बूत डुमा चुम्मी मेन्डानेडीन ईसू उजराकतेड
5
1 आनातले ईसू आरू ओन चेलालेर गलील सोमून्द आड़ञी किली आकलाट मेन्डान गिरासेनीयोa पेरगेन एदेर।
2 ईसू ओडे तीग इड़ेक बूत डुमा चुम्मी मेन्डानेड ओकूर माड़ाबाटे तीग पेची किली ओनीन बेट गाट एरू वेञ्ञेड।
3 ओड एके माड़ाबाटे ती नी डेरा मेन्डीड।
एबे एड एरको ओनीन चिकरीलोड बेले काटकू ओड़ा मेन्डीर।
4 कुबे गुबोड़ूल केय्यूल केलूलीन चिकरीलोड काटकी मेन्डीर।
एरोड बेले आवीन ओड पुटतीड आरू आदीन गोन्देल-गोन्देल चाजेड।
ओनीन काटकूरान बातेर तो लाव तो मांजा एडी चिल्ला मेन्डीर।
5 चित्ता विलोमी पाकटा पोकाली ओड माड़ाबाटे ती नी चिलाड कोप्पेल ती डेरा मेन्नी किली निक्के कोलार एर्रीड आरू तान्न मेनीन तानी केलकूलोड कुटीक एर्रीड।
6 ओड ईसून कोमाड तीग चूड़ी किली ईसून कान तूलेरी किली ओन केलूल पाड्डी ओनीन मोड़केड।
7-8 आदूग ईसू ओनीन,
“ए बूत डुमा वेन्दीडीने,
ई मांजेन कान तीग पेक” एनी पोक्कू मुरीयाकतेड।
आदूग आ मांजा निक्के कोलार एरी किली,
“ए ईसू,
पोडीत बेड़तो मापोरबून चिन्डीने,
इनूंग आन्नोड नातो काम मेन्डा?
इनीन नोयपीकपाना एनी आनूंग मापोरबून पिदीर पात्ती किली पाटा चिय” एट्टेड।
9 मारी ईसू ओनीन,
“इन पिदीर नाताय?”
एनी जाच आडेड।
आदूग ओड,
“आन्न पिदीर पालटेनकूल मान्दाb आय।
एटे एनोड आम कुबे बूत डुमेल मेन्डाम” एट्टेड।
10 ओड एके ईसून मारी,
“आनीन ई देचे तीग आटी बेले चेन एनी वालीकमेन” एनी उमडी गुवारतीड।
11 आतोडी आ लेग्गेत कोप्पा पोडी कुबे पेन्ड मान्दा चारा तिन तिनी मेन्डूव।
12 बूत डुमेल एके,
“आमीन ई पेन्डकूलीन का चेनी किली आवीन चुम्मू इड” एनी ईसून गुवारतोव।
13 आरू ईसू पोकरानूग,
आ मांजेन कान मेन्डान बूत डुमेल ओन कान तीग पेची किली दुय आजार आत्ती मेन्डान पेन्डकूलीन चुम्मोव।
आटनी एर्रानूग आ पेन्डकूल जाम्मा एके आना तीग किड़ेड इड़ी किली सोमून्द ती बूड़ोव।
14 आरू आ पेन्डकूल कोतान गाडीकूल तूल तूली चेनी किली गेड़े ती आरू पोलूब ती पोक्केर।
आदूग आ लेग्गेत लोग बेले नातो एटे एञ्ञो एनी चूड़ू वेञ्ञेर।
15 आरू ओर ईसून लेग्गे एदेक,
बूत डुमेल चुम्मी मेन्डानेड ईसून लेग्गे उन्डी मेन्डीड।
ओड उजरी किली गान्डेल नूड़ी किली रेच्चा चुरते ती उन्डी मेन्डानोन चूड़ी किली नारचेर।
16 आरू ईसू चाजूरानोन चूड़रानेर,
ओड बूत डुमेल चुम्मी मेन्डान मांजेन उजराकतानोन आरू बूत डुमेल पेन्डकूलीन चुम्मी किली नीर बीतराम बुड़ाकतानोन,
वेर्रान लोगीन पोक्केर।
17 आनातले आर्र तो लोग एके ईसून,
“ए ईसू!
ईन आम्म राचे तीग पेची किली चेन” एनी गुवारतेर।
18 आनातले ईसू ओडे ती चोत्तेक,
बूत डुमेल चुमी मेन्डूव जे?
आ मांजा ओनीन,
“आनीन बेले इन चेंगे वेरू इड” एनी गुवारतेड।
19 आदूग ईसू ओनीन वेरू इडेडा;
एरोड ओनीन,
“ईन ओलेक चेन आरू पोरबू इनीन जियोम नोयपीक किली इनूंग एटो बेड़तो कामीन चाजेड एनी इन ओलेक तो लोगीन पोक चिय” एट्टेड।
20 आटनी एन्डानूग आ मांजा आना तीग पेची किली देस गेड़ेल (दिकपूलीस) एन्डान पेरगेन ती ईसू तानूंग एटो बेड़तो कामीन चाजेड एनी पोक चिञ्ञेड।
आरू आदीन वेनदान लोग काबा एञ्ञेर।
ओक आयाल उजरूरानो आरू चाय्यरान माल जियोम पाडरानो
21 ईसूलेर मारी ओडे ती चोक्की किली गलील सोमून्द आकलाट आड़ञेर।
ओड आड़ञी किली सोमून्द कुडी मेनेक बेड़तो जोप तो लोग ओन बोँरेक उलजेर।
22 आतोड एऊदीकूल बिन्ती जोड़रान ओलेक तो मुकीयाल कान तीग ओकूर,
याईर पिदीरतेड आना वेञ्ञेड।
ओड ईसून चूड़ी ओनीन केलूल पाट्टेड।
23 आरू ईसून,
“आन्न माल चाय्यरान बातेर एञ्ञो ना।
ईन वेरी किली आन्न मालीन टोड।
आरू ईन टोडोड आन्न माल उजरूरा आरू जियोम बाचूरा” एनी निक्के गुवारतेड।
24 आटनी एन्डानूग ईसू ओन चेंगे चेन्डेड।
आरू कुबे लोग बेले ओन पोटतेल टेका टेक चेन्डीर।
25 आरू आना मोरकोड बेमार मेन्डान आयाल ओकाल मेन्डू।
आरू आदीन नोयकूड बारा बेरेक आत्ती एञ्ञो बेले,
चायाका मेन्डू।
26 आरू आद एके गुनीयालेरीन पात पात्ती जाम्मा पोयसेल पोली पान्डोतो।
एरोड आ मोरकोड बेमार उलटा आदीक एञ्ञो बेले चाया मेन्डू।
27-28 ईसून बीतेर ती वेनदानूग आ आयाल ईसून गान्डेन टोडोड,
आन्न मोरकोड बेमार चायूरा एनी,
निक्के जोप एरी मेन्डानूग लोगीन गुचाक-गुचाक ईसून पोटतेल वेञ्ञो,
आरू ईसून गान्डेन टोट्टो।
29 आ आयाल ईसून गान्डेन टोडेक,
तुरते नी आदीन नेतीर पेतानो तेबोतो आरू तानूंग मेन्डान डेन्ड तीग तान बाचूरान आकाट आदूग बावोतो।
30 आटनी एर्रानूग तुरते नी ईसू तान्न मेन तीग नोयकूडीन उजराकतान ताकोत पेपेक तान जानेड।
आटनी जानूरानूग ईसू लोगीन उलटी चूड़ी,
“आन्न गान्डेन एड आय टोट्टेड?”
एनी जाच आडेड।
31 आदूग ईसून चेलालेर,
“इन पोटतेल कुबे लोग टेका टेक वेरमेर।
एरोड बेले ईन,
‘आनीन एड आय टोट्टेड’ एनी नांग जाच आडूमोत?”
एट्टेर।
32 ईसू एके,
एड आय आटनी चाजेड एनी पोटतेल उलटी किली उमडी चूड़ चूड़ी मेन्डीड।
33 आनातले आ आयाल तान उजरूरानोन पुन्नी किली,
ईसून मुन्देल वेञ्ञो आरू ओन केलूल पाड्डी किली,
तान उजरूरान इसाबीन नार्रोड-नार्रोड पोकोतो।
34 आदूग ईसू आ आयालीन,
“नोनी!
इन बिसवात इनीन उजराकतो।
एपोट ईन डेन्ड तीग बाची किली चुकनाय चेन” एट्टेड।
35 ईसू ऊब ऊबी मेनेक एऊदीकूल बिन्ती जोड़रान ओलेक तो मुकीयाल याईरीन कानतेर ओदेर आना वेञ्ञेर।
ओर,
“इन माल चाञ्ञो ना,
गुरून मारी नांग ओरबोर चियमोत?”
एट्टेर।
36 ओर पोकेक-पोकेक ओर पाटेन पाताका ईसू याईरीन,
“ईन नारचूमेन,
आमान बिसवात चाजी मेन” एट्टेड।
37 आरू ईसू याईरीनोड चेनेक पतरस याकूब आरू याकूबीन तोल्लेड एऊनेन चायी ओन चेंगे एरीनी उयेडा।
38 ओर याईरीन ओलेक एदेक जाम्मा लोग किसीग आड़ आड़ी निक्के कोलार एरी मेन्डीर।
39 ओड बीतराम तान्नी किली ओरीन,
“नांग किसीयाकमोर?
नांग कोलार एर्रान आकाट एरमोर?
ई माल चाय्यायी।
इद तुञ्ञूमो” एनी पोक्केड।
40 ओर एके ओन पाटेन वेन्नी किली ओन पोडे नाव्वू मुरीयाकतेर।
ईसू जाम्मा लोगीन,
ओलेक तीग वाल पेक इड्डी किली,
आ मालीन ईय्या बुवेन आरू तान्न चेंगे मेन्डान चेलालेरोड आ माल मेन्डान बाकरे ती चेन्डेड।
41 ईसू आ मालीन केय्यीन पात्ती किली,
“तलीता कूमी” एट्टेड।
तलीता कूमी एनोड “नोनी आन इनीन पोक्कूमेन,
चुलूक” एन्डानो आय।
42 आ टान्डील-टान्डील नीर एन्देर्रान बातेर तो माल एके,
तुरते चुलची किली ताकू मुरीयाकतो।
आरू आनातेर जाम्मा निक्के काबा एञ्ञेर।
43 ईसू एके,
“ई इसाबीन एरीनी मुरले पोकूमोर” एनी पोक्केड आरू “आ मालीन नातीन बेले तितीकपूर” एट्टेड।