कोड़ बेमार तो मांजेन उजराकतानो
8
1 आनातले ओड आ कोप्पे तीग इड़ूरानूग ओक बेड़तो जोप ओन पोटतेल-पोटतेल वेञ्ञो।
2 आरू चूड़!
आतोड ओक कोड़ बेमारतेडa लेग्गे वेरी किली ओनीन जुवारतेड,
आरू ओन केलूल पाड्डी किली,
“ए पोरबू इन मेन्न मेनोडेल आनीन चूत पाडरान तीग उजराक नाम्बीकतात” एनी पोक्केड।
3 आदूग ईसू आपला केय्यीन नीकीक किली ओनीन टोट्टेड आरू ओनीन,
“आनूंग मेन्न मेन्डा;
ईन ओगराक एर” एट्टेड।
आरू ओड तुरते नी कोड़ बेमार तीग उजरेड।b
4 ईसू ओनीन,
“वेन!
ईन आन रेच्चा उजरेन एनी एरीनी पोकूमेन।
एरोड ईन एके चेनी किली ईन उजरोत एन्डानोन पेलाचीन का टोटीक।
ओड इनीन चूड़ेकेड आरू ईन उजरूरानूग मूसाल मेनगा पोक्की मेन्डान बोदनेन चिय।
आटनी एरोड ईन उजरूरानूग ओगराक एञ्ञोत एनी लोगूग पुनूंग एर्रा” एट्टेड। c
पालटेनकूलीन सियानीन बिसवात
5 आनातले ईसू कपरनाऊम गेड़े ती वेर्रानूग सोव गोटा पालटेन मान्देन मुकीयाल ओकूर ईसून लेग्गे वेञ्ञेड आरू ओनीन गुवारची किली,
6 “ए सियान!
आन्न कामीयाल आन्न ओलेक ती लकवा आटरान बेमार तीग निक्के डेन्ड एरी माट्टेड नाड” एट्टेड।
7 तेबे ईसू ओनीन,
“आन वेरी किली ओनीन उजराकतान” एनी पोक्केड।
8 आदूग पालटेनकूलीन मुकीयाल,
“ए पोरबू,
ईन आन्न ओलेक वेर्रान बातेरतेन बेले आन एरान;
ईन सोजे ओक पोद्द पोकोड आन्न कामीयाल उजरूराड।
9 एटे एनोड आन बेले आवूर लोगीन काबजे ती मेन्डान;
आरू आन बेले आवूर पालटेनकूलीन तियारतान।
ओकूरीन चेन एनोड ओड चेन्डाड आरू आवूरतेडीन वेर एनोड ओड वेर्राड।
आरू आन्न कामीयालीन इदीन चाज एनोड ओड आदीन चाजूराड”d एट्टेड।
10 इदीन वेन्नी किली ईसू काबा एञ्ञेड,
आरू तान्न पोटतेल वेर्रान लोगीन,
“‘इसराएली लोगीन कान बेले ईटो बेड़तो बिसवातीन बेटेना’ एनी आन इमीन चेत्ते पोक्कूमेन” एट्टेड।
11 आरू आन इमीन पोकूमेन,
“एऊदीकूल चिला कुबे लोग बेले पोकाल पेतानेल आरू पोकाल पाडरानेल तीग वेरी किली मापोरबू आंगरूरान सरग ती आम्म बुवेर दादीलेर इबराईम,
इसाक आरू याकूबीन चेंगे बोजी ती बिड़रार।
12 एरोड मापोरबू आंगरूरानेल एके एऊदीकूल चेन्डानो मेट्टो।
एरोड ओर कान तीग कुबे लोगीन मापोरबू वाल चीकोड ती तीनची काडराड;
आना आड़रान आरू पेलकूल कोरकूरान आत्ती डेन्ड टोन्डूरा” एट्टेड।
13 आनातले ईसू आ पालटेनकूलीन सियानीन,
“ईन चेन;
इनूंग मेन्डान बिसवातीन आकाटी इनूंग एरको” एट्टेड।
आयची बेरा ओन कामीयाल रेच्चा उजरेड।
ईसू कुबे लोगीन उजराकतानो
14 आनातले ईसू,
पतरसीन ओलेक ती वेरी किली आना पतरसीन आञ्ञा नूम्बीरूग माड्डी मेन्डानोन चूड़ेड।
15 ओड आदीन केय्यीन टोडरानूग आदीन नूम्बीर चायोतो आरू आद चुलची किली ईसून मान दान चाजू मुरीयाकतो।
16 आरू आन्डेक ओन लेग्गाट बूत डुमेल चुम्मी मेन्डान कुबे लोगीन एन्देरनेर।
ओड आ बूत डुमेलीन आपला पोद्दीन तीग पुच्चेड आरू जाम्मा बेमार तो लोगीन उजराकतेड।
17 “ओड कुदे आम्म नोयकूडूलीन चान्डाकतेड आरू बेमारूलीन उजराकतेड” एनी मापोरबून कान तीग काबेर वेन्नी किली लोगीन पोक चियरान एसाया गुरू मेनगा पोकी मेन्डान पाटा पूरा एरूe ईटे एञ्ञो।
एटो लोग ईसून चेलालेर एरू एर्रा?
18 आनातले ईसू आपला बोँरेक जोप मेन्डानोन चूड़ी किली तान्न चेलालेरीन,
“आम्मोर सोमून्दीन आकलाट आड़ञार” एट्टेड।
19 आरू आतोड मूसाल नीतीन मेरचीकतानेड ओकूर वेरी किली,
“ए गुरू ईन आरे चेनोड बेले,
आन इन पोटतेल-पोटतेल वेर्रान” एट्टेड।
20 आदूग ईसू,
ओनीन “गोलीलूग बोत्तेल आरू तीतेलूग गूड़ेल मेन्डाव,
एरोड सरग तो मांजेगfg एके तेल्ल इड्डू बेले पाड चिल्ला” एट्टेड।
21 तेबे मारी ओन चेलालेर कान तीग ओकूरh ओनीन,
“ए पोरबू!
पोईल आन चेनी किली आन्न बुवेन माटी चियेकेन” एट्टेड।
22 आदूग ईसू,
“बिसवात चाजायेर चाय्यरानेर आकाट मेन्डार।
ओर आपला चाय्यरानेरीन माटी चियेकेर;
ईन आन्न पोटतेल वेर” एट्टेड।
ईसू वाल्ल वाञीन तेबाकतानो
23 आनातले ईसू ओडे ती चोत्तेड;
आदूग ओन चेलालेर ओन पोटतेल बिड़ेर।
24 आतोड उदापड़े सोमून्द ती बेड़तो वाल्ली चुलतो आरू ओडा एलकेलोड कुमी एरू मुरीयाकतो।
ओड एके तुञरीड।
25 तेबे चेलालेर ओन लेग्गे वेरी किली ओनीन चुनतीक किली,
“ए पोरबू!
आमीन बाचाक;
आम बूड़राम बे” एट्टेर।
26 आदूग ओड,
“ए कोमजोर बिसवात तो लोगीने!
नांग आदरा नारचूमोर?”
एनी किली चुलतेड आरू वाल्लीन आरू सोमून्दीन कावडेड।
आदूग आव तुरते नी जाम्मा किटूक पाट्टोव।
27 आदूग आ लोग काबा एर चेनी किली,
“ऊड एट्टो मांजा आय रे?
वाल्ली आरू सोमून्द बेले ऊन पाटेन पातूमोव” एट्टेर।
ईसू बूत डुमेल चुम्मी मेन्डानेरीन उजराकतानो
28 आनातले ओड आकलाट गदरेनीयोi देचे ती एदेड।
आतोड बूत डुमेल चुम्मी मेन्डान इरूल मांजाकूल माड़ाबाटे तीग पेची किली ईसून बेट गाट एञ्ञेर।
ओर नार्रूग एडी बेले आ पावोड चेनूंग ओड़ा मेन्डीर।
29 आरू चूड़!
ओर कोलार एरी किली,
“ए मापोरबून चिन्डीने!
आम्मोड इनूंग नातो काम मेन्डा?
आम्म बेरा एदाका मेनेक,
ईन आमीन सताव चियू इना एदेरनोत नात काय एटे?”
एट्टेर।
30 ओर ले किन्डीक कोमाड पेन्ड मान्दा चारा तिन्दूव।
31 तेबे आ बूत डुमेल,
“ईन आमीन इना तीग पुचरान एनमोत एरोड,
आमीन आ पेन्ड मान्दे ती चोडूक” एनी गुवारतोव।
32 आदूग ओड,
“चेनूर” एन्डानूग आव पेची किली पेन्ड मान्दे ती चेन्डोव।
आदूग जाम्मा मान्दा डिपके तीग जेटके-जेटके नीर ती तिरी किली बूड़ी चाय्य चेन्डोव।
33 आदूग आवीन कोतानेर तूलेर आरू गेड़े ती चेनी किली जाम्मा पाटेलीन आरू बूत डुमेल चुम्मी मेन्डान लोगूग एर्रानोन जाम्मेनी बेले पोक्केर।
34 आदूग चूड़!
जाम्मा गेड़ेत लोग ईसूनोड बेट गाट एरू पेची किली वेञ्ञेर,
आरू ईसून चूड़ी किली,
“आम्म राचे तीग पेची किली चेन” एनी गुवारतेर।