मरकू 4

वित्तील वीतूरानेडीन चोमजाकतान डाग्गा

(मत्ती 13:1-9; लूका 8:4-8)

1 मारी ईसू गलील सोमून्द लेग्गे मेरचीक मुरीयाकतेड। बेड़तो जोप ओन का वेर्रानूग ओड, सोमून्द ती मेन्डान ओक ओडे ती चोत्ती किली उन्डेड। जाम्मा लोग एके सोमून्द कुडी मेट्टेर। 2 आरू ओड एके ओरूग चोमजाकतान डाग्गेलोड कुबे इसाबूलीन मेरचीक चिञ्ञेड। 3 “वेनूर, ओक वीतूरान मांजा वीतू पेतेड। 4 ओड वीतेक ओदो पिटकेल पाव कुडी उरकोव। आवीन एके तीतेल वेरी किली तिन काट्टोव। 5 ओदोव निक्के तूक चिला चाटरे तो नेन्दील ती उरकोव; निक्के तूक टोन्डा कान्डूग आव जेटके पान्डोव। 6 एरोड पोकाल पेतानूग एके, रेच्चा वार चेना कान्डूग आव केरी चेन्डोव आरू वेट चेन्डोव। 7 ओदो वित्तील एके चाकेल ती उरकोव। चाकेल चान्दी किली आवीन चेपाकतानूग चेन्नूल पेपोवा। 8 ओदोव रेच्चाट नेन्दील ती पाडरानूग आव पान्डी किली चान्दोव आरू आरोव एके तीस गोटा, आरोव एके साट गोटा, आरोव एके चोव गोटा पिटकेल काट्टोव। 9 इमूंग केकोचील मेन्डाव चिला? तेबे ईम रेच्चा केकोचील ओनी वेनूर” एट्टेड।

ईसू नांग डाग्गेलोड चोमजाकतेड?

10 आटनी एन्डानूग, ईसू एलगा ओकूरी मेनेक, बारा जान चेलालेर आरू ओन चेंगे मेन्डान लोग, आ चोमजाकतान डाग्गेलीन इसाब ती ओनीन जाच आडूरीर। 11 आदूग ओड, “मापोरबू जाम्मेनी आंगरूरान इसाब तो चोमजू एरा इसाबूलीन आन ईम चोमजारे पोक चियमेन, आवूर लोग एके आवीन चोमजाकतान डाग्गेन आकाट वेनमेर। 12 नांग एनोड,

‘ओर आन चाजूरान कामूलीन चूड़-चूड़ी बेले,

आव नातोव आय एनी पूनार

आरू आन पोकरान पाटेन वेन-वेनी बेले,

आदीन चोमजारा।

ओर एके आ पाटेलीन पूनोड आरू चोमजोड,

ओर पापदेरोमीन चायी किली मेन्नीन उजराकतीरमीन

आरू ओर पापदेरोमूलूग मापी टोन्डरूमीन’” एट्टेड।

वित्तील वीतूरान डाग्गेन चोमजाकतानो

(मत्ती 13:18-23; लूका 8:11-15)

13 मारी ईसू ओरीन, “ई चोमजाकतान डाग्गेन ईम एटे चोमजू ओड़ोर? इदीन चोमजू ओड़ाकोड, आवूर डाग्गेलीन इमूंग एटे चोमजू एर्रा?” एनी किली आ डाग्गेत इसाबीन चोमजाकतेड। 14 “मापोरबून पाटेन पोक चियरानेड वीतूरान आकाटतेड आय। ओड मापोरबून पाटेन वित्तील आकाट वीतूराड। 15 ओदेर-ओदेर पाव ती पाडरान वित्तील आकाट आ पाटेन वेनदार। एरोड, वेनोड बेले तुरते नी चेयतान एन्डानो एके वेरी किली आदीन ओर मेन्न तीग उयरा। 16 आटनी चाटरेत नेन्दील ती पाडरान वित्तील आकाट मेन्डानेर मापोरबून पाटेन वेनूंगके वेड़के ती पातीयाकतार। 17 एरोड, वारकूल किड़ी चेनूंग ओड़ा कान्डूग पान्डरानोव डेन्डीक चाय्यरान आकाट, मोंजीबूत बिसवात चिला कान्डूग मापोरबून पाटेन चेत्तूग ताकलीस चिलाड सताव एरोड, आदीन बिसवात चाजूरानोन चाय काडरार। 18 चाकेल नाड़बूल उरकूरान पिटकेल आकाटतेर, मापोरबून पाटेन गो वेनदार। 19 एरोड, ई मोंजीपूर तो बिचारूल आरू देनीन लालेचूल आरू जिवड़ेय एर्रानो, ईव जाम्मा ओर मेन्न ती तान्नी किली मापोरबून पाटेन चेपाकतानूग, ओर पालकूल आकाट तो मापोरबूग मेन्न ती वेर्रान कामूलीन चाजू ओड़ार। 20 रेच्चाट नेन्दील ती पाडरान वित्तील आकाटतेर, मापोरबून पाटेन वेनदार आरू पातरार। आरू ओर आ पिटकेल तीस गोटा, चिलाड साट गोटा, चिलाड चोव गोटा गुबोडूल आकाट, मापोरबूग मेन्न लागूरान कामूलीन चाजूरार” एट्टेड।

कोलकी ती मान्डाकतान दिया

(लूका 8:16-18)

21 ईसू मारी ओरीन, “दियेन पातीक किली पोयली किड़ी चिलाड काटीया किड़ी आ दिया विलीजीन पाकीकपोड विलीज आटाया। एरोड आदीन एके कोलकी ती रेच्चा इड्डी मेनोड रेच्चा विलीज आटरा। 22 इदीन नांग पोक्कूमेन एनोड, पाकी मेन्डान पाटेलीन बेले पारगाकतानो आय आरू पाड़चे-पाड़चे मेन्डान पाटेलीन बेले पारगाक लागूरा। 23 इमूंग केकोचील मेन्डाव चिला? तेबे ईम रेच्चा केकोचील ओनी वेनूर” एट्टेड।

24 आनातले ईसू मारी ओरीन, “ईम वेनदानोन केकोल ओनी वेनूर। ईम एरूग एरको एट्टो पोयली ती ऊदीकतार आटनीत पोयली ती इमूंग बेले ऊदीक चियराड। किन्डीक आगेर बेले टोन्डूरा। 25 आटनी एड एरको मापोरबू चियरान पोद्दूलीन पात्ती मेनोड, ओनूग कुबे बुदी टोन्डूरा। आरू एड एरको मापोरबू चियरान पोद्दूलीन पाताकोड ओरूग मेन्डान बुदी बेले चायूरा” एट्टेड।

वित्तील पान्डरान इसाब तो चोमजाकतान डाग्गा

26 आनातले ईसू ओरीन, “मापोरबू जाम्मेनी आंगरूरान इसाब ईटे मेन्डा, एटे एनोड: ओक मांजा नेन्दील ती वीतूराड। 27 एंगोट पाकटेल आरू चित्तेल ओड तुञराड चिलाड चेता मेन्डाड। आतोड वीतूरानोव एके तामी पान्डराव। ओड एके, आव एटे वार चेन्डाव आरू गाजेल एरी पेताव एनी पूनाड। 28 आवीन एके नेन्दील तानी पान्डीकता। आव चान्दराव, चान्दी किली ईनूराव आरू ईनोड मारी पिटका काटराव आरू पाड़ञूराव। 29 पाड़ञी किली कोयरान बातेर एरोड मारी वीतूरानेड चेटालोड कोयराड” एट्टेड।

सेरसून पिटकेत चोमजाकतान डाग्गा

(मत्ती 13:31-32, 34-35; लूका 13:18-19)

30 मारी ईसू ओरीन, “मापोरबू जाम्मेनी आंगरूरान इसाबीन एटे पोकोड एर्रा आले? एट्टो चोमजाकतान डाग्गा पोक्की किली आदीन चोमजाकपोड एर्रा आले? 31 मापोरबू आंगरूरान इसाब नेन्दील ती वीतूरान जाम्मा बानील तो पिटकेल ले पिटीतो मेन्डान सेरसून पिटकेन आकाट तो आय। 32 आदीन पिटका एके चोपूर तो एरोड बेले, तापरान पिटतेल पान्डी किली चान्दोड वाड़ेत जाम्मा कुच्चा पोर्रेल ले बेड़तोत एर्रा; आरू निक्के चेल्लेल एर्रानूग बादोर ती वेल्लान तीतेल बेले आदीन नीड़े ती गूड़ा चाजूरान आत्ती एर्रा” एट्टेड।

33 ईसू, तान्न का उलजूरान लोगूग, ओर चोमजू नाम्बीकतान आंगोट, ईटो कुबे चोमजाकतान डाग्गेल पोक चिञ्ञेड। 34 जाम्मा पाटेलीन आटनी चोमजाकतान डाग्गेल पोकाका ओड ओरीन नाती नी पोका मेन्डीड। आरू लोग बागूरान पिटतेल एलगा मेनेक, ईसू एके तान्न चेलालेरूग जाम्मेनी रेच्चा चोमजाकतेड।

ईसू वाल्ल वाञीन आटकाकतेड

(मत्ती 8:23-27; लूका 8:22-25)

35 आ चिरीक आन्डेक, ईसू तान्न चेलालेरीन, “सोमून्दीन आड़ञी किली आकलाट चेनार” एनी पोक्केड। 36 आना मेन्डान जोप तो लोगीन चायी किली, ईसून चेलालेर ईसू तान एटे ओडे ती उन्डी मेन्डीड आटनी उञ्ञेर। आवूर ओडेल बेले आना मेन्डूव। 37 ओर ओडे ती आड़ञेक वाल्ली निक्के वेञ्ञो आरू ओडेन नीर एलका आट्टोतो। आरू ओडे ती एके नीर कोपरान आकाट एञ्ञो। 38 ईसू ओडे ती पोटतेल मेन्डीड। ओड पाकीलीन आकाट तो कान तेल्ल इड्डी किली माड्डी मेन्डीड। ईसून चेलालेर एके ईसून चुनतीक किली, “ए गुरू! चूड़-चूड़! ओड़ा आमीन जाम्मेनी बुड़ाकता बे। इनूंग बिचार चिल्ला आदूग?” एट्टेर। 39 आदूग ईसू चुलतेड आरू वाल्लीन, “आटकू रे वाल्लीने!” एट्टेड। आरू नीरीन एके, “तेब रे नीरीने!” एट्टेड। आदूग वाल्ली आरू नीर आटकी चेन्डोव। 40 ईसू एके तान्न चेलालेरीन, “ईम नांग आदरा नारचूमोर? एबले बेले आन बाचाकतान एनी इमूंग बिसवात चिल्ला काय एटे?” एट्टेड। 41 ईसून चेलालेर एके आदीन चूड़ी किली निक्के नारचेर आरू काबा एरी किली, “ऊड एट्टो मांजा आय रे, वाल्ली आरू सोमून्द बेले ऊन पाटेन पातूमोव” एनी तामूंग तामी ऊबूरीर।