वित्तील वीतूरानेड
13
1 आनातले आयची चिरीक ईसू ओलेक तीग पेची किली सोमून्द कुडी चेनी लोगीन मेरचीक उन्डेड।
2 ओन लेग्गाट बेड़तो जोप रून्डरानूग,
ओड ओडे ती चोत्ती किली उन्डेड आरू जाम्मा जोप कुडी निलची मेन्डू।
3 ओड ओरूग कुबे इसाबूलीन चोमजाकतान डाग्गेलोड पोक्केड:
“वेनूर,
ओक वीतूरान मांजा वीतू पेतेड।
4 ओड वीतेक ओदो पिटकेल पाव कुडी उरकोव;
आवीन एके तीतेल वेरी किली तिन काट्टोव।
5 ओदोव निक्के तूक चिला चाटरेत नेन्दील ती उरकोव;
निक्के तूक टोन्डा कान्डूग आव जेटके पान्डोव।
6 एरोड पोकाल पेतानूग एके,
रेच्चा वार चेना कान्डूग आव केरी चेन्डोव आरू वेट चेन्डोव।
7 ओदो वित्तील एके चाकेल ती उरकोव आरू चाकेल चान्दी किली आवीन चेपाकतोव।
8 ओदोव रेच्चाट नेन्दील ती उरकी किली ईनू मुरीयाकतोव।
आरोत एके चोव गोटा,
आरोत एके साट गोटा आरू आरोत एके तीस गोटा पिटकेल काट्टोव।
9 इमूंग केकोचील मेन्डाव चिला?
तेबे ईम रेच्चा केकोचील ओनी वेनूर” एट्टेड।
ईसू नांग चोमजाकतान-डाग्गा पोकी चोमजाकतेड?
10 आदूग चेलालेर ओन लेग्गाट वेरी किली,
“ईन चोमजाकतान डाग्गेल पोक-पोक्की नांग ओरोड ऊबूमोत?”
एनी जाच आडेर।
11 आदूग ईसू,
इमूंग एरोड मापोरबू जाम्मेनी आंगरूरान इसाब तो पाकीक मेन्डान पाटेलीन पुनूंग गियान चियरानो मेन्डा;
ओरूग एके एरा।
12 एटे एनोड एर लेग्गाट मेन्डा,
ओनूग मारी मापोरबू चियराड आरू ओन लेग्गाट कुबे एर चेन्डाव।
एरोड एर लेग्गाट नाती चिल्ला,
ओन लेग्गाट मेन्डानोन बेले मापोरबू आयमूराड।a
13 आरू ओर चूड़-चूड़ी बेले चूड़ारा;
वेन वेनी बेले वेनारा आरू चोमजारा।
b
आदूगी ओरोड चोमजाकतान डाग्गेल पोक-पोक्की ऊबूमेन।
14 आरू मापोरबून कान तीग काबेर वेन्नी किली लोगीन पोक चियरान एसाया गुरू पोकरान मापोरबून पाटा ओरूग पूरा एरमो।
एटे एनोड:
“ईम केकोलूग वेन वेनी मेन्डार,
एरोड चोमजा कियालतोर मेन्डार।
आरू ईम बोम्मेग चूड़-चूड़ी मेन्डार एरोड चूड़ा कियालतोर मेन्डार।
15 एटे एनोड,
ई लोगीन मेन्न आगेरी एञ्ञो ना।
ओर केकोचीलोड वेनदानोन तुयतेर नार
आरू आपला बोम्मेलीन कान्नाम्बरेर नार।
चिलाड ओर बोम्मेग चूड़रीरमीन,
आरू केकोलूग वेनदीरमीन
आरू मेन्न ती चोमजी किली आन्नेल मेलेरेरमीन
आरू आन ओरीन उजराकतीनमीन।c”
16 एरोड इम बोम्मेल चूड़रानूग आरू इम केकोचील वेनदानूग इमूंग आसतीर टोन्डोको।
17 आन इमीन चेत्तेगी पोक्कूमेन,
“मापोरबून कान तीग काबेर वेन्नी किली लोगीन पोक चियरान कुबे गुरूकूल आरू देरमीकूल ईम चूड़रानोन चूड़ू,
ईम वेनदानोन वेनूंग मेन्न चाजूरीर।
एरोड बेले ओर चूड़ू ओड़ेर आरू वेनूंग ओड़ेर” एट्टेड।
वित्तील वीतूरानेडीन डाग्गेन चोमजाकतानो
18 “एपोर,
ईम वित्तील वीतूरानेडीन चोमजाकतान डाग्गेन इसाब नाताय एनी वेनूर।
19 एड एरको मापोरबू आंगरूरान इसाब तो पाटेलीन वेन्नी किली चोमजाडा,
ओडी आय आ पाव कुडी उरकी मेन्डान पिटकेन आकाटतेड।
एड़जाट चेयतान वेरी किली ओन मेन्न ती वीतूरानोन आयमी किली उयरा।
20 चाटरेत नेन्दील ती पाडरान वित्तील आकाट मेन्डानेड मापोरबून पाटेन वेन्नी किली वेड़के ती पातराड।
21 एरोड वारकूल किड़ी चेनूंग ओड़ा कान्डूग पान्डरानो डेन्डीक चाय्यरान आकाट,
मोंजीबूत बिसवात चिला कान्डूग मापोरबून पाटेन चेत्तूग ताकलीस चिलाड सताव एरोड आदीन बिसवात चाजूरानोन चाय काडराड।
22 चाकेल नाड़बूल उरकूरान पिटकेल आकाटतेड,
पाटेन वेन्नी किली मोंजीपूर तो बिचारूल आरू देनीन लालेचूल आ पाटेन चेपाकतानूग ओड बेले पालकूल आकाट तो मापोरबूग मेन्न ती वेर्रान कामूलीन चाजू ओड़ाड।
23 रेच्चाट नेन्दील ती उरकूरान पिटकेन आकाटतेड,
आ पिटकेल चोव गोटा चिलाड साट गोटा चिलाड तीस गोटा गुबोड़ूल पालकूल पातरान आकाट,
ओड मापोरबून पाटेन वेन्नी किली आदीन चोमजूराड आरू मापोरबूग मेन्न ती वेर्रान कामूलीन चाज चाजी मेन्डाड” एट्टेड।
लाटेल तो चोमजाकतान-डाग्गा
24 आनातले ईसू ओरीन मारी ओक चोमजाकतान डाग्गा पोक्केड:
मापोरबू जाम्मेनी आंगरूरानो आपला वायेल ती रेच्चाट वित्तीलीन वीतूरान मांजेन आकाट तो आय।
25 एरोड जाम्मा लोग तुञ्ञेक कुचरेय वेरी किली गोंगकूल नाड़बूल लाटेत पिटकेलीन वीती किली चेन काट्टेड।
26 गोंगकूल पान्डी किली ईनूरानूग लाटेल बेले पान्डू मुरीयाकतोव।
27 कामीयालेर वेरी किली सावकारीन,
“ए सावकार!
ईन आपला कामेय ती रेच्चाट वित्तीलीन वीतोत चिला?
मारी आना लाटेल आरे तीग एटे पान्डोव नाव?”
एट्टेर।
28 आदूग ओड,
“आरो कुचरेय आले ई कामीन चाजेड नाड” एट्टेड।
तेबे कामीयालेर,
“इनूंग मेन्न मेनोडेल आम आवीन पेड्डी किली तीनची काडराम” एनी पोक्केर।
29 आदूग ओड,
“एरा,
आटे चाजूमोर।
आटे चाजोड लाटेल चेंगे गोंग पोर्रेल बेले पेड्डी एर्राव।
कोयरानो एदारे इरडूकीनी चान्दू इडूर।
30 आरू कोयरान वादेक आन कोयरान लोगीन,
मुन्नी लाटेन कोय्यी किली किच पातीक बारेल काट्टूर आरू पिटतेल गोंगकूलीन आन्न गेदीये ती रुन्डाकपूर एनी पोकरान एट्टेड” एनी ईसू पोक्केड।
सेरसून पिटकेत चोमजाकतान-डाग्गा
31 आरू ईसू ओरीन मारी ओक चोमजाकतान डाग्गा पोक्केड:
“मापोरबू जाम्मेनी आंगरूरान इसाब सेरसून पिटकेन आकाट तो आय।
आदीन आरो मांजा आले पेड्डी किली आपला कामेय ती वीत काट्टेड।
32 आद जाम्मा बानील तो पिटकेल ले पिटीतो मेनोड बेले पान्डी किली चान्दोड वाड़ेत जाम्मा कुच्चा पोर्रेल ले बेड़तोत एर्रा;
आरू बेड़तो मेरी एर्रानूग बादोर ती वेल्लान तीतेल वेरी किली आदीन चेल्लेल ती गूड़ेल चाजूराव” एट्टेड।
पुलतान पोर्र तो चोमजाकतान-डाग्गा
33 आनातले ईसू मारी ओक चोमजाकतान डाग्गा पोक्केड:
मापोरबू जाम्मेनी आंगरूरानो पुलपीकतान पोर्रीन आकाट तो आय।
आदीन तीग आरो आयाल आले किन्डीक आकाट काल्ली किली मून्डू पोयलील तो पोर्र ती मिसाकतो।
आरू आटनी एर एरी,
आद्दी मारी जाम्मेनी पुलपीकतो।
चोमजाकतान-डाग्गेल
34 ई जाम्मा पाटेलीन ईसू चोमजाकतान डाग्गेलोड लोगीन पोकरीड;
आरू चोमजाकतान-डाग्गेल पोकाका ओड ओरीन नाती नी पोका मेन्डीड।
35 “आन चोमजाकतान डाग्गेल पोक्कू आपला चोन्ड चानतान;
मोंजीपूर उपजेक ले पाकीक मेन्डानोन पारगोड टोटीकतान”d
एनी मापोरबून कान तीग काबेर वेन्नी किली लोगीन पोक चियरान गुरू पोकी मेन्डानो पूरा एरू आटे एञ्ञो।
कामेय तो लाटेत डाग्गेन चोमजाकतानो
36 आनातले मारी ईसू जोपीन चायी किली ओलेक वेञ्ञेड।
ओन चेलालेर ईसून लेग्गाट वेरी किली,
“कामेय तो लाटेत चोमजाकतान डाग्गेन आमीन चोमजाक चिय” एट्टेर।
37 आदूग ओड,
रेच्चाट पिटकेलीन वीतूरानेड सरग तो मांजा आय।
38 कामेय मोंजीपूर आय।
रेच्चाट पिटकेल मापोरबू आंगरूरानोन पातीयाकतानेर आय।
आरू लाटेल एड़जाट चेयतानीन पातीयाकतानेर आय।
39 आवीन वीतूरानेड कुचरेय चेयतान आय।
कोयरान वादेक मोंजीपूर मुरजूरान वादेक आय।
कोयरानेर सरग दूतकूलe आय।
40 आदूगी एटे काड पेड्डी किली लाटेलीन किच पातीकतार आटनी मोंजीपूर मुरजूरान वादेक एर्रा।
41 सरग तो मांजा आपला सरग दूतकूलीन चोटताड;
ओर देचेत पापदेरोमूल आरू एड़जाट कामूल चाजपीकतानेरीन जाम्मेनी रुन्डाक किली,
42 ओरीन एतोडी चिटा गुड़ गुड़रान किच बाटी ती तीनतार।
आना आड़रानो आरू पेलकूल कोरकूरान आकाट ताकलीस टोन्डूरा।
43 आतोड देरमीकूल एके आपला सरग तो बुवा आंगरूरानेल पोकालीन आकाट मेडूरार।
f इमूंग केकोचील मेन्डाव चिला?
तेबे ईम रेच्चा केकोचील ओनी वेनूर।
कामेय ती पाकीक मेन्डान देन
44 मापोरबू जाम्मेनी आंगरूरानो कामेय ती पाकीक मेन्डान देनीन आकाट तो आय।
आदीन ओकूर मांजा बेटी किली पाकीक काट्टेड।
आरू वेड़केन चेत्तूग चेनी किली आपला जाम्मा बानीन वीड़ काड्डी किली आ कामेयीन पात्तेड।
रेच्चाट मोतीलीन कानतान बेबारी
45 मारी मापोरबू जाम्मेनी आंगरूरानो रेच्चाट मोतीलीन कानतान बेबारीन आकाट तो मेन्डा।
46 ओड ओक निक्के मोल्लेत मोतीन बेटूरानूग आपला ओलेक चेनी किली,
आपला जाम्मा जामूकूलीन वीड़ काट्टेड आरू आदीन पात्तेड।g
बेड़तो जालीन चोमजाकतान-डाग्गा
47 मारी मापोरबू जाम्मेनी आंगरूरानो सोमून्द ती तीनची किली बानीग-बानीग तो मीनूलीन टान्डरान बेड़तो जालीन आकाट तो मेन्डा।
48 आद कोपरान पिटतेल आदीन सोमून्द कुडी टान्ड टान्डी एन्देर्रार आरू उन्डी किली रेच्चाट रेच्चाचीलीन आची किली गाप्पेल ती इड काडरार आरू कियाल तोन तीनची काडरार।
49 मोंजीपूर मुरजूरान वादेक बेले आटनी एर्रा।
सरग दूतकूल वेरी किली देरमी लोगीन टिटाक तीग एड़जालेरीन एलगाकतार,
50 आरू ओरीन एतोडी चिटा गुड़ गुड़रान किच बाटी ती तीनची काडरार।
आना आड़रानो आरू पेलकूल कोरकूरान आकाट ताकलीस टोन्डूरा।
51 आनातले मारी ईसू चेलालेरीन,
“ई जाम्मा पाटेलीन चोमजोर काय एटे?”
एट्टेड।
आदूग ओर “ओ चोमजोम” एट्टेर।
52 आदूगी ओड ओरीन,
“मूसाल नीतीन मेरचीकतानेड एड एरको,
मापोरबू जाम्मेनी आंगरूरानोन पातीयाकतान चेलाल एरोड,
ओर तान्न गेदीये तीग पुन्न देन मालीन आरू आटा देन मालीन पुचरान ओलेक तो मुकीयालीन आकाट मेन्नी किली,
पुन्न नियोम आरू आटा नियोम तो इसाबूलीन बेले मेरचीक नाम्बीकतार” एट्टेड।
नासरत पोलूब ती ईसून इजीत चाजारा
53 आनातले ईसू ई चोमजाकतान डाग्गेलीन जाम्मेनी पोक्कू पोली किली,
आना तीग पेतेड।
54 आरू तान चान्दरान पोलूब ती वेरी किली एऊदीकूल बिन्ती जोड़रान ओलेक ती ओरीन मेरचीक मुरीयाकतेड।
ओर बाकवा एरी किली,
“ओनूग ईटो गियानूल आरू पोरलेत कामूल चाजूरान ताकोत आरे तीग टोन्डोव?
55 एटे ऊड बेड़ेयीन चिन्ड एरा आदूग?
आरू ओन ईय्या मरीयम एरा आदूग?
आरू याकूब,
यूसूप,
सिमोन आरू एऊदा ओन तोल्लेनकूल एरा आदूग?
56 ओन जाम्मा चालाचील आम्म नाड़बूली गो मेन्डाव।
मारी ओनूग ईव जाम्मा आरे तीग टोन्डोव?
एनी किली,
57 ओन पाटेन मारी नांग पातीयाकताम?”
एनी ओन पाटेन पातेरा।
आदूग ईसू ओरीन,
“मापोरबून कान तीग काबेर वेन्नी किली लोगीन पोक चियरान गुरूग आपला पोलूब आरू आपला ओलेकीन चायी आरे एरको इजीत टोन्डूरा” एट्टेड।
58 आरू ओर बिसवात चाजा कान्डूग ओड आना कुबे पोरलेत कामूल चाजेडा।