन्डा” एट्टेर।
15 मारी ओदेर-ओदेर ईसून,
“ओड एलीयाb आय आकाट बावूमो” एट्टेर।
आवूरतेर मारी,
“मापोरबून कान तीग काबेर वेन्नी किली लोगीन पोक चियरान मुन्नीत गुरूकूल कान तीग एड आले ओकूर आय आकाट बावूमो” एट्टेर।
16 एरोदेस एके ईसून बीतेर ती वेन्नी किली,
ओनीन एऊना एनी उलटा चोमजेड।
आरू “आन चार्र कुड्डीकतान एऊना चाय्यी किली मारी जियोम पाड्डी वेञ्ञेड” एट्टेड।
17-20 एटे एनोड,
एरोदेस आपला तोल्लेड पिलीपूसीन आयाल एरोदीयासीन चेत्तूग,
एऊनेन चुम्मीक किली ओनीन जेल ओलेक ती केटपीक मेन्डीड।
नांग केटतेड एनोड,
एरोदेस एरोदीयासीन उबराक किली राकी मेन्डीड।
आदूग एऊना ओनीन,
“ईन आदीन तान्न माईड जियोम मेनेक राकू मापोरबून नीती ती बानाया” एनी पोक-पोक्की मेन्डीड।
आदूग एरोदेस ओनीन जेल ती केटतेड।
एरोड एरोदीयास एके एऊनेनोड टेक पात्ती किली ओनीन आनकीक उवाट चाजूरू।
एरोड ओनीन आनकीक ओड़ा मेन्डू।
नांग एनोड एरोदेस एऊनेग निक्के नारची किली ओनीन बाचाक मेन्डीड।
ओड एके एऊना देरमी मांजा आय आरू मापोरबू तानूंग एलगाक मेन्डानेड आय एनी पुन्दीड।
ओड एऊना केडीकतानोन एतोड नांग वेनेक बायबीताल एर्रीड।
एरोड ओड ओनोन मेन्न चाजी किली वेनदीड।
21 जाम्मेन ले पिटतेल एरोदीयासूग एऊनेन आनकीकतान बेरा टोन्डोतो।
एटे एनोड,
कोस तान जेनोम दिना मानूरान चिरीक चेरकार तो देचा चेलाकतान पोर्रालेरूग,
पालटेनकूलीन सियानकूलूग आरू गलील देचेत नातो-नातो सियानकूलूग मान दान चाजेड।
22 आ चिरीक एरोदीयासीन माल आना वेरी किली एन्दोतो।
आटनी एन्दी किली कोसीन आरू ओन चेगा लोगीन वेड़का एरीकतो।
आदूग कोस किरीया तिन्नी किली आ मालीन,
“नातो एरको इनूंग मेन्न ती वेर्रानोन आडू।
आन इनूंग चियरान” एट्टेड।
23 आरू,
“नातीन एरको आडोड आन चियरान,
बागेक देचेन चिय एनोड बेले चियरान” एनी पाटा चिञ्ञेड।
24 आनातले आ माल तान्न ईय्येन का चेनी,
“नातो आडूरान ईय्या?”
एट्टो।
आदूग ताम्म ईय्या एके,
“बपतीसमा चियरान एऊनेन तेल्लीन आडू” एट्टो।
25 आनातले आ माल तुरते नी कोसीन का तूलोतो आरू,
“आनूंग एबे नी बपतीसमा चियरान एऊनेन तेल्लीन ओक तारी ती चियू लागूरा” एट्टो।
26 आदीन वेन्नी किली कोस निक्के मुर-मुरा एञ्ञेड।
एरोड बेले चेगा लोगीन मुन्देल चियरान एनी किरीया तिन्नी पाटा चियी मेन्डानूग,
चियू ओड़ान एनी पोक्कू ओड़ेड।
27 आनातले ओड तुरते नी ओक पालटेनीन,
“एऊनेन तेल्लीन चिट्टी किली एन्देर” एनी चोटतानूग आ पालटेन जेल ती मेन्डान एऊनेन तेल्लीन चिट्टेड।
28 आरू आ तेल्लीन ओक तारी ती पात्ती किली एन्देरनेड आरू आ मालूग चिञ्ञेड।
आ माल एके आदीन ताम्म ईय्येग चिञ्ञो।
29 एऊनेन आनकीकतान काबेर एऊनेन चेलालेरूग पाता चेल्लानूग,
ओर आना वेरी किली ओन मोड़ीन उञ्ञेर आरू मोट ती इट्टेर।
ईसू पाँच आजार माईलीन तित्तीकतानो
30 पोरबू नीतीकतानेर पोलूबूल तीग मेल्ली किली ईसून का वेरी किली ताम ईटे-ईटे चाजोम आरू ईटे-ईटे पोक चिञ्ञोम एनी पोक्केर।
31 आना निक्के लोग वेरमेर आरू चेनमेर आरू ओर तिनूंग उनूंग बेले पाबू ओड़ा मेन्डीर।
आदूग ईसू ओरीन,
“आम्मोर पुटा चिड़ा बाट ती चेनार आरू डेन्डीक बिसाकपार गाट” एट्टेड।
32 आटनी एन्डानूग ओर ओडे ती चोक्की किली पुटा चिड़ा बाट तो कान बिसाक चेन्डेर।
33 एरोड कुबे लोग ओर चेन्डानोन चूड़ी किली,
ओर आरे चेनमेर एनी चोमजेर आरू जाम्मा गेड़ेल तीग पेतेर आरू सोमून्द कुडी-कुडी ताक-ताकी चेनी किली,
ओर एदाका मेनेक ताम मुन्नी एदेर।
34 ईसू ओडे तीग इड़ी किली बेड़तो जोप तो लोगीन चूड़ी किली जियोम नोयपीकतेड।
एटे एनोड ओर गाडीड चिल्ला मेन्डेल आकाट टोन्डेर।
आटनी एर्रानूग ओरीन कुबे पाटेल मेरचीक चिञ्ञेड।
35 कुबे कोम्बेर एर्रानूग ओन चेलालेर ओन लेग्गाट वेरी किली,
“इद गो चिड़ा बाट आय आरू आन्डू कान्डूकमो।
36 लोगूग पाव चियू।
चेन्डेर एरोड ओर लेग्गे मेन्डान पोलूबूल आरू राचेल ती चेनी किली नातीन एरको पात्ती तिनूंग नाम्बीकतार” एट्टेर।
37 एरोड ओड एके,
“ईमी ओरूग नातीन एरको तिनूंग चियूर” एनी चेलालेरीन पोक्केड।
आदूग ओर,
“आटेकोड आम चेनी किली देस कोड़ी दिनेल तो कूली पोयसेलोडc रोटील पात्ती एन्दरी किली ओरीन तित्तीकताम तेबे?”
एट्टेर।
38 आदूग ओड,
“इमूंग एंगोट रोटील मेन्डाव आले?
चेन चूड़ूर” एट्टेड।
ओर चेनी चूड़ी किली,
“चेन्डू रोटील आरू इरडू मीनूल मेन्डाव” एट्टेर।
39 आनातले ईसू,
“जाम्मा लोगीन गुबरेल-गुबरेल बाट तो पायगेय्याट दूप लाटेल ती उन्डतीकपूर” एनी तियारतेड।
40 आटनी एन्डानूग ओर पोचास-पोचास जानीन गुबरेल आरू चोव-चोव जानीन गुबरेल आकाट दाड़ील-दाड़ील उन्डतीकतेर।
41 आदूग ईसू चेन्डू रोटील आरू इरडू मीनूलीन पात्ती किली सरग टिटाक चूड़ी,
मापोरबून जुवार पोक्की किली आ रोटीलीन गोन्दाकतेड आरू चेलालेरूग चियी किली “ईवीन लोगूग पायची चियूर” एट्टेड।
मीनूलीन बेले आटनी गोन्दाक किली “पायची चियूर” एट्टेड।
42 जाम्मा लोग पोट्टा पाञारे तिन्देर।
43 आरू चेरूंगूरान रोटील आरू मीनूल तो गोन्देलीन चेलालेर बारा गोटा गाप्पेल ती कोप्पे इट्टेर।
44 आना तिन्दानेर तीग पाँच आजार माईंड चिन्ड मेन्डीर।
ईसू नीर पोडी ताकूरानो
45 आनातले ईसू लोगीन पाव चियेक,
आपला चेलालेरीन तुरते नी ओडे ती चोत्तीक किली,
“सोमून्दीन आड़ञी किली आन्न ले मुन्नी बेतसयदा पोलूब ती एदी मेनूर” एनी पोक्केड।
46 ओर चेन्डान पिटतेल ईसू कोप्पेकेल बिन्ती जोड़ू चेन्डेड।
47 आन्डेक ओडे ती चोकरान लोग सोमून्द नेनगा एदी मेन्डीर,
ईसू ओकूरी कुडी मेन्डीड।
48 ओडे ती चेनेक वाल्ली मुन्देल तीग आटरानूग,
ईसून चेलालेरूग एके ओडेन गाटू आबोड़ पाडरू।
ईसू आदीन चूड़ेड।
पोका पुल सुन्दरीग ईसू सोमून्द ती नीर पोडी ताक-ताकी चेलालेर लेग्गाट चेन्डेड आरू ओडेन जोंरीया एदेड।
49 नीर पोडी ताक ताकी वेर्रानोन ओडे ती मेन्डानेर चूड़ी किली डुमा नीर पोडी ताक ताकी वेरमो एनी कोलार एञ्ञेर।
50 ओनीन चूड़ी किली ओर तोडे बेले नारचेरा।
आटनी नारचूरानूग तुरते नी ईसू,
“डाडू चाजी मेनूर;
आन आय,
नारचूमोर” एट्टेड।
51 आनातले ओड ओडे ती चोत्तेड आरू वाल्ली मिड चेन्डो।
आदीन चूड़ी किली ईसून चेलालेर निक्के काबा एञ्ञेर।
52 ईसू दिंगोट रोटीलीन पोरले आंगोट लोगूग पोट्टा पाञारे चियरानोन चूड़ेर नार,
एरोड बेले ओन ताकोतीन चोमजेरा।
आरू ओर ऊबागेरी मेन्न तो लोग मेन्डीर।
ईसू गन्नेसरत गेड़ेत लोगीन उजराकतानो
53 ओर सोमून्द आकलाट आड़ञी किली गन्नेसरत गेड़े ती इड़ेर आरू कुच ती ओडेन काट काट्टेर।
54 ओर ओडे तीग इड़ूके,
आनात लोग ईसून चिताक किली,
55 आ लेग्गे लेग्गेत पोलूबूल ती तूल तूली चेनी किली,
कुबे नोयरान लोगीन डोला बाड़देल ती ओक तुडूंगा काट्टी,
काञी किली ईसू आरे मेन्डीड एनी वेनदीर आना एन्दरू मुरीयाकतेर।
56 आरू पोलूबूल ती,
गेड़ेल ती,
राचेल ती आरू आरे एरको चेनोड बेले नोयरान लोगीन ईसू उजराकपेकेड एनी आट पाचरा लेग्गे उन्डतीक मेन्डीर।
ओर एके “नोयरान लोगीन आपला गान्डा देड़ीन बेले टोड्डू इड” एनी गुवारतेर आरू आदीन टोडरान जाम्मा लोग उजरेर।